ភ្ជាប់​ទៅ​គេហទំព័រ​ទាក់ទង

កិច្ច​ចរចា​អំពី​សន្តិភាព​នៅ​​ស៊ីរី និង​ជំនួយ​មនុស្សធម៌​កំពុង​ស្ថិត​ក្នុង​ការ​ប្រថុយ​ប្រថាន​ ដោយសារ​ជម្លោះ​កាន់​តែ​ក្តៅ​ឡើង

  • Lisa Schlein

តង់​របស់​ជនបាត់បង់ទីលំនៅ​ដែល​រងការ​ខូចខាត​ បន្ទាប់​ពី​មាន​ការ​វាយប្រហារ​តាម​អាកាស​នៅ​ជាយក្រុង​ Atareb កាន់កាប់​ដោយ​ពួកឧទ្ទាម​ក្នុង​ខេត្ត​ Aleppo ប្រទេស​ស៊ីរី កាល​ពី​ថ្ងៃ​ទី០៤ ខែ​សីហា ឆ្នាំ​២០១៦។

ក្រុម​មន្រ្តី​ជាន់​ខ្ពស់​នៃ​អង្គការ​សហប្រជា​ជាតិ​ ប្រកាស​ឲ្យ​ដឹង​ថា ​​គម្រោង​បន្ត​កិច្ច​ចរចា​សន្តិភាព​នៅ​ក្នុង​ប្រទេស​ស៊ីរី នៅ​​ចុង​ខែ​សីហា​នេះ​ ស្ថិត​ក្នុង​ភាព​ប្រថុយ​ប្រថាន​​ ដោយសារ​ការ​កើន​ឡើង​នៃ​ជម្លោះ​រវាង​រដ្ឋាភិបាល​​ និង​ក្រុម​ឧទ្ទាម​។​

សង្រ្គាម​ និង​ជម្លោះ​ដែល​បាន​យក​ជីវិត​មនុស្ស​ជាង​៣០០.០០០​នាក់ ក្នុង​រយៈ​ពេល​ជាង​ប្រាំ​ឆ្នាំ​មក​ហើយ នៅ​តែ​បន្ត​គ្មាន​ឈប់។ អង្គការ​សហប្រជាជាតិ​និយាយ​ថា​ មាន​តែ​ដំណោះស្រាយតាម​នយោបាយ​តែ​មួយ​គត់ ទើប​អាច​បញ្ចប់​ជម្លោះ​បង្ហូរ​ឈាម​នេះ​បាន។

អនុ​បេសកកជន​ពិសេស​ប្រចាំ​ប្រទេស​ស៊ីរី លោក Ramzy Ezzeldin Ramzy មាន​ប្រសាសន៍​ថា​ អង្គការ​សហប្រជាជាតិប្តេជ្ញា​ដាច់​ខាត​នឹង​នាំ​យក​ភាគី​ជម្លោះ​ទាំងអស់​មក​ចូល​រួម​តុ​ប្រជុំ​ចរចា នៅ​ចុង​ខែ​នេះ។ ​

«ដើម្បី​ឲ្យ​កិច្ច​ចរចា​នេះ​ បាន​ផល​មាន​ផ្លែផ្កា ខ្ញុំ​គិត​ថា ​ត្រូវ​ផ្អាក​ការ​វាយ​ប្រហារ ត្រូវ​តែ​ពង្រឹង​បន្ថែម ហើយ​នៅ​ទីនេះ​ សហរដ្ឋ​អាមេរិក​ និង​សហព័ន្ធ​សហភាព​សូវៀត​ ជា​សហ​ប្រធាន​រួម​នៅ​ក្នុង​កិច្ច​ពិភាក្សា​ចំពោះ​បញ្ហា​នោះ​ផ្ទាល់។​ ប៉ុន្តែ​ស្ថានភាព​មនុស្សធម៌​ ក៏​ត្រូវ​ធ្វើ​ឲ្យ​ប្រសើរ​ឡើង​ដែរ។ ​កាលពី​ខែ​កន្លង​ទៅ​ មិន​សូវ​មាន​ផល​សម្រេច​អ្វី​ច្រើន​ឡើយ​ ដោយសារ​ការ​កើន​ឡើង​នៃ​សកម្មភាព​យោធា»។

អង្គការ​សហប្រជាជាតិ​បាន​សង្ឃឹម​ថា​ នឹង​ផ្តល់​ជំនួយ​មនុស្សធម៌​ ទៅ​ឲ្យ​ប្រជាជន​១,២​លាន​នាក់ដែល​ត្រូវ​ជាប់​ឃាំង​ និង​នៅ​តំបន់​ពិបាក​ទៅ​ដល់​ ដែល​ទទួល​រង​ផល​ប៉ះ​ពាល់​ពី​ជម្លោះ​នៅ​ក្នុង​ខែ​កក្កដា។ ប៉ុន្តែ​ លោក​ Jan Egeland ទីប្រឹក្សា​ជាន់​ខ្ពស់​របស់​បេសកកជន​ពិសេស​ប្រចាំ​ស៊ីរី បាន​និយាយ​ថា​ ជំនួយ​មនុស្សធម៌​បាន​ទៅ​ដល់ប្រជាជន​តែ​៤០​ភាគរយ​ប៉ុណ្ណោះ។

«វា​ពិត​ជា​គួរ​ឲ្យ​ឈឺ​ចាប់​ខ្លាំង​ណាស់​ សម្រាប់​អ្នក​ធ្វើ​ការ​ផ្នែក​មនុស្សធម៌​ដែល​បាន​ត្រៀម​សម្ភារៈ​ផ្គត់ផ្គង់​ ជាមួយ​នឹង​ឡាន​ដឹក​ទំនិញ​ ជាមួយ​អ្នក​ស្ម័គ្រ​ចិត្ត​ប្រឈម​នឹង​គ្រោះថ្នាក់​ជា​ច្រើន​នៅ​តំបន់​ផ្សេងៗ នៅ​ពេល​ដែលយើង​ត្រូវ​បាន​រារាំង​មិន​ឲ្យ​ទៅ​ដល់ ​៦០ភាគរយ​នៃ​មនុស្ស​១,២​លាន​នាក់ ដែល​យើង​បាន​សង្ឃឹមថា​ នឹង​ទៅ​ជួប»។ ​

អង្គការ​សហប្រជាជាតិ​ បាន​ពិពណ៌នា​ស្ថានភាព​នៅ​ក្នុង​ទីក្រុង​ Aleppo ថា ​ជា​ការ​ខាតបង់​ដ៏​ធ្ងន់ធ្ងរ។ ប្រជាជន​ស៊ីវិល​ជាង​៣០០.០០០នាក់​ បាន​កាត់ផ្តាច់​ពី​ជំនួយ​ស្បៀង​អាហារ និង​ជំនួយ​ផ្សេងៗ​ទៀត​ ក្នុង​រយៈពេល​បី​សប្តាហ៍​កន្លង​ទៅ​នេះ​ នៅ​ខណៈពេល​ដែល​កងទ័ព​រដ្ឋាភិបាល​ប្រទេស​ស៊ីរី​ បាន​រឹត​បន្តឹង​កម្លាំង​របស់​ពួកគេនៅ​ភាគ​ខាង​កើត​ក្រុង​ ដែល​កាន់កាប់​ដោយ​ក្រុម​ឧទ្ទាម។

អង្គការ​សហប្រជាជាតិ​ បាន​អំពាវនាវ​ដដែលៗ​ ក្នុង​ការ​សុំ​ផ្អាក​ជម្លោះ​៤៨​ម៉ោង​ ដើម្បី​ឲ្យ​ជំនួយ​មនុស្សធម៌​បាន​ទៅ​ដល់​ប្រជាពលរដ្ឋ​ដែល​ជាប់​ក្នុង​ការ​ឡោម​ព័ទ្ធ។​ លោក​ Jan Egeland បាន​និយាយថា សកម្មភាព​ផ្នែក​ការ​ទូត​កំពុង​បន្ត​ដំណើរ​ការ​យ៉ាង​ខ្លាំងក្លា​ ដើម្បី​ឲ្យ​ប្រតិបត្តិការ​មនុស្សធម៌​នេះអនុវត្ត​ទៅ​បាន។

លោក​មាន​ប្រសាសន៍​ថា​ ភ្នាក់ងារ​ផ្តល់​ជំនួយ​របស់​អង្គការ​សហប្រជាជាតិ​ បានត្រៀម​រួច​ជាស្រេច​ ដើម្បី​ចេញ​ទៅ​កាន់​ទីក្រុង Aleppo ភ្លាម នៅ​ពេល​ណា​ការ​ផ្អាក​ប្រយុទ្ធ​បាន​អនុម័ត។​ លោកបាន​និយាយថា វិធី​ដែល​មាន​ប្រសិទ្ធភាព​បំផុត​ក្នុង​ការ​ធ្វើ​ដូច្នេះ​ គឺ​ត្រូវ​បង្កើត​ផ្លូវ​មួយ​មាន​ច្រក​ពីរ។ ច្រក​មួយ​គឺ​ឲ្យ​មនុស្ស​ចេញ​ពីទីក្រុង Aleppo ​ ដោយ​ស្ម័គ្រចិត្ត និងច្រក​មួយ​ទៀត ​គឺ​ឲ្យ​ជំនួយ​ចូល​ទៅ​ទីក្រុងដែល​ត្រូវរង​ការ​ឡោម​ព័ទ្ធ​នេះ។

ប្រែ​សម្រួល​ដោយ សើ​ សាយ្យាណា

XS
SM
MD
LG