ក្រុមមន្ត្រីសហភាពអឺរ៉ុបនិយាយថា សហភាពអឺរ៉ុបត្រូវគេរំពឹងថា នឹងស្នើបណ្តាប្រទេសជាសមាជិករបស់ខ្លួនឲ្យដាក់ការរឹតបន្តឹងការធ្វើដំណើរឡើងវិញ ទៅលើក្រុមអ្នកធ្វើដំណើរមកពីសហរដ្ឋអាមេរិក ជាទីកន្លែងដែលករណីឆ្លងថ្មីនិងការសម្រាកព្យាបាលក្នុងមន្ទីរពេទ្យ បានកើនឡើងយ៉ាងខ្លាំងនៅក្នុងរយៈពេលប៉ុន្មានសប្តាហ៍ថ្មីៗនេះ។
ក្រុមមន្ត្រីដែលបានថ្លែងប្រាប់ពួកអ្នកយកព័ត៌មានក្នុងលក្ខខណ្ឌមិនបញ្ចេញឈ្មោះ ស្របពេលដែលគោលនយោបាយនៃការធ្វើដំណើររបស់សហភាពអឺរ៉ុបកំពុងត្រូវបានគេត្រួតពិនិត្យមើលឡើងវិញនោះ និយាយថា យ៉ាងឆាប់បំផុតនៅដើមសប្តាហ៍នេះ សហរដ្ឋអាមេរិកអាចត្រូវបានគេដកចេញពី«បញ្ជីសុវត្ថិភាព»នៃបណ្តាប្រទេសដែលពលរដ្ឋអាចធ្វើដំណើរទៅកាន់សហភាពអឺរ៉ុបដែលមាន២៧ប្រទេសដោយមិនមានការបន្ថែមការរឹត្បិតដូចជាការតម្រូវឲ្យធ្វើចត្តាឡីស័កនិងការធ្វើតេស្តហើយ។
ការស្នើនេះនឹងត្រូវធ្វើឡើងដោយក្រុមប្រឹក្សាអឺរ៉ុបដែលពិនិត្យមើលឡើងវិញនូវបញ្ជីនៃការធ្វើដំណើររបស់សហភាពអឺរ៉ុបជារៀងរាល់២សប្តាហ៍ម្តង។ ទោះជាយ៉ាងណា ការរឹតបន្តឹងដែលស្នើឡើងនេះ នឹងមិនតម្រូវឲ្យបណ្តាប្រទេសដែលជាសមាជិកទាំងអស់អនុវត្តនោះទេ នៅពេលដែលមិនមានគោលនយោបាយនៃការធ្វើដំណើរឯកភាពគ្នា ហើយប្រទេសជាសមាជិកមានសិទ្ធិកំណត់បទបញ្ញត្តិដោយខ្លួនឯង។
សហភាពអឺរ៉ុបបានលុបចោលការរឹតបន្តឹងការធ្វើដំណើរសម្រាប់អ្នកទេសចរណ៍អាមេរិកកាលពីខែមិថុនា ថ្វីបើសហរដ្ឋអាមេរិកនៅតែរក្សាការហាមឃាត់អ្នកធ្វើដំណើរមកពីអឺរ៉ុបក៏ដោយ។
កាលពីសប្តាហ៍មុន ការឆ្លងថ្មីក្នុងមួយថ្ងៃមានជាមធ្យមចំនួន១៥០.០០០ករណី ជាចំនួនឆ្លងកើនឡើងខ្លាំងដូចជាខែមករានិងកុម្ភៈនៅឆ្នាំនេះ។ ការចូលសម្រាកក្នុងមន្ទីរពេទ្យទាក់ទិននឹងជំងឺកូវីដ១៩ ក៏បានកើនឡើងប្រហែល១០០.000ករណីដែរ ដែលជាចំនួនមួយដែលមិនបានឃើញមានចាប់តាំងពីដើមខែកុម្ភៈមក៕
(ព័ត៌មានខ្លះនៃសេចក្តីរាយការណ៍នេះត្រូវបានដកស្រង់ចេញពីទីភ្នាក់ងារព័ត៌មាន AP។)
