សហភាពអឺរ៉ុប នៅថ្ងៃច័ន្ទនេះ បានសន្យាផ្តល់ថវិកា១០លានអឺរ៉ូមានតម្លៃប្រមាណជា១១លានដុល្លារ ដើម្បីជួយក្នុងដំណើរការចុះបញ្ជីឈ្មោះអ្នកបោះឆ្នោត និងការចូលរួមរៀបចំដំណើរប្រព្រឹត្តទៅនៃការបោះឆ្នោតនៅឆ្នាំ២០១៧ និង២០១៨ ខាងមុខនេះ ខណៈពេលដែលប្រទេសជប៉ុនពុំទាន់បញ្ជាក់ជំហរច្បាស់ក្នុងការផ្តល់ជំនួយហិរញ្ញវត្ថុនៅឡើយទេ។ នេះបើតាមការបញ្ជាក់ពីអ្នកនាំពាក្យរបស់គណៈកម្មាធិការជាតិរៀបចំការបោះឆ្នោត(គ.ជ.ប.។)។
ការសន្យាផ្តល់ជំនួយហិរញ្ញវត្ថុរបស់អ្នកជំនាញសហភាពអឺរ៉ុបនេះធ្វើឡើងនៅឯកិច្ចប្រជុំមួយរវាងលោក ស៊ិក ប៊ុនហុក ប្រធាន គ.ជ.ប. និងលោកឯកអគ្គរដ្ឋទូតសហភាពអឺរ៉ុបគឺលោក Jean Francois Cautain និងឯកអគ្គរាជទូតជប៉ុនគឺលោក Yuji Kumamaru ដែលរៀបចំឡើង នៅឯទីស្នាក់កណា្តលនៃគ.ប.ជ.ស្ថិតនៅក្នុងបរិវេណក្រសួងមហាផ្ទៃ។
បន្ទាប់ពីប្រជុំនេះ លោក ហង្ស ពុទ្ធា អ្នកនាំពាក្យ គ.ជ.ប. បានថ្លែងប្រាប់អ្នកយកព័ត៌មានថា សហភាពអឺរ៉ុបនឹងសម្រេចជួយគ.ជ.ប. លើគម្រោងបីសំខាន់ៗចាប់ពីឆ្នាំ២០១៦ដល់ឆ្នាំ២០១៩ ដោយទី១ គឺជួយលើការផ្តល់អនុសាសន៍លើបទបញ្ជា និងនីតិវិធីនៃការបោះឆ្នោត ទី២ ការបញ្ជូនអ្នកជំនាញការឲ្យមកធ្វើការជាមួយមន្ត្រី គ.ជ.ប.ក្នុងរយៈពេលវែង និងរយៈពេលខ្លី ហើយទី៣ គឺការជួយជាសម្ភារៈបច្ចេកទេសសម្រាប់ការចុះឈ្មោះ និងរៀបចំដំណើរការបោះឆ្នោត។
លោកបញ្ជាក់ថា ដំណើរការចុះឈ្មោះសាកល្បងនឹងចាប់ផ្តើម នៅខែតុលាខាងមុខនេះ ហើយថា ប្រទេសជប៉ុនក៏នឹងបញ្ជូនក្រុមអ្នកជំនាញរបស់គេមកជួយ គ.ជ.ប.ក្នុងការរៀបចំប្រព័ន្ធព័ត៌មានវិទ្យា និងការចុះបញ្ជីឈ្មោះអ្នកបោះឆ្នោតថ្មីក្នុងមួយរយៈពេលខ្លីដែរ។
«ដំណើរការសាកល្បងពីមុនមកយើងធ្លាប់ផ្សព្វផ្សាយថា នៅក្នុងដើមខែ៨ ប៉ុន្តែយើងមើលទៅវាមានការយឺតយ៉ាវ។ អញ្ចឹងអាចចូលខែ៩ ប៉ុន្តែខែ១០នោះ គឺជាខែច្បាស់លាស់តែម្តង»។
លោកបន្តថា៖«ឥឡូវហ្នឹងយើងបានទទួលព័ត៌មានពីខាងជប៉ុនថ្ងៃ៦ ដល់ថ្ងៃ១០ គឺក្រុមបច្ចេកទេសកំព្យូទ័រនឹងមកធ្វើការ មានគ្នាបីនាក់ ហើយក្រុមទី២ គឺក្រុមរបស់ជប៉ុនដដែលមានជំនាញការខាងចុះឈោ្មះ គាត់នឹងធ្វើការជាមួយ គ.ជ.ប. នេះនៅថ្ងៃទី៨តទៅ ប្រហែលជារយៈពេលមួយសប្តាហ៍»។
លោក ហង្ស ពុទ្ធា ថ្លែងថា ក្រៅពីការជួយជ្រោមជ្រែងពីសហភាពអឺរ៉ុប និងប្រទេសជប៉ុន ក៏នៅមានអង្គទូតនៃប្រទេសដទៃ និងទីភ្នាក់ងារជំនួយមួយចំនួនបានទាក់ទងមក គ.ជ.ប. រួចទៅហើយដែរ ក្រោយការបង្កើត គ.ជ.ប. ថ្មីនេះដែលមានសមាភាពមកពីគណបក្សនយោបាយទាំងពីរនៅក្នុងសភា គឺគណបក្សសង្គ្រោះជាតិ និងគណបក្សប្រជាជនកម្ពុជា ហើយនិងបុគ្គលឯករាជ្យ៕
