ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

អ្នក​ជំនាញ​មាន​ចម្ងល់​ចំពោះ​ការ​ផ្ដោត​របស់​លោក Trump លើ​តំបន់​ប្រេង​ក្នុង​ប្រទេស​ស៊ីរី


លោក​ប្រធានាធិបតី​អាមេរិក ដូណាល់ ត្រាំ ថ្លែង​ទៅ​កាន់​អ្នកសារព័ត៌មាន នៅ​សេតវិមាន ក្នុង​រដ្ឋធានី​វ៉ាស៊ីនតោន កាលពី​ថ្ងៃទី៣ ខែវិច្ឆិកា ឆ្នាំ២០១៩។

ប្រធានាធិបតី​សហរដ្ឋ​អាមេរិក​លោក Donald Trump បាន​ចាត់ទុក​ការ​ការពារ​ធនធាន​ប្រេង​របស់​ប្រទេស​ស៊ីរី​ថា​ជា​អាទិភាព​ចម្បង និង​បាន​ពង្រាយ​ទាហាន​អាមេរិកាំង​ទៅ​កាន់​តំបន់​ប្រេង​នានា ទោះបីជា​លោក​បាន​ដក​កង​ទ័ព​សហរដ្ឋ​អាមេរិក​ចេញ​ពី​តំបន់​ព្រំដែន​ជាប់​ប្រទេស​តួកគី​ក៏​ដោយ។

ពួក​ជនជាតិ Kurd បាន​ឆ្លើយតប​ទាំង​ខឹង​សម្បា​លើ​ការណ៍​ដែល​កង​ទ័ព​សហរដ្ឋ​អាមេរិក​បោះបង់​ខ្លួន​ចោល​នៅ​ក្នុង​ប្រទេស​ស៊ីរី ដោយ​ពួកគេ​បាន​សង្កត់​ធ្ងន់​ចំពោះ​ការ​រិះគន់​ជា​ទូទៅ​លើ​ការ​សម្រេច​របស់​ប្រធានាធិបតី​សហរដ្ឋ​អាមេរិក​លោក Donald Trump នៅ​ក្នុង​ការ​ដក​ទាហាន​អាមេរិកាំង​ចេញ​ពី​ប្រទេស​ស៊ីរី នៅ​ពេល​ដែល​តួកគី​កំពុង​ធ្វើ​ការ​លុកលុយ។

លោក Trump និយាយ​ថា៖ «អ្នក​ដឹង​ទេ ប្រេង​គឺ​មាន​តម្លៃ​ណាស់​ដោយសារ​មូលហេតុ​ជា​ច្រើន។ មូលហេតុ​ទី​មួយ​គឺ​វា​ជួយ​ផ្គត់ផ្គង់​ដល់​ពួក ISIS។ មូលហេតុ​ទី​ពីរ​គឺ​វា​ជួយ​ពួក Kurd ដោយសារតែ​វា​ធ្លាប់​ត្រូវ​បាន​គេ​ដណ្ដើម​យក​ពី​ពួក Kurd ហើយ​មូលហេតុ​ទី​បី គឺ​វា​អាច​ជួយ​សហរដ្ឋ​អាមេរិក​បាន ដោយសារតែ​សហរដ្ឋ​អាមេរិក​អាច​ទទួល​បាន​ចំណែក​មួយ​ចំនួន​ផង​ដែរ។ អ្វី​ដែល​ខ្ញុំ​ប្រហែល​ជា​ចង់​ធ្វើ​នោះ​គឺ​ការ​ចុះ​កិច្ច​ព្រមព្រៀង​ជាមួយ​នឹង​ក្រុមហ៊ុន Exxon Mobil ឬ​ក៏​ជាមួយ​នឹង​ក្រុមហ៊ុន​ប្រេង​ដ៏​អស្ចារ្យ​ណា​មួយ​របស់​សហរដ្ឋ​អាមេរិក ដើម្បី​ឲ្យ​ទៅ​ធ្វើ​អាជីវកម្ម​ប្រេង​ដ៏​ត្រឹមត្រូវ​នៅ​ទី​នោះ‍»។

រដ្ឋមន្ត្រី​ក្រសួង​ការពារ​ប្រទេស​សហរដ្ឋ​អាមេរិក​លោក Mark Esper ក៏​បាន​ពន្យល់​បន្ថែម​អំពី​ហេតុ​ផល​នេះ​ដែរ។

លោក Esper បញ្ជាក់​ដូច្នេះ​ថា៖ «ឥឡូវ​នេះ ពួក​យើង​កំពុងតែ​ចាត់​វិធានការ​មួយ​ចំនួន ដែល​ខ្ញុំ​នឹង​មិន​និយាយ​លម្អិត​នោះ​ទេ ដើម្បី​ពង្រឹង​ជំហរ​របស់​ពួក​យើង​នៅ​ទីក្រុង Deir al-Zor ដើម្បី​ធានា​ថា យើង​អាច​រារាំង​លទ្ធភាព​របស់​ពួក ISIS មិន​ឲ្យ​ចូល​ទៅ​កាន់​តំបន់​ប្រេង​បាន ដោយសារតែ​ពួក​យើង​ចង់​ធ្វើ​ឲ្យ​ច្បាស់​ថា ពួក ISIS ពិតជា​មិន​អាច​មាន​លទ្ធភាព​ចូល​យក​ធនធាន​ទាំង​នោះ​បាន ដែល​ធនធាន​ទាំង​នោះ​អាច​ជួយ​ពួកគេ​ឲ្យ​ធ្វើ​ការ​វាយ​ប្រហារ​នៅ​ក្នុង​តំបន់ លើ​ទ្វីប​អឺរ៉ុប និង​លើ​សហរដ្ឋ​អាមេរិក​បាន‍»។

ពួក​សកម្ម​ប្រយុទ្ធ​រដ្ឋ​ឥស្លាម​បាន​ពឹង​ផ្អែក​លើ​ប្រេង​នេះ​កាល​ពី​ប៉ុន្មាន​ឆ្នាំ​មុន។ នេះ​បើ​តាម​ការ​បញ្ជាក់​របស់​អ្នកស្រី Laurie Blank អ្នក​ជំនាញ​នៃ​សាកលវិទ្យាល័យ Emory។

អ្នកស្រី​និយាយ​ដូច្នេះ​ថា៖ «នៅ​ពេល​ពួក ISIS គ្រប់គ្រង​ដែន​ដី​ជា​ច្រើន​នៅ​ក្នុង​ប្រទេស​ស៊ីរី និង​ប្រទេស​អ៊ីរ៉ាក់ ពួក​នេះ​បាន​ប្រើ​តំបន់​ប្រេង​ដើម្បី​ជា​ប្រយោជន៍​របស់​ខ្លួន ដូចជា​ការ​ផ្គត់ផ្គង់​ដល់​ប្រតិបត្តិការ​យោធា​របស់​ពួកគេ និង​ការ​រត់​ពន្ធ​ប្រេង​ក្នុង​បរិមាណ​ដ៏​ច្រើន​នៅ​ក្នុង​ទីផ្សារ​ងងឹត​ជា​ដើម‍»។

ប៉ុន្តែ អ្នក​ជំនាញ​ភាគ​ច្រើន​ច្រានចោល​នូវ​គោល​គំនិត​ដែល​ថា ក្រុមហ៊ុន​អាមេរិកាំង​អាច​ទទួល​បាន​ប្រយោជន៍​ពី​ប្រេង​របស់​ប្រទេស​ស៊ីរី។

លោក Jeff Colgan នៃ​សាកល​វិទ្យាល័យ Brown និយាយ​ថា៖ «ក្រុមហ៊ុន​ប្រេង​អាមេរិកាំង​នានា​នឹង​ប្រឈម​នឹង​ការ​លំបាក​មួយ​ចំនួន​នៅ​ពេល​ធ្វើ​ប្រតិបត្តិការ​នៅ​ទី​នោះ​ដូចជា បញ្ហា​ផ្នែក​ក្បួន​ច្បាប់​នានា និង​បញ្ហា​ជាក់​ស្ដែង​នានា​ជា​ដើម។ ដូច្នេះ​ហើយ ករណី​នេះ​ប្រហែល​ជា​មិន​ងាយស្រួល​ធ្វើ​នោះ​ទេ ហើយ​ខ្ញុំ​មិន​ប្រាកដ​ថា​ពួកគេ​នឹង​ចង់​ធ្វើ​រឿង​នេះ​នោះ‍​ឡើយ»។

លោក Jeff Colgan បាន​ប្រាប់ VOA ថា ពួក​ភេរវជន ដែល​មាន​តាំង​ពី​ជន Osama bin Laden ជា​ដើម ធ្លាប់​អះអាង​មិន​ត្រឹមត្រូវ​ថា សហរដ្ឋ​អាមេរិក​ប្រឡូក​ក្នុង​តំបន់​មជ្ឈិម​បូព៌ា​ដើម្បី​បាន​ប្រេង​ពី​បណ្ដា​ប្រទេស​នានា​នៅ​ក្នុង​តំបន់​នោះ​តែ​ប៉ុណ្ណោះ។

លោក Jeff Colgan បញ្ជាក់​ច្នេះ​ថា៖ «ការ​លើក​ឡើង និង​ស្នើ​ឡើង​របស់​លោក​ប្រធានាធិបតី Trump [អំពី​ប្រេង​នៅ​ក្នុង​ប្រទេស​ស៊ីរី] គឺ​ស្រប​ទៅ​នឹង​ការ​អះអាង​នេះ ហើយ​ការ​ចាត់​ទុក​រឿង​នេះ​ថា​ជា​រឿង​ត្រឹមត្រូវ​នៅ​ក្នុង​តំបន់​មជ្ឈិម​បូព៌ា​នោះ គឺ​ពិតជា​ការ​ប្រឆាំង​ទៅ​នឹង​សុវត្ថិភាព​ដ៏​យូរ​អង្វែង​របស់​ពលរដ្ឋ​អាមេរិកាំង‍»។

អ្នកស្រី Laurie Blank និយាយ​ថា លោក​ប្រធានាធិបតី Donald Trump ផ្ដោត​លើ​ប្រេង​នេះ គឺ​ដោយសារតែ​ទស្សនៈ​អំពី​ការ​ធ្វើ​សង្គ្រាម​តាំង​ពី​បុរាណ ដែល​ហួស​សម័យ។

អ្នកស្រី​ថ្លែង​ដូច្នេះ​ថា៖ «យ៉ាង​ហោច​ណាស់ ខ្ញុំ​គិត​ថា ចំណាប់​អារម្មណ៍​នេះ​ទំនងជា​ផ្អែក​លើ​ទស្សនៈ​កាល​ពី​បុរាណ​អំពី​ការ​ធ្វើ​សង្គ្រាម ដែល​ទស្សនៈ​នេះ​មិន​ត្រូវ​បាន​គេ​ប្រើ​ទៀត​ទេ។ ទស្សនៈ​ដែល​ថា​ចេញ​ទៅ​ច្បាំង​ដណ្ដើម​យក​នោះ​គឺ​មិន​ត្រូវ​នឹង​កាលៈទេសៈ​នា​ពេល​បច្ចុប្បន្ន​របស់​ពិភពលោក​ទៀត​ទេ។

ដោយសារតែ​មាន​ភាគី​ជា​ច្រើន​ពាក់ព័ន្ធ​នៅ​ក្នុង​ជម្លោះ​ក្នុង​ប្រទេស​ស៊ីរី ដូចជា​ប្រទេស​រុស្ស៊ី ពួក Kurd ទាហាន​ស៊ីរី និង​ពួក​យុទ្ធជន​អ៊ីរ៉ង់​ជា​ដើម អ្នក​ជំនាញ​នានា​អះអាង​ថា ភាគី​ទាំង​នោះ​ទំនងជា​ប្រជែង​គ្នា​ដើម្បី​គ្រប់គ្រង​លើ​តំបន់​ប្រេង៕

ប្រែ​សម្រួល​ដោយ ភី សុភាដា

តួលេខនៃករណីឆ្លងជំងឺកូវីដ១៩

XS
SM
MD
LG