ការប្រយុទ្ធគ្នារវាងក្រុមហាម៉ាស់និងអ៊ីស្រាអែលបានបន្តឡើងវិញហើយក្នុងតំបន់ហ្កាហ្សា។ នេះបើតាមការឱ្យដឹងរបស់កងកម្លាំងការពារអ៊ីស្រាអែលនៅថ្ងៃសុក្រនេះ។
កងទ័ពអ៊ីស្រាអែលបានឱ្យដឹងថា ការបន្តការប្រយុទ្ធគ្នាឡើងវិញនេះ កើតមានឡើងបន្ទាប់ពីមានការបំពានរបស់ក្រុមហាម៉ាស់ទៅលើកិច្ចព្រមព្រៀងឈប់បាញ់គ្នាជាបណ្តោះអាសន្ន ដោយក្រុមសកម្មប្រយុទ្ធនេះបានវាយប្រហារដោយគ្រាប់រ៉ុក្កែតទៅលើអ៊ីស្រាអែល។
យោធាអ៊ីស្រាអែលបាននិយាយលើបណ្តាញសង្គមX ថា ខ្លួនបានបាញ់កម្ទេចគ្រាប់រ៉ុក្កែតដែលបាញ់ចេញពីតំបន់ហ្កាហ្សានោះដោយជោគជ័យ។
គេនៅពុំទាន់ឃើញមានការអះអាងទទួលខុសត្រូវភ្លាមៗពីក្រុមហាម៉ាស់ ជុំវិញការវាយប្រហារដោយគ្រាប់រ៉ុក្កែតនោះឡើយ។
ការវិលត្រឡប់ទៅរកការប្រយុទ្ធគ្នាឡើងវិញនេះកើតមានឡើង ក្រោយពីមានបទឈប់បាញ់គ្នាចំនួន៧ថ្ងៃ ដើម្បីអនុញ្ញាតឱ្យមានការផ្លាស់ប្តូរចំណាប់ខ្មាំងអ៊ីស្រាអែល ដែលក្រុមហាម៉ាសបានចាប់ក្នុងការវាយប្រហារលើអ៊ីស្រាអែលកាលពីថ្ងៃទី៧ ខែតុលាកន្លងទៅ ជាមួយនឹងក្រុមអ្នកទោសជនជាតិប៉ាឡេស្ទីន ដែលអ៊ីស្រាអែលបានឃុំខ្លួន។
កាលពីថ្ងៃព្រហស្បតិ៍ ក្រុមហាម៉ាស់ បានដោះលែងចំណាប់ខ្មាំងអ៊ីស្រាអែលចំនួន៨នាក់ទៀតក្នុងតំបន់ហ្កាហ្សា នៅក្រោមបទឈប់បាញ់ដែលត្រូវបានពន្យារពេល ហើយបន្តិចក្រោយមកអ៊ីស្រាអែលក៏បានដោះលែងអ្នកទោសប៉ាឡេស្ទីនចំនួន៣០នាក់ ខណៈពេលដែលអ្នកចរចាបានព្យាយាម ដើម្បីពន្យារពេលកិច្ចព្រមព្រៀងបទឈប់បាញ់គ្នានោះ។
ស្ត្រីចំណាប់ខ្មាំង២នាក់ត្រូវបានដោះលែងនៅរសៀលថ្ងៃព្រហស្បតិ៍ ហើយ៦នាក់ទៀតត្រូវបានដោះលែងនៅពេលយប់ជ្រៅ។ នេះជាក្រុមចំណាប់ខ្មាំងទី៧ហើយ ដែលត្រូវបានដោះលែងនៅក្រោមកិច្ចព្រមព្រៀងឈប់បាញ់គ្នាជាបណ្តោះអាសន្ន រវាងក្រុមហាម៉ាស់និងអ៊ីស្រាអែល។
រហូតមកដល់ពេលនេះ ក្រុមហាម៉ាស់បានដោះលែងចំណាប់ខ្មាំងអស់ចំនួន១០៥នាក់ហើយ ខណៈអ៊ីស្រាអែលបានដោះលែងអ្នកទោសប៉ាឡេស្ទីនចំនួន២៤០នាក់។
រដ្ឋមន្ត្រីការបរទេសសហរដ្ឋអាមេរិក លោក Antony Blinken បានជួបជាមួយប្រធានាធិបតីអ៊ីស្រាអែល លោក Isaac Herzog ក្នុងទីក្រុង Tel Aviv កាលពីថ្ងៃព្រហស្បតិ៍។ នៅពេលចាប់ផ្តើមកិច្ចប្រជុំនោះលោក Blinken បានប្រាប់ប្រធានាធិបតីអ៊ីស្រាអែលថា សហរដ្ឋអាមេរិកជឿជាក់ថាបទឈប់បាញ់គ្នានោះទទួលបានលទ្ធផលល្អ ហើយវាគួរបន្តទៅមុខទៀត៕
ព័ត៌មានខ្លះសម្រាប់សេចក្តីរាយការណ៍នេះដកស្រង់ពីទីភ្នាក់ងារសារព័ត៌មានAssociated Press, Agence France-Presse និងReuters
