ភ្ជាប់​ទៅ​គេហទំព័រ​ទាក់ទង

ជន​ភៀស​ខ្លួន​​៤​នាក់​ពី​កោះ​ណូរូ​នឹង​មក​ដល់​ទី​ក្រុង​ភ្នំពេញ​នៅ​ថ្ងៃ​ព្រហស្បតិ៍​នេះ


ជន​ភៀសខ្លួន​​​ដែល​ស្វះស្វែង​រក​សិទ្ធិ​ជ្រក​កោណ​កំពុង​ត្រូវ​គេ​នាំ​​ពី​យន្តហោះ​ទៅ​កាន់​​រថយន្ត​ក្រុង​នៅ​ក្រោយ​ពួក​គេ​ទើប​មក​ដល់​កោះ​ណូរូ​កាល​ពី​ថ្ងៃ​ទី​១៤ ខែ​កញ្ញា ឆ្នាំ​២០១២។ (រុបថត៖ REUTERS/Rod Henshaw)

អាជ្ញាធរ​កម្ពុជា​ថ្លែង​ថា ​ជន​ភៀស​ខ្លួន៤​រូប​ពី​កោះ​ណូរូ​នឹង​មក​ដល់​ទី​ក្រុង​ភ្នំពេញ​នៅ​ថ្ងៃ​ព្រហស្បតិ៍​នេះ។​ ជន​ភៀស​ខ្លួន​ដែល​ស្ម័គ្រ​ចិត្ត​មក​រស់​នៅ​អចិន្ត្រៃយ៍​លើ​ទឹក​ដី​កម្ពុជា​ទាំង​នោះ​នឹង​ស្នាក់​នៅ​រាជធានី​ភ្នំពេញ​ជា​បណ្តោះ​អាសន្ន​ មុន​នឹង​ធ្វើ​សមាហរណកម្ម​ចូល​ក្នុង​សហគមន៍​ខ្មែរ។​

មន្ត្រី​ជាន់​ខ្ពស់​រដ្ឋាភិបាល​កម្ពុជា​បាន​ប្រាប់​ឲ្យ​ដឹង​នៅថ្ងៃពុធ​នេះ​ថា ​ជនភៀស​ខ្លួន​បួន​រូប​ដំបូង​គេ​បង្អស់​ពី​កោះ​ណូរូ​នឹងមក​ដល់​កម្ពុជា​នៅថ្ងៃ​ព្រហស្បតិ៍​ស្អែក​ ក្នុង​ដំណើរ​តាំង​ទីលំ​នៅ​អចិន្ត្រៃយ៍​នៅ​ប្រទេស​ដ៏​ក្រីក្រ​នេះ។​

លោក​នាយ​ឧត្តម​សេនីយ៍​ ខៀវ សុភ័គ ​អ្នក​នាំ​ពាក្យ​ក្រសួង​មហាផ្ទៃ​ បាន​ប្រាប់​វីអូអេ​ខេមរ​ភាសាថា​ ជន​ភៀស​ខ្លួន​៤រូប​ដំបូង​គេ​បង្អស់ ​ដែល​បញ្ជូន​មក​ក្រោម​កិច្ច​ព្រម​ព្រៀង​ជាមួយ​នឹង​ប្រទេស​អូស្ត្រាលី​នោះ​ មាន​ជនជាតិ​ភាគតិច​រ៉ូហ៊ីងយ៉ា​ ​(Rohingya)​ មួយ​រូប​ ដែល​ភៀស​ខ្លួន​ចេញ​ពី​ការ​ធ្វើ​ទុក្ខ​បុកម្នេញ​របស់​អាជ្ញាធរ​ភូមា​ និង​៣​រូប​ទៀត​មក​ពី​ប្រទេស​អ៊ឺរ៉ង់។​

«បាទ ​តាម​ដែល​ខ្ញុំ​ដឹង​គឺ​ថ្ងៃ​ស្អែក​ព្រឹក​បាន​មក​ដល់​ តាម​ជើង​យន្តហោះ​ MH​ របស់​ប្រទេស​ម៉ាឡេស៊ី»។​

លោក ​ខៀវ សុភ័គ​ ក៏​បាន​បន្ថែម​ថា៖​ «មាន​តែ​៤នាក់​ទេ​ ដូច​បាន​ជំរាប​ជូន​កន្លង​មក​នេះ​ ម្នាក់​ជា​ជន​ជាតិរ៉ូហ៊ីងយ៉ា​ (Rohingya​) ​មក​ពី​ភូមា​ បី​នាក់​មក​ពី​ប្រទេស​អ៊ឺរ៉ង់​ ក្នុង​នោះ​ពីរ​នាក់​ជា​ប្តី​ប្រពន្ធ​ និង​ម្នាក់​ទៀត​ប្រុស»។​

កាល​ពី​ឆ្នាំ​២០១៤​ កម្ពុជា​បាន​ចុះ​ហត្ថលេខា​ជា​មួយ​ប្រទេស​អូស្ត្រាលី​ ដើម្បី​ទទួល​យក​ជនភៀស​ខ្លួន​ជាង​១​ពាន់​នាក់​ ដែល​សុំ​សិទ្ធិ​ជ្រក​កោន​នៅ​ក្នុងប្រទេស​អូស្ត្រាលី​ ប៉ុន្តែ​ត្រូវ​បាន​បដិសេធ ហើយអាជ្ញាធរ​ប្រទេស​នេះដាក់​ឲ្យ​រស់​នៅ​ក្នុង​ជំរំ​នៅ​លើ​ប្រទេស​ដែន​កោះ​ដាច់​ស្រយ៉ាលគឺ​« Nauru » ​ដែល​ស្ថិត​នៅ​ក្នុង​មហាសមុទ្រ​ប៉ាស៊ីហ្វិក។​ កិច្ច​ព្រមព្រៀង​នេះ​គឺ​ជា​ថ្នូរនឹង​អ្វី​ ដែល​គេ​ពណ៌នា​ថា​ ជា​កម្មវិធី​ជំនួយ​ដែល​មាន​ទឹក​ប្រាក់​ជាង​៣០​លាន​ដុល្លារ​ពី​ប្រទេស​អូស្រ្តាលី​វិញ។​

កាល​ពី​សប្តាហ៍​មុន​ ប្រទេស​អូស្ត្រាលី​បាន​បន្ថែម​ទឹកប្រាក់​ជំនួយ​ជាង​១២​លាន​ដុល្លារ​សហរដ្ឋអាមេរិក​ថែម​ទៀត​ដល់​ប្រទេស​កម្ពុជា​ សម្រាប់​ជា​ការ​តាំងទី​លំ​នៅថ្មី​របស់​ជនភៀស​ខ្លួន​ទាំង​នោះ។

លោក​នាយ​ឧត្តម​សេនីយ៍​ ខៀវ សុភ័គ​ បាន​ថ្លែង​ថា ​ជន​ភៀស​ខ្លួន​ទាំង​នោះ​នឹង​ស្នាក់​នៅ​ក្នុង​ខណ្ឌ​ច្បារ​អំពៅ​ជា​បណ្តោះ​អាសន្ន​ក្រោម​ការ​ចាត់​ចែង​របស់​មន្ត្រី​អូស្ត្រាលី។​ តាម​កិច្ច​ព្រមព្រៀង​នោះ​ ជន​ភៀស​ខ្លួន​ទាំង​នេះ​នឹង​ត្រូវ​ស្នាក់​នៅ​ទី​ក្រុង​ភ្នំពេញ​រយៈ​ពេល​យ៉ាង​ហោច​ណាស់​៦​ខែ​ ដើម្បី​សិក្សា​អំពី​ប្រទេស​កម្ពុជា​មុន​នឹង​ធ្វើ​សមាហរណ​កម្ម​ទៅ​ក្នុង​សង្គម។​

«នៅ​ក្នុង​នោះ​អាច​រៀនសូត្រភាសា​ខ្មែរ​ និង​អ្វីតាម​ហ្នឹង។​ ជា​ដំបូង​ ធម្មតា ​នៅ​ស្រុកគេ​គឺ​ត្រូវ​រៀន​ភាសា​ខ្មែរ​ និង​វប្បធម៌​អី​ ជា​ដើម​ជាមុខ​សិន ​មុន​នឹង​ទៅ​រក​កន្លែង​នៅ​ផ្សេង»។​

វីអូអេ​ខេមរ​ភាសា​មិន​អាច​សុំ​ការ​អត្ថាធិប្បាយ​ពី​មន្ត្រី​ស្ថានទូត​អូស្ត្រាលី​ប្រចាំ​កម្ពុជា​បាន​ទេ​ ដោយ​សារ​អេឡិចត្រូនិច​ ឬemail​ ផ្ញើរ​ទៅ​កាន់​មន្ត្រី​ជំនាញ​នៅ​ស្ថានទូត​នោះ​មិន​មាន​កា​រឆ្លើយ​តប។​

កិច្ច​ព្រម​ព្រៀង​ទទួល​ និង​បញ្ជូន​ជនភៀស​ខ្លួន​ពី​កោះ​ណូរូ​នោះ​ទទួល​រង​ការ​រិះគន់​យ៉ាង​ខ្លាំង​ពី​អង្គការ​សិទ្ធិ​មនុស្ស​ជាតិ​ និង​អន្តរជាតិ។ ការ​រិះគន់​នោះ​អះអាង​ថា​ កិច្ច​ព្រម​ព្រៀង​នេះ​បាន​រំលោភ​អនុសញ្ញា​ជន​ភៀស​ខ្លួន​របស់​អង្គការ​សហប្រជាជាតិ។​ ជាង​នេះ​ទៅ​ទៀត ​ប្រទេស​កម្ពុជា​ដ៏​ក្រីក្រ​មួយ​នេះ​នៅ​មាន​បញ្ហា​ប្រឈម​ជា​ច្រើន​ដូច​ជា​អំពើ​ពុករលួយ​ ភាព​ក្រីក្រ​ និង​ទំនាស់​ដីធ្លី​ដ៏​ច្រើន។​

ក៏​ប៉ុន្តែ​ លោក​នាយ​ឧត្តម​សេនីយ៍​ ខៀវ សុភ័គ ​បាន​ថ្លែង​ការពារ​ចំណាត់​ការ​របស់​រដ្ឋាភិបាល​កម្ពុជា​ ដោយ​ឆ្លើយ​ថា​ ការ​រិះ​គន់​ជា​រឿង​ធម្មតា​សម្រាប់​ប្រទេស​ដែល​កាន់​លទ្ធិ​ប្រជា​ធិបតេយ្យ៕

XS
SM
MD
LG