ភ្ជាប់​ទៅ​គេហទំព័រ​ទាក់ទង

site logo
ព័ត៌មាន​​ថ្មី

តើវិសោធនកម្ម​ទី ២៥ ​​នៃ​រដ្ឋធម្មនុញ្ញ​​សហរដ្ឋអាមេរិក​​ មាន​​ដំណើរការ​យ៉ា​ងដូចម្តេច?


រូបឯកសារ៖ ត្រាតំណាងប្រធានាធិបតីសហរដ្ឋអាមេរិក ត្រូវបានបិទលើវេទិកាថ្លែងសុន្ទរកថាសម្រាប់ប្រធានាធិបតីសហរដ្ឋអាមេរិក នៅទីក្រុង Tampa រដ្ឋ Florida កាលពីថ្ងៃទី៦ ខែធ្នូ ឆ្នាំ២០១៦។

វិសោធនកម្ម​ទី ២៥ នៃរដ្ឋធម្មនុញ្ញសហរដ្ឋអាមេរិកចែងយ៉ាងលម្អិត អំពីនីតិវិធីតែងតាំងតំណែងជំនួសប្រធានាធិបតី ឬ​អនុប្រធានាធិបតីនៅពេល ដែល​អ្នក​ណា​ម្នាក់ក្នុង​ចំណោម​អ្នក​ទាំងពីរ ​មិន​អាចបំពេញភារកិច្ចបាន។

ហេតុផលដើម្បីជំនួស​តំណែងប្រមុខរដ្ឋ ឬអនុប្រធានាធិបតីដែល​ជាមន្រ្តី​ជាន់ខ្ពស់​បំផុត​ គឺរួមមានការ​បាត់បង់ជីវិត​ ការបណ្តេញ​ចេញពីតំណែង​ ការ​លាលែង​ពី​តំណែង ​ឬ​អសមត្ថភាព​បំពេញ​ការងារ។

ឧទាហរណ៍ដូច​ជាការ​ធ្វើឃាត​លោកអតីតប្រធានាធិបតី John F. Kennedy កាល​ពី​ខែវិច្ឆិកា ឆ្នាំ ១៩៦៣ និង​ការលាលែង​ពីតំ​ណែង​របស់​អតីត​ប្រធានាធិបតី​លោក​ Richard Nixon កាល​ពីឆ្នាំ ១៩៧៤ ដោយសារ​មានរឿងអាស្រូវ Watergate។

ការពិភាក្សា​អំពី​វិសោធនកម្ម​ទី ២៥​ ត្រូវបាន​ធ្វើឡើង​ជាថ្មី​ បន្ទាប់​ពីការប្រកាស​កាលពី​ព្រឹកថ្ងៃ​សុក្រ​សប្តាហ៍​មុនថា​ លោកប្រធានាធិបតី Donald Trump បានឆ្លង​ជំងឺ​កូវីដ១៩ ដែលបង្កឡើងដោយវីរុសកូរ៉ូណា។ ភរិយារបស់​លោក​គឺលោកស្រី Melania​Trump ​ក៏បានឆ្លងជំងឺកូវីដ១៩ ដែរ។

សេតវិមាន​កាល​ពី​ថ្ងៃសុក្រ​បានប្រកាស​ថា លោក Trump ​មាន​រោគសញ្ញាកម្រិត​ស្រាល។

អ្នកនាំពាក្យម្នាក់​បាន​និយាយ​កាល​ពី​ថ្ងៃសុក្រ​ថា ​អនុប្រធានាធិបតី​លោក Mike Pence និង​ភរិយា​របស់លោក គឺលោកស្រី Karen Pence បាន​ធ្វើ​តេស្ត និង​មាន​លទ្ធផល​អវិជ្ជមាន។

នៅក្រោម​វិសោធនកម្មទី ២៥ ​ប្រសិនបើ​លោក Trump​ ធ្លាក់​ខ្លួន​ឈឺធ្ងន់​ នោះ​លោក​អា​ចលើក​យក​វិសោធនកម្មទី ២៥ ​នៃរដ្ឋធម្មនុញ្ញ​ មកប្រើ​ដោយ​ផ្តល់​អំ​ណាចបណ្តោះអាសន្នទៅ​ឲ្យ​លោក Pence ធ្វើ​ជា​ប្រធានាធិបតី​ស្តីទី។

ដើម្បី​ធ្វើដូច្នេះ​បាន ​លោក​នឹង​ត្រូវ​ផ្ញើ​លិខិតបញ្ជាក់ទៅប្រធានព្រឹទ្ធសភា ដែល​មាន​ឋានៈ​លំដាប់ទីពីរ​ខាង​គណបក្ស​សាធារណៈរដ្ឋ​ គឺលោក Chuck Grassley និង​ប្រធាន​រដ្ឋសភា​លោកស្រី Nancy Pelosi ខាង​គណបក្ស​ប្រជាធិបតេយ្យ។

មន្រ្តីសេតវិមាន​ម្នាក់​និយាយ​ថា​៖ «​យើង​ស្ថិត​នៅ​ឆ្ងាយ ​ពី​ស្ថានភាព​នោះ​ខ្លាំងណាស់»។

វិសោធនកម្ម​នេះ​ក៏​ចែង​ដែរ​ថា ​អនុប្រធានាធិបតី​និងសំឡេង​ភាគច្រើន​នៅក្នុងគណៈរដ្ឋមន្រ្តី​ ឬ​នៅ​ក្នុង​សភា​ អាច​សម្រេច​ដកមេដឹកនាំ​សហរដ្ឋ​អាមេរិក នៅពេល​ដែល​ប្រធានាធិបតីមិនអាចបំពេញភារកិច្ចបាន ​ហើយ​ភ្លាមៗ​ត្រូវ​តែងតាំង​អនុប្រធានាធិបតី ​ឲ្យកាន់តំណែងបន្ត។

ប្រសិនបើ​ប្រធានាធិបតី​អាច​ត្រឡប់​មក​ធ្វើការវិញ​បាន​ នោះ​លោក​ត្រូវ​ប្រកាស​ជាលាយលក្ខណ៍អក្សរ​ទៅកាន់​ប្រធាន​ព្រឹទ្ធសភា ​និ​ងប្រធានរដ្ឋសភាអំពី​សមត្ថភាពផ្លូវកាយ ​និង​ផ្លូវចិត្តរបស់​លោកថា អាច​ចូល​បំពេញ​ភារកិច្ច​វិញបាន។

ប្រធានាធិបតី​អាច​ចូល​កាន់តំណែង​វិញ​បាន​ លើកលែង​តែអនុប្រធានាធិបតី និង​សំឡេងភាគច្រើន​នៅក្នុង​គណៈរដ្ឋមន្រ្តី ជូនដំណឹង​ទៅ​សភា​ជាលាយលក្ខណ៍អក្សរ​ ក្នុង​រយៈពេល ៤ ថ្ងៃ​ បន្ទាប់​ពី​ការ​ជូនដំណឹង​របស់​ប្រធានាធិបតី​ថា ប្រធានាធិបតី​នៅតែ​មិន​អាច​បំពេញ​ភារកិច្ច​បាន។ បន្ទាប់​មក​ សភា​នឹង​កោះប្រជុំ​ក្នុងរ​យៈពេល ៤៨ ម៉ោង ​និង​បើក​កិច្ចពិភាក្សាអាច​រហូត​ដល់ ​២១ ថ្ងៃ។

ការសម្រេច​ណា​មួយ​របស់​សភា​ថា ​ប្រធានាធិបតី​មិនអាច​បំពេញ​ភារកិច្ច​បាន​នោះ ត្រូវ​តែ​សម្រេច​ដោយ​សំឡេង​ភាគច្រើន​ ២ ភាគ ៣ ​ទាំង​នៅក្នុង​រដ្ឋសភា ​និង​ព្រឹទ្ធសភា។

ប្រសិនបើ​មិន​ទទួល​បាន​សំឡេង ២ ភាគ ៣ ទេ​ នោះ​ប្រធានាធិបតី ​នឹង​ត្រូវ​អនុញ្ញាត​ឲ្យ​ត្រឡប់ចូល​កាន់​តំណែង​វិញ៕

ប្រែសម្រួលដោយ ស៊ូ ពេជ្រចិន្តា

XS
SM
MD
LG