ភ្ជាប់​ទៅ​គេហទំព័រ​ទាក់ទង

៥៨នាក់​ត្រូវ​បាន​សម្លាប់​នៅ​ក្នុង​ការ​ផ្ទុះ​គ្រាប់បែក​នៅ​វិហារ​ Shi'ite ក្នុង​ប្រទេស​បាគីស្ថាន


ក្រុម​អ្នក​ជួយ​សង្រោះ​ដើរ​ចេញ​មក​ខាង​ក្រៅ​ជា​កន្លែង​ដែល​ស្បែក​ជើង​របស់​ជន​រងគ្រោះ​នៅ​រប៉ាត់រប៉ាយ​នៅ​ក្រោយ​ការ​ផ្ទុះ​គ្រាប់បែក​នៅ​ក្នុង​វិហារ​ Shi'ite ក្នុង​ទីក្រុង​ Shikarpur ខេត្ត Sindh ប្រទេស​បាគីស្ថាន កាលពី​ថ្ងៃទី៣០ ខែមករា ឆ្នាំ២០១៥។

អាជ្ញាធរ​បាគីស្ថាន​បាន​និយាយ​ថា​មាន​មនុស្ស​យ៉ាង​តិច​ណាស់​៥៨​នាក់​បាន​ត្រូវ​សម្លាប់​ហើយ​ជាង​៥០​នាក់​ទៀត​បាន​ត្រូវ​របួស​នៅ​ក្នុង​ការ​ផ្ទុះ​គ្រាប់បែក​ខ្លាំង​មួយ​នៅ​ឯ​ព្រះវិហារ Shi'ite មួយ​ក្នុង​ខេត្ត​ Sindh នៅ​ពេល​សូត្រ​ធម៌​កាល​ពី​ថ្ងៃ​សុក្រ។

ការ​ផ្ទុះ​គ្រាប់​បែក​នេះ​បាន​កើត​មាន​ទ្បើង​នៅ​ក្នុង​តំបន់​ Lakidar នៃ​ក្រុង​ Shikarpur ឋិតនៅ​ចម្ងាយ​ប្រមាណ​៤៧០គ.ម.​ខាង​ជើង​ក្រុង​កំពង់ផែ Karachi។ គេ​និយាយ​ថា​មនុស្ស​មួយ​ចំនួន​ក្នុង​ចំណោម​អ្នក​ត្រូវ​របួស​ឋិត​នៅ​ក្នុង​ស្ថានភាព​ធ្ងន់ធ្ងរ។​

ក្រុម Jundallah ដែល​ជា​ក្រុម​មួយ​បំបែក​ខ្លួន​ចេញ​ពី​ក្រុម​តាលីបង់​បាគីស្ថាន​បាន​អះអាង​ទាមទារ​ទទួល​ខុស​ត្រូវ​ដល់​ការ​វាយប្រហារ​នេះ​ដែល​ជា​ការ​វាយ​ប្រហារ​ថ្មី​បំផុត​នៅ​ក្នុង​កំណើន​អំពើ​ហិង្សា​ខាង​និកាយ​សាសនានៅ​ក្នុង​ប្រទេស​បាគីស្ថាន។​

ក្រុម​អ៊ីស្លាម Sunni ជ្រុល​និយម​ជា​ញឹក​ញយ​បាន​យក​ស្ថាប័ន​សាសនា​នៃ​ក្រុម Shi'ites ជា​ទិសដៅ​នៃ​ការ​វាយ​ប្រហារ។ ក្រុម​ Shi'ites មាន​ចំនួន​មួយ​ភាគ​ប្រាំ​នៃ​ប្រជាពលរដ្ឋ​បាគីស្ថាន។​

ក្រុម​ Shi'ites ជាង​៨០០​នាក់​បាន​ត្រូវ​សម្លាប់​នៅ​ក្នុង​ប្រទេស​បាគីស្ថាន​កាល​ពី​ពីរ​ឆ្នាំ​កន្លង​ទៅ​នេះ។​

ប្រទេស​បាគីស្ថាន​បាន​ប្រុង​ប្រយ័ត្ន​ខ្លាំង​អំពី​ការ​វាយប្រហារ​ដោយ​ក្រុម​ជន​សកម្មប្រយុទ្ធ​ចាប់តាំង​ពី​មាន​ការ​វាយ​ប្រហារ​មួយ​ដោយ​ក្រុម​តាលីបង់​កាលពី​ខែ​ធ្នូ​ក្នុង​សាលារៀន​មួយ​ក្នុង​ក្រុង ​Peshawar ដែល​បាន​បណ្តាលឱ្យ​មនុស្ស​១៤៥នាក់​ស្លាប់​ដោយ​ភាគ​ច្រើន​បំផុត​ជា​កុមារ៕

XS
SM
MD
LG