ភ្ជាប់​ទៅ​គេហទំព័រ​ទាក់ទង

អតីត​មេបញ្ជាការ​យោធា​បូស្ន៊ី​ក្រូអាដ​បាន​ស្លាប់​បន្ទាប់​ពី​ផឹក​គ្រឿង​ពុល​នៅ​ក្នុង​បន្ទប់​តុលាការ​ក្រុង​ឡាអេរ៍


មនុស្ស​ម្នា​មើល​ទូរទស្សន៍​ដែល​ផ្សាយ​បន្ទ​ផ្ទាល់​ពី​សវនាការ​របស់​លោក Slobodan Praljak កាលពី​ថ្ងៃទី២៩ ខែវិច្ឆិកា ឆ្នាំ២០១៧។

លោក Slobodan Praljak ​អតីត​មេបញ្ចាការ​យោធា​បូស្ន៊ី​ក្រូអាដ​បាន​ស្លាប់​កាល​ពី​ថ្ងៃ​ពុធ​បន្ទាប់​ពី​ផឹកសារធាតុ​ពុល​នៅ​ក្នុង​បន្ទប់​តុលាការ​ក្រុង​ឡាអេរ៍​ភ្លាមៗ​បន្ទាប់​ពី​ចៅក្រម​អង្គការ​សហប្រជាជាតិ​ម្នាក់​បាន​សម្រេច​កាត់​ទោសឲ្យ​លោក​ជាប់​ពន្ធនាគារ​២០​ឆ្នាំចំពោះ​ឧក្រិដ្ឋកម្ម​សង្គ្រាម​ប្រឆាំង​នឹង​ជន​ជាតិបូស្ន៊ី​កាន់​សាសនា​ឥស្លាម ​នេះ​យោ​ងតាម​ទីភ្នាក់ងារ​ព័ត៌មាន​របស់​រដ្ឋ​ក្រូអាដ។

ពួក​អាជ្ញាធរ​អនុវត្ត​ច្បាប់​ហូឡង់​បាន​ប្រកាស​ក្នុង​បន្ទប់​តុលាការ​នៅឯ​តុលាការ​ឧក្រិដ្ឋកម្ម​អន្តរជាតិ​សម្រាប់​ការកាត់ទោស​អតីត​ឧក្រិដ្ឋជន​យូហ្គោស្លាវីរូប​នេះ​បន្ទាប់ពី​លោក Praljak ​បាន​ផឹក​សារធាតុ​ពុល​ក្នុង​ដប​ហើយ​បាន​ស្រែក​ថា «ខ្ញុំ​មិន​មែន​ជា​ឧក្រិដ្ឋជន​សង្គ្រាម​ទេ‍»។

​បន្ទាប់​ពី​ចៅក្រមបាន​ផ្អាក​សវនាការ​ហើយ​បាន​កោះ​ហៅ​ឲ្យ​បុគ្គលិក​ពេទ្យ​ដែល​ស្ថិត​នៅ​អគារ​តុលាការ​នោះ​បាន​ចូល​ក្នុង​បន្ទប់​តុលាការ​ដើម្បី​ធ្វើ​ការ​ព្យាបាល។​ឆ្មាំ​ការពារ​តុលាការ​ម្នាក់​បាន​និយាយ​ថា ​លោក Praljak បាន​ទទួល​ការ​ព្យាបាល​អស់​រយៈ​ពេល​ជាង​មួយ​ម៉ោង​បន្ទាប់​ពី​ចុង​ចោទ​នោះ​បាន​និយាយ​ថា ​លោក​បាន​ផឹក​សារធាតុ​ពុល។

​ព្រឹត្តិការណ៍នេះ​បាន​កើត​មាន​ឡើង​នៅពេល​ដែល​តុលាការ​ឧក្រិដ្ឋកម្ម​សង្គ្រាម​របស់​អង្គការ​សហប្រជាជាតិបាន​កាត់​ទោស​លោក Praljik ​និង​ពួក​មេដឹកនាំ​នយោបាយ​និង​យោធា​បូស្ន៊ី​ក្រូអាដ​៥នាក់​ទៀត​ដែល​ត្រូវបាន​កាត់​ឲ្យ​ជាប់​ទោស​នៅ​ឆ្នាំ​២០១៣​ពី​បទ​ឧក្រិដ្ឋកម្ម​សង្គ្រាម​ក្នុង​ទសវត្សរ៍​១៩៩០។

សេចក្តី​សម្រេច​នេះ​ជាការ​សម្រេច​ចុងក្រោយ​ដោយ​តុលាការ​ដែល​ត្រូវបាន​បង្កើត​ឡើង​ដោយ​អង្គការ​សហប្រជាជាតិ​នៅឆ្នាំ​១៩៩៣។ តុលាការ​មាន​គម្រោង​នឹង​បិទ​សវនាការ​នៅពេ​ល​ដែល​អាណត្តិ​របស់​ខ្លួន​ផុត​កំណត់​នៅ​ចុងឆ្នាំ​នេះ៕

XS
SM
MD
LG