ក្រុមសមាជិកសភាខាងគណបក្សប្រជាធិបតេយ្យកាលពីថ្ងៃអាទិត្យ បានរិះគន់ចំណាត់ការរបស់ប្រធានាធិបតីសហរដ្ឋអាមេរិកលោក Joe Biden ក្នុងការរក្សាទុកឯកសារសម្ងាត់ជាតិ បន្ទាប់ពីការរកឃើញនាពេលថ្មីៗចុងក្រោយនេះនូវឯកសារជាច្រើនទៀត ដែលមានសរសេរអក្សរថាជាឯកសារសម្ងាត់។
នៅក្នុងបទសម្ភាសន៍មួយជាមួយកម្មវិធី «State of the Union» របស់ទូរទស្សន៍ CNN សមាជិកព្រឹទ្ធសភាសហរដ្ឋអាមេរិកនៃគណបក្សប្រជាធិបតេយ្យ លោក Dick Durbin និយាយថា លោក Biden គួតែមានការ«ខ្មាស់អៀនលើបញ្ហានេះ»។
សមាជិកព្រឹទ្ធសភារូបនេះនិយាយថា គ្មាននរណាម្នាក់ក្នុងចំណោមលោក Biden ឬអតីតប្រធានាធិបតីអាមេរិកលោក Donald Trump គួររក្សាទុកនូវឯកសារទាំងនោះផ្ទាល់ខ្លួននោះទេដោយលោកថ្លែងថា «អ្វីដែលបានកើតឡើង និងកើតចេញពីបញ្ហានេះគឺមានការខុសប្លែកគ្នាខ្លាំង»។
មេធាវីរបស់លោក Biden បាននិយាយកាលពីថ្ងៃសៅរ៍ថា ទីភ្នាក់ងារស៊ើបអង្កេតសហព័ន្ធ FBI អាមេរិក បានរកឃើញនិងយកឯកសារចំនួន៦ដុំដែលមានសរសេរអក្សរថា ជាឯកសារសម្ងាត់ចេញពីគេហដ្ឋានរបស់លោក Biden ក្រោយពីបានរកឃើញឯកសារមួយចំនួនផ្សេងទៀតនៅក្នុងពេលកន្លងទៅ ដែលមានដាក់ថ្ងៃខែតាំងពីលោក Biden ធ្វើជាអនុប្រធានាធិបតីអាមេរិកម្ល៉េះ ដែលឯកសារទាំងនោះ ត្រូវបានរកឃើញនៅអតីតការិយាល័យធ្វើការរបស់លោកនៅមជ្ឈមណ្ឌល Penn Biden ក្នុងរដ្ឋធានីវ៉ាស៊ីនតោន។
ដោយឡែកក្រសួងយុត្តិធម៌សហរដ្ឋអាមេរិកវិញនិយាយថា លោក Trump បានយកឯកសារសម្ងាត់រាប់រយដុំ ក្រោយបញ្ចប់អាណត្តិជាប្រធានាធិបតីរបស់លោកក្នុងឆ្នាំ២០២១ ហើយថា ខ្លួនត្រូវតែរកដីកាឆែកឆេរមួយពីតុលាការដើម្បីយកឯកសារទាំងនោះមកវិញ បន្ទាប់ពីលោក Trump បានប្រកែកមិនព្រមផ្តល់ឯកសារទាំងនោះតាមសំណើរបស់រដ្ឋាភិបាលមក។
លោក Biden បានប្រាប់ក្រុមអ្នកសារព័ត៌មានកាលពីពេលកន្លងទៅក្នុងខែនេះថា ក្រុមរបស់លោកបានរកឃើញឯកសារមួយចំនួន ដែលត្រូវបានរក្សាទុកខុសកន្លែង ហើយថា ក្រុមរបស់លោកបានផ្តល់ឯកសារទាំងនោះជាបន្ទាន់រួចហើយទៅឱ្យក្រសួងមួយចំនួន ដែលត្រូវចាត់ចែងឯកសារទាំងនេះ។
ដោយឡែកសមាជិកព្រឹទ្ធសភាមួយរូបទៀត ខាងគណបក្សប្រជាធិបតេយ្យ គឺលោក Joe Manchin បានប្រាប់កម្មវិធី«Meet the Press» របស់ទូរទស្សន៍ NBC កាលពីថ្ងៃអាទិត្យថា វាជារឿងដែលមិនគួរឱ្យជឿដែលទាំងលោក Biden និងលោក Trump មានបញ្ហានេះដូចគ្នា ហើយក្រុមរដ្ឋអាជ្ញាស្រាវជ្រាវពិសេស ត្រូវតែធ្វើការស៊ើបអង្កេតឱ្យបានពេញលេញសិន មុនប្រញាប់ប្រញាល់ធ្វើសេចក្តីសន្និដ្ឋានណាមួយនោះ៕
ព័ត៌មានខ្លះក្នុងអត្ថបទនេះត្រូវបានដកស្រង់ពីទីភ្នាក់ងារសារព័ត៌មាន AP។
