ប៉ូលិសភាគឦសានប្រទេសនីហ្សេរីយ៉ា (Nigeria) និយាយថា ស្រ្តីពីរនាក់ជាអ្នកដាក់គ្រាប់បែកអត្តឃាតត្រូវសហការីម្នាក់ទៀតសម្លាប់កាលពីថ្ងៃសៅរ៍ នៅពេលពួកគេកំពុងសុំឡានជិះទៅកាន់ទីក្រុង Maiduguri។
ប៉ូលិសក្នុងស្រុកនិយាយប្រាប់វីអូអេថា ស្ត្រីទាំងនោះឈរនៅតាមដងផ្លូវ ហើយកំពុងព្យាយាមសុំទៅជាមួយឡានអ្នកដំណើរនៅតំបន់ Jakana ចម្ងាយប្រហែល៤០គ.ម.ភាគខាងលិចទីក្រុង Maiduguri តែអ្នកបើកឡានជាច្រើនមិនបានឈប់ទេ។
ប៉ូលិសនិយាយថា នៅម៉ោងប្រហែល៤និង២០នាទីរសៀលម៉ោងក្នុងស្រុក ប៉ូលិសបានឮស្នូរផ្ទុះយ៉ាងខ្លាំង។ នៅពេលប៉ូលិសទៅដល់កន្លែងកើតហេតុ គេបានឃើញសពស្រ្តីម្នាក់រហែករយ៉ៃដោយសារគ្រាប់បែក។ រីឯស្ត្រីម្នាក់ទៀតដេកស្លាប់ដោយមានគ្រាប់បែកអត្តឃាតមិនទាន់ផ្ទុះនៅជាប់នឹងខ្លួន។
មន្ត្រីប៉ូលិសម្នាក់និយាយថា ប៉ូលិសនៅរង់ចាំអ្នកជំនាញខាងគ្រាប់បែកមកពិនិត្យ និងដោះគ្រាប់បែកនោះ មុនពេលប៉ូលិសប្រមូលសាកសព។ ប៉ូលិសនិយាយថា អ្នកបើកបរនៅក្បែរទីក្រុង Maiduguri មិនហ៊ានឈប់ឡានឲ្យស្រ្តីសុំជិះជាមួយទេ ដោយសារមានរឿងបែបនេះច្រើន៕
