បេក្ខជនឈរឈ្មោះប្រធានាធិបតីនៃគណបក្សប្រជាធិបតេយ្យទាំង៣នាក់បានពិភាក្សាដេញដោលទៅលើការគ្រប់គ្រងកាំភ្លើងនិងបញ្ហាសុខាភិបាលកាលពីថ្ងៃអាទិត្យនៅលើវេទិកាពិភាក្សាដេញដោល មុនពេលដែលអ្នកបោះឆ្នោតធ្វើការថ្លឹងថ្លែងនៅក្នុងកិច្ចប្រជុំគណបក្ស នៅរដ្ឋ Iowa។
លោកស្រី Hillary Clinton អតីតរដ្ឋមន្រ្តីក្រសួងការបរទេស លោក Bernie Sanders សមាជិកព្រឹទ្ធសភានៃរដ្ឋ Vermont និងលោក Martin O'Malley អតីតអភិបាលរដ្ឋ Maryland នឹងជួបពិភាក្សាដេញដោលគ្នាជាលើកទី៤នៅទីក្រុង Charleston នៃរដ្ឋ South Carolina។
បន្ទាប់ពីបង្ហាញសេចក្តីដឹងគុណទៅកាន់មេដឹកនាំសិទ្ធិមនុស្សគឺលោក Martin Luther King, Jr. ហើយនិយាយថាពួកគេចង់តំឡើងប្រាក់ឈ្នួល បង្កើតការងារ និងធ្វើឲ្យប្រាកដថាបុគ្គលិកនឹងទទួលបានប្រាក់ឈ្នួលសមស្របនឹងការងារ បេក្ខជនឈរឈ្មោះប្រធានាធិបតីទាំង៣រូបបានពិភាក្សាភ្លាមៗទៅលើការគ្រប់គ្រងកាំភ្លើងនិងបញ្ហាសុខាភិបាល ដែលជាបញ្ហាដែលពិបាកដោះស្រាយ។
លោកស្រី Clinton បានរិះគន់ទៅលើគោលនយោបាយគ្រប់គ្រងកាំភ្លើងរបស់លោក Sander ដោយចោទប្រកាន់លោកថាបានផ្លាស់ប្តូរសំណួរថាតើគេអាចប្តឹងក្រុមហ៊ុនផលិតកាំភ្លើងបានដែរឬទេ។
លោក Sanders បានហៅការរិះគន់របស់លោកស្រី Clinton ថាជា«ការមិនស្មោះត្រង់» ដោយលោកបានថ្លែងថា លោកតែងតែក្រោកឈរឡើងប្រឆាំងនឹងការបញ្ចុះបញ្ចូលលើការប្រើប្រាស់កាំភ្លើង ហើយលោកនិយាយថាការគ្រប់គ្រងកាំភ្លើងមិនគួរជាបញ្ហានយោបាយនោះទេ ប៉ុន្តែគេមិនគួរប្តឹងហាងលក់កាំភ្លើងតូចៗចំពោះការលក់កាំភ្លើងដោយស្របច្បាប់នោះទេ ប្រសិនបើកាំភ្លើងនោះត្រូវបានគេប្រើប្រាស់ដើម្បីប្រព្រឹត្តអំពើឧក្រិដ្ឋកម្មនោះ។
លោកស្រី Clinton បានចោទប្រកាន់លោក Sanders ថាបានបោះឆ្នោតគាំទ្រសមាគមជាតិការពារសិទ្ធិអ្នកកាន់កាំភ្លើងជាច្រើនលើកច្រើនសារ ដោយរួមមានទាំងការគាំទ្រក្រុមហ៊ុនផលិតកាំភ្លើងនៅតុលាការថែមទៀតផង។
ប៉ុន្តែលោក O'Malley ទៅវិញទេដែលមានភាពលេចធ្លោ នៅពេលដែលលោកបានមានប្រសាសន៍ថា លោកធ្លាប់បានលឺភាពមិនសមហេតុផលជាច្រើនពីការគ្រប់គ្រងកាំភ្លើងតាំងពីលោកស្រី Clinton និងលោក Sanders ចាប់កំណើត ហើយលោកបានបញ្ជាក់ថា លោកគឺជាមនុស្សតែម្នាក់គត់ដែលមិនកែប្រែគោលនយោបាយកាំភ្លើងរបស់លោក៕
