ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

អ្នក​កាសែត​លោក Zsomber Peter ថា លោក​មិន​ដឹង​អំពី​មូលហេតុ​ដែល​គេ​ចោទ​ប្រកាន់​លោក​នោះ​ទេ


លោក Zsombor Peter (រូប​ឆ្វេង) និង​លោក អូន ភាព កំពុង​ប្រឈម​មុខ​នឹង​ការ​កាត់​ទោស​ឱ្យ​ជាប់​ពន្ធនាគារ​រយៈពេល​ពីរ​ឆ្នាំ​ពី​បទ​ញុះញង់​ឲ្យ​ប្រព្រឹត្តិ​បទ​ឧក្រិដ្ឋ​ជា​អាទិ៍។
លោក Zsombor Peter (រូប​ឆ្វេង) និង​លោក អូន ភាព កំពុង​ប្រឈម​មុខ​នឹង​ការ​កាត់​ទោស​ឱ្យ​ជាប់​ពន្ធនាគារ​រយៈពេល​ពីរ​ឆ្នាំ​ពី​បទ​ញុះញង់​ឲ្យ​ប្រព្រឹត្តិ​បទ​ឧក្រិដ្ឋ​ជា​អាទិ៍។

ក្រោយ​ពី​ការ​រាយការណ៍​មួយ​ពី​ការ​បោះឆ្នោត​ឃុំសង្កាត់​កាលពី​ឆ្នាំ២០១២ លោក អូន ភាព និង​លោក Zsomber Peter ដែល​ជា​អ្នក​យក​ព័ត៌មាន​ជើង​ចាស់​របស់​កាសែត The Cambodia Daily បាន​រង​ការ​ចោទ​ប្រកាន់​ពី​បទ «ញុះញង់​ឲ្យ​ប្រព្រឹត្តិ​បទ​ឧក្រិដ្ឋ​ជា​អាទិ៍»។

កាល​ពី​ខែ​ឧសភា ឆ្នាំ ២០១៧ លោក អូន ភាព និង​លោក Zsomber Peter ដែល​ជា​អ្នក​យក​ព័ត៌មាន​ជើង​ចាស់​របស់​កាសែត The Cambodia Daily បាន​ធ្វើ​ដំណើរ​ទៅ​កាន់​ឃុំ​ប៉ាតេ ដែល​ជា​មណ្ឌល​បោះ​ឆ្នោត​តែ​មួយ​គត់​ក្នុង​ចំណោម​មណ្ឌល​បោះ​ឆ្នោត​ទាំង ៥០ នៅ​ក្នុង​ខេត្ត​រតនគីរី ដែល​គណបក្ស​ប្រជាជន​កម្ពុជា​របស់​លោក​នាយករដ្ឋមន្ត្រី ហ៊ុន សែន មិន​បាន​ឈ្នះ​ឆ្នោត​នៅ​ក្នុង​ការ​បោះ​ឆ្នោត​ឃុំ​សង្កាត់​កាល​ពី​ឆ្នាំ ២០១២។

ក្នុង​គោល​បំណង​ដើម្បី​ស្វែង​រក​មូលហេតុ​ដែល​ឃុំ​ប៉ាតេ​ជា​ឃុំ​តែ​មួយ​គត់​នៅ​ក្នុង​ខេត្ត​រតនគីរី​ដែល​គាំទ្រ​គណបក្ស​សម រង្ស៊ី កាល​ពី​ការ​បោះ​ឆ្នោត​ឃុំ​សង្កាត់​ឆ្នាំ ២០១២ លោក អូន ភាព និង​លោក Zsomber Peter បាន​ចំណាយ​ពេល​មួយ​ថ្ងៃ​សាកសួរ​អ្នក​ស្រុក​ទូទៅ​អំពី​ការ​បោះ​ឆ្នោត​ដែល​ជិត​ចូល​មក​ដល់ និង​បាន​សម្ភាស​លោក យ៉ុត រម៉ាំ ដែល​ជា​មេឃុំ​ប៉ាតេ​នៅ​ពេល​នោះ​មក​ពី​កូតា​គណបក្ស​សម រង្ស៊ី។

បន្ទាប់ពី​បាន​ផ្សព្វផ្សាយ​សេចក្ដី​រាយការណ៍​របស់​ពួកគេ​មក អ្នក​កាសែត​ទាំង​ពីរ​បាន​រង​ការ​ចោទ​ប្រកាន់​ពី​បទ «ញុះញង់​ឲ្យ​ប្រព្រឹត្តិ​បទ​ឧក្រិដ្ឋ​ជា​អាទិ៍» ហើយ​នៅ​ពេល​នោះ​ដែរ កាសែត The Cambodia Daily បាន​ប្រឈម​នឹង​ការ​តម្រូវ​ឲ្យ​បង់​ពន្ធ​ចំនួន ៦ លាន ៣ សែន​ដុល្លារ​អាមេរិក រួម​ទាំង​ការ​បញ្ជា​របស់​លោក​នាយករដ្ឋមន្ត្រី ហ៊ុន សែន ឲ្យ​បង់​ពន្ធ​នេះ​ផង​ដែរ បើ​មិន​ដូច្នេះ​ទេ​ត្រូវ​តម្រូវ​ឲ្យ​បិទ។

កាសែត The Cambodia Daily ដែល​គេ​ស្គាល់​ជា​យូរ​មក​ហើយ​ថា​បាន​រាយការណ៍​យ៉ាង​ហ្មត់ចត់​អំពី​អំពើ​ពុក​រលួយ​របស់​រដ្ឋាភិបាល និង​ការ​រំលោភ​សិទ្ធិ​មនុស្ស​នានា រួម​ទាំង​បាន​រាយការណ៍​ជា​ច្រើន​ផង​ដែរ​អំពី​ការ​កាប់​ព្រៃឈើ​ខុស​ច្បាប់ និង​ការ​រំលោភ​សិទ្ធិ​ការងារ​នៅ​ក្នុង​វិស័យ​កាត់ដេរ​ជា​ដើម​នោះ បាន​ចេញ​ផ្សាយ​កាសែត​ច្បាប់​ចុង​ក្រោយ​របស់​ខ្លួន​នៅ​ថ្ងៃ​ទី ៤ ខែ​កញ្ញា ឆ្នាំ ២០១៧។

ដោយ​សវនាការ​អំពី «បទ​ញុះញង់» សម្រាប់​អ្នក​កាសែត​ទាំង​ពីរ ដែល​បាន​គ្រោង​ធ្វើ​ឡើង​ដំបូង​នៅ​ថ្ងៃ​ពុធ​ទី ២៥ ខែ​ធ្នូ​កន្លង​ទៅ​នេះ ត្រូវ​បាន​ពន្យារពេល​រហូត​ដល់​មាន​ការ​ជូន​ដំណឹង​ជា​ថ្មី អង្គការ​អ្នក​សារព័ត៌មាន​គ្មាន​ព្រំដែន ដែល​មាន​មូលដ្ឋាន​នៅ​ទីក្រុង​ប៉ារីស ប្រទេស​បារាំង បាន​អំពាវនាវ​ឲ្យ​មាន​ការ​ទម្លាក់​ចោល​នូវ​អ្វី​ដែល​អង្គការ​នេះ​អះអាង​ថា​ជា «បទ​ចោទ​ប្រកាន់​មិន​សម​ហេតុ​ផល និង​ប្រតិដ្ឋ​ឡើង»។

ជាង​នេះ​ទៀត អង្គការ​អ្នក​សារព័ត៌មាន​គ្មាន​ព្រំដែន​នេះ​បាន​ចាត់​ថ្នាក់​ប្រទេស​កម្ពុជា​ឲ្យ​ស្ថិត​នៅ​លំដាប់​ថ្នាក់​ទី ១៤៣ ក្នុង​ចំណោម​ប្រទេស​ចំនួន ១៨០ ដែល​ខ្លួន​បាន​សិក្សា​ស្រាវជ្រាវ​នៅ​ក្នុង​សន្ទស្សន៍​ស្ដី​ពី​សេរីភាព​សារព័ត៌មាន​ពិភពលោក​ឆ្នាំ ២០១៩។

អង្គការ​នេះ​ក៏​ដូចជា​អង្គការ​តស៊ូ​មតិ​ដើម្បី​សេរីភាព​សារព័ត៌មាន​អន្តរជាតិ​ដទៃ​ទៀត​ផង​ដែរ បាន​បញ្ជាក់​ថា បទ​ចោទ​ប្រកាន់​ប្រឆាំង​នឹង​លោក អូន ភាព និង​លោក Zsomber Peter នេះ ទំនងជា​មិន​ពាក់ព័ន្ធ​នឹង​សេចក្ដី​រាយការណ៍​ពី​ឃុំ​ប៉ាតេ​កាល​ពី​ឆ្នាំ ២០១៧ របស់​អ្នក​ទាំង​ពីរ​ទេ ប៉ុន្តែ​គ្រាន់តែ​ដើម្បី​ជា​ការ​បង្ហាញ​ជា​ឧទាហរណ៍​ឲ្យ​អ្នក​ដទៃ​ទៀត​បាន​ឃើញ​តែ​ប៉ុណ្ណោះ។

លោក Daniel Bastard អ្នក​ជំនាញ​ខាង​កិច្ចការ​តំបន់​អាស៊ី​ប៉ាស៊ីហ្វិក​នៃ​អង្គការ​អ្នក​សារព័ត៌មាន​គ្មាន​ព្រំដែន បាន​បញ្ជាក់​ដូច្នេះ​ថា៖ «ដំណើរការ​ប្រតិដ្ឋទាំង​ស្រុង​នេះ​គឺ​បង្ហាញ​យ៉ាង​ច្បាស់​ថា​ជា​មធ្យោបាយ​សម្រាប់​ក្រុម​របស់​លោក ហ៊ុន សែន នៅ​ក្នុង​ការ​ជូន​ដំណឹង​ដល់​អ្នក​កាសែត​នានា​ថា នេះ​គឺ​ជា​ហានិភ័យ​ដែល​អ្នក​កាសែត​ទាំង​នោះ​នឹង​ប្រឈម ប្រសិនបើ​ពួកគេ​ហ៊ាន​រាយការណ៍​ព័ត៌មាន​ឯករាជ្យ»។

លោក អូន ភាព អាយុ ៥៥ ឆ្នាំ ដែល​បាន​និរទេស​ខ្លួន​ទៅ​កាន់​សហរដ្ឋ​អាមេរិក​តាំង​ពី​ពេល​នោះ​មក និង​លោក Zsomber Peter អាយុ ៤១ ឆ្នាំ ដែល​នៅតែ​បន្ត​រាយការណ៍​ពី​ក្រៅ​ប្រទេស​អំពី​តំបន់​អាស៊ី​អាគ្នេយ៍ ប្រឈម​នឹង​ការ​ជាប់​ពន្ធនាគារ​រហូត​ដល់​ទៅ ២ ឆ្នាំ ប្រសិនបើ​ត្រូវ​គេ​រក​ឃើញ​ថា​មាន​ទោស។

ខាង​ក្រោម​នេះ​គឺ​ជា​កិច្ច​សម្ភាសន៍​ជាមួយ​នឹង​លោក Zsomber Peter ដែល​ជា​អ្នក​កាសែត​ជនជាតិ​កាណាដា និង​ជា​អ្នក​រាយការណ៍​ព័ត៌មាន​ជា​ប្រចាំ​ឲ្យ VOA អំពី​តំបន់​អាស៊ី​អាគ្នេយ៍៖

VOA: តើ​ការ​ចោទ​ប្រកាន់​ទាំង​នេះ គឺ​ជា​ការ​ចោទ​ប្រកាន់​អំពី​របាយការណ៍​របស់​លោក​ស្ដី​អំពី​ឃុំ​មួយ​ដែល​បោះ​ឆ្នោត​ប្រឆាំង​នឹង​ការ​ដឹកនាំ​ជា​បន្ត​របស់​លោក ហ៊ុន សែន មែន​ទេ? ឬ​ក៏​បទ​ចោទ​ប្រកាន់​ទាំង​នេះ​ពិតជា​បទ​ចោទ​ប្រកាន់​អំពី​របាយការណ៍​អំពី​ការ​កាប់​ព្រៃឈើ​ខុស​ច្បាប់?

Zsomber Peter: ខ្ញុំ​ក៏​មិន​ដឹង​ដែរ។ ខ្ញុំ​សង្ឃឹម​ថា ខ្ញុំ​អាច​ផ្ដល់​ចម្លើយ​ដ៏​ពេញចិត្ត​ជាង​នេះ​ដល់​លោក​បាន។ ប្រសិនបើ​ខ្ញុំ​អាច​ផ្ដល់​ចម្លើយ​ដល់​លោក​អំពី​ការ​ចោទ​ប្រកាន់​នេះ​បាន នោះ​មាន​ន័យ​ថា ខ្ញុំ​ដឹង​ថា​នរណា​ដែល​ពិតជា​នៅ​ពី​ក្រោយ​រឿង​នេះ​ជា​មិន​ខាន។ ប៉ុន្តែ​ខ្ញុំ​មិន​ដឹង​នោះ​ទេ ដូច្នេះ​ទាំង​អស់​នេះ​គឺ​គ្រាន់តែ​ជា​ការ​ស្មាន​តែ​ប៉ុណ្ណោះ។ រឿង​ដែល​ធ្វើ​ឲ្យ​ខ្ញុំ​មិន​អស់​ចិត្ត​ខ្លាំង​ជាង​គេ​នោះ គឺ​រឿង​មិន​ដឹង​ថា​នរណា​ដែល​ប្ដឹង​ពួក​យើង។ អ្នក​ដែល​ដាក់​ពាក្យ​បណ្ដឹង​នេះ​គឺ​ជា​អ្នក​ដែល​ធ្វើ​តាម​គេ​បញ្ជា​តែ​ប៉ុណ្ណោះ។

អ្នក​ដែល​បញ្ជា​ពួកគេ​ទាំង​នេះ​អាច​ជា​អង្គការ​ចាត់​តាំង​កាប់​ឈើ​ខុស​ច្បាប់ ដែល​ពួក​យើង​បាន​ធ្វើ​ឲ្យ​ពួកគេ​ខឹង​ដោយសារ​អត្ថបទ​រាយការណ៍​បែប​ស៊ើប​អង្កេត​របស់​ពួក​យើង ឬ​ក៏​អាច​ជា​អ្នក​នយោបាយ​ខាង​គណបក្ស​កាន់​អំណាច​ដែល​ភ័យ​ខ្លាច​អំពី​ការ​រាយការណ៍​ព័ត៌មាន​ត្រឹមត្រូវ​អំពី​ការ​បោះ​ឆ្នោត ឬ​ក៏​អាច​ទាំង​ពីរ​ក៏​ថា​បាន។

អ្វី​ដែល​ខ្ញុំ​ច្បាស់​គឺ​ថា បទ​ចោទ​ប្រកាន់​មក​លើ​លោក អូន ភាព និង​ខ្ញុំ គឺ​មិន​ត្រឹមតែ​គ្មាន​មូលដ្ឋាន​ប៉ុណ្ណោះ​ទេ ប៉ុន្តែ​ថែម​ទាំង​មិន​សម​ហេតុ​ផល និង​មិន​ដឹង​ជា​ប្រតិដ្ឋ​ឡើង​ពី​ណា​មក​ទេ។

មនុស្ស​ពីរ​នាក់​ក្នុង​ចំណោម​មនុស្ស ៣ នាក់ ដែល​បាន​ចោទ​ប្រកាន់​ពួក​យើង​ពី​បទ​ញុះញង់ បាន​និយាយ​ជាមួយ​ពួក​យើង​ដោយ​គ្មាន​នរណា​បង្ខំ។ ចំណែក​ឯ​មនុស្ស​ម្នាក់​ទៀត គឺ​ពួក​យើង​មិន​ដែល​បាន​សុំ​សម្ភាសន៍​ម្ដង​ណា​ទេ។ តើ​វា​អាច​ទៅ​ជា «ការ​ញុះញង់​ដើម្បី​បង្ក​បទ​ឧក្រិដ្ឋ​ជា​អាទិ​តាម​វិធី​ណា?»។

ជាង​នេះ​ទៀត គ្មាន​នរណា​ម្នាក់​ធ្លាប់​ពន្យល់​ប្រាប់​ថា​បទ​ឧក្រិដ្ឋ​អ្វី​ដែល​ពួក​យើង​រង​ការ​ចោទ​ប្រកាន់​ថា​បាន​ញុះញង់​គេ​នោះ​ទេ ដោយសារតែ​រឿង​នេះ​គឺ​កុហក​ច្បាស់​នឹង​ភ្នែក​ពេក ដែល​ពួកគេ​មិន​អាច​រក​បទ​ឧក្រិដ្ឋ​ណា​មួយ​បាន​មក​ចោទ​ប្រកាន់​ពួក​យើង​នោះ។ ដូច្នេះ​មាន​ន័យ​ថា រឿង​នេះ​គឺ​មាន​លក្ខណៈ​នយោបាយ​ទាំង​ស្រុង។

VOA: លោក អូន ភាព បាន​និរទេស​ខ្លួន​ទៅ​សហរដ្ឋ​អាមេរិក​រួច​ហើយ ប៉ុន្តែ​សម្រាប់​លោក​វិញ​គឺ​នៅតែ​បន្ត​រាយការណ៍​ចេញ​ពី​តំបន់​ជុំវិញ​ប្រទេស​កម្ពុជា​ដដែល។ តើ​ការ​ប្រកាស​អំពី​ថ្ងៃ​សវនាការ​ដែល​ត្រូវ​បាន​ពន្យារ​ពេល​នេះ បង្ក​ជា​បញ្ហា​អ្វី​ខ្លះ​ដល់​ជីវិត​ផ្ទាល់​ខ្លួន និង​ជីវិត​ការងារ​របស់​លោក? តើ​ឥឡូវ​នេះ លោក​ត្រូវ​បង្ខំ​ខ្លួន​មិន​សូវ​ចេញ​មុខ ឬ​ក៏​ចេញ​ឈ្មោះ​ជា​សាធារណៈ​មែន​ទេ?

Zsomber Peter: រឿង​នេះ​បាន​បង្ក​បញ្ហា​ដល់​ខ្ញុំ​តាំង​ពី​បទ​ចោទ​ត្រូវ​បាន​ប្រកាស​កាល​ពី​ខែ​តុលា ឆ្នាំ ២០១៧ មក។ ការ​ឃុំ​ខ្លួន​មុន​ពេល​កាត់ទោស​គឺ​ជា​ការ​អនុវត្ត​ជា​ទូទៅ​នៅ​ក្នុង​ប្រទេស​កម្ពុជា ជា​ពិសេស​ក្នុង​សំណុំ​រឿង​ដែល​មាន​លក្ខណៈ​នយោបាយ ដូច្នេះ​លទ្ធភាព​ដែល​ខ្ញុំ​អាច​ត្រូវ​គេ​ចាប់​ខ្លួន​គឺ​ពិត​ប្រាកដ​ណាស់​ត្រង់​ចំណុច​នេះ។

ករណី​នេះ​ធ្វើ​ឲ្យ​ការ​ត្រឡប់​ទៅ​កាន់​ប្រទេស​កម្ពុជា​វិញ​គឺ​គ្រោះថ្នាក់​ណាស់ ជា​ពិសេស​ក្នុង​ករណី​ទៅ​រាយការណ៍​ព័ត៌មាន។ ចំណុច​នេះ​មាន​ន័យ​ថា ចំណេះដឹង​អំពី​ប្រទេស​កម្ពុជា​រយៈពេល ៨ ឆ្នាំ ដែល​ខ្ញុំ​បាន​ឆ្លងកាត់​កន្លង​មក គឺ​ខ្ញុំ​មិន​អាច​ប្រើប្រាស់​បាន​ទេ។ ក្នុង​នាម​ជា​អ្នក​កាសែត​ដែល​នៅ​រាយការណ៍​អំពី​តំបន់​អាស៊ី​អាគ្នេយ៍ នោះ​មាន​ន័យ​ថា ខ្ញុំ​មាន​ឱកាស​ការងារ​តិចតួច​ប៉ុណ្ណោះ។

ប្រសិនបើ​ខ្ញុំ​ត្រូវ​គេ​កាត់ទោស នោះ​ខ្ញុំ​អាច​ត្រូវ​គេ​ធ្វើ​បត្យាប័ន​បញ្ជូន​ទៅ​កាន់​ប្រទេស​កម្ពុជា​ដើម្បី​បំពេញ​ទោស​របស់​ខ្ញុំ។

VOA: តើ​លោក​អាច​មាន​ដំបូន្មាន​អ្វី​ខ្លះ​ដល់​អ្នក​កាសែត​ដទៃ​ទៀត ដែល​ប្រឈម​នឹង​ការ​ចោទ​ប្រកាន់​ដែល​មាន​លក្ខណៈ​នយោបាយ​ស្រដៀង​គ្នា​នេះ​ដែរ? តើ​លោក​ជំរុញ​កុំ​ឲ្យ​ពួកគេ​រត់​គេច​ទៅ​ទី​ណា ហើយ​នៅ​បន្ត​រាយការណ៍​ព័ត៌មាន ទោះបីជា​មាន​ការ​គំរាមកំហែង​ចាប់​ដាក់​ពន្ធនាគារ ឬ​ក៏​ការ​គំរាមកំហែង​ធ្ងន់ធ្ងរ​ជាង​នេះ​ក៏​ដោយ? ឬ​ក៏​លោក​លើក​ទឹក​ចិត្ត​អ្នក​កាសែត​ផ្សេង​ទៀត​ឲ្យ​រាយការណ៍​ពី​កន្លែង​ដែល​មាន​សុវត្ថិភាព​វិញ?

Zsomber Peter: ខ្ញុំ​បាន​ចាកចេញ​ពី​ប្រទេស​កម្ពុជា​កាល​ពី​ខែ​តុលា ឆ្នាំ ២០១៧ នៅ​ពេល​ដែល​ខ្ញុំ​ត្រូវ​គេ​ចោទ​ប្រកាន់។ ដូច្នេះ ខ្ញុំ​គ្មាន​សមត្ថភាព​នៅ​ក្នុង​ការ​ផ្ដល់​ប្រឹក្សា​ថា​តើ​អ្នក​ដទៃ​គួរតែ​ចាកចេញ ឬ​ក៏​នៅ​បន្ត​រាយការណ៍​នោះ​ទេ។

VOA: ប្រសិនបើ​លោក​អាច​ត្រៀម​សេចក្ដី​ថ្លែងការណ៍​មួយ​សម្រាប់​តុលាការ​អំពី​ការ​ចោទ​ប្រកាន់​ទាំង​នេះ តើ​លោក​នឹង​និយាយ​អ្វី​ខ្លះ?

Zsomber Peter: ខ្ញុំ​មិន​អាច​ត្រៀម​សេចក្ដី​ថ្លែងការណ៍​សម្រាប់ «តុលាការ» នេះ​បាន​ទេ។ ខ្ញុំ​ត្រៀម​សេចក្ដី​ថ្លែងការណ៍​នេះ​ទុក​សម្រាប់​តែ​តុលាការ​ពិត​ប្រាកដ​តែ​ប៉ុណ្ណោះ ដែល​នោះ​គឺ​តុលាការ​មួយ​ដែល​ផ្ដោត​លើ​ការ​ពិត។ ការ​ពិត​ដែល​ថា សំណុំ​រឿង​នេះ​បាន​វិវត្ត​រហូត​ឈាន​ដល់​ដំណាក់កាល​សវនាការ​របស់​តុលាការ​ដោយ​គ្មាន​ភស្តុតាង​ណា​មួយ គឺ​ជា​តឹកតាង​គ្រប់គ្រាន់​ដែល​បង្ហាញ​ថា នេះ​មិន​មែន​ជា​តុលាការ​ពិត​ប្រាកដ​នោះ​ទេ។

VOA: ប្រសិនបើ​លោក​អាច​ត្រឡប់​ទៅ​កាន់​ប្រទេស​កម្ពុជា​វិញ និង​រាយការណ៍​អំពី​ប្រធានបទ​ណា​មួយ​ដែល​លោក​ពេញចិត្ត​ដោយ​មិន​ខ្លាច​មាន​ការ​សងសឹក តើ​លោក​នឹង​រាយការណ៍​អំពី​ប្រធានបទ​អ្វី?

Zsomber Peter: ខ្ញុំ​នឹង​រាយការណ៍​អំពី​រឿង​ដដែល ដែល​ខ្ញុំ​ធ្លាប់​បាន​រាយការណ៍​មុន​ពេល​ដែល​ខ្ញុំ​ចាកចេញ​ពី​ប្រទេស​កម្ពុជា។ មាន​ប្រធានបទ​ជា​ច្រើន​ក្នុង​រយៈពេល ៨ ឆ្នាំ​នៃ​ការ​រាយការណ៍​របស់​ខ្ញុំ​ក្នុង​ប្រទេស​កម្ពុជា។

ប្រធានបទ​ទាំង​នោះ​មាន​ដូចជា​អាជីវកម្ម​កាប់​ឈើ​ខុស​ច្បាប់ អំពើ​ពុករលួយ​គ្រប់​ទម្រង់ ការ​ជិះជាន់​របស់​រដ្ឋាភិបាល​លើ​អ្នក​ប្រឆាំង​ដោយ​សន្តិវិធី ការ​រំលោភ​បំពាន​សិទ្ធិ​ការងារ ជា​ពិសេស​នៅ​ក្នុង​វិស័យ​កាត់ដេរ ការ​រំលោភ​សិទ្ធិ​មនុស្ស​ជា​ទូទៅ វិធានការ​របស់​កម្ពុជា​នៅ​ក្នុង​ការ​ធ្វើ​ឲ្យ​មាន​តុល្យភាព​រវាង​ប្រទេស​ចិន និង​ទ្វីប​អឺរ៉ុប​និង​សហរដ្ឋ​អាមេរិក រួម​ទាំង​ការ​សាងសង់​ទំនប់​វារីអគ្គិសនី​របស់​រដ្ឋាភិបាល​លើ​ទន្លេ​មេគង្គ និង​ដៃ​ទន្លេ​នានា​ជា​ដើម។

ខ្ញុំ​ក៏​ធ្លាប់​រាយការណ៍​ផង​ដែរ​អំពី​ការ​ប្រយុទ្ធ​ប្រឆាំង​របស់​រដ្ឋាភិបាល​កម្ពុជា​ជាមួយ​នឹង​មេរោគ​ដែល​ប្រឆាំង​នឹង​ថ្នាំ​ព្យាបាល​ជំងឺ​គ្រុនចាញ់ និង​អំពី​គ្រាប់​មិន​ទាន់​ផ្ទុះ។ ខ្ញុំ​ក៏​ចង់​រាយការណ៍​អំពី​រឿង​ទាំង​ពីរ​នេះ​ឡើង​វិញ​ផង​ដែរ៕

ប្រែ​សម្រួល​ដោយ ភី សុភាដា

XS
SM
MD
LG