មិនដល់ពីរសប្តាហ៍បន្ទាប់ពីចៅក្រមសាលាដំបូងរាជធានីភ្នំពេញបានផ្តន្ទាទោសដ៏ធ្ងន់លើលោក កឹម សុខា សភាសហភាពអឺរ៉ុបនឹងបើកកិច្ចពិភាក្សាជជែកដេញដោលគ្នា ពាក់ព័ន្ធនឹងការផ្តន្ទាទោសអតីតមេដឹកនាំគណបក្សប្រឆាំងរូបនេះ។
កិច្ចជជែកដេញដោលគ្នានេះ នឹងធ្វើឡើងនៅរសៀលថ្ងៃព្រហស្បតិ៍ ទី១៦ ខែមីនានេះ ម៉ោងនៅទីក្រុង Strasbourg នៃប្រទេសបារាំង ដែលត្រូវនឹងពេលល្ងាចម៉ោងនៅប្រទេសកម្ពុជា។
កាលពីថ្ងៃទី ៣ ខែមីនាកន្លងទៅនេះ លោក កឹម សុខា អតីតមេដឹកនាំគណបក្សសង្គ្រោះជាតិ ដែលត្រូវបានតុលាការកំពូលរំលាយ ត្រូវបានចៅក្រមជនុំជម្រះក្តីនៃសាលាដំបូងរាជធានីភ្នំពេញ សម្រេចផ្តន្ទាទោសឱ្យជាប់ពន្ធនាគាររយៈពេល ២៧ ឆ្នាំ ដោយលោកត្រូវឃុំនៅក្នុងផ្ទះ ដោយមានការយាមកាមយ៉ាងតឹងរ៉ឹង។
បន្ថែមលើនេះ អ្នកនយោបាយជំទាស់ជើងចាស់រូបនេះ ក៏បានបាត់បងសិទ្ធិធ្វើនយោបាយទាំងស្រុង និងសិទ្ធិពាក់ព័ន្ធនឹងការបោះឆ្នោតជារៀងរហូតផងដែរ។
ទោះជាយ៉ាងណាក្តី មេធាវីការពារក្តីរបស់លោក កឹម សុខា នឹងប្តឹងជំទាស់នឹងសាលក្រមនេះ នៅសាលាឧទ្ធរណ៍នាពេលឆាប់ៗនេះ។ ក៏ប៉ុន្តែ នៅដើមសប្តាហ៍នេះ សហមេធាវីពីររូបរបស់លោក កឹម សុខា ត្រូវបានសមត្ថកិច្ចហាមឃាត់មិនឱ្យចូលជួបមេដឹកនាំនយោបាយជំទាស់រូបនេះ ក្រោមហេតុផលថាគ្មានលិខិតអនុញ្ញាតពីព្រះរាជអាជ្ញា។
ក្រោយពីការប្រកាសសាលក្រមលើសំណុំរឿងក្បត់ជាតិដ៏ចម្រូងចម្រាសរបស់លោក កឹម សុខា នោះ សហគមន៍អន្តរជាតិដូចជាសហរដ្ឋអាមេរិក ចក្រភពអង់គ្លេស អូស្ត្រាលី សហភាពអឺរ៉ុប អង្គការសហប្រជាជាតិ និងអង្គការសិទ្ធិមនុស្សក្នុងតំបន់ជាច្រើន បានប្រតិកម្មនឹងការផ្តន្ទាទោសនោះ ដោយបានថ្លែងថ្កោលទោស និងបង្ហាញក្តីបារម្ភអំពីភាពត្រឹមត្រូវនៃដំណើរការបោះឆ្នោតថ្នាក់ជាតិនៅខែកក្កដា និងអំពាវនាវឱ្យរដ្ឋាភិបាលកម្ពុជាដោះលែងលោក កឹម សុខា និងស្តាស្ថានភាពសិទ្ធិមនុស្សនិងនយោបាយដ៏ដុនដាបក្នុងប្រទេសកម្ពុជាឡើងវិញ៕
