ភ្ជាប់​ទៅ​គេហទំព័រ​ទាក់ទង

ក្រុម​អ្នក​ជំនាញយល់​ថា​ពិភពលោក​នឹង​ទទួល​ផល​ប៉ះ​ពាល់​ពី​ភាព​រាំង​ស្ងួត​ដ៏​អាក្រក់​បំផុត​នៅ​ក្នុង​​រដ្ឋ​តិចសាស់


ត្រី​ងាប់​នៅជិត​ទូកក្តោង​ដោយសារ​ការរាំង​ស្ងួត​យ៉ាង​ខ្លាំង​នៅ​បឹង​ Benbrook​ រដ្ឋ ​Texas​ ថ្ងៃទី​១៦​ ខែ​សីហា​ ឆ្នាំ​២​០១១។

សេចក្តី​រាយការណ៍​មួយ​ ចេញ​ផ្សាយ​កាល​ពី​ថ្ងៃ​ពុធ ​ដោយ​ទី​ភ្នាក់​ងារ​មួយ​របស់​រដ្ឋ​ តិចសាស់​ (Texas)​ នៅ​ភាគ​នីរតី​នៃ​សហរដ្ឋ​អាមេរិក​ ហៅ​ Texas​ Agrilife​ Extension​ Service​ បង្ហាញ​ថា​ ភាព​រាំង​ស្ងួត​នៅ​ក្នុង​រដ្ឋ​នេះ​ មាន​សភាព​ធ្ងន់​ធ្ងរ​ជា​ទី​បំផុត​ក្នុង​ប្រវត្តិសាស្រ្ត​ ហើយ​ថា​ផលិតផល​កសិកម្ម​បាន​ថយ​ចុះ​ដោយ​សារ​តែ​ភាព​រាំង​ស្ងួត​នេះ​ ដែល​ជា​ព័ត៌មាន​អាក្រក់​មួយ​សម្រាប់​អ្នក​ប្រើ​ប្រាស់​នៅ​ជុំវិញ​ពិភពលោក។

រដ្ឋ​ តិចសាស់ ​(Texas)​ ជាង​ ៩០​ភាគរយ​កំពុង​ទទួល​ផល​ប៉ះ​ពាល់​ពី​ភាព​រាំង​ស្ងួត​ដ៏​ធ្ងន់​ធ្ងរ​ ឬ​ដ៏​អាក្រក់​បំផុត។​ សេដ្ឋវិទូ​ ដេវិត​ អានដឺរសុន​(David​ Anderson)​ បាន​និយាយ​ប្រាប់​វីអូអេ​ តាម​រយៈ​សេវា​ ស្កែព​ (Skype)​ ពី​ការិយាល័យ​របស់​លោក​នៅ​ទី​ភ្នាក់​ងារ​ Texas​ Agrilife​ Extension​ Service​ ក្នុង​សាកលវិទ្យាល័យ​ តិចសាស់​ អេ​&​អិម​ (Texas​ A&M)​ ថា​ ការ​ខូច​ខាត​មាន​ចំនួន​លើស​ពី​ឆ្នាំ​ណាៗ​ទាំង​អស់។

«រហូត​មក​ទល់​និង​ថ្ងៃ​ទី​ ១​ ខែ​សីហា​ ការ​កាក់​ស្មាន​អំពី​ផល​ប៉ះ​ពាល់​នៃ​ភាព​រាំង​ស្ងួត​មាន​ចំនួន​ ៥​ពាន់​ ២​រយ​លាន​ដុល្លារ។​ ការ​ខូច​ខាត​នេះ​មាន​រួម​ទាំង​សត្វ​ពាហណៈ​និង​ដំណាំ។​ ចំនួន​នេះ​ច្រើន​ជាង​ការ​ខូច​ខាត​ក្នុង​ឆ្នាំ​ ២០០៦​ ដែល​មាន​ចំនួន​ ៤​ពាន់​ ១​រយ​លាន​ដុល្លារ។​ ដូច្នេះ​យើង​មាន​ការ​ខូច​ខាត​ជាង​មួយ​ពាន់​លាន​ដុល្លារ​លើស​ពី​ឆ្នាំ​ ២០០៦»។

លោក​ អានដឺរសុន​ ថ្លែង​ថា​ ការ​ខូច​ខាត​សត្វ​ពាហណៈ​មាន​ចំនួន​ប្រហែល​ ២​ពាន់​លាន​ដុល្លារ។​ អ្នក​ចំការ​និង​កសិករ​ជា​ច្រើន​នាក់​បាន​លក់​សត្វ​ទាំង​ហ្វូងៗ​ ដោយ​មក​ពី​តំបន់​ខ្លះ​មិន​មាន​ទឹក​គ្រប់​គ្រាន់​ ហើយ​ដោយ​សារ​ផលិតកម្ម​ចំបើង​នៅ​ក្នុង​រដ្ឋ​ធ្លាក់​ចុះ​ទាប​ពេក​ ដែល​បង្ខំ​ឲ្យ​ពួក​គេទិញ​ចំបើង​ថ្លៃ​ខ្ពស់​ពី​រដ្ឋ​ក្រៅ​ ដើម្បី​ចិញ្ចឹម​សត្វ​របស់​គេ។

លោក​ ដេវិត​ អានដឺរសុន​ និយាយ​ថា​ចំនួន​សត្វ​ចុះ​ថយ​ដែល​បណ្តាល​ពី​ភាព​រាំង​ស្ងួត​ នឹង​មាន​ផល​ប៉ះពាល់​ទៅ​លើ​ចំនួន​សាច់​គោ​នៅ​ពាស​ពេញ​ពិភពលោក​ ក្នុង​រយៈ​ពេល​យូរ​ទៅ​ថ្ងៃ​មុខ​ទៀត។

«យើង​ជា​ប្រទេស​លក់​សាច់​គោ​ចេញ​ទៅ​បរទេស​ដ៏​ធំ​មួយ។​ រដ្ឋ​ តិចសាស់​ ជា​អ្នក​ផលិត​សាច់​គោ​ច្រើន​ជាង​គេ​នៅ​ក្នុង​សហរដ្ឋ​អាមេរិក។​ យើង​មាន​ហ្វូង​សត្វ​គោ​ដ៏​ធំ​បំផុត​នៅ​ក្នុង​សហរដ្ឋ​អាមេរិក​ ច្រើន​ជាង​រដ្ឋ​ណា​ទាំង​អស់។​ ដូច្នេះ​ ផល​ប៉ះ​ពាល់​មួ​យ​ក្នុង​ពេល​អនាគត​គឺ​សាច់​គោ​នឹង​ឡើង​ថ្លៃ»។

លោក​ អានដឺរសុន​ ពន្យល់​ថា​ រដ្ឋ​ តិចសាស់​ មិន​ផលិត​ពោត​ដែល​ដាំ​នៅ​ក្នុង​សហរដ្ឋ​អាមេរិក​ច្រើន​ប៉ុន្មាន​ទេ​ ក៏​ប៉ុន្តែ​ផលិតកម្ម​ធ្លាក់​ចុះ​ ៣០​ភាគរយ​នៅ​ក្នុង​រដ្ឋ​នេះ​ នឹង​មាន​ផល​ប៉ះ​ពាល់​ទៅ​លើ​ទី​ផ្សារ​អន្តរជាតិ​ ដែល​ត្រូវ​ការ​ពោត​យ៉ាង​ច្រើន។

រដ្ឋ​ តិចសាស់​ ក៏​ជា​រដ្ឋ​ផលិត​ស្រូវ​សាលី​មួយ​ដែរ។​ លោក​ អានដឺរសុន​ និយាយ​ថា​ សេចក្តី​ព្រួយ​បារម្ភ​ឥឡូវ​នេះ​គឺ​ថា​តើ​ទឹក​ភ្លៀង​នឹង​មាន​ធ្លាក់​ទាន់​ពេល​វេលា​ដើម្បី​ជួយ​ស្រោច​ស្រង់​ដំណាំ​ស្រូវ​សាលី​នៅ​ឆ្នាំ​ក្រោយ​បាន​ឬ​ទេ។

«ស្រូវ​សាលី​ជា​ច្រើន​ដែល​ដាំ​នៅ​ក្នុង​រដ្ឋ​ តិចសាស់​ ត្រូវ​បណ្តុះ​នៅ​រដូវ​ស្លឹក​ឈើ​ជ្រុះ​ ហើយ​ឥឡូវ​នេះ​យើង​កំពុង​តែ​ខិត​ជិត​ដល់​ពេល​ដែល​យើង​ត្រូវ​ការ​ភ្លៀង​ហើយ​ ដើម្បី​ឲ្យ​សើម​ដី​ យ៉ាង​ហោច​ណាស់​ឲ្យ​យើង​អាច​ប្រុង​ប្រៀប​ខ្លួន​ដើម្បី​ដាំ​ស្រូវ​សាលី​ដែល​យើង​នឹង​អាច​ច្រូត​កាត់​បាន​នៅ​ឆ្នាំ​ក្រោយ»។

ភាព​រាំង​ស្ងួត​មិន​ជា​រឿង​ថ្មី​ទេ​សម្រាប់​រដ្ឋ​ តិចសាស់។​ រដ្ឋ​ ផ្កាយ​តែ​មួយ​ (Lone Star)​ នេះ​ ទទួល​រង​ការ​រាំង​ស្ងួត​ជា​ច្រើន​ដង​មក​ហើយ។​ តែ​ភាព​រាំង​ស្ងួត​ដ៏យូរ​ជាង​គេ​បំផុត ​ បាន​កើត​មានក្នុង​រយៈ​ពេល​ជា​ច្រើន​ឆ្នាំ​ ដែល​បានចាប់​ផ្តើម​ពី​ឆ្នាំ​ ១៩៤៩​ ទៅ​ដល់​ឆ្នាំ​ ១៩៥៧។​ ភាព​រាំង​ស្ងួត​ក្នុង​ពេល​ប៉ុន្មាន​ឆ្នាំ​ថ្មីៗ​នេះ​មិន​មាន​រយៈ​ពេល​យូរ​ដូច​នោះ​ទេ​ ក៏​ប៉ុន្តែ​បាន​កើត​មាន​ជា​ញឹក​ញាប់​ ដែល​ធ្វើ​ឲ្យ​រំខាន​ដល់​ផលិតផល​កសិកម្ម​ ហើយ​បង្ខំ​ឲ្យ​ផលិតករ​ខ្លះ​ឈប់​ប្រកប​អាជីវកម្ម។

លោក​ ដេវិត​ អានដឺរសុន​ និយាយ​ថា​ មនុស្ស​ភាគ​ច្រើន​ដែល​ប្រកប​របរ​កសិកម្ម​នៅ​ក្នុង​រដ្ឋ​មួយ​ដែល​មាន​ធាតុ​អាកាស​មិន​ទៀង​ទាត់​នេះ​ ដឹង​អំពី​គ្រោះ​ថ្នាក់​ ហើយ​ព្យាយាម​ដោះស្រាយ​បញ្ហា​នេះ។

«នេះ​ជា​រដ្ឋ​មួយ​ដែលពិត​ជា​មាន​ធាតុ​អាកាស​និង​បរិយាកាស​មិន​ទៀង​ទាត់​ទាល់​តែ​សោះ។​ ហើយ​ខ្ញុំ​គិត​ថា​កសករ​និង​អ្នក​ចំការ​ដឹង​អំពី​រឿង​នេះ​ ហើយ​ពួក​គេ​ធ្វើ​អាជីវកម្ម​សម្រប​ទៅ​តាម​ស្ថានភាព​ទាំង​នេះ។​ នៅ​ពេល​ដែល​យើង​មាន​ភាព​រាំង​ស្ងួត​កើត​ឡើង​ យើង​ក៏​មាន​ឆ្នាំ​ល្អ​មួយ​ដែរ​ ដែល​ជា​ចាំ​បាច់​អាច​ជួយ​ឲ្យយើង​ឆ្លង​កាត់ឆ្នាំ​អាក្រក់​ទាំង​នោះ​បាន​ដែរ»។

តាម​ធម្មតា​ ពេល​នេះជា​ពេល​ដែល​មនុស្ស​រស់​នៅ​ក្បែរ​ឆ្នេរ​ឈូង​សមុទ្រ​ម៉េចស៊ីក​ (Gulf​ of​ Mexico)​ ត្រូវ​ព្រួយ​បារម្ភ​អំពី​ខ្យល់​ព្យុះ​និវន្ត​និង​ខ្យល់​ព្យុះ​សង្ឃរា។​ តែ​ឆ្នាំ​នេះ​ អ្នក​ស្រុក​រីង​ស្ងួតក្នុង​រដ្ឋ​ តិចសាស់​ សង្ឃឹម​ថា​ខ្យល់​ព្យុះ​មួយ​នឹង​នាំ​យក​ទឹក​ភ្លៀង​ដែល​ត្រូវ​ការ​យ៉ាង​ខ្លាំង​មក​ឲ្យ​ពួក​គេ​ក្នុង​ពេល​ឆាប់ៗ​នេះ៕

ប្រែ​សម្រួល​ដោយ​ កែរ យ៉ាន

XS
SM
MD
LG