ភ្ជាប់​ទៅ​គេហទំព័រ​ទាក់ទង

លោក​ ទេព នីថា​ ជាប់​ជា​អគ្គលេខាធិការ​គ.ជ.​ប.​ជាថ្មី


រូបឯកសារ៖ លោក ទេព នីថា អគ្គ​លេខាធិការ​គណៈកម្មាធិការ​រៀបចំ​ការ​បោះឆ្នោត (គ.ជ.ប.) និយាយ​នៅ​ក្នុង​សន្និសីទសារព័ត៌មាន​មួយ​នៅ​ទីស្នាក់ការ គ.ជ.ប. ដើម្បី​ឆ្លើយតប​នឹង​ការ​សាកសួរ​ពី​អង្គការ​សង្គម​ស៊ីវិលកាល​ពី​ថ្ងៃសុក្រ ទី៣ ខែ​ឧសភា ឆ្នាំ​២០១៣។ (ស៊ុយ ហ៊ាមខេមរា/VOA)

លោក​ ទេព​ នីថា​ ត្រូវ​បាន​ជ្រើសរើស​ឲ្យ​បន្ត​តួនាទី​ជា​អគ្គលេខាធិការ​របស់​លោក​តទៅ​ទៀត​ បន្ទាប់​ពី​ការ​ពិគ្រោះ​យោបល់​របស់​ប្រធាន​ និង​សមាជិក​៨រូប​ផ្សេង​ទៀត​នៃ​ស្ថាប័ន​បោះ​ឆ្នោត​ជាតិ។

លោក​ ទេព​ នីថា​ ត្រូវ​បាន​ជ្រើសរើស​ឲ្យ​បន្ត​តួនាទី​ជា​អគ្គលេខាធិការ​របស់​លោក​តទៅ​ទៀត​ បន្ទាប់​ពី​ការ​ពិគ្រោះ​យោបល់​របស់​ប្រធាន​ និង​សមាជិក​៨រូប​ផ្សេង​ទៀត​នៃ​ស្ថាប័ន​បោះ​ឆ្នោត​ជាតិ ​ដែល​បាន​បង្កើត​ដោយ​គណបក្ស​ធំៗ​ទាំង​ពីរ​មាន​អាសនៈ​នៅ​ក្នុង​សភា​ជាតិ​ ក្រោយ​ពី​ការ​បោះ​ឆ្នោត​ឆ្នាំ​ ២០១៣។ នេះ​បើ​យោង​ទៅ​តាម​ការ​បញ្ជាក់​ពី​លោក​ ស៊ិក​ ប៊ុនហុក​ ប្រធាន​គណៈកម្មាធិការ​ជាតិ​រៀប​ចំ​ការ​បោះ​ឆ្នោត​ថ្មី។

ថ្លែង​ទៅ​កាន់​អ្នក​សារព័ត៌មាន​នៅ​ឯទីស្នាក់​ការ​របស់​គណៈ​កម្មាធិការ​ជាតិ​រៀប​ចំ​ការ​បោះ​ឆ្នោត​ ហៅ​កាត់​ថា​ គ.ជ.ប.​ លោក​ ស៊ិក​ ប៊ុន​ហុក​ ថ្លែង​ថា​ ការ​ជ្រើស​រើស​ លោក ទេព នីថា​ ត្រូវ​បាន​ធ្វើ​ឡើង​ដោយ​ផ្អែក​ទៅ​តាម​សំឡេង​ភាគច្រើន​របស់​សមាជិក​នៃ​ គ.ជ.ប. ​ទាំង​ប្រាំបួន​រូប ​និង​ទៅ​តាម​ពិសោធន៍​ការងារ​របស់​អតីត​អគ្គលេខា​ធិការ​របស់​ គ.ជ.ប.​ ចាស់។​ លោក​បញ្ជាក់​ថា៖​ ​

«ការ​រក្សាទុក​អ្នក​ចាស់​ ឬ​ត្រូវ​ជ្រើសរើស​អ្នក​ថ្មី​មិន​សំខាន់​ទេ​ ចំពោះ​ គ.ជ.ប.​ ត្រូវ​តែ​ថ្មី​ ឬ​ក៏​ត្រូវ​តែ​ចាស់​ ត្រូវ​អី​ មិន​សំខាន់​ចំពោះ​ គ.ជ.ប.​ សំខាន់​ត្រង់​ថា​ ប្រព័ន្ធ​ការងារ​របស់​ គ.​ជ.​ប.​ នេះ​ឯង ​អាច​ជឿ​ទុកចិត្ត​បាន​ទេ?​ មិន​មែន​មនុស្ស​ទេ​ណ៎ា​ ប្រព័ន្ធ​ធ្វើ​ការងារ​របស់​ គ.ជ.ប.​ អាច​ទុក​ចិត្ត​បាន​ទេ?​ គឺ​នៅ​ត្រង់​ថា​ តើ​ការ​ប្រព្រឹត្តិ​ទៅ​របស់​ គ.ជ.ប.​ មាន​យុត្តិធម៌​ មាន​តម្លាភាព​ឬ​អត់?​ អា​នោះ​ដែល​សំខាន់​នោះ!»។

លោក ទេព​ នីថា​ នឹង​ទទួល​ការងារ​ខាង​ផ្នែក​រដ្ឋបាល​ និង​ហិរញ្ញកិច្ច។​

ក្នុង​ចំណោម​អគ្គលេខារង​ចំនួន​បួន​នាក់​ដែល​ត្រូវ​បាន​ជ្រើសរើស​នៅ​ថ្ងៃនេះ​ក៏​មាន​លោក​ នី ចរិយា​ ដែល​ជា​អ្នក​ការពារ​សិទ្ធិ​មនុស្ស​មក​ពី​អង្គការ​អាដហុក​ផង​ដែរ។​

អគ្គ​លេខាធិការ​រង​ទាំង​បួន​នាក់​ រួមមាន​លោក​ ម៉ៅ​ សុភារិទ្ធ​ ទទួល​បន្ទុក​នាយកដ្ឋាន​គ្រប់​គ្រង​ទិន្នន័យ​បោះ​ឆ្នោត​ និង​បញ្ជី​បោះឆ្នោត​ និង​នាយកដ្ឋាន​ប្រតិបត្តិ​ការ​ លោក​ សោម សូរីដា​ ទទួល​បន្ទុក​នាយកដ្ឋាន​ សេវាកម្ម​ច្បាប់​ និង​វិវាទកម្ម​ លោក​ នី ចរិយា​ ទទួល​បន្ទុក​នាយកដ្ឋាន​ សវនកម្ម​ផ្ទៃក្នុង​ និង​លោក​ ម៉ុក តារា​ ទទួល​បន្ទុក​នាយកដ្ឋាន​បណ្តុះ​បណ្តាល​អប់រំ​អ្នក​បោះឆ្នោត​ និង​នាយក​ដ្ឋាន​ព័ត៌មាន​ និង​ទំនាក់​ទំនង​សាធារណៈ។ នេះ​បើ​តាម​ការ​បញ្ជាក់​របស់​លោក​ ស៊ិក ប៊ុនហុក។

ការ​សម្រេច​របស់​ គ.ជ.ប.​ នៅ​ព្រឹក​ថ្ងៃ​សុក្រនេះ​ កើត​មាន​បន្ទាប់ពី​ការ​ប្រជុំ​របស់​ប្រធាន​ និង​សមាជិក​ទាំង​ប្រាំបី​រូប​អស់​រយៈពេល​ប្រមាណ​បី​ម៉ោង​ នៅ​ឯ​ទីស្នាក់ការ ​គ.ជ.​ប.​ ស្ថិត​នៅ​ក្នុង​បរិវេណ​របស់​ក្រសួង​មហាផ្ទៃ។

លោក គល់​ បញ្ញា​ នាយក​ប្រតិបតិ្ត​អង្គការ​ ខុមហ្វ្រែល​ យល់​ថា​ ការ​ជ្រើសរើស​នេះ​ធ្វើ​ឡើង​ដោយ​ខ្វះ​ការ​ចូលរួម​ពី​ភាគី​ពាក់ព័ន្ធ​ ជាពិសេស​នោះ​គឺ​ភាគី​នៃ​គណបក្ស​នយោបាយ​ដែល​នឹង​ត្រូវ​ចូលរួម​ការ​បោះ​ឆ្នោត​នា​ពេល​ខាងមុខ​នេះ។​

«ទម្លាប់​នៃ​គេ​រើស​ដែល​បាន​មនុស្ស​ធ្វើការ​បាន​ប្រសិទ្ធភាព​ ដើម្បី​ធ្វើ​ការ​សម្រេច​ចិត្ត​មួយ​ដ៏​ត្រឹម​ត្រូវ​ហ្នឹង​ ក្នុង​ការ​ជ្រើសរើស​ហ្នឹង​គេ​ត្រូវ​ប្រមូល​ព័ត៌មាន​ ហ្នឹង​ឲ្យ​បាន​គ្រប់​ជ្រុង​ជ្រោយ​ ជាពិសេស​ការ​សម្ភាស​ ការ​អ្វី​ហ្នឹង។​ គេ​ចង់​ដឹង​អំពី​កម្រិត​នៃ​មនុស្ស​ ដែល​អា​ច​ធ្វើ​កិច្ចការងារ​ហ្នឹង​បាន​ បាន​អត់​ ហើយ​គាត់​អាច​រៀនសូត្រ​បាន​លឿន​អត់?​ ហើយ​គេ​ចង់​ដឹង​ដែរ​ បើ​រឿង​បោះឆ្នោត​ រឿងអី​អញ្ចឹង​រឿង​របៀ​ប​ជា​សាធារណៈ​អញ្ចឹង​ គេ​ច្រើន​តែ​យក​ទៅ​ឲ្យ​អ្នក​ពាក់ព័ន្ធ​ ជាពិសេស​គណបក្ស​នយោបាយ​អី​ដែល​គេ​ចូល​ប្រកួត​ប្រជែង​នោះ​ ឲ្យ​គេ​ឲ្យ​យោបល់​មតិ​ថា ​តើ​គេ​យល់​ម៉េច​ចំពោះ​បេក្ខជន​ ព្រោះ​ការ​ទុក​ចិត្ត​ហ្នឹង​ជា​ទស្សនៈ​ដែរ។ វា​មិនមែន​ គេ​មើល​ទៅ​មើល​មនុស្ស​ គេ​យល់​ឃើញ​មនុស្ស​អ្វីៗ​ដែល​គេ​យល់​ឃើញ​ថា​ ទុក​ចិត្ត​ មិន​ទុក​ចិត្ត​ទេ»។​

លោក​ថ្លែង​បញ្ជាក់​ថា​ ការ​ជ្រើសរើស​មិន​ត្រូវ​បាន​ធ្វើ​ឡើង​ដោយ​តម្លាភាព​នោះ​ទេ​ ហើយ​ការណ៍​នេះ​ នឹង​ធ្វើ​ឲ្យ​ក្រុម​អ្នក​សង្កេត​ការណ៍​បោះឆ្នោត​នៅ​ក្នុង​ប្រទេស​កម្ពុជា​ត្រូវ​ប្រឈម​នឹង​បញ្ហា​ច្រំ​ដែល​ ទាក់​ទិន​ការ​ឃ្លាំ​មើល​ដំណើរការ​នៃ​ការ​បោះឆ្នោត​ និង​ការ​តស៊ូមតិ ​ដើម្បី​ឲ្យ​ការ​បោះឆ្នោត​ប្រព្រឹត្ត​ទៅ​ដោយ​តម្លាភាព។​ លោក​និយាយ​ថា៖​

«អាហ្នឹង​វា​ជា​ការ​ប្រឈម​របស់​យើង​ខ្លាំង។ ពេល​ហ្នឹង​ការងារ​យើង​ហ្នឹង​វាកាន់​តែ​ច្រើន​ទៀត។​ តាម​ពិត​បើ​សិន​ជា​អគ្គលេខាធិការ​ហ្នឹង​ ឬក៏​ គ.ជ.ប.​ហ្នឹង​គេ​ទុក​ចិត្ត​ ការងារ​សង្គម​ស៊ីវិល​យើង​ យើង​មិន​ចាំ​បាច់​ប្រឈម​អី​ខ្លាំង​ទេ។​ យើង​មិន​ចាំបាច់​ទៅ​ធ្វើ​អ្វី​ច្រើន​ទេ។​ យើង​ធ្វើ​កិច្ច​ការងារ​ ដូចជា​ការងារ​អប់រំ​ ធ្វើ​កិច្ច​ការងារ​អ្វី​ខ្លះ‌ៗ​ ដែល​វាមិន​មែន​ជាទៅ​តាម​ឃ្លាំមើល​ ទៅ​តស៊ូ​មតិ​អ្វី​ដើម្បី​ឲ្យ​ គ.​ជ.​ប.​ ហ្នឹង​ដើរការងារ​បានតម្លាភាព​ត្រឹមត្រូវ។​ ប៉ុន្តែ​ឥឡូវ​យើង​ប្រឈម​ ត្រូវ​ប្រើ​ប្រាស់​ធនធាន​ទាំងអស់​ហ្នឹង​មក​ធ្វើ​កិច្ច​ការងារ​ដដែល»។​

យ៉ាង​ណាក៏​ដោយ​ លោក​ ស៊ិក​ ប៊ុន​ហុក​ បាន​ថ្លែង​ការពារ​ការ​ជ្រើស​រើស​នេះ​ ដោយ​លោក​បាន​ច្រាន​ចោល​មតិ​រិៈគន់​ចំពោះ​តួនាទី​របស់​ លោក​ ទេព​ នីថា។ លោក​បញ្ជាក់​ថា​ ការ​ជ្រើសរើស​នេះ​ធ្វើឡើង​ដោយ​យោង​ទៅ​តាម​មាត្រា៥៥​នៃ​ច្បាប់​ស្តី​ពី​ការ​រៀបចំ​ និង​ការ​ប្រព្រឹត្តិ​ទៅ​នៃ​គណៈ​កម្មាធិការ​ជាតិ​រៀប​ចំ​ការ​បោះឆ្នោត​ ដែល​បាន​ប្រកាស​ដាក់​ឲ្យ​ប្រើប្រាស់​ដោយ​ព្រះ​មហាក្សត្រ​ខ្មែរ​កាល​ពី​ឆ្នាំ​២០១៥។

មាត្រា៥៥​នៃ​ច្បាប់​ស្តី​ពី​ការ​រៀបចំ​ និង​ការ​ប្រព្រឹត្តិ​ទៅ​នៃ​គណៈ​កម្មាធិការ​ជាតិ​រៀបចំ​ការ​បោះឆ្នោត​ ចែង​ថា៖​«អគ្គ​លេខាធិការ​ និង​អគ្គ​លេខាធិការ​រង​ត្រូវ​តែង​តាំង​ដោយ​ព្រះ​រាជក្រិត្យ​តាម​សំណើ​របស់​ប្រធាន​គណៈ​កម្មាធិការ​ជាតិ​រៀបចំ​ការ​បោះឆ្នោត​ បន្ទាប់​ពី​បាន​យោបល់​យល់​ស្រប​តាម​សំឡេង​ភាគ​ច្រើន​ដាច់​ខាត​នៃ​សមាសភាព​គណៈ​កម្មាធិការ​ជាតិ​រៀបចំ​ការ​បោះឆ្នោត​ទាំង​មូល»។​

គ.ជ.ប.​ថ្មី​នេះ​ត្រូវ​បាន​បង្កើត​ឡើង​ក្រោយ​ពី​មាន​ដំណោះ​ស្រាយ​នយោបាយ​រវាង​គណបក្ស​ប្រជាជន​កម្ពុជា​ និង​គណបក្ស​សង្គ្រោះ​ជាតិ​ បន្ទាប់​ពី​មាន​ការ​តវ៉ា​ក្រោយ​ការ​បោះឆ្នោត​ជាតិ​កាល​ពី​ខែ​កក្កដា ​ឆ្នាំ​២០១៣។​

លោក យ៉ែម​ ប៉ុញ្ញឬទ្ធិ​ អ្នក​នាំ​ពាក្យ​គណបក្ស​សង្គ្រោះ​ជាតិ​ ថ្លែង​ប្រាប់​ VOA ថា​ គណបក្ស​សង្គ្រោះ​ជាតិ​ មាន​ការ​សោក​ស្តាយ​ចំពោះ​ការ​ជ្រើសរើស​យក​អគ្គ​លេខាធិការ​ចាស់​នេះ។​ លោក​បញ្ជាក់​ថា៖​

«គណបក្ស​សង្គ្រោះ​ជាតិ​ យើង​មាន​ការ​សោក​ស្តាយ​ និង​ខក​ចិត្ត​ទៅលើ​សមាជិក​ទាំង​ប្រាំបួន​រូប​របស់​ គ.​ជ.​ប.​ ដែល​ប្រជាពលរដ្ឋ​លោក​ចង់​ឲ្យ​មាន​កំណែ​ទម្រង់​ ការ​ផ្លាស់​ប្តូរ​ទាំង​សមាសភាព​ គ.​ជ.​ប.​ ក៏ដូច​ជា​អគ្គ​លេខាធិការ​ ហើយ​ការ​ជ្រើសរើស​ព្រឹក​មិញ​នេះ​ ធ្វើឲ្យ​យើង​មាន​ការ​ព្រួយ​បារម្ភ​ ហើយ​ប្រជាពលរដ្ឋ​លោក​អាច​មិន​មាន​ជំនឿ​ទុក​ចិត្ត​ទៅ​លើ​គ.ជ.ប.​ថ្មី»។​

លោក​បន្ថែម​ថា​ ការ​បំពេញ​មុខងារ​របស់​ លោក​ ទេព​ នីថា​ ​បាន​ធ្វើ​ឲ្យ​ប្រជាពលរដ្ឋ​ខ្មែរ​ជា​អ្នក​បោះឆ្នោត​មិន​មាន​ជំនឿ​ទុក​ចិត្ត​ពេញលេញ​ក្នុង​ការ​បោះឆ្នោត​នាពេល​កន្លង​មក​នោះ​ទេ។​ ទោះ​បី​ជា​យ៉ាង​ណា​ក៏​ដោយ​ គណបក្ស​ប្រឆាំង​ ឬ​គណបក្ស​នយោបាយ​ផ្សេង​ មិន​អាច​ជ្រៀតជ្រែក​ការងារ​របស់​ គ.ជ.ប.​ ដែល​ជា​ស្ថាប័ន​ឯករាជ្យ​នោះ​ទេ។​ លោក​ក៏​មិន​អាច​ធ្វើការ​សន្និដ្ឋាន​ទុក​ជា​មុន​ថា​ នឹង​មាន​ភាព​មិន​ប្រក្រតី​កើត​ឡើង​នៅ​ក្នុង​ពេល​បោះឆ្នោត​នា​ពេល​ខាងមុខ​នោះ​ដែរ​ ខណៈ​ដែល​លោក​ ទេព​ នីថា​ ត្រូវ​បាន​សម្រេច​ឲ្យ​កាន់​ការងារ​ជា​អគ្គ​លេខាធិការ​របស់​ គ.ជ.ប.​ ថ្មីនេះ។​

លោក ទេព នីថា បេក្ខជន​ដែល​បាន​ជាប់​ជា​អគ្គ​លេខាធិការ​ នៃ​ គ.ជ​.ប.​ថ្មី​នេះ​ បាន​សម្តែង​ក្តី​រីករាយ​ចំពោះ​ការ​ជាប់​ធ្វើ​ជា​អគ្គលេខាធិការ​នៃ​ គ.ប.ជ.​ថ្មី​ ហើយ​លោក​បាន​បេ្តជ្ញា​ថា​ នឹង​បំពេញ​តួនាទី​ឲ្យ​បាន​កាន់​តែ​ល្អ​ថែម​ទៀត​នៅ​ពេល​ខាង​មុខ។ លោក​ក៏​បាន​ច្រាន​ចោល​មតិ​រិៈគន់​នានា​ផងដែរ​ចំពោះ​ការ​ជ្រើសរើ​ស​រូប​លោក​ ដោយ​លោក​អះអាង​ថា​ លទ្ធផល​នៃ​ការ​បោះឆ្នោត​កន្លង​មក​ត្រូវ​បាន​អ្នក​សង្កេត​ការណ៍​បោះឆ្នោតទទួល​ស្គាល់។​

«ខ្ញុំ​គិត​ថា​ ប្រហែល​ជា​យោបល់​របស់​គាត់​ ឬ​ក៏​ពួក​គាត់​មួយ​ចំនួន​ទេ​បាទ។​ ព្រោះ​ថា​ យើង​ធ្វើ​អ្វី​វា​មិន​អាច​ថា​ល្អ​១០០​ភាគរយ​ទេ​ ហើយ​មនុស្ស​យើង​ក៏​គ្មាន​នរណា​ស្រឡាញ់​យើង​១០០​ភាគរយ​ដែរ។​ អញ្ចឹង​តែង​តែ​មាន​អ្នក​ពេញចិត្ត​ អ្នក​មិន​ពេញចិត្ត។​ ក៏​ប៉ុន្តែ​ទោះ​យ៉ាង​ណា​ក៏​ដោយ​ លទ្ធផល​នៃ​ការ​បោះឆ្នោត​កន្លង​មក​ហ្នឹង​ ត្រូវ​បាន​ទទួល​ការ​វាយ​តម្លៃ​ជា​ទូទៅ​ ទាំង​អ្នក​បច្ចេកទេស​ ទាំង​អ្នក​សង្កេត​ការណ៍​បោះ​ឆ្នោត​ទូទៅ​ រឿង​វាយ​តម្លៃ​តម្លាភាព​ ឬ​កម្រិត​បច្ចេកទេស​ហ្នឹង​ល្អ។ ហើយ​ការ​កើត​បញ្ហា​ក្រោយ​ការ​បោះឆ្នោត​នេះ​ ខ្ញុំ​គិត​ថា​ មួយ​ចំនួន​មិន​មែន​ជា​រឿង​បច្ចេកទេស​ទេ​ គឺ​ជា​ការ​ប្រកួត​ប្រជែង​រវាង​អ្នក​នយោបាយ​ទេ​បាទ»។

ប្រទេស​កម្ពុជា​គ្រោង​នឹង​រៀបចំ​ការ​បោះឆ្នោត​ក្រុម​ប្រឹក្សា​ឃុំ-សង្កាត់​នៅ​ឆ្នាំ​២០១៧​ និង​ការ​បោះឆ្នោត​ជាតិ​នៅ​ឆ្នាំ​២០១៨​ ប៉ុន្តែ​ថ្ងៃ​ពិត​ប្រាកដ​នៅ​មិន​ទាន់​សម្រេច​នៅ​ឡើយ​ទេ។​

ការ​បោះឆ្នោត​ឆ្នាំ​ ២០១៣​ បាន​បង្ក​ឲ្យ​មាន​ការ​ធ្វើ​បាតុកម្ម​ជា​ទ្រង់ទ្រាយ​ធំ​ពុំ​ធ្លាប់​មាន​ក្នុង​ប្រទេស​កម្ពុជា​ ដើម្បី​ប្រឆាំង​នឹង​លទ្ធផល​ឆ្នោត​ ដែល​អ្នក​តំណាងរាស្ត្រ​នៃ​គណបក្ស​សង្គ្រោះ​ជាតិ​ចោទ​ថា​ លទ្ធផល​ឆ្នោត​នោះ​មិន​បាន​ឆ្លុះ​បញ្ចាំង​ពី​ឆន្ទៈ​របស់​ប្រជារាស្រ្ត​ខ្មែរ។​ បាតុកម្ម​នេះ​ក៏បាន​បញ្ចប់​ទៅ​វិញ​ បន្ទាប់​ពី​អ្នក​តំណាង​រាស្ត្រ​ទាំង​៥៥​រូប​នៃ​គណបក្ស​សង្គ្រោះ​ជាតិ​ បាន​សម្រេច​ចូល​ទៅ​អង្គុយ​នៅ​កៅអី​របស់​ពួកគេ​វិញ​នៅ​ក្នុង​សភា ជា​ទី​ដែល​ពួក​គេ​ និង​អ្នក​តំណាង​រាស្ត្រ​នៃ​គណបក្ស​គ្រប់​ប្រទេស​ ផ្តល់​កំណើត​ដល់​ គ.​ជ.​ប.​ ថ្មីនេះ​កាល​ពី​ឆ្នាំ​មុន៕

XS
SM
MD
LG