ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

​តំណាង​សហ​ភាព​អឺរ៉ុប​ និង​អង្គការ​សង្គម​ស៊ីវិល​បង្ហាញ​ក្តី​បារម្ភ​ចំពោះ​ការ​ធ្លាក់​ចុះ​នៃ​សិទ្ធិ​មនុស្ស​នៅ​កម្ពុជា​


អង្គការ​សង្គម​ស៊ីវិល​ ​ក្រុម​សហជីព និង​សកម្មជន និងប្រជាពលរដ្ឋ​នានា​ ចូលរួម​ប្រារព្ធទិវាសិទ្ធិមនុស្សអន្តរ​ជាតិ១០ធ្នូ ​លើក​ទី៧០ ទីលាន​ប្រជាធិបតេយ្យ​ នៅរាជធានីភ្នំពេញ​​ នៅថ្ងៃទី​១០ ខែធ្នូ ឆ្នាំ​២០១៨។ (អូន​ ឆេង​ប៉រ​​​/ VOA)

នៅ​ក្នុង​ពិធី​រំឭក​ខួប​លើក​ទី​​៧០​នៃ​សេចក្តី​ប្រកាស​ស្តីពី​សិទ្ធិ​មនុស្ស ​សហភាព​អឺរ៉ុប​នៅ​តែ​បង្ហាញ​ការ​ព្រួយ​បារម្ភ​ពី​ស្ថានភាព​សិទ្ធិ​មនុស្ស​នៅ​កម្ពុជា ​ខណៈ​ពេល​មាន​ការ​រឹតត្បិត​លើ​ការ​ប្រមូល​ផ្តុំ​របស់​សហគមន៍​មូលដ្ឋាន​មួយ​ចំនួន។

ក្នុង​ថ្ងៃ​ប្រារព្ធ​ខួប​លើក​ទី៧០​នៃ​សេចក្តី​ប្រកាស​ជា​សាកល​ស្តី​ពី​សិទ្ធិ​មនុស្ស​កាល​ពី​ថ្ងៃ​ចន្ទ​ ​តំណាងសហភាព​អឺរ៉ុប​ប្រចាំ​កម្ពុជា​បង្ហាញ​ក្តី​បារម្ភ​របស់​សហភាព​អឺរ៉ុប​សារ​ជាថ្មីចំពោះ​ការ​ធ្លាក់​ចុះ​នៃ​ការ​គោរព​សិទ្ធិ​មនុស្ស​នៅ​កម្ពុជា​ ​ក៏​ប៉ុន្តែ​មន្ត្រី​ជាន់​ខ្ពស់​កម្ពុជា​បញ្ជាក់​ថា ​សេរីភាព​និង​ការ​គោរព​សិទ្ធិ​មនុស្ស​នៅ​កម្ពុជា​ប្រសើរ​ជាង​ប្រទេស​អភិវឌ្ឍន៍​មួយ​ចំនួន​ក្នុង​ពិភពលោក។​

ថ្លែង​ប្រាប់​អ្នក​សារ​ព័ត៌មាន​ក្នុង​ពិធី​រំឭក​ខួប​លើក​ទី​៧០​នៃ​សេចក្តី​ប្រកាស​ជា​សាកល​ស្តី​ពី​សិទ្ធិ​មនុស្ស​ កាល​ពី​ល្ងាច​ថ្ងៃ​ចន្ទ​ ​ឯកអគ្គ​រដ្ឋទូត​សហភាព​អឺរ៉ុប​ប្រចាំ​កម្ពុជា​ ​លោក​ ​George Edgar​ ​បាន​លើក​ឡើង​យ៉ាង​ដូច្នេះ៖

«នៅ​ក្នុង​បរិបទ​ស្ថានភាព​ទូទៅ​ វា​ច្បាស់​ណាស់​ថា​ ​សហភាព​អឺរ៉ុប​មាន​ការ​ព្រួយ​បារម្ភ​អំពី​ស្ថានភាព​សិទ្ធិ​មនុស្ស​ [នៅ​កម្ពុជា] ​ពាក់​ព័ន្ធ​នឹង​រឿងរ៉ាវ​ ដែល​បាន​កើត​មាន​កាល​ពី​ឆ្នាំ​មុន​មក​ ​ដែល​បាន​ប៉ះពាល់​ដល់​សិទ្ធិ​នយោបាយ​នៅ​កម្ពុជា»។

ឯកអគ្គរដ្ឋទូតសហភាពអឺរ៉ុបប្រចាំកម្ពុជា លោក​ George Edgar ថ្លែងទៅកាន់អ្នកសារព័ត៌មាននៅពិធីរំឭកខួបទី ៧០ នៃ​សេចក្តីប្រកាសស្តីពីសិទ្ធិមនុស្ស នៅវិទ្យាស្ថានបច្ចេកវិទ្យា កាលពីថ្ងៃចន្ទ ទី១០ ខែធ្នូ ឆ្នាំ២០១៨។ (ណឹម សុភ័ក្រ្តបញ្ញា/VOA)
ឯកអគ្គរដ្ឋទូតសហភាពអឺរ៉ុបប្រចាំកម្ពុជា លោក​ George Edgar ថ្លែងទៅកាន់អ្នកសារព័ត៌មាននៅពិធីរំឭកខួបទី ៧០ នៃ​សេចក្តីប្រកាសស្តីពីសិទ្ធិមនុស្ស នៅវិទ្យាស្ថានបច្ចេកវិទ្យា កាលពីថ្ងៃចន្ទ ទី១០ ខែធ្នូ ឆ្នាំ២០១៨។ (ណឹម សុភ័ក្រ្តបញ្ញា/VOA)

កាល​ពី​ឆ្នាំ២០១៧​កន្លង​ទៅ​ រដ្ឋាភិបាល​កម្ពុជា​បាន​បើក​យុទ្ធនាការ​ទ្រង់ទ្រាយ​ធំ​មួយ​ដើម្បីបង្រាប​អង្គការ​សង្គម​ស៊ីវិល​ ​ក្រុម​អ្នក​រិះគន់​រដ្ឋាភិបាល​ និង​សារ​ព័ត៌មាន​ឯករាជ្យ។​ ​ក្នុង​ឆ្នាំ​ដដែល​នោះ ​តុលាការ​កំពូល​កម្ពុជា​បានរំលាយគណបក្ស​សង្រ្គោះ​ជាតិ​ ​ដែល​ជា​គណបក្ស​ប្រឆាំង​ចម្បង​មួយ​នៅ​កម្ពុជា ដោយ​មានការ​ចាប់​ខ្លួន​លោក​កឹម សុខា​ មេ​ដឹកនាំ​គណបក្ស​នេះក្រោម​បទចោទ​ថា​ក្បត់​ជាតិ។​ តុលាការ​កំពូល​កម្ពុជា​ក៏បាន​ដកហូត​សិទ្ធិ​នយោបាយ​របស់អ្នក​នយោបាយ​ជាន់​ខ្ពស់​ពី​គណបក្ស​សង្រ្គោះ​ជាតិ​ចំនួន​១១៨​នាក់ផង​ដែរ។​ ​លោក​កឹម សុខា​ ​ក្រោយមក​ ​ត្រូវបាន​ដាក់​ឱ្យ​ស្ថិត​ក្នុង​ការ​ឃុំឃាំង​ក្នុង​ផ្ទះ​ ​ក្រោម​ការ​ឃ្លាំ​មើល​របស់​តុលាការ។​

ការ​បង្ក្រាប​របស់​រដ្ឋាភិបាល​កម្ពុជា​បាន​រងការ​រិះគន់​យ៉ាង​ចាស់​ដៃ​ពី​សំណាក់​បស្ចឹម​លោក​ ​រួម​ទាំង​ការ​ដាក់​ទណ្ឌកម្ម​ ​និង​ការ​ព្រមាន​ដក​កិច្ច​អនុគ្រោះ​ពន្ធ​ ​EBA​ ​សម្រាប់​ទំនិញ​កម្ពុជា​ចូល​ទីផ្សារ​របស់​សហភាព​អឺរ៉ុប​ផង​ដែរ។​ ​សហភាព​អឺរ៉ុប​កាល​ពី​ខែ​តុលា បាន​ប្រកាស​ទុក​ពេល​ឱ្យ​កម្ពុជា​១២​ខែ​ដើម្បី​សម្រួល​ស្ថានការណ៍​ឡើង​វិញ​ ប្រសិន​បើ​ខ្លួន​ចង់​នាំចូល​ទំនិញ​ទៅ​ទីផ្សា​អឺរ៉ុប​ក្រោម​កិច្ច​អនុគ្រោះ​ពន្ធ។​

ជា​កិច្ច​ឆ្លើយតប​ រដ្ឋាភិបាល​កម្ពុជា ​នៅ​ដើម​ខែ​ធ្នូ​កន្លង​ទៅ​ បាន​ប្រកាស​ពី​ជំហរ​ និង​វិធានការ​នានាធ្វើ​ឱ្យ​ស្ថានការណ៍​សិទ្ធិ​មនុស្ស​ក្នុង​ស្រុក​បាន​ប្រសើរ​ឡើង​រួម​ទាំង​ការ​បើក​លំហ​សេរីភាព​សង្គមស៊ីវិល​ កិច្ច​ព្យាយាម​ធ្វើ​ឱ្យ​អ្នក​នយោបាយ​១១៨​រូប​របស់​បក្ស​ជំទាស់​អាច​ទទួល​សិទ្ធិ​ធ្វើ​នយោបាយ​ឡើង​វិញ​ ​និង​អនុញ្ញាត​ឱ្យ​ស្ថាប័ន​ព័ត៌មាន​ដែល​បិទ​ទ្វារ​អាច​បើក​ដំណើរការ​ឡើង​វិញ​ផង​ដែរ។​

យ៉ាង​ណា​ក្តី​ ​ឯក​អគ្គរដ្ឋទូត​សហ​ភាព​អឺរ៉ុប​ប្រចាំ​កម្ពុជា​ លោក George Edgar​ ​បាន​កត់​សម្គាល់​ពីសេចក្តី​ថ្លែង​ការណ៍​របស់​រដ្ឋាភិបាល​ស្តី​ពី​ការ​ពង្រឹង​លទ្ធិ​ប្រជាធិបតេយ្យ​ និង​លំហ​នយោបាយ​នៅ​កម្ពុជា​ ​ដែល​ផ្តោត​ទៅ​លើ​ការ​សម្រួល​វិធាន​ការ​ច្បាប់​សម្រាប់សមាជិក​គណបក្ស​សង្រ្គោះ​ជាតិ​ចំនួន​១១៨​នាក់​ ​ក៏ដូច​ជា​ការ​បន្ធូរ​បន្ថយ​ការ​រឹត​បន្តឹង​លើ​សង្គម​ស៊ីវិល ​និង​ប្រព័ន្ធ​ផ្សព្វផ្សាយ​ឯករាជ្យ។

លោក​ Edgar ​បាន​និយាយ​ថា៖​

«យើង​ក៏​បាន​ធ្វើ​ការ​កត់​សម្គាល់​យ៉ាង​ប្រយ័ត្ន​ប្រយែង​ចំពោះ​សេចក្តី​ថ្លែង​ការណ៍​របស់​រដ្ឋាភិបាល​ ដែល​ធ្វើ​ឡើង​ ជាពិសេស​ចាប់​ពី​ដើម​សប្តាហ៍​មុន​នេះ​ ដែល​បង្ហាញ​ពី​ភាព​វិជ្ជមាន។​ ​ប៉ុន្តែ​យើងសង្ឃឹម​ថា ​អ្វី​ដែល​ជា​សេចក្តី​ថ្លែង​ការណ៍​របស់​រដ្ឋាភិបាល​នោះនឹង​ក្លាយ​ជា​ការ​អនុវត្ត​ជាក់​ស្តែង»។​

លោក​ឯក​អគ្គរដ្ឋទូត​ ​Edgar បាន​លើក​ឡើង​ថា​ សហភាព​អឺរ៉ុប​ក៏​មិន​បាន​មើល​រំលង​ពី​សមទ្ធិផល​របស់​រដ្ឋាភិបាល​កម្ពុជា​នៅ​ក្នុង​វិស័យផ្សេងៗ​នៅ​ក្នុង​រយៈពេល​ ​២០​ឆ្នាំ​កន្លង​មក​នេះ ​ជា​ពិសេស​នៅ​ក្នុង​វិស័យ​សេដ្ឋកិច្ច​ ដែល​បាន​រួម​ចំណែក​លើក​កម្ពស់​ជីវភាព​ប្រជា​ពលរដ្ឋ​ក្រីក្រ។​ ស្រប​ពេល​ដូចគ្នា​នេះ​ដែរ​ ​លោក​ ​Edgar​ ​ក៏​សង្ឃឹម​ថា​ ​នឹង​មាន​ដំណើរ​ការ​វិវត្តន៍​ទៅ​មុខបន្ថែម​ទៀត​លើ​ផ្នែក​សិទ្ធិ​មនុស្ស​នៅ​កម្ពុជា។​

នៅ​ក្នុង​ពិធី​រំឭក​ខួប​លើក​ទី​៧០​នៃ​សេចក្តី​ប្រកាស​ជា​សាកល​ស្តី​ពី​សិទ្ធិ​មនុស្សនេះ​ផង​ដែរ​ ​លោក​កែវ រ៉េមី​ ​ប្រធាន​គណៈ​កម្ម​ការ​សិទ្ធិ​មនុស្ស​កម្ពុជា ​បាន​លើក​ឡើង​ថា ​មាន​ស្ថានភាព​សិទ្ធិ​មនុស្ស​ផ្សេងៗ​គ្នា​នៅ​តាម​បណ្តា​ប្រទេស​នានា​នៅ​លើ​ពិភព​លោក​ ​ហើយ​បញ្ហា​សិទ្ធិ​មនុស្ស​គឺ​មាន​នៅ​គ្រប់​ប្រទេស​ទាំង​អស់​ ​មិនមែន​តែ​កម្ពុជា​នោះ​ទេ។

លោក​បាន​មាន​ប្រសាសន៍​ថា៖​

«ហើយ​សូម​ជម្រាប​បងប្អូន​ជន​រួមជាតិ​ខ្មែរ​យើង​ឲ្យ​បាន​ជ្រាប​ទាក់ទងទៅ​នឹង​បញ្ហា​សិទ្ធិ​មនុស្ស​នេះ​ ​កុំ​ឲ្យ​មាន​អារម្មណ៍​ថា​ ​កម្ពុជា​...​ ​សូម​ឲ្យ​បើក​ចិត្ត​ទូលាយ​ ​ហើយ​ឆែក​យើង​មើល​តាម​ក្នុង​ប្រព័ន្ធ​អ៊ីន​ធឺណិត​ ​យើង​ឆែក​មើល​រឿង​សិទ្ធិ​មនុស្ស​តាម​បណ្តា​ប្រទេស​នីមួយៗ។​ ​ខ្ញុំ​សូម​ជម្រាប​ជូន​ថា​ ​នៅ​ប្រ​ទេស​ណា​ក៏​មាន​បញ្ហា​សិទ្ធិ​មនុស្ស​ដែរ»។

លោក កែវ រ៉េមី ប្រធាន​គណៈកម្មាធិការ​សិទ្ធិ​មនុស្ស (កាន់ វិច្ឆិកា/VOA)
លោក កែវ រ៉េមី ប្រធាន​គណៈកម្មាធិការ​សិទ្ធិ​មនុស្ស (កាន់ វិច្ឆិកា/VOA)

រដ្ឋាភិបាល​កម្ពុជា​នា​ថ្ងៃ​អង្គារ​នេះ​ក៏​បាន​ចេញ​សេចក្តី​ថ្លែង​ការណ៍​មួយ​ ​ដោយ​លើក​ឡើង​ពី​កិច្ច​ប្រឹងប្រែង​របស់​លោក​នាយក​រដ្ឋមន្រ្តី ហ៊ុន សែន​ ​ប្រធាន​គណបក្ស​ប្រជាជន​កម្ពុជា​ ​ក្នុង​ការ​ផ្តល់​សិទ្ធិ​សេរីភាព​ដល់​ប្រជា​ពលរដ្ឋ​កម្ពុជា​ឡើង​វិញ​ពី​របប​ខ្មែរ​ក្រហម​ ​និង​បាន​ចាត់​ទុក​កិច្ច​ប្រឹងប្រែង​នេះ​ជា​សមិទ្ធ​ផល​ប្រវត្តិ​សាស្រ្ត​របស់​ប្រទេស។​

សេចក្តី​ថ្លែង​ការណ៍​នេះ​ក៏​បាន​សរសេរ​នៅ​ក្នុង​ន័យ​ដើម​ថា៖​

«សិទ្ធិ​មនុស្ស​កម្ពុជា​គឺ​ធានា​ដោយ​ច្បាប់​ពិតប្រាកដ​ ដែល​រាជ​រដ្ឋាភិបាល​កំពុង​ធ្វើ​កំណែ​ទម្រង់​ប្រព័ន្ធ​យុត្តិធម៌​ ​និង​ច្បាប់​ពាក់ព័ន្ធ​នានា​ដើម្បី​ធានា​ និង​ការពារ​សិទ្ធិ​សេរីភាព​ជូន​ប្រជា​ពលរដ្ឋ​ ក៏ដូច​ជាប្រសិទ្ធ​ភាព​នៃ​ការ​អនុវត្ត​ច្បាប់​របស់​អាជ្ញាធរ​ ​និង​កិច្ច​ប្រតិបត្តិ​របស់​ម្ចាស់​អំណាច​គឺ​ប្រជា​ពលរដ្ឋ​ខ្មែរ​ទាំង​អស់»។

អ្នក​ស្រីចក់ សុភាព​ ​ប្រធាន​មជ្ឈមណ្ឌល​សិទ្ធិ​មនុស្ស​កម្ពុជា​ បាន​ប្រាប់​ ​VOA​ ​ថា អ្នក​ស្រី​សង្កេត​ឃើញ​ថា​ ​សិទ្ធិ​មនុស្ស​នៅ​កម្ពុជា​មាន​ការ​ធ្លាក់​ចុះ​យ៉ាង​ខ្លាំង​ ​ប៉ុន្តែ​អ្នកស្រី​សង្ឃឹម​ថា​ រដ្ឋាភិបាល​នឹង​សហការ​ជា​មួយ​សហគមន៍​នានា​ដើម្បី​លើក​កម្ពស់​សិទ្ធិ​មនុស្ស។

រូបឯកសារ៖ នាយិការមជ្ឈមណ្ឌលសិទ្ធិមនុស្សកម្ពុជា (CCHR)
រូបឯកសារ៖ នាយិការមជ្ឈមណ្ឌលសិទ្ធិមនុស្សកម្ពុជា (CCHR)

អ្នកស្រីបាន​និយាយ​ថា៖​

«ស្ថានភាព​សិទ្ធិ​មនុស្ស​នៅ​ក្នុង​រយៈពេល​ពីរ​ឆ្នាំ​នេះ​ គឺ​មាន​សភាព​ដុនដាប​មែន​ទែន។ ​ហើយ​ខ្ញុំ​សង្ឃឹម​ថា​ ​ក្នុង​ទិវា​សិទ្ធិ​មនុស្ស​១០​ធ្នូ​នេះ​ ​ហើយ​ក៏​ចំ​ពេល​ដែល​យើង​ប្រារព្ធ​ខួប​៧០​ឆ្នាំ​នេះ ​ជា​ការ​ក្រើន​រំឭក​សម្រាប់​យើង​ទាំងអស់​គ្នា​ ​ជា​ពិសេស​គឺ​រដ្ឋាភិបាល​ ដែល​គាត់​មាន​កាតព្វកិច្ចផ្តល់​ការ​គោរព ​ហើយ​នឹង​ការ​ការពារ​សិទ្ធិ​មនុស្ស​នេះ​ ត្រូវ​ពិនិត្យ​មើល​ឡើង​វិញ​ថា តើ​ខ្លួន​បាន​បំពេញ​នូវ​លក្ខខណ្ឌ ​និង​កាតព្វកិច្ច​របស់​ខ្លួន​កម្រិត​ណា។​ ​ហើយ​សម្រាប់​យើង​ជាសហគមន៍​ក៏​ដូចគ្នា​ដែរ​ តើ​យើង​បាន​ស្វែង​យល់ ​និង​អនុវត្ត​សិទ្ធិ​របស់​យើង​ពេញលេញ​ដល់​កម្រិត​ណា»។​

លើស​ពី​នេះ​ទៀត​ ​អ្នកស្រី​ ចក់ សុភាព​ ក៏​បាន​លើក​ឡើង​ពី​ការ​បើក​ទូលាយ​ ​ក៏​ដូច​ជាការ​ដាក់​កំហិត​នៅ​ក្នុង​ការ​ប្រមូល​ផ្តុំ​របស់​សហគមន៍​តាម​មូលដ្ឋាន​ផ្សេងៗ​នា​ថ្ងៃ​បុណ្យ​សិទ្ធិ​មនុស្ស​ ​ដែល​ការណ៍​នេះ​បាន​ធ្វើ​ឲ្យ​អ្នកស្រី​ចោទសួរទៅ​លើ​កម្រិត​សិទ្ធិ​សេរីភាព​នៅ​កម្ពុជា​ផង​ដែរ។​

អ្នកស្រី​បាន​និយាយ​ថា៖

«ទន្ទឹម​នឹង​មាន​ការ​រៀបចំ​ផ្សេងៗ​ ដែល​យើង​បាន​ឃើញ​ យើង​ឃើញ​ថា​ ​មាន​ការ​រៀបចំ​ ​ខ្លះ​ហ្នឹង​ត្រូវ​បាន​ទទួល​ការ​ស្វាគមន៍​ មាន​ន័យ​ថា​ ​ការ​បើក​ចំហ​ឲ្យ​ការ​រៀប​ចំ។​ ​ប៉ុន្តែ​យើង​ឃើញ​ថា ​ក្នុង​ហ្នឹង​ក៏​មាន​សហគមន៍​មួយ​ចំនួន​នៅ​តែ​មាន​ការ​ប្រឈម។​ ​យើង​ឃើញ​នៅ​សហគមន៍​ដូចជា​ ​នៅ​ព្រះវិហារ​ ​ខាង​ស្វាយ​រៀង​អី​ហ្នឹង។​ ក្នុង​ឱកាស​នៃ​ទិវា​សិទ្ធិ​មនុស្ស​នេះ​ ជា​សញ្ញាណ​មួយ​ដែល​បង្ហាញ​ថា​ ​តើ​សេរីភាព​របស់​យើង​ហ្នឹង​មាន​កម្រិត​ណា»។​

កាល​ពីព្រឹក​ថ្ងៃ​ចន្ទ​កន្លង​ទៅ​នេះ​ ​បណ្ដា​អង្គការ​សង្គម​ស៊ីវិល ​សហជីព​ ​សកម្មជន​សិទ្ធិ​មនុស្ស ​និង​ពលរដ្ឋ​ប្រមាណ​៤០០​នាក់​បាន​ជួបជុំ​គ្នា​ក្នុង​ទីលាន​ប្រជាធិបតេយ្យ​ស្ថិត​នៅ​ជាយ​រាជធានី​ភ្នំពេញ​ ដើម្បី​ប្រារព្ធ​កម្មវិធី​អបអរ​ទិវា​សិទ្ធិ​មនុស្ស​អន្តរជាតិ​លើក​ទី​៧០។​ ​អ្នកចូល​រួមមាន​ការ​រអ៊ូរទាំ​ពី​«ការ​រឹត​ត្បិត»មិន​ឱ្យ​មាន​ការ​ហែក្បួន​ ​និង​មាន​ការ​រក្សា​សន្តិសុខ​យ៉ាង​តឹងរ៉ឹងពី​សំណាក់​អាជ្ញាធរ​កម្ពុជា។​

លោក​បណ្ឌិត​ ​មាស នី​ ​អ្នក​វិភាគ​ផ្នែក​នយោបាយ ​និង​សង្គម​ បាន​សម្តែង​មតិ​ស្រដៀង​នឹង​អ្នកស្រី​ចក់ ​សុភាព​ ​ប្រធាន​មជ្ឈមណ្ឌល​សិទ្ធិ​មនុស្ស​កម្ពុជា ​ដោយ​លោក​បាន​កត់​សម្គាល់​ពី​ការ​មិន​គោរព​តាម​សារាចរណ៍​ចេញ​ដោយ​រដ្ឋាភិបាល។​

លោក​បាន​ធ្វើ​ការ​ប្រដូច​ការ​ដាក់​កំហិត​លើ​ការ​ប្រមូល​ផ្តុំ​របស់​សហគមន៍​មូលដ្ឋាន​ថា៖​

«វា​ជា​ទិដ្ឋភាពមួយ​ ដែល​អាច​ធ្វើ​ឲ្យ​យើង​និយាយ​បាន​ថា ​ការ​គោរព​សិទ្ធិ​មនុស្ស​នៅ​ក្នុង​ប្រទេស​កម្ពុជា​មក​ដល់​ថ្ងៃ​នេះ ​ឬ​ក៏​ថ្ងៃ​ម្សិល​មិញ​នេះ​គឺ​មិន​ទាន់​បាន​ធ្វើ​ទៅ​ដោយ​ពេញលេញ​នៅ​ឡើយ​ទេ គឺ​នៅ​តែ​ស្ថិត​នៅ​ក្នុង​ការ​គោរព​សិទ្ធិ​មនុស្ស​ ឬក៏​ប្រជា​ធិបតេយ្យ​តាម​បែប​ចង​មុង​ដដែល​ហ្នឹង»។

រូបឯកសារ៖ លោក​បណ្ឌិត​ ​មាស នី​ ​អ្នក​វិភាគ​ផ្នែក​នយោបាយ និង​សង្គម (លឹម សុធី/VOA)
រូបឯកសារ៖ លោក​បណ្ឌិត​ ​មាស នី​ ​អ្នក​វិភាគ​ផ្នែក​នយោបាយ និង​សង្គម (លឹម សុធី/VOA)

លោក​បណ្ឌិត​ មាស នី ក៏បាន​លើក​ឡើង​ពី​ការ​សហការ​គ្នា​រវាង​អាជ្ញាធរ​ និង​សង្គម​ស៊ីវិលក្នុង​បរិបទ​ពង្រឹង​លទ្ធិ​ប្រជាធិបតេយ្យ​ និង​សិទ្ធិ​មនុស្ស​នៅ​កម្ពុជា។​

លោក​បាន​មាន​ប្រសាសន៍​ថា៖​

«វាជា​ការ​សាកល្បង​របស់​រដ្ឋាភិបាល។​ ​ហើយ​អ្វី​ដែល​ខ្ញុំ​សន្និដ្ឋាន​ឃើញ​ថា​ ​រដ្ឋាភិបាល​នៅ​តែ​មិន​ទាន់​ទុក​ចិត្ត​ខ្លួន​ឯង​នៅ​ឡើយ​ទេ ​ក្នុង​ការ​បើក​ចំហ​ឲ្យ​ពលរដ្ឋ​មាន​ការ​ជួបជុំ​គ្នា​ បាទ។​ ​អ៊ីចឹង​ គេ​ត្រូវ​ការ​យាម​កាម។​ ​អ៊ីចឹងដំណោះស្រាយ​ដែល​អាច​ធ្វើ​ទៅ​បានដើម្បី​ឲ្យ​វា​ជា​ការ​ជឿ​ទុកចិត្ត​គ្នា ​គឺ​ត្រូវ​មាន​ការ​ជួបជុំ​គ្នា​រវាង​មន្រ្តី​សង្គមស៊ីវិល​ ​ហើយ​នឹង​ក្រសួង​មហាផ្ទៃ​ឆាប់ៗ​ដែល​អាច​ធ្វើ​ទៅ​បាន​ ​ដើម្បី​ឆ្លុះ​បញ្ចាំង​នូវ​ការ​អនុវត្ត​នូវ​លំហ​ប្រជាធិបតេយ្យ​ ​និង​សិទ្ធិ​មនុស្ស​ ដែល​យើង​ជួប​ប្រទះ​ក្នុង​ពេល​ថ្មីៗ​នេះ ​ហើយ​ធ្វើ​ការ​រួមគ្នា​ដើម្បី​កែ​សម្រួល​ ​ឬ​កែ​តម្រូវ​ទៅ​ទៀត។​ ​អាហ្នឹង​បាន​ហើយ»។

យ៉ាងណា​ក៏​ដោយ​ ប្រធាន​បទ​លើ​ការ​ពង្រឹង​លទ្ធិ​ប្រជាធិបតេយ្យ​ និង​ការ​គោរព​សិទ្ធិ​មនុស្ស​ក្នុង​ប្រ​ទេស​កម្ពុជា​ក្រោយ​ការ​បង្ក្រាប​ដ៏​ធ្ងន់ធ្ងរ​កាល​ពី​ឆ្នាំ​២០១៧​ ​នៅ​តែ​ជា​បញ្ហា​ចោទ​សម្រាប់​រដ្ឋាភិបាល​កម្ពុជា​ ​ខណៈ​សហភាព​អឺរ៉ុប​កំពុង​ពិនិត្យ​លើ​ដំណើរ​ការ​ ​ការ​ដក​កម្ពុជា​ពី​កិច្ច​អនុគ្រោះ​ពន្ធ​ហៅ​កាត់​ថា ​EBA​ ដែល​ផ្តល់ផល​ចំណេញ​ដល់​កម្ពុជា​ប្រមាណ​៧០០​លាន​ដុល្លារ​ក្នុង​មួយ​ឆ្នាំៗ៕

សេចក្តីរាយការណ៍ពិសេស

  • VOA Khmer Special Report Section

    សេចក្តីរាយការណ៍ពិសេស

XS
SM
MD
LG