ការសិក្សាថ្មីមួយនៅក្នុងប្រទេសឥណ្ឌាបានរកឃើញថាការរីកចំរើនសេដ្ឋកិច្ចដ៏លឿនរបស់ប្រទេសនៅក្នុងពីរទសវត្ស៍កន្លងទៅនេះមានឥទ្ធិពលតែបន្តិចបន្តួច ទៅលើនិមិត្តសញ្ញាសំខាន់ៗជាច្រើននៃសុខភាពរបស់កុមារ។ ក្រុមអ្នកនិពន្ធនៃការសិក្សាសន្មត់ថា ការលូតលាស់សេដ្ឋកិច្ច មិនបាននាំឲ្យកុមារបរិភោគអាហារមានជីវជាតិល្អប្រសើរជាងមុនទេ។
ការសិក្សាបានប្រើទិន្នន័យពាសពេញប្រទេស មានតាំងពីការស្ទង់មតិបីដែលចាប់ផ្តើមនៅដើមទសវត្ស៍ឆ្នាំ១៩៩០។ នៅក្នុងកំឡុងនៃការសិក្សាទាំងនេះ ប្រទេសឥណ្ឌាមានការលូតលាស់សេដ្ឋកិច្ចដ៏ខ្លាំង ព្រមទាំងមានការកើនឡើង នៃមនុស្សវណ្ណៈមធ្យមយ៉ាងច្រើនផង។ លោក ស៊ូប្រាមេនីញាន (S.V. Subramanian) នៃសាកលវិទ្យាល័យ Harvard University និងក្រុមសហសេវិករបស់លោកចង់ ឃើញថាតើមានការធ្វើឲ្យប្រសើរឡើងអ្វីខ្លះ ដល់ចំណីអាហាររបស់កុមារ នៅក្នុងកំឡុងនៃការលូតលាស់សេដ្ឋកិច្ចនោះ។
នៅក្នុងការសិក្សាទាំងឡាយ កុមារជាង៧ម៉ឺន៧ពាន់នាក់ត្រូវបានថ្លឹងទម្ងន់និងវាស់កំពស់ដើម្បីឲ្យក្រុមអ្នកស្រាវជ្រាវអាចប្រៀបធៀបអាយុ ទម្ងន់ និងកំពស់។ គេបានយកទិន្នន័យនេះដើម្បីគុណគូរ រករង្វាស់រង្វាល់ស្តង់ដានៃចំណីអាហារគ្រប់គ្រាន់សម្រាប់ឲ្យកុមារធំធាត់នៅក្នុងរដ្ឋទាំងឡាយទូទាំងប្រទេសឥណ្ឌា។
«រឿងដ៏ល្អមួយអំពីការរៀបចំនេះគឺយើងអាចឃើញការផ្លាស់ប្តូរ។ ចុះប្រសិនបើសេដ្ឋកិច្ចរបស់រដ្ឋបានប្រសើរឡើងនោះ តើអាចនាំឲ្យមានការកាត់បន្ថយគ្រោះថ្នាក់នៅក្នុងកុមារដែលខ្សោយស្គមស្គាំងដោយគ្មានអាហារបរិភោគគ្រប់គ្រាន់បានឬទេ? យើងបានរកឃើញថា គ្មានការជាប់ទាក់ទងគ្នាទាល់តែសោះ»។
នៅក្នុងកំឡុងនៃការស្ទង់មតិបីនោះ ការលូតលាស់សេដ្ឋកិច្ចមិនមានគ្រប់វិស័យទេ។ បច្ចេកវិជ្ជានិងវិស័យសេវា បានរីកចំរើនមែន ប៉ុន្តែមានឥទ្ធិពលតិចតួចណាស់នៅក្នុងតំបន់ជនបទស្រុកស្រែដ៏ធំរបស់ឥណ្ឌានិងក្នុងសេដ្ឋកិច្ចខាងកសិកម្មរបស់ខ្លួន។
លោក ស៊ូប្រាមេនីញាន (Subramanian) និយាយថានៅក្នុងគោលការណ៍នោះ ការលូតលាស់សេដ្ឋកិច្ចមិនចាំបាច់មាននៅក្នុងគ្រប់វិស័យទេ។
«ទោះបីជាការលូតលាស់សេដ្ឋកិច្ចកើតមានទាំងស្រុងចេញពីផ្នែកតូចៗនៃប្រជាពលរដ្ឋក៏ដោយ រដ្ឋាភិបាលអាចទទួលប្រាក់ចំណូលច្រើន ប៉ុន្តែគេត្រូវតែបណ្តាក់ទុនប្រាក់ចំណូលបន្ថែមនោះក្នុងវិស័យសុខភាព ដើម្បីធ្វើឲ្យមានការផ្លាស់ប្តូរមួយ។ ប៉ុន្តែរឿងនេះហាក់ដូចជាមិនបានកើតឡើងនោះទេ»។
ការស្ទង់មតិរបស់ឥណ្ឌាជាផ្នែកនៃគម្រោងការណ៍ចម្រុះជាតិសាស្ត្រមួយដែលហៅថាការស្ទង់មតិនៃប្រជាសាស្ត្រនិងសុខភាព ដែលបានឧបត្ថម្ភឡើងដោយទីភ្នាក់ងារស.រ.អាសម្រាប់ការអភិវឌ្ឍន៍អន្តរជាតិ។ លោកSubramanian និយាយថា ខ្លួនលោកនិងសហសេវិករបស់លោកកំពុងប្រមាណមើលការស្ទង់មតិផ្សេងៗទៀតនៅក្នុងគម្រោងការណ៍ ដើម្បីមើលថាតើការលូតលាស់សេដ្ឋកិច្ចនិងចំណីអាហារកុមារ បានភ្ជាប់គ្នាដូចម្តេចខ្លះ នៅក្នុងប្រទេសដទៃៗទៀតដែលមានប្រាក់ចំណូលទាបនិងមធ្យមនោះ។
ការសិក្សាអំពីការលូតលាស់សេដ្ឋកិច្ចនិងអំពីចំណីអាហារកុមារក្នុងប្រទេសឥណ្ឌាដោយលោក S.V. Subramanian អ្នកនិពន្ធនាំមុខគេ Malavika Subramayam និងក្រុមសហសេវិកនោះ មានចុះផ្សាយក្នុងទស្សនាវដ្តីឈ្មោះ “Plos Medicine”។
ប្រែសម្រួលដោយ នុច សារីតា
