ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

បេក្ខជន​មេឃុំ​ជាប់​ឆ្នោត​គណបក្ស​ភ្លើងទៀន​ក្នុង​ខេត្ត​កំពង់ធំ ត្រូវ​ចាប់​ខ្លួន


លោក ញឹម សារ៉ុម បេក្ខជន​មេឃុំ​ជាប់ឆ្នោត​ នៅ​ឃុំ​ចំណាលើ ស្រុក​ស្ទោង ខេត្តកំពង់ធំ​មក​ពី​គណបក្ស​ភ្លើងទៀន នៅ​ក្នុង​រូបថត​ផ្សាយ​តាម​ហ្វេសប៊ុក​របស់​គណបក្ស​ភ្លើងទៀន​កាល​ពី​ថ្ងៃ​ទិ​២១ ខែ​មិថុនា ឆ្នាំ​២០២២។ (ហ្វេសប៊ុក/គណបក្ស​ភ្លើងទៀន)
លោក ញឹម សារ៉ុម បេក្ខជន​មេឃុំ​ជាប់ឆ្នោត​ នៅ​ឃុំ​ចំណាលើ ស្រុក​ស្ទោង ខេត្តកំពង់ធំ​មក​ពី​គណបក្ស​ភ្លើងទៀន នៅ​ក្នុង​រូបថត​ផ្សាយ​តាម​ហ្វេសប៊ុក​របស់​គណបក្ស​ភ្លើងទៀន​កាល​ពី​ថ្ងៃ​ទិ​២១ ខែ​មិថុនា ឆ្នាំ​២០២២។ (ហ្វេសប៊ុក/គណបក្ស​ភ្លើងទៀន)

បេក្ខជន​ជាប់​ឆ្នោត​ជា​មេឃុំ​មក​ពី​គណបក្ស​ភ្លើងទៀន ក្នុង​ឃុំ​ចំណារ​លើ ស្រុក​ស្ទោង ខេត្ត​កំពង់ធំ ត្រូវ​បាន​ចាប់​ខ្លួន កាល​ពី​រសៀល​ថ្ងៃ​អង្គារ។ នេះ​បើ​តាម​ក្រុម​គ្រួសារ និង​គណបក្ស​ភ្លើងទៀន។

គណបក្ស​ភ្លើងទៀន​បាន​បង្ហោះ​សារ​នៅ​លើ​ហ្វេស​ប៊ុក​របស់​ខ្លួន​នា​ថ្ងៃ​អង្គារ​នេះ​ថា​ លោក ញឹម សារ៉ុម បេក្ខជន​មេឃុំ​ជាប់​ឆ្នោត នៅ​ឃុំ​ចំណាលើ ស្រុក​ស្ទោង ខេត្ត​កំពង់ធំ ត្រូវ​បាន​ចាប់​ខ្លួន កាល​ពី​ម៉ោង​ជាង​១​រសៀល ហើយ​គណបក្ស​មិន​ទាន់​អាច​បញ្ជាក់​មូលហេតុ​នៅ​ឡើយ​ទេ។

អ្នកស្រី ខាត់ សុឃាង ភរិយា​របស់​លោក ញឹម សារ៉ុម ប្រាប់​វីអូអេ ខណៈ​កំពុង​ធ្វើ​ដំណើរ​ទៅ​ស្វែង​រក​ស្វាមី​ថា​ ស្វាមី​ត្រូវ​បាន​ហៅ​ទៅ​សួរ​នាំ​នៅ​ប៉ុស្តិ៍​នគរ​បាល​ចំណា​លើ ហើយ​លោក​ត្រូវ​បាន​ចាប់​ខ្លួន​នៅ​ទី​នោះ។ អ្នកស្រី​មិន​ទាន់​ដឹង​អំពី​មូលហេតុ​នៃ​ការ​ចាប់​ខ្លួន និង​ការ​ចោទ​ប្រកាន់​លើ​ស្វាមី​នៅ​ឡើយ​ទេ។

អធិការ​ស្រុក​ស្ទោង លោក យ៉ង់ សំ ថ្លែង​ថា ​នគរបាល​ទើប​ទទួល​បាន​ដីកា​ចាប់​ខ្លួន​នេះ បើ​ទោះ​ដីកា​នេះ​ចុះ​ថ្ងៃ​ទី​២១ ខែ​មិថុនា ឆ្នាំ​២០១២​ ក៏ដោយ។ លោក​បន្ថែម​ថា​លោក ញឹម សារ៉ុម ត្រូវ​បាន​បញ្ជូន​ខ្លួន​ទៅ​កាន់​ស្នង​ការដ្ឋាន​នគរបាល​ខេត្ត​កំពង់ធំ។

លោក ថាច់ សេដ្ឋា​ អនុ​ប្រធាន​គណបក្ស​ភ្លើងទៀន ប្រាប់​វីអូអេ​នៅ​ថ្ងៃ​អង្គារ​នេះ​ថា ​ករណី​ចាប់​ខ្លួន​នេះ​ជា​«រឿង​នយោបាយ​សុទ្ធសាធ» ដោយសារ​ករណី​នេះ​មាន​ដីកា​របស់​តុលាការ​តាំង​ពី​ឆ្នាំ​២០១២។ លោក​ចោទ​ជា​សំណួរ​ថា​ ហេតុ​អ្វី​បាន​ជា​លោក ញឹម សារ៉ុម មិន​ត្រូវ​ចាប់​ខ្លួន​កាល​ពី​១០​ឆ្នាំ​មុន។ លោក​បន្ថែម​ថារឿងរ៉ាវ​ចោទ​ប្រកាន់​លើ​លោក សារ៉ុម ត្រូវ​បាន​សម្រប​សម្រួល​គ្នា​រួច​អស់​ហើយ។

លោក​ថ្លែង​ថា៖ «ហើយ​យើង​គិត​មើល​តាំង​ពី​២០១២ គាត់​មាន​រត់​ទៅណា ហេតុ​អី​ក៏​មិន​អនុវត្ត មិន​ចាប់ ស្រាប់​តែពេល​មក​ដល់ ពេល​ជាប់​ជា​មេឃុំ មក​ចាប់ អាហ្នឹង​ជា​រឿង​មួយ ដែល​យើង​មើល​ឃើញ​ទាំង​អស់​គ្នា​ហើយ​ថា​ វា​ជា​រឿង​នយោបាយ​សុទ្ធសាធ»។

បើ​តាម​ដីកា​បង្គាប់​ឱ្យ​ចាប់​ខ្លួន​របស់​សាលាដំបូង​ខេត្ត​កំពង់ធំ ចុះ​ថ្ងៃ​ទី​២១ ខែ​មិថុនា ឆ្នាំ​២០១២ គឺ​កាល​ពី​១០​ឆ្នាំ​មុន លោក ញឹម សារ៉ុម ត្រូវ​បាន​ចោទ​ប្រកាន់​ពី​បទ​«ប្លន់»៕

XS
SM
MD
LG