អតីតមន្ត្រីជាន់ខ្ពស់ម្នាក់ខាងគណបក្សរាជានិយម ហ្វ៊ុន ស៊ិនប៉ិច គឺលោក លឺ ឡាយស្រេង នៅថ្ងៃព្រហស្បតិ៍នេះ បានសរសេរលិខិតមួយច្បាប់ ថ្វាយព្រះមហាក្សត្រខ្មែរ ព្រះបាទនរោត្តម សីហមុនី ដើម្បីស្នើឲ្យព្រះអង្គ ធ្វើអន្តរាគមន៍ដោះស្រាយភាពតានតឹងនយោបាយដែលកំពុងកើតឡើងក្នុងប្រទេសកម្ពុជាបច្ចុប្បន្ននេះ។
បើយោងតាមលិខិតរបស់អតីតមន្ត្រីជាន់ខ្ពស់របស់គណបក្សហ្វ៊ុន ស៊ិនប៉ិចរូបនេះ ដែលត្រូវបានផ្សព្វផ្សាយដោយបណ្តាញព័ត៌មានក្នុងស្រុក លោក លឺ ឡាយស្រេង បានសរសេរថា «ប្រជានុរាស្ត្រ មានការតុកស្លុត រន្ធត់យ៉ាងមហិមា ដោយបានឭថាកងកម្លាំងប្រដាប់អាវុធរបស់សម្តេច ហ៊ុន សែន នឹងប្រើចុងអាវុធបង្ហូរឈាម អ្នកមកធ្វើមហាបាតុកម្មអហិង្សា ដែលមានតែបាតដៃទទេ»។
ការសរសេរលិខិតស្នើអន្តរាគមន៍ពីព្រះមហាក្សត្រនេះ ធ្វើឡើងក្រោយពីស្ថានការណ៍នយោបាយនៅក្នុងប្រទេសកម្ពុជាសព្វថ្ងៃ ត្រូវបានអ្នកឃ្លាំមើលជាច្រើនមើលឃើញថា មានសភាពតានតឹងយ៉ាងខ្លាំង បន្ទាប់ពី លោកនាយករដ្ឋមន្ត្រី ហ៊ុន សែន ដែលកាន់អំណាចជាង៣០ឆ្នាំមកហើយនោះ បានព្រមានប្រើប្រាស់កងកម្លាំងប្រដាប់អាវុធ ដើម្បី«កម្ទេច» អ្នកចូលរួមក្នុងមហាបាតុកម្ម ដែលគណបក្សសង្គ្រោះ ជាតិគ្រោងនឹងដឹកនាំ។
គណបក្សសង្គ្រោះជាតិ ដែលមេដឹកនាំនិងសមាជិកមួយចំនួនរបស់ពួកគេ កំពុងត្រូវបានញាំញីដោយរឿងក្តីក្តាំក្នុងតុលាការកម្ពុជា បានប្រកាសថា ពួកគេនឹងរៀបចំមហាបាតុកម្មនៅពេលខាងមុខ ប្រសិនបើរដ្ឋាភិបាល នៅតែមិនព្រមវិលរកការចរចានយោបាយ ដើម្បីឲ្យស្ថានការណ៍វិលត្រឡប់មកធម្មតាវិញ នៅមុនពេលបោះឆ្នោតទេនោះ។
លោក លឺ ឡាយស្រេង បានសរសេរថានៅក្នុងលិខិតរបស់លោកថា ស្ថានការណ៍នយោបាយក្នុងប្រទេសកម្ពុជាសព្វថ្ងៃ តឹងតែងណាស់ ហើយអាចក្លាយជាព្រឹត្តិការណ៍មួយដ៏អាក្រក់បំផុត។
លោកបានសម្ដែងក្ដីព្រួយបារម្ភថា អាចមានអង្គភាពទី៣ មកបង្កចលាចល ហើយធ្វើឲ្យកងកម្លាំងប្រដាប់អាវុធរបស់លោកនាយករដ្ឋមន្ត្រី ហ៊ុន សែន ស្មានថា «ជាគណបក្សប្រឆាំងជាអ្នកធ្វើ ហើយក៏កេះកៃកាំភ្លើងសម្លាប់ខ្មែរគ្នាឯង»។
លោក លឺ ឡាយស្រេង ដែលបានទៅចូលរួមគោរពវិញ្ញាណក្ខន្ធរបស់លោក កែម ឡី ក្រោយពីឃាតកម្មដ៏សាហាវទៅលើអ្នកវិភាគដ៏ល្បីល្បាញរូបនោះកាលពីខែកក្កដាកន្លងទៅផងនោះ បានសរសេរនៅក្នុងលិខិតថ្វាយព្រះមហាក្សត្រខ្មែរនោះដែរថា «ការសម្ងំនៅក្នុងព្រះបរមរាជវាំងដោយសុខសាន្ត ធ្វើឲ្យប្រជារាស្ត្រព្រះអង្គរន្ធត់របៀបនេះ មិនជាការសមរម្យឡើយក្នុងឋានៈជាព្រះមហាក្សត្រ»៕
