ភ្ជាប់​ទៅ​គេហទំព័រ​ទាក់ទង

ចលាចល​ក្នុង​ប្រទេស​អេហ្ស៊ីប​គម្រាម​កំហែង​កិច្ចប្រឹងប្រែង​ស្រោច​ស្រង់​ការចរចា​សន្តិភាព​តំបន់​មជ្ឈឹម​បូព៌ា


បាតុករ​អេហ្ស៊ីប​សែង​សាកសព​ក្លែងក្លាយ​របស់​លោក​ប្រធានាធិបតី​​ ហ៊ូស្នី​ មូបារ៉ាក់​ ដើម្បី​ជា​​ការ​ចំអក​ដល់​លោក។​

ទីក្រុងយេរូសាឡឹម៖ ចលាចល​នយោបាយ​យ៉ាងខ្លាំង​នៅក្នុង​ប្រទេស​អេហ្ស៊ីប​ ​និង​ប្រទេស​អារ៉ាប់​ផ្សេង​ៗទៀត​បាន​ធ្វើ​ឲ្យមាន​អស្ថេរភាព​នៅក្នុង​តំបន់​ដែល​គម្រាមកំហែង​កិច្ចខិតខំ​ប្រឹងប្រែង​ស្តារ​ការចរចា​សន្តិភាព​ឡើងវិញ​រវាង​ប្រទេស​អ៊ីស្រាអែលនិង​ប៉ាឡេស្ទីន​។ ក៏ប៉ុន្តែ​ មន្រ្តី​ជាន់ខ្ពស់​នៃ​បណ្តា​ប្រទេស​ដែល​គាំទ្រ​ការចរចា​សន្តិភាព​កំពុង​ជម្រុញ​ឲ្យ​បន្ត​ការចរចា​នោះ​ឡើងវិញ​ដោយ​និយាយ​ថា​ការចរ​ចានោះ​មាន​សារៈសំខាន់​ដល់​ស្ថេរភាព​និង​សន្តិសុខ​ក្នុង​តំបន់​មជ្ឈិមបូព៌ា។

សក្តានុពល​សម្រាប់​ការផ្លាស់ប្តូរ​ស្ថានការណ៍​សន្តិសុខ​នៅក្នុង​តំបន់​មជ្ឈិម​បូព៌ាអាច​ធ្វើ​ឲ្យមាន​ភាព​អាប់អួរដល់​សេចក្តី​សង្ឃឹម​នៃ​ការចរចារ​សន្តិភាព​រវាង​អ៊ីស្រាអែល​និង​ប៉ាឡេស្ទីន​ យ៉ាង​ហោច​ណាស់​រហូត​ដល់​ការបះបោរ​ក្នុង​ប្រទេស​អេហ្ស៊ីប​និង​រដ្ឋាភិបាល​នាថ្ងៃ​អនាគត​ក្នុង​ទីក្រុង​ឡឺគែ​ អាច​ទាយទុក​មុន​បាន​។

ថ្លែង​កាលពីពេលថ្មី​ៗ​នេះ​នៅ​មុខសភា​ នាយក​រដ្ឋមន្រ្តី​ Benjamin Netanyahu​ ​បាន​និយាយ​ថា​ ក្នុង​ប្រវត្តិសាស្រ្ត​កាល​ពីពេល​ថ្មី​ៗ​នេះ​ ក្នុង​តំបន់​មជ្ឈិម​បូព៌ា​ ពួកជ្រុលនិយម​អ៊ីស្លាម​ បាន​ឆ្លៀត​ឱកាស​ពី​ការផ្លាស់ប្តូរ​បរិយាកាស​នយោបាយ​ដ៍ឆាប់​រហ័ស​ ដើម្បី​ត្រួតត្រា​ហើយ​នឹង​បង្កើត​របប​ប្រឆាំង​លទ្ធិ​ប្រជាធិបតេយ្យ​។

លោក​ Netanyahu ​បាន​ប្រាប់​សភា​ថា​ពួកជ្រុលនិយម​អ៊ីស្លាម​ក្នុង​ប្រទេស​អ៊ីរ៉ង់ពួក Hezbollah​ ក្នុង​ប្រទេស​លីបង់​ ហើយនឹង​ក្រុម​ប៉ាឡេស្ទីន​ហាម៉ាស​ក្នុង​តំបន់​ ​Gaza Strip ​បាន​ចូលរួម​ក្នុង​ការបោះឆ្នោតដើម្បី​ពង្រឹង​អំណាច។ លោកនិយាយទៀត​ថា​ អ៊ីស្រាអែល​ត្រូវតែ​ធ្វើ​ឲ្យប្រាកដ​ថា​បញ្ហា​នេះ​ មិន​កើតឡើង​ម្តងទៀត​ទេ។

អ៊ីស្រាអែលមាន​ការព្រួយ​កង្វល់​ជាពិសេស​អំពី​គណបក្ស​ Muslim ​Brotherhood​ នៃ​ប្រទេស​អេហ្ស៊ីប។​ នៅខណៈពេល​ដែល​ គណៈបក្ស​នោះត្រូវបាន​ហាមឃាត់​ជា​ផ្លូវការ​ ហើយ​មិន​បញ្ចេញ​សកម្មភាព​ខ្លាំងពេក​ក្នុងការប្រឆាំង​តវ៉ា​នា​ពេល​បច្ចុប្បន្ន ​គណៈបក្ស​នេះ​ត្រូវ​គេ​ចាត់ទុក​ជា​គណៈ​បក្ស​ប្រឆាំង​ដែល​មាន​ការរៀបចំ​ដ៍​ល្អ​ជាងគេ​នៅក្នុង​ប្រទេស​អេហ្ស៊ីប។​ ពួកបាតុករ​ក្នុង​ទីក្រុង​ឡឺគែ​ បាន​ផ្តោត​កំហឹង​របស់​ខ្លួន​លើ​ប្រធានាធិបតីHosni Mubarak​ ក៏ប៉ុន្តែ​ ពួកអ្នកវិភាគ​អ៊ីស្រាអែល​ខ្លះ​ បារម្ភ​ថា​ កំហឹងដ៍ខ្លាំង​នោះ​ នៅថ្ងៃ​ណាមួយ​អាច​តម្រង់​ទៅរក​ប្រទេស​អ៊ីស្រាអែល​។

លោក ​Mark Heller​ ជា​អ្នកស្រាវជ្រាវ​នៅ​វិជ្ជាស្ថាន​ការសិក្សា​សន្តិសុខ​ជាតិ​ក្នុងទីក្រុង​តែល អាវីវ​ (Tel Aviv)​។

«មាន​ការព្រួយកង្វល់​ថា​អរិភាព​ចំពោះ​របប​នោះ​ នឹង​ត្រូវ​ភ្ជាប់គ្នា​ជាមួយ​អរិភាពឆ្ពោះទៅ​កាន់​អ៊ីស្រាអែល​និង​សហរដ្ឋ​អាមេរិក​ហើយ​ថា​ការដួល​រលំ​ដោយ​កា​រផ្លាស់ប្តូរ​របប​នយោបាយ​ នឹង​ក្លាយជា​នយោបាយ​គគ្លើន​ អរិភាព​និងសកម្ម​ប្រយុទ្ធ​កាន់តែ​ខ្លាំង​ឡើង​ដល់​អ៊ីស្រាអែល​។ នេះ​ជា​ការបារម្ភ​មួយ»។

ការចរចា​សន្តិភាព​រវាង​អ៊ីស្រាអែល​និង​ប៉ាឡេស្ទីន​ ដែល​ចាប់ផ្តើម​ក្នុង​រដ្ឋធានីវ៉ាស៊ីនតោន​កាលពី​ខែ​កញ្ញា​ឆ្នាំ​ទៅ​ បាន​ទទួល​បរាជ័យ​ភ្លាម​ៗ​ដោយសារ​អ៊ីស្រាអែល​សម្រេចចិត្ត​មិន​បន្ត​ការផ្អាក​ជា​បណ្តោះ​អាសន្ន​លើ​ការសាងសង់​ទីលំនៅរបស់​អំបូជាតិ​ជ្វីវ​ក្នុង​ទីក្រុង​ Jerusalem ​ភាគខាង​កើត​និង​តំបន់ ​West​Bank​។

ប៉ាឡេស្ទីន​ បាន​បដិសេធ​ពុំវិល​ត្រឡប់​ទៅកាន់​ការចរចា​ដោយ​គ្មាន​ការ​ផ្អាក​ការតាំង​ទីលំនៅ​។

នៅខណៈពេល​ដែល​មាន​ភាព​មិន​ប្រាកដ​ប្រជា​នៅ​ខាងមុខ​ លោក​ Mahdi Abdul​Hadi​ អ្នក​វិភាគន​យោបាយ​ប៉ាឡេស្ទីន​ និយាយ​ថា​ពួកមន្រ្តី​អ៊ីស្រាអែល​ ចាំបាច់​យល់​ថា​ការបះបោរ​របស់​អារ៉ាប់​ អាច​ផ្លាស់ប្តូរ​ការសន្មត់​ជាមុន​មាន​យូរ​មកហើយ​អំពី​ដំណើរការ​សន្តិភាព​នេះ​។

«សង្គម​អ៊ីស្រាអែល​ សព្វថ្ងៃនេះ​ ពួកគេ​កំពុង​រស់នៅ​ភព​មួយ​ផ្សេង​ទៀត​។ ពួក​គេ​ មិន​មើលឃើញ​ការផ្លាស់ប្តូរ​ទេ​។ ពួកគេមិន​មើលឃើញ​ខ្យល់​ទេ​។ ពួកគេ​ មិន​យល់​ពី​សន្ទុះ​នៅ​តាម​ផ្លូវ​ទេ​។ អ្វី​ដែល​ពួកគេ​បារម្ភ​គឺ​សន្តិសុខ​របស់​ខ្លួនគេ​។ ចំពោះ​យើង​ ជា​ជនជាតិ​ប៉ាឡេស្ទីន​ យើង​បាន​មើល​ឃើញ​រឿង​នេះជាព្រិត្តិការណ៍ប្រវត្តិសាស្រ្ត​មួយ»។

បញ្ហា​មួយ​ដែល​ជនជាតិ​ប៉ាឡេស្ទីន​និង​អ៊ីស្រាអែល​ជាច្រើន​មាន​ការព្រួយ​កង្វល់​ គឺ​ការ​មិន​អាច​ទស្សន៍ទាយ​បាន​នៃ​រដ្ឋាភិបាល​ថ្មី​មួយ ​ប្រសិនបើ​ការផ្លាស់ប្តូរ​កើតឡើង​ឆាប់​រហ័ស​ពេក​នោះ​៕

ប្រែ​សម្រួល​ដោយ​ជឹង ប៉ូជីន

XS
SM
MD
LG