ភ្ជាប់​ទៅ​គេហទំព័រ​ទាក់ទង

មេ​ដឹកនាំ​សហគមន៍​អឺរ៉ុប​បន្ត​ស្វែងរក​ចម្លើយ​សម្រាប់​បញ្ហា​សេដ្ឋកិច្ច


មេ​ដឹកនាំ​សហគមន៍​អឺរ៉ុប​បន្ត​ស្វែងរក​ចម្លើយ​សម្រាប់​បញ្ហា​សេដ្ឋកិច្ច

មេ​ដឹកនាំ​សហគមន៍​អឺរ៉ុប​អាច​នឹង​រៀបចំ​ការ​ប្រជុំ​កំពូល​មួយ​ផ្សេង​ទៀត​ស្តីពី​វិបត្តិ​ក្នុង​ប្រទេស​ប្រើ​រូបិយ​ប័ណ្ណ​អឺរ៉ូ នៅ​ថ្ងៃ​សុក្រ​នេះ។ ​នាង​ Lisa ​Bryant ​រាយ​ការណ៍​ពី​ទីក្រុង​បារីស​មកថា​ តំបន់​ដែល​ប្រើ​រូបិយ​ប័ណ្ណ​អឺរ៉ូ​គឺ​កំពុង​តែ​ជួប​ប្រទះ​នឹង​បញ្ហា​អាក្រក់ ​ហើយ​បញ្ហា​បំណុល​របស់​សហ​រដ្ឋ​អាមេរិក​គឺ​បន្ថែម​ទៅ​លើ​ភាព​មិន​ប្រាកដ​នេះ។

មាន​ព័ត៌មាន​ដ៏​អាប់អួរ​ជា​ច្រើន​សម្រាប់​១៧​ប្រទេស​ដែល​ប្រើ​រូបិយប័ណ្ណ​អឺរ៉ូ។ ​សប្តាហ៍​នេះ ​ការកាត់​បន្ថយ​បំណុល​របស់​ប្រទេស​អៀឡង់​ដោយ​ភ្នាក់ងារ​អត្រា​ហិញ្ញវត្ថុ​Moody​ ​ដែល​បង្ហាញ​ពី​ស្ថានភាព​អាក្រក់​នោះ​គឺ​ជា​សកម្មភាព​ទី​២​ស្រដៀង​គ្នា​នឹង​វិធាន​ការ​ធ្វើ​ទៅ​លើ​ប្រទេស​ព័រទុយហ្កាល់ ​(Portugal)​ កាល​ពី​សប្តាហ៍​មុន។ ​ភ្នាក់ងារ​នេះ​បាន​ធ្វើ​ការ​ទស្សន៍​ទាយ​ថា​ ប្រទេស​ទាំង​ពីរ​នេះ​នឹង​ត្រូវ​ការ​ប្រាក់​ជួយ​សង្រ្គោះ​ជា​លើក​ទី​ពីរ​ ដូច​ប្រទេស​ដែល​ប្រើ​រូបិយ​ប័ណ្ណ​អឺរ៉ូ​ដែរ។​ កាល​ពី​ថ្ងៃ​អង្គារ​ ប្រធាន​សហគមន៍​អឺរ៉ុប​ លោក​Herman Van Rompuy​ ដែល​កំពុង​នៅ​ប្រទេស​អេស្បាញ​ និយាយ​ថា​ មាន​ការ​ស្វះស្វែងធ្វើ​ឲ្យ​ទី​ផ្សារ​ដែល​រង្គោះរង្គើរ​នេះ​ស្ងប់​ស្ងាត់​ទៅវិញ។

«ខ្ញុំ​ដឹង​យ៉ាង​ច្បាស់​ពី​ភាព​តាន​តឹង​ក្នុង​ពេល​បច្ចុប្បន្ន​នេះ​នៅ​ក្នុង​ទី​ផ្សារ​បំណុល។ ​ប៉ុន្តែ​ខ្ញុំ​សូមបញ្ជាក់​ឲ្យ​បាន​ច្បាស់​ថា​ មាន​ការ​ប្តេជ្ញា​ចិត្ត​យ៉ាង​មុតមាំនៅ​កម្រិត​ខ្ពស់​បំផុត​ថា​ នឹងធ្វើ​អ្វីៗ​ទាំងអស់​ដើម្បី​រក្សា​ការពារ​ស្ថិរភាព​ហិរញ្ញវត្ថុ​នៅតំបន់​ដែល​ប្រើ​រូបិយ​ប័ណ្ណ​អឺរ៉ូ។ ​មេ​ដឹកនាំ​ប្រទេស​នានា​ត្រូវ​តែ​លើក​យក​បញ្ហា​នេះ​មក​ដាក់​ពី​លើ​របៀប​វារៈ​នយោបាយ​ក្នុង​ស្រុក​ ហើយ​ពួក​គេ​នឹងធ្វើ​ដូច្នេះ»។

ក៏​ប៉ុន្តែ​ កាល​ពី​ដើម​សប្តាហ៍​នេះ​ ជំនួប​រដ្ឋមន្រ្តី​ហិរញ្ញ​វត្ថុ​នៃ​សហគន៍​អឺរ៉ុប​នៅ​ក្នុង​ទីក្រុង​ប្រ៊ុសែស​(Brussels)​ ខកខាន​មិន​បាន​ដាក់​ចេញ​គម្រោង​សកម្មភាព​ច្បាស់​លាស់​ទេ។ ​គេ​ប្រហែល​ជា​ទុក​តួនាទី​នេះ​ឲ្យ​មេ​ដឹកនាំ​សហគមន៍​អឺរ៉ុប​សម្រេច​ ថា​តើពួក​គេ​នឹង​រៀប​ចំ​ប្រជុំ​ជា​បន្ទាន់​នៅ​ថ្ងៃ​សុក្រ​នេះ​ឬ​យ៉ាង​ណា។

គេ​ពិភាក្សា​ថា តើ​វិស័យ​ឯកជន​អាច​ចូលរួម​ភាគ​ទាន​ប៉ុន្មាន​នៅ​ក្នុងកញ្ចប់​ប្រាក់​សង្រ្គោះ​ប្រទេស​ហ្គ្រិច​ម្តង​ទៀត និង​ថា​ តើ​គេ​អាច​ដោះស្រាយ​វិបត្តិ​កញ្ចប់​ប្រាក់​សង្រ្គោះ​បាន​ទាំង​ស្រុង​ដើម្បី​ធ្វើ​ឲ្យ​វា​កាន់​តែ​មាន​លទ្ធភាព​អាច​បត់​បែន​បាន​តាម​ស្ថាន​ការណ៍​ដែរ​ឬ​ទេ។

លោក​ Gilles​ Moec ​សហ​ប្រធាន​ស្ថាប័ន​ស្រាវជ្រាវ​សេដ្ឋកិច្ច​សហគមន៍​អឺរ៉ុប​សម្រាប់​ធនាគារ​ Deutsche ​Bank​ ​ប្រចាំ​នៅ​ទីក្រុង​ឡុងដ៍​ មាន​ប្រសាសន៍​ថា​ ការ​ពាក់ព័ន្ធ​របស់​វិស័យ​ឯកជន​គឺ​ជា​បញ្ហា​នយោបាយ​ដ៏​សំខាន់​មួយ។

«គំនិត​នេះ​បង្ហាញ​ថា ​អ្នក​បង់​ពន្ធ​មិន​គួរ​ជា​ក្រុម​តែ​មួយ​គត់​ក្នុង​ប្រព័ន្ធ​ដែល​ធ្វើ​ការ​បង់​ប្រាក់​សង្រ្គោះ​ទេ​ ជា​ពិសេស ​អ្នក​បង់​ពន្ធ​ក្នុង​ប្រទេស​ដែល​ប្រើប្រាស់​ប្រាក់​អឺរ៉ូ»។

លទ្ធផល​បាន​ពី​អ្វី​ដែល​គេ​ហៅ​ថា​ ការ​សាកល្បង​សមត្ថភាព​របស់​ធនាគារ​អឺរ៉ុប​នេះ​ត្រូវ​បាន​កំណត់​ធ្វើ​នៅ​សប្តាហ៍​នេះ​ ហើយ​ការ​សាក​ល្បង​នេះគួរ​តែ​បង្ហាញ​ពី​លទ្ធភាព​របស់​ធនាគារ​ក្នុង​ការ​ទប់ស្កាត់​វិបត្តិ​ដែល​រីករាល​ដាល​នេះ ​ហើយ​ការ​សាកល្បង​នេះ​ក៏​បង្ហាញ​ពី​លទ្ធភាព​របស់​ធនាគារ​អឺរ៉ុប​ក្នុង​ការ​ផ្តល់​ភាគទាន​សម្រាប់​ប្រាក់​សង្រ្គោះ​ផង​ដែរ៕

ប្រែសម្រួល​ដោយ​ ហ៊ុយ សម្ផស្ស

XS
SM
MD
LG