ភ្ជាប់​ទៅ​គេហទំព័រ​ទាក់ទង

ជន​ជាតិ​អេហ្ស៊ីប​នៅ​ក្រៅ​ប្រទេស​តាម​ដានភាព​វឹកវរ​ក្នុង​ស្រុក


បាតុករអហ្ស៊ីប​ម្នាក់​កាន់ស្លាកសញ្ញាមួយដែលសរសេរថា​'សេរីភាពអេហ្ស៊ីប'​ នៅក្នុង​ពេល​ធ្វើ​បាតុកម្ម​ប្រឆាំងនឹង​លោក​ ប្រ​ធានាធិបតី​ ហ៊ូសនី​មូបារ៉ាក់​នៅ​ទីក្រុង​បាកសេឡូន​នៃ​ប្រទេស​អេស្ប៉ាញ។

ទីក្រុងម៉ាឌ្រីដ៖ ជនជាតិ​អេហ្ស៊ីប​ដែល​ចេញ​ទៅ​ធ្វើ​ការ​នៅ​ក្រៅ​ប្រទេស តាម​ដាន​ស្ថានការណ៍​នៅ​ប្រទេស​របស់​ខ្លួន​យ៉ាង​អន្ទះសារ តាមរយៈ​វីដេអូ​ស្តី​អំពី​ភាពវឹកវរ​ដែល​កំពុង​កើត​មាន​នៅ​តាម​ផ្លូវ​នានា​ក្នុង​ទីក្រុង​ឡឺគែរ​ ដោយ​ចង់​ដឹង​ថា​ តើ​អ្វី​ដែល​កំពុង​កើត​ឡើង​នោះ​ មាន​ន័យ​យ៉ាងណា​ចំពោះ​អនាគត​របស់​ពួកគេ​ ហើយ​ថាតើ​ពួកគេ​នឹង​អាច​វិល​ត្រឡប់​ទៅ​មាតុភូមិ​របស់​ខ្លួន​បាន​ដែរ​ឬ​ទេ។

ក្នុង​រយៈពេល​៣០ឆ្នាំ​កន្លង​មក​នេះ​ ប្រជាពលរដ្ឋ​អេហ្ស៊ីប ជា​ច្រើន​បាន​ចាក​ចេញ​ពី​ប្រទេស​កំណើត​របស់​ខ្លួន ដើម្បី​ស្វែងរក​ការងារ​ និង​ជីវភាព​ប្រសើរ​ឡើង​នៅ​ឯ​ក្រៅ​ប្រទេស។ ដោយ​ឡែក​ប្រជា​ពលរដ្ឋ​អេហ្ស៊ីប​ដែល​កំពុង​រស់នៅ​ក្នុង​ប្រទេស​អេស្ប៉ាញ​ បាន​ប្រមូលផ្តុំ​គ្នា​នៅ​ស្ថានទូត​អេហ្ស៊ីប ដើម្បី​ធ្វើការ​តវ៉ា​ដូច​ញាតិ​សន្តាន​របស់​ខ្លួន​ដែល​កំពុង​ធ្វើ​នៅ​ក្នុង​ប្រទេស​ដែរ។

ព្រឹត្តិការណ៍​ដែល​បាន​កើត​ឡើង​នៅ​ក្នុង​សប្តាហ៍​កន្លង​ទៅ​នេះ​ ជា​ការ​លំបាក​នឹង​មើល​សម្រាប់​ប្រជា​ពលរដ្ឋ​អេហ្ស៊ីបដែល​រស់នៅ​ឯ​ក្រៅ​ប្រទេស។ អ្នក​ខ្លះ​ចង់​វិល​ត្រឡប់​ទៅ​ទីក្រុង​ឡឺគែរ​វិញ​ភ្លាម​ដើម្បី​ចូល​រួម​ធ្វើ​បាតុកម្ម។​ បេសល រ៉ាមស៊ីស (Basel Ramsis) ដែល​ទើប​តែ​ទិញ​សំបុត្រ​យន្តហោះ​ ដើម្បី​ធ្វើ​ដំណើរ​ទៅ​ទីក្រុង​ឡឺគែរ​ ថ្លែង​ថា៖

«វា​ជា​ប្រទេស​របស់​ខ្ញុំ​ និង​ជា​ប្រជា​ពលរដ្ឋ​របស់​ខ្ញុំ។​ ខ្ញុំ​គិត​ថា​ ពលរដ្ឋ​អេហ្ស៊ីបណា​ក៏ដោយ​ ដែល​មាន​ទំនាក់ទំនង​ពិត​ប្រាកដជាមួយ​នឹង​ប្រជាពលរដ្ឋ​របស់​ខ្លួន​នោះ​នឹង​មាន​អារម្មណ៍​ក្តុក​ក្តួល​ណាស់​ ដែល​ខ្លួន​ឋិត​នៅ​ឯ​ក្រៅ​ប្រទេស។​ នោះ​ជា​មូលហេតុ​ដែល​ខ្ញុំ​ទៅ​ទីក្រុង​ឡឺគែរ​វិញ»។

ប្រជាពលរដ្ឋ​អេហ្ស៊ីប​ភាគ​ច្រើន​នៅ​ទីក្រុង​ម៉ាឌ្រីដ​នេះ​ និយាយ​ថា​ ពួក​គេ​មាន​អារម្មណ៍​រំភើប​ចំពោះ​អនាគត​រដ្ឋាភិបាល​ថ្មី​នៅ​ឯ​មាតុភូមិ​របស់​ខ្លួន។​ ពួក​គេ​ជា​ច្រើន​បាន​ចាក​ចេញ​ពី​ប្រទេស​អេហ្ស៊ីប ដោយសារ​តែ​នៅ​ក្រោម​ការ​ដឹកនាំ​របស់​លោក​មូបារ៉ាក់​ ពួកគេ​គ្មាន​ឱកាស​ គ្មាន​ការងារ​ និង​គ្មាន​ប្រាក់កាស​ដើម្បី​បន្ត​ការសិក្សា​នៅ​សាកល​វិទ្យាល័យ។

ហ៊ូសេន​ អាប់ដែល​ ការ៉េម​ (Hussein Abdel-Karem) ជា​ជន​អេហ្ស៊ីប​ម្នាក់​ទៀត​ដែល​កំពុង​មើល​វីដេអូ​នៃ​សកម្ម​ភាព​បាតុកម្ម។ លោក​ថ្លែង​ថា៖

«រហូត​មក​ដល់​ពេល​នេះ ខ្ញុំ​បាន​មក​នៅ​ប្រទេស​អេស្ប៉ាញ​នេះ​១០​ខែ​ហើយ។​ ខ្ញុំ​កំពុង​សិក្សា​ថ្នាក់​ក្រោយ​ឧត្តម​សិក្សា​នៅ​សាលា​អេស្ប៉ាញ​មួយ។​ ខ្ញុំ​កំពុង​សិក្សា​យក​បរិញាប័ត្រ​ជាន់​ខ្ពស់​ផ្នែក​រដ្ឋបាល​ពាណិជ្ជកម្ម។​ ខ្ញុំ​អាយុ​៣១ឆ្នាំ​ហើយ។​ ខ្ញុំ​បាន​រស់នៅ​ប្រទេស​អេហ្ស៊ីបអស់​មួយ​ជីវិត​ខ្ញុំ​ហើយ»។

ហ៊ូសេន ​បាន​ពណ៌នា​អំពី​អារម្មណ៍​របស់​លោក​ នៅ​ពេល​ដែល​លោក​មើល​វីដេអូ​ដែល​ជនរួមជាតិ​របស់​លោក​ធ្វើ​បាតុកម្ម។ លោក​បន្ត​ថា៖

«ខ្ញុំ​មាន​ចិត្ត​សប្បាយ​រីករាយ​ណាស់។​ នេះ​ជា​ពេលវេលា​ និង​ជា​ឱកាស​តែ​មួយ​គត់​ ដែល​ប្រជាពលរដ្ឋ​អេហ្ស៊ីប អាច​ស្តារ​សកម្មភាព​វីរភាព និង​ទឹកចិត្ត​ល្អ​របស់​ពួកគេ​ឡើង​វិញ។​ ពួកគេ​ត្រូវ​បាន​ជិះ​ជាន់​អស់​រយៈពេល​៣០ឆ្នាំ​ហើយ»។

នូរេឌីន អេសាវី (Noureddin Essawi) បាន​ចេញ​ពី​ទីក្រុង​ឡឺគែរ​ ទៅ​រស់​នៅ​ប្រទេស​អេស្ប៉ាញ​ កាលពី​៦ឆ្នាំ​មុន។ លោក​បាន​ប្រៀបធៀប​ជីវិត​របស់​លោក​នៅ​ទីនេះ​ ទៅ​នឹង​ជីដូន​មួយ​ម្នាក់​របស់​លោក​នៅ​អេហ្ស៊ីបថា​ លោក​មាន​គូដណ្តឹង​ មាន​ការងារ​ល្អ​ និង​មាន​ការ​ថែទាំ​សុខភាពឥត​គិត​ថ្លៃ​ រី​ឯ​ជីដូន​មួយ​របស់​លោក​នៅ​អេហ្ស៊ីបវិញ​មិនមាន​អ្វី​ទាំងនេះ​ទេ។​ លោក​និយាយថា៖

«ជីដូន​មួយ​ខ្ញុំ​នោះ​ នឹង​គ្មាន​អនាគត​រីករាយ​ទេ​ គាត់​គ្មាន​ផ្ទះ​ គ្មាន​អ្វី​ៗ​ទាល់​តែ​សោះ។​ ឧទាហរណ៍​ នៅ​ប្រទេស​អេស្ប៉ាញ​នេះ​ ខ្ញុំ​មាន​ឱកាសធ្វើ​ការងារ។ ខ្ញុំ​មាន​ឱសថ​ព្យាបាល។ ខែ​ក្រោយ​នេះ​ ខ្ញុំ​នឹង​រៀបការ។​ ខ្ញុំ​ជួល​ផ្ទះ​នៅ​ដោយ​ខ្លួន​ឯង​ ខ្ញុំ​មាន​ការងារ​ធ្វើ។​ នៅ​ទីនេះ​ សម្រាប់​មនុស្ស​សាមញ្ញ​ម្នាក់​ ខ្ញុំ​អាច​មាន​អ្វី​ដែល​ខ្ញុំ​ត្រូវការ»។

អ្នកស្រី​ម៉ាហា​ អាហ្សាម​ (Maha Azzam) ជា​អ្នកសិក្សា​ស្រាវជ្រាវ​អំពី​មជ្ឈិមបូព៌ា​ប្រទេស​នៃ​វិទ្យាស្ថាន​ស្រាវជ្រាវ​ ឆាថាម​ ហោស​ (Chatham House)​ នៅ​ទីក្រុង​ឡុងដ៍​ និង​ជា​ជន​ជាតិ​អេហ្ស៊ីប​ម្នាក់​ដែល​ធ្វើការ​នៅ​ក្រៅ​ប្រទេស។ អ្នក​ស្រី​ អាហ្សាម​ មាន​ប្រសាសន៍​ថា​ មិន​ថា​គេ​រស់នៅ​ក្រៅ​ប្រទេស​យូរ​ប៉ុណ្ណា​នោះ​ទេ​ ពួក​គេ​មិនអាច​ផ្តាច់​ទំនាក់​ទំនង​ជា​មួយ​ប្រទេស​របស់​ពួកគេ​បាន​ឡើយ។ អ្នក​ស្រី​បន្ត​ថា៖

«ចំណង​ទាក់ទង​ គឺ​ខ្លាំង​ណាស់​ ហើយ​ខ្ញុំ​គិត​ថា​ ចំណង​ទាក់ទង​នោះ​ នឹង​បើក​ទ្វារ​ទទួល​ពលរដ្ឋ​អេហ្ស៊ីបគ្រប់​រូប​ ដែល​ចង់​វិលត្រឡប់​ទៅ​មាតុភូមិ​វិញ​ បើ​មិន​មែន​ក្នុង​ពេល​ឆាប់ៗ​នេះ​ គឺ​ក្នុង​ពេល​ណាមួយ​ដែល​ស្ថានការណ៍​នយោបាយ​អំណោយ​ផល»។

ប្រជាពលរដ្ឋ​អេហ្ស៊ីបដែល​ធ្វើការ​នៅ​ក្រៅ​ប្រទេស​ជាច្រើន​សង្ឃឹម​ថា​ ស្ថានការណ៍​អំណោយ​ផល​នោះ​អាច​នឹង​កើតមាន​ក្នុង​ពេល​ឆាប់ៗ​នេះ៕

ប្រែសម្រួល​ដោយ​ លី​ ម៉ូរីវ៉ាន់

XS
SM
MD
LG