ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

សង្គម​ស៊ីវិល៖​ ការ​ចងក្រង​ក្រុម​តំណាង​នៅ​មូលដ្ឋាន​ត្រូវ​អាក់ខាន ​ដោយសារ​ច្បាប់​សមាគម​អង្គការ​សង្គម​ស៊ីវិល


លោក យង់ គិមអេង​ ប្រធាន​មជ្ឈមណ្ឌល​ប្រជាពលរដ្ឋ​ដើម្បី​អភិវឌ្ឍន៍ និង​សន្តិភាព​ ថ្លែងក្នុង​ពិធីបើក​សិក្ខាសាលាស្តីពី​វិសោធនកម្ម​ច្បាប់​ស្តីពី​សមាគម​ និង​​អង្គការ​មិនមែន​រដ្ឋាភិបាល​ នៅទីក្រុង​ភ្នំពេញ​ ថ្ងៃទី​២៥ ខែ​សីហា ឆ្នាំ​២០២០។ (ហ៊ុល រស្មី/វីអូអេ)​

ក្រុម​សង្គម​ស៊ីវិល​ និយាយ​នៅ​ថ្ងៃ​អង្គារ​នេះ​ថា​វិសោធន​កម្ម​ច្បាប់​ស្តីពី​សមាគម​ និង​អង្គការ​ក្រៅ​រដ្ឋាភិបាល​(LANGO)​ជា​តម្រូវ​ការ​ចាំបាច់​ ដើម្បី​បើក​ឱកាស​ឲ្យ​ពលរដ្ឋ​ដែល​រស់​នៅ​តំបន់​ដាច់​ស្រយាល​មាន​សិទ្ធិ​ចង​ក្រង​សមាគម​ និង​អង្គការ​ ឬ​ក៏​បំពេញ​ការងារ​ងាយ​ស្រួល​ជាង​មុន​ ដោយ​គ្មាន​ការ​រារាំង​ពី​អាជ្ញាធរ​មូលដ្ឋាន។​

នេះ​ជា​ការ​លើក​ឡើង​របស់​ក្រុម​សង្គម​ស៊ីវិល​ក្នុង​សិក្ខា​សាលា​មួយ​ស្តីពី​ការ​ធ្វើ​វិសោធន​កម្ម​ច្បាប់​ស្តី​សមាគម​ និង​អង្គការ​ក្រៅ​រដ្ឋាភិបាល ​ដោយ​មាន​ការ​ចូលរួម​ពី​ក្រុម​មេ​ដឹកនាំ​ តំណាង​អង្គការ​សង្គម​ស៊ិវិល ​និង​មន្ត្រី​ជាន់​ខ្ពស់​នៃ​ការិយាល័យ​សិទ្ធិ​មនុស្ស​របស់​អង្គការ​សហ​ប្រជាជាតិ​ និង​ស្ថានទូត​សហ​រដ្ឋ​អាមេរិក​ប្រចាំ​នៅ​កម្ពុជា។​

លោក​ យង់ គិមអេង​ ប្រធាន​មជ្ឈមណ្ឌល​ប្រជា​ពលរដ្ឋ​ដើម្បី​អភិវឌ្ឍន៍​និង​សន្តិភាព ​លើក​ឡើង​ថា​ ដំណើរ​ការ​ចុះ​បញ្ជី​សមាគម​ដែល​នៅ​តំបន់​ជន​បទ​ មាន​ភាព​ស្មុគ​ស្មាញ​ ហើយ​ត្រូវ​ចាយ​វាយ​ថវិកា​ ដែល​មិន​តម្រូវ​ដោយ​ច្បាប់​ស្តីពី​សមាគម​ និង​អង្គការ​ក្រៅ​រដ្ឋាភិបាល។​លោក​បញ្ជាក់​ថា​នេះ​ជា​ការ​បន្ថែម​លើ​មាត្រា​ដែល​មាន​ភាព​រឹត​ត្បិត​ជា​ច្រើន​នៅ​ក្នុង​ច្បាប់​ដែល​បង្កើត​តាំង​ពី​ឆ្នាំ​២០១៥។ ​ លោក​កត់​សម្គាល់​ថា​ចំណុច​រឹតត្បិត​នៃ​ច្បាប់​នេះ​នឹង​រាំង​ខ្ទប់​ការ​ចូល​រួម​របស់​ពលរដ្ឋ​ក្នុង​ការ​អភិវឌ្ឍ​ភូមិឃុំ។​

«គោល​នយោបាយ​វិមជ្ឈការ​ វិសហមជ្ឈការ​ក្នុង​ការ​លើក​កម្ពស់​ការ​ចូលរួម​របស់​ប្រជា​ពលរដ្ឋ​ទៅ​បាន​ទេ​បាទ?​ អត់​ធ្វើ​បាន​ទេ។​ហើយ​បើ​ចុះ​បញ្ជី​ មិន​មែន​ចុះ​បញ្ជី​នៅ​ឃុំ​បាន​ឯណា៎!​ចុះ​បញ្ជី​អង្គការ​សមាគម​ គឺ​មក​ចុះ​នៅ​មហាផ្ទៃ​បាទ។​ គ្រាន់​តែ​ធ្វើ​ដំណើរ​មក​ ហើយ​អ្នក​នៅ​ដាច់​ស្រយាល​ចុង​កាត់​មាត់​ញក​ ទៅ​ធ្វើ​ម៉េច​បាទ?»​

ការ​ចុះ​បញ្ជី​ថ្មី​ត្រូវ​បង់​ប្រាក់​៣០​ម៉ឺន​រៀល​ ហើយ​ការ​ជូន​ដំណឹង​អំពី​ការ​ផ្លាស់​ប្តូរ​ទីតាំង ​ឬ​ក្បាល​ម៉ាស៊ីន​ដឹកនាំ​អង្គការ​សមាគម​ត្រូវបង់​២០​ម៉ឺន​រៀល។ ​ការ​បង់​ប្រាក់​នេះ​ គឺ​ជា​ផ្នែក​មួយ​នៃ​ការ​បង់​សេវា​រដ្ឋបាល។​នេះ​បើ​តាម​មន្រ្តី​សង្គម​ស៊ីវិល​ដែល​ចូល​រួម​សិក្ខា​សាលា​នេះ។​

លោក ​យង់ គិមអេង​ មាន​ប្រសាសន៍​ថា៖​«គ្រាន់​តែ​មាន​ឆន្ទៈ​ កម្លាំង​ដើម្បី​ចូលរួម​ គំនិត​ដើម្បី​ចូលរួម​ ប៉ុន្តែ​ខ្វះ​ធន​ធាន​ ខ្វះ​ថវិកា។ ​ គាត់​មាន​លុយ​ពីណា?​ មាន​តែ​រក​លុយ​ឯ​ណា?​ហើយ​អ្នក​ណា​ដែល​ស្ម័គ្រ​ចិត្ត​ចេញ​លុយ​៣០​ម៉ឺន​(រៀល) ​ដើម្បី​ចុះ​បញ្ជី​ឧទាហរណ៍? ​ ហើយ​ធ្វើ​ដំណើរ​មក​បាទ​ ហើយ​មក​ប៉ុន្មាន​ម៉ោង​បាទ?​ ហ្នឹង​គឺ​រឿង​ស្មុគ​ស្មាញ​បាទ»។​

លោក​ យង់ គិមអេង​ ឲ្យ​ដឹង​ទៀត​ថា​ ការ​ប្រើ​ប្រាស់​ពាក្យ​ពេចន៍ ​ដូច​ជា​លើក​កម្ពស់​សន្តិភាព​ ឬ​ក៏​ប្រជា​ធិបតេយ្យ​ សម្រាប់​ការ​ចុះ​បញ្ជី​សមាគម​ និង​អង្គការ​ ក៏​ប្រឈម​នឹង​ការ​ចោទ​សួរ​របស់​មន្ត្រី​ទទួល​បន្ទុក​សម្រាប់​ការ​ចុះ​បញ្ជី​អង្គការ​សមាគម​ដែរ។​

«គ្រាន់​តែ​គ្នា​ដាក់​ពាក្យ​ថា​ លើក​កម្ពស់​សន្តិភាព​លើក​កម្ពស់​ប្រជា​ធិបតេយ្យ​ ក៏​មាន​មន្ត្រី​ហ្នឹង​គាត់​សួរ​ បាទ។​ ​ខ្ញុំ​គិត​ថាប្រហែល​ជា​ មិនមែន​ជា​ឆន្ទៈ​របស់​ថ្នាក់​លើ​ ឬ​ក៏​យ៉ាង​ណា​ ឬ​ក៏​ជា​ ការ​យល់​ឃើញ​របស់​មន្ត្រី​ម្នាក់ៗ​ ក៏​មិន​ដឹង។​ ខ្ញុំ​មិន​ដឹង​ថា​ ម៉េច។ ​ គាត់​សួរ​ថា​ចុះ​រាល់​ថ្ងៃ​ឲ្យ​មាន​សន្តិភាព​ បានៗ​ត្រូវ​ការ​លើក​កម្ពស់?​ ហើយ​ដល់​ពេល​ហើយ​ លើក​កម្ពស់​ប្រជា​ធិបតេយ្យ​គាត់​សួរ​ថា​ ចុះ​ឥឡូវ​អត់​មាន​ប្រជា​ធិបតេយ្យ​បាន​ត្រូវកា​រ​លើក​កម្ពស់?...​ការ​កែប្រែ​ទាំង​ពាក្យ​ពេចន៍​របៀប​ហ្នឹង​ទៀត​គឺ​អាហ្នឹង​វា​ជា​បញ្ហា​មួយ​ធំ »។​

ក្រុម​អង្គការ​សមាគម​បាន​ពិនិត្យ​ឃើញ​ថា​មាន​មាត្រា​ចំនួន​១៤​សំខាន់ៗ ​ដែល​ត្រូវ​ការ​កែប្រែ​ ដោយ​សារ​មាត្រា​ទាំង​នេះ​ មាន​លក្ខណៈ​រឹតត្បិត​លើ​ការ​បង្កើត ​និង​ការ​ប្រព្រឹត្ត​ទៅ​របស់​អង្គការ​សមាគម​នៅ​ប្រទេស​កម្ពុជា។​

លោក កន​ សាវាង្ស​ មន្ត្រី​អង្កេត​ការបោះ​ឆ្នោត​របស់​អង្គការ​ (Comfrel) ផ្តល់​បទសម្ភាសន៍​ជាមួយ​វីអូអេ​ នៅ​ទីក្រុង​ភ្នំពេញ​ ថ្ងៃ​២៥ ខែសីហា​ ឆ្នាំ​២០២០។ (ហ៊ុល រស្មី​/វីអូអេ)​
លោក កន​ សាវាង្ស​ មន្ត្រី​អង្កេត​ការបោះ​ឆ្នោត​របស់​អង្គការ​ (Comfrel) ផ្តល់​បទសម្ភាសន៍​ជាមួយ​វីអូអេ​ នៅ​ទីក្រុង​ភ្នំពេញ​ ថ្ងៃ​២៥ ខែសីហា​ ឆ្នាំ​២០២០។ (ហ៊ុល រស្មី​/វីអូអេ)​

លោក​កន សាវាង្ស​ មន្ត្រី​អង្កេត​ការ​បោះ​ឆ្នោត​របស់​អង្គការ​ខុមហ្រ្វែល ​លើក​ឡើង​អំពី​ការ​កំណត់​អព្យាក្រឹត្យ​របស់​អង្គការ​សមាគម​ចំពោះ​គណ​បក្ស​នយោបាយ​ថា ជា​ចំណុច​មិន​ច្បាស់​លាស់ ​ហើយ​បាន​ក្លាយ​ជា​សម្ពាធ​មក​លើ​ប្រតិបត្តិ​ការ​របស់​អង្គការ​សមាគម។

«អ្នក​នយោបាយ​មួយ​ចំនួន​បាន​លើក​ឡើង​អំពី​អង្គការ​សង្គម​ស៊ីវិល​ ដែល​លោក​បាន​បញ្ចេញ​ ដែល​លោក​បាន​ធ្វើ​សកម្មភាព​ ទាក់​ទង​នឹង​សិទ្ធិ​ ឬ​ក៏​លទ្ធិ​ប្រជា​ធិបតេយ្យ​ហ្នឹង​ តែងតែ​លើក​ឡើង​ទាក់ទង​ថា​ ​គណបក្ស អាដេញ​អង្គការ​ពួក​ហ្នឹង​គាំទ្រ​ក្រុម​នេះ​ ​ ក្រុម​នោះ​ជា​ដើម​អ៊ីចឹង»។​

លោក​ប្រាប់​វីអូអេ​នៅ​ក្រៅ​បន្ទប់​សិក្ខាសាលា​បន្ថែម​ថា៖ ​«ឧទាហរណ៍​ទាក់ទង​អង្គការ​ដែល​គេ​ហៅ​ សហគមន៍​ព្រៃឡង់​ដែល​លោក​បាន​ការពារ​ទីកន្លែង​ព្រៃ​ឈើ​នៅ​ក្នុង​ព្រៃឡង់​ ប៉ុន្តែ​មាន​ការ​លើក​ឡើង​អំពី​ផ្សេងៗ​ក្នុង​ការ​ថា​អង្គការ​ហ្នឹង​ធ្វើ​ឲ្យ​ប៉ះពាល់​អី​ផ្សេងៗ​ទៅ ​អំពី​អាជ្ញាធរ​ ឬ​មួយ​ក៏​អំពី​រដ្ឋាភិបាល។​ហ្នឹង​ហើយ​ដែល​ជា​ចំណុច​មួយ​ដែល​យើង​មើល​ឃើញ​ថា​ វា​ជា​បញ្ហា​ប៉ះពាល់​ទៅ​ដល់​ការ​អនុវត្ត​សកម្មភាព»។

លោក​កន សាវាង្ស ​បញ្ជាក់​ទៀត​ថា​ ចាប់តាំង​ពី​ច្បាប់​នេះ​ត្រូវ​បាន​ដាក់​ឲ្យ​ចូល​ជាធរមាន​នោះ​ សកម្ម​ភាព​របស់​អង្គការ​សមាគម​នៅ​តាម​មូល​ដ្ឋាន​ ជា​រឿយៗ​ស្ថិត​ក្រោម​ការ​ឃ្លាំ​មើល​របស់​អាជ្ញាធរ​ ដោយមាន​ការ​ចុះ​មក​ថតរូប​ ស្រង់​បញ្ជី​វត្តមាន​ និង​តម្រូវ​ឲ្យ​មាន​ការ​ជូន​ដំណឹង​ជាមុន​ដល់​អាជ្ញាធរ​ មុន​ពេល​អង្គការ​សង្គម​ស៊ីវិល​ធ្វើ​កម្មវិធី​ជួប​ជុំ​ជា​មួយ​ពលរដ្ឋ។​

ច្បាប់​ស្តីពី​«សមាគម​ និង​អង្គការ​ក្រៅ​រដ្ឋាភិបាល» ​ដែល​មាន​៩​ជំពូក​ និង​៣៩​មាត្រា​ ត្រូវ​បាន​អនុម័ត​ដោយ​រដ្ឋ​សភា​ជាតិ​ កាលពី​ខែ​កក្កដា​ ឆ្នាំ​២០១៥​បន្ទាប់​ពី​មាន​ការ​តវ៉ា​តាំង​ពី​ឆ្នាំ​២០១៣​មក។ ការ​តវ៉ា​ប្រឆាំង​នឹង​សេចក្តី​ព្រាង​ច្បាប់​នេះ​បាន​ធ្វើ​ឡើង​ជា​បន្ត​បន្ទាប់​ពី​សំណាក់​អង្គការ​សង្គម​ស៊ីវិល​មួយ​ចំនួន។​

កញ្ញា ​ប្រាក់​ មុន្នីរត្ន​ ប្រធាន​សមាគម​យុវជន​ខ្មែរ ​ប្រាប់​វីអូអេ ​នៅក្រៅ​សិក្ខាសាលា​ស្តីពី​វិសោធន​កម្ម​ច្បាប់​ស្តីពី​សមាគម ​និង​អង្គការ​ក្រៅរដ្ឋាភិបាល​ថា​ច្បាប់​ដែល​មាន​លក្ខណៈ​ចម្រូង​ចម្រាស​នេះ​ មិន​បាន​លើក​ទឹក​ចិត្ត​យុវជន​ទាំង​នៅ​ថ្នាក់​ខេត្ត ​និង​រាជធានី​ឲ្យ​ចូលរួម​ក្នុង​កិច្ច​ការ​សង្គម​នោះ​ទេ។​

«យុវជន​ខ្លះ​ហ្នឹង​ គាត់​គ្រាន់​តែ​ជា​និស្សិត​មួយ​ដែល​គាត់​ចង់​ចូលរួម​ចំណែក​ក្នុង​ការ​អភិវឌ្ឍ​សង្គម​ជាតិ​របស់​យើង​អ៊ីចឹង។អ៊ីចឹង​ចង់​មិន​ចង់​ នៅ​ពេល​ដែល​យើង​តម្រូវ​ឲ្យ​គាត់​មាន​ការ​បង់​ថវិកា​ ឬក៏​គាត់​មាន​របាយ​ការណ៍​ផ្ញើ​ជូន​មួយ​ចំនួន​ទៅ​កាន់​រាជ​រដ្ឋាភិបាល​អ៊ីចឹង​ វា​ធ្វើ​ឲ្យ​ពេល​ខ្លះ​ ដំណើការ​ទាំង​អស់​ហ្នឹង​មាន​ផល​វិបាក​សម្រាប់​គាត់»។

កញ្ញា ​ប្រាក់ មុន្នីរ័ត្ន​ ប្រធាន​សមាគម​យុវជន​ខ្មែរ ផ្តល់​បទសម្ភាសន៍​ជាមួយ​វីអូអេ​ នៅទីក្រុង​ភ្នំពេញ​ ថ្ងៃ​២៥ ខែសីហា​ ឆ្នាំ​២០២០។ (ហ៊ុល រស្មី​/វីអូអេ)​
កញ្ញា ​ប្រាក់ មុន្នីរ័ត្ន​ ប្រធាន​សមាគម​យុវជន​ខ្មែរ ផ្តល់​បទសម្ភាសន៍​ជាមួយ​វីអូអេ​ នៅទីក្រុង​ភ្នំពេញ​ ថ្ងៃ​២៥ ខែសីហា​ ឆ្នាំ​២០២០។ (ហ៊ុល រស្មី​/វីអូអេ)​

នាយ​ឧត្តម​សេនីយ៍​ខៀវ សុភ័គ​ អ្នក​នាំពាក្យ​ក្រសួង​មហាផ្ទៃ​ មាន​ប្រសាសន៍​ថា​ ក្រុម​អង្គការ​សង្គម​ស៊ីវិល​មួយ​ចំនួន​តែង​តែ​រិះគន់​ច្បាប់​នេះ ​ចាប់​តាំង​ពី​ច្បាប់​នេះ​ស្ថិត​ក្នុង​ដំណាក់​កាល​ព្រាង​នៅ​ឡើយ។​លោក​ថា​ រហូត​មក​ដល់​ពេល​នេះ ​មាន​អង្គការ​សមាគម​ជាតិ​និង​អន្តរ​ជាតិ​ជាង​៥​ពាន់​កំពុង​ដំណើរ​ការ​ក្នុង​ប្រទេស​កម្ពុជា។​

«គ្រាន់តែ​ថាៗ​ទៅ!​ធម្មតា​ចោទ​តាំង​ពី​ដើម​រៀង​មក។​ គាត់​មិន​ដែល​ថា​ មាន​ច្បាប់​ណា​ដែល​គាត់​ពេញ​ចិត្ត​ទេ។​ គាត់​ចោទ​តាំង​ពី​មិន​ទាន់​មាន​ច្បាប់​ ក៏​ធ្វើ​ច្បាប់​ទៅ​[ថា]​រឹត​បន្តឹង​តែ​រហូត​ហ្នឹង!​ ប៉ុន្តែ​ក៏​ចេះ​តែ​មាន​ដំណើរ​ការ​រហូត។​មក​ដល់​ពេល​នេះ​អង្គ​ការ​ក្រៅ​រដ្ឋាភិបាល​មាន​ជាង​៥​ពាន់​ហើយ​ ថ្វី​ដ្បិត​តែ​[គាត់ថា]​ មាន​ការ​មាន​ការ​គាប​សង្កត់​ ឬ​ចោទ​ប្រកាន់​អ៊ីចឹង​មែន»។ ​

វីអូអេ​មិន​អាច​សុំ​ការ​អធិប្បាយ​បន្ថែម​ពី​លោក​មាស សុខសេនសាន ​អ្នក​នាំពាក្យ​ក្រសួង​សេដ្ឋកិច្ច​ និង​ហិរញ្ញ​វត្ថុ​ និង​លោក ​ប៊ុន ហុន ​រដ្ឋ​លេខាធិការ​ក្រសួង​មហា​ផ្ទៃ ​ដែល​ទទួល​បន្ទុក​ខាង​ច្បាប់​នេះ​ បាន​ទេ​នៅ​ថ្ងៃច័ន្ទ​នេះ ​ទាក់​ទង​នឹង​ការ​យក​ថ្លៃ​សេវា​នៃ​ការ​ចុះ​បញ្ជី​អង្គការ​សមាគម ​និង​ការ​ជូន​ដំណឹង​នៃ​ការ​ផ្លាស់​ប្តូរ​រចនា​សម្ព័ន្ធ​ដឹកនាំ​អង្គការ​សមាគម។​

អង្គការ​សង្គម​ស៊ីវិល​លើក​ឡើង​ថា ​ទោះបី​មាន​កិច្ច​ប្រជុំ​ពិគ្រោះ​យោបល់​ចំនួន​៦​លើក​ រវាង​អង្គការ​សង្គម​ស៊ីវិល​ និង​ភាគី​រដ្ឋាភិបាល​ទៅ​លើ​មាត្រា​រឹតត្បិត​នានា​ក៏​ដោយ​ ក៏​មិន​ទាន់​មាន​ការ​ព្រមព្រៀង​លើ​ចំណុច​ណា​មួយ​នោះ​ទេ។ ​ មាត្រា​ទាំង១៤​ដែល​អង្គការ​សង្គម​ស៊ីវិល​សុំ​កែ​ប្រែ​ រួម​មាន​មាត្រា​១​ មាត្រា​៧​ មាត្រា​៨​មាត្រា​៣០ ​មាត្រា៣១​ មាត្រា៣២ ​និង​មាត្រា​៣៥​ជាដើម៕

តួលេខនៃករណីឆ្លងជំងឺកូវីដ១៩

XS
SM
MD
LG