ក្រុមគ្រួសារនិងអ្នកគាំទ្រលោក រ៉ាត់ រត្នមុនី អ្នកបកប្រែភាពយន្តឯកសារ«ម្តាយខ្ញុំលក់ខ្ញុំ»នៅថ្ងៃអង្គារនេះ បានប្រមូលផ្តុំនៅមុខស្ថានទូតរុស្ស៊ីប្រចាំកម្ពុជាដើម្បីដាក់ញត្តិ និងសូមឲ្យមានអន្តរាគមន៍ដោះលែងលោក ក្រោយពីតុលាការសម្រេចឃុំខ្លួន និងចោទប្រកាន់ពីបទ«ញុះញង់ឲ្យមានការរើសអើង»។
អ្នកស្រី ឡុង គឹមហ៊ាង ភរិយារបស់លោក រ៉ាត់ រត្នមុនី ប្រាប់ VOA ក្រោយដាក់ញតិ្តនៅថ្ងៃអង្គារនេះថា ក្រុមគ្រួសារនិងអ្នកគាំទ្រលោក រ៉ាត់ រត្នមុនី ប្រមាណជាង២០នាក់ បានយកញត្តិទៅដាក់នៅស្ថានទូតរុស្ស៊ីដើម្បីស្នើឲ្យមានអន្តរាគមន៍ដោះលែងស្វាមីរបស់អ្នកស្រី ប៉ុន្តែអ្នកស្រីលើកឡើងថា មិនមានអ្នកចេញមកទទួលញត្តិរបស់អ្នកស្រីនោះទេ។ អ្នកស្រីបន្ថែមថា អ្នកស្រីនឹងបន្តប្តឹងទៅស្ថាប័នពាក់ព័ន្ធផ្សេងៗទៀតដើម្បីទាមទារឲ្យមានការដោះលែងស្វាមីរបស់អ្នកស្រី។
អ្នកស្រីបន្ថែមដោយលើកពីមូលហេតុនៃការយកញត្តិទៅដាក់នៅស្ថានទូតរុស្ស៊ីប្រចាំកម្ពុជាយ៉ាងដូច្នេះថា៖
«កាសែតរុស្ស៊ីហ្នឹងគឺជាកាសែតរបស់រដ្ឋាភិបាលរុស្ស៊ី ហេតុដូច្នេះហើយប្តីខ្ញុំត្រូវបានគេចាប់ ហើយគេបញ្ជូនគាត់ទៅក្នុងគុក។ ដូច្នេះហើយខ្ញុំទាមទារឲ្យរដ្ឋាភិបាលរុស្ស៊ីធ្វើការជាមួយរដ្ឋាភិបាលកម្ពុជា ឬក៏ក្រសួងការបរទេសរបស់កម្ពុជាដើម្បីទាមទារឲ្យមានការដោះលែងប្តីខ្ញុំ។ ហើយខ្ញុំអំពាវនាវទៅតុលាការ ឬក៏រដ្ឋាភិបាលកម្ពុជា បើចង់ដឹងថា ខ្សែភាពយន្តហ្នឹងពិត មិនពិត ប្រឌិតយ៉ាងណានោះ សូមឲ្យរដ្ឋាភិបាលកម្ពុជា ក៏ដូចជាតុលាការធ្វើការទាក់ទងទៅបណ្តាញព័ត៌មាន RT ឬក៏រដ្ឋាភិបាលរុស្ស៊ីខ្លួនឯងដោយផ្ទាល់ដើម្បីបំភ្លឺរឿងហ្នឹង»។
អ្នកស្រី ឡុង គឹមហ៊ាង ដែលជាសកម្មជនការពារសិទ្ធិដីធ្លី និងសិទ្ធិលំនៅដ្ឋានបន្ថែមថា ប្រសិនបើរដ្ឋាភិបាលរុស្ស៊ីចេញធ្វើអន្តរាគមន៍ នោះស្វាមីរបស់អ្នកស្រីនឹងត្រូវបានដោះលែង។
វីដេអូឯកសារដែលមានចំណងថា«ម្តាយខ្ញុំលក់ខ្ញុំ»ត្រូវបានផលិតដោយបណ្តាញព័ត៌មានរដ្ឋរបស់ប្រទេសរុស្ស៊ី ឈ្មោះ Russia Today (RT) ពាក់ព័ន្ធនឹងការជួញដូរផ្លូវភេទនៅកម្ពុជា។ ក្រោយវីដេអូនេះត្រូវបានផ្សព្វផ្សាយ រដ្ឋាភិបាលកម្ពុជាបានបង្ហាញការមិនសប្បាយចិត្ត ហើយចោទថា ភាពយន្តឯកសារនោះគឺការប្រឌិតឡើង ធ្វើឲ្យខូចដល់កិត្តិយសរបស់កម្ពុជា។
លោក រ៉ាត់ រត្នមុនី សកម្មជនសិទ្ធិពលករ និងជាអ្នកបកប្រែក្នុងការផលិតវីដេអូឯកសារ«ម្តាយខ្ញុំលក់ខ្ញុំ»បានរត់ភៀសខ្លួនទៅទីក្រុងបាងកក ដើម្បីគេចពីការចាប់ខ្លួនដោយអាជ្ញាធរកម្ពុជា និងរង់ចាំទិដ្ឋាការសុំសិទ្ធិជ្រកកោននៅប្រទេសហូរឡង់។ ប៉ុន្តែលោកត្រូវបានប៉ូលិសថៃចាប់ខ្លួននៅក្នុងទីក្រុងបាងកកនិងបញ្ជូនមកកម្ពុជាវិញកាលពីដើមខែធ្នូនេះ ហើយត្រូវបានសាលាដំបូងរាជធានីភ្នំពេញចោទប្រកាន់ពីបទ «ញុះញង់ឲ្យមានការរើសអើង»តាមមាត្រា៤៩៦នៃក្រមព្រហ្មទណ្ឌ។ យោងតាមមាត្រានេះ លោក រ៉ាត់ រត្នមុនី អាចនឹងត្រូវជាប់ពន្ធនាគារពីមួយឆ្នាំទៅបីឆ្នាំ ប្រសិនបើតុលាការរកឃើញថា លោកមានទោស។
VOAបានព្យាយាមទាក់ទងសុំការអត្ថាធិប្បាយពីលោក Vitaly Malikov មន្រ្តីអនុព័ន្ធស្ថានទូតរុស្ស៊ីប្រចាំកម្ពុជា តែរហូតមកដល់ល្ងាចថ្ងៃអង្គារនេះមិនមានការឆ្លើយតបនៅឡើយទេ។
អ្នកស្រី ឡុង គឹមហ៊ាង ក៏បានស្នើជាថ្មីទៀតឲ្យអាជ្ញាធរកម្ពុជាសួរទៅខាងបណ្តាញព័ត៌មាន Russia Today និងស្ថានទូតរុស្ស៊ីដើម្បីបញ្ជាក់អំពីការផលិតវីដេអូឯកសារដែលឈានដល់ការចោទប្រកាន់ស្វាមីរបស់អ្នកស្រីនោះ។
នាយឧត្តមសេនីយ៍ ខៀវ សុភ័គ អ្នកនាំពាក្យក្រសួងមហាផ្ទៃ ថ្លែងថា លោកកំពុងជាប់ប្រជុំ មិនអាចឆ្លើយសំណួរបានទេ។ ចំណែកការទាក់ទងទៅទូរស័ព្ទរបស់លោក អ៊ី រិន្ទ អ្នកនាំពាក្យសាលាដំបូងរាជធានីភ្នំពេញ មិនមានអ្នកទទួល។
យ៉ាងណាក្តីអ្នកស្រី ជូ ប៊ុនអេង អនុប្រធានអចិន្ត្រៃយ៍នៃគណៈកម្មាធិការជាតិប្រឆាំងនឹងការជួញដូរមនុស្សនិងផ្លូវភេទលើស្ត្រីនិងកុមារនៃក្រសួងមហាផ្ទៃ បានប្រាប់ VOA កាលពីសប្តាហ៍មុនថា ខ្សែវីដេអូដែលផលិតឡើងដោយមានលោក រ៉ាត់ រត្នមុនី ជាអ្នកបកប្រែសម្រួលនោះគឺមានការបំភ័ន្តការពិត ដែលប៉ះពាល់ដល់សាម៉ីខ្លួនជាអ្នកផ្តល់សម្ភាសន៍ និងធ្វើឲ្យខូចកេរ្តិ៍ឈ្មោះរបស់សាលារៀនក៏ដូចជាក្រសួងអប់រំ។
បើតាមអត្ថបទមួយរបស់បណ្តាញព័ត៌មាន RT ដែលផ្សាយអំពីការចាប់ខ្លួនលោក រ៉ាត់ រត្នមុនី កាលពីថ្ងៃទី១៣ ខែធ្នូ បានស្រង់សម្តីរបស់លោក Pavel Burnatov អ្នកផលិតខ្សែភាពយន្តឯកសារនោះថា លោក Pavel Burnatov សង្ស័យថា ក្មេងស្រីក្នុងខ្សែវីដេអូនោះត្រូវបានប៉ូលិសបង្ខំឲ្យនិយាយថា នាងត្រូវបានគេផ្តល់លុយក្នុងការផ្តល់សម្ភាសន៍ជាថ្នូរនឹងការមិនចាប់ខ្លួនម្តាយរបស់នាង។ លោក Pavel ត្រូវបានបណ្តាញព័ត៌មាន RT ស្រង់សម្តីបន្ថែមថា ក្រុមការងារផលិតខ្សែភាពយន្តនោះមិនបានផ្តល់ប្រាក់ណាមួយជាថ្នូរនឹងការឲ្យសម្ភាសន៍ក្មេងស្រីនោះទេ និងថា ក្រុមការងាររបស់លោកទទួលបានការអនុញ្ញាត និងបានធ្វើការយ៉ាងជិតស្និទ្ធជាមួយអាជ្ញាធរមូលដ្ឋានដែលបានដឹងច្បាស់អំពីលក្ខណៈនៃឯកសារនេះ។
ក្នុងសារអេឡិចត្រូនិចមួយដែលឆ្លើយតបមក VOA កាលពីយប់ថ្ងៃចន្ទ ដោយមន្រ្តីព័ត៌មានដែលមិនបញ្ចេញឈ្មោះរបស់បណ្តាញព័ត៌មាន RT បានសរសេរតាមន័យដើមជាភាសាអង់គ្លេស និងត្រូវបានប្រែសម្រួលជាភាសាខ្មែរថា៖
«យើង [បណ្តាញព័ត៌មាន RT] មានការព្រួយបារម្ភយ៉ាងខ្លាំងចំពោះការឃុំឃាំងលោកមុនី និងបានធ្វើអ្វីៗគ្រប់យ៉ាងដែលយើងអាចធ្វើបានដើម្បីជួយដោះស្រាយស្ថានភាពនេះ រួមទាំងតាមរយៈបណ្តាញទូត។ យើងមានទំនាក់ទំនងជាប្រចាំជាមួយគ្រួសាររបស់លោកមុនី ហើយនឹងបន្តគាំទ្រពួកគេតាមវិធីណាដែលអាចធ្វើទៅបាន»។
ក្រោយពីមានការចាប់ខ្លួនលោក រ៉ាត់ រត្នមុនី បញ្ជូនពីប្រទេសថៃមកកម្ពុជាវិញ និងក្រោយពីមានការចោទប្រកាន់ពាក់ព័ន្ធនឹងបទញុះញង់ឲ្យមានការរើសអើង គេឃើញអង្គការការពារសិទ្ធិមនុស្សទាំងជាតិ និងអន្តរជាតិប្រតិកម្មថា វិធានការនេះធ្វើឡើងដោយមិនត្រឹមត្រូវ និងអំពាវនាវឲ្យមានការទម្លាក់ចោលបទចោទលើលោក រ៉ាត់ រត្នមុនី៕
