សភាស.រ.អ.ដែលមានសំឡេងគណបក្សប្រជាធិបតេយ្យភាគច្រើន ប្រុងប្រៀបអនុម័តកញ្ចប់ថវិកាបញ្ចៀសការបិទផ្នែកខ្លះនៃរដ្ឋាភិបាលសហព័ន្ធ។
ព្រឹទ្ធសភាសហរដ្ឋអាមេរិកនៅថ្ងៃព្រហស្បតិ៍នេះ មានគម្រោងបោះឆ្នោតអំពីវិធានការថវិកាដើម្បីបញ្ចៀសការបិទផ្នែកខ្លះនៃរដ្ឋាភិបាលសហព័ន្ធ។
បើព្រឹទ្ធសភាយល់ព្រម បញ្ហានេះនឹងត្រូវបញ្ជូនទៅរដ្ឋសភាដើម្បីបោះឆ្នោតនៅពេលដែលសមាជិកសភាធ្វើការដើម្បីសម្រេចឱ្យបានមុនពេលកំណត់ចុងក្រោយនៅពាក់កណ្តាលយប់។
មេដឹកនាំព្រឹទ្ធសភាសំឡេងភាគច្រើនលោក Chuck Schumer បាននិយាយថា សេចក្តីព្រាងច្បាប់នេះ នឹងធ្វើឱ្យស្ថាប័នរដ្ឋាភិបាលមានថវិការហូតដល់ ថ្ងៃទី៣ ខែធ្នូ។ សេចក្តីព្រាងច្បាប់នោះ ក៏នឹងរួមបញ្ចូលកញ្ចប់ថវិកាចំនួន៦.៣០០លានដុល្លារសម្រាប់ជួយការតាំងទីលំនៅរបស់ជនភៀសខ្លួនអាហ្វហ្គានីស្ថានមករស់នៅសហរដ្ឋអាមេរិក បន្ទាប់ពីរដ្ឋាភិបាលក្រុងវ៉ាស៊ីនតោនបានបញ្ចប់សង្គ្រាមរយៈពេល២ទសវត្សរ៍នៅក្នុងប្រទេសអាហ្វហ្គានីស្ថានកាលពីខែមុន និងកញ្ចប់ថវិកាចំនួន២៨.៦០០លានដុល្លារដើម្បីជួយរដ្ឋនៅភាគខាងកើត និងភាគខាងត្បូងស្តារសេដ្ឋកិច្ចពីព្យុះសង្ឃរាដ៏ប្រល័យ និងជួយរដ្ឋនៅផ្នែកខាងលិចស្តារសេដ្ឋកិច្ចពីភ្លើងឆេះព្រៃ។
លោក Schumer បាននិយាយនៅសម័យប្រជុំព្រឹទ្ធសភាកាលពីថ្ងៃពុធថា «ដោយមានបញ្ហាជាច្រើនត្រូវដោះស្រាយ បញ្ហាចុងក្រោយដែលប្រជាពលរដ្ឋអាមេរិកាំងត្រូវទប់ស្កាត់នៅពេលឥឡូវនេះ គឺការបិទរដ្ឋាភិបាល។ សំណើនេះ នឹងរារាំងមិនឲ្យមានការបិទរដ្ឋាភិបាល»។
គណបក្សសាធារណរដ្ឋនៅក្នុងព្រឹទ្ធសភានៅដើមសប្តាហ៍នេះ បានរារាំងការអនុម័តវិធានមួយទៀតដែលបញ្ចៀសការបិទរដ្ឋាភិបាល ព្រោះវិធានការនោះរួមមានមាត្រាដែលផ្អាកកំហិតប្រាក់បំណុលរយៈពេលយូរដែលពួកគេកំពុងព្យាយាមបង្ខំឲ្យគណបក្សប្រជាធិបតេយ្យអនុម័តវិធានការនោះតែខ្លួនឯង ដោយគ្មានការគាំទ្រពីគណបក្សសាធារណរដ្ឋ។
ក៏ប៉ុន្តែមេដឹកនាំខាងគណបក្សសាធារណរដ្ឋនៅព្រឹទ្ធសភាលោក Mitch McConnell បាននិយាយថា គណបក្សសាធារណរដ្ឋ នឹងគាំទ្រតែវិធានការណាដែលទាក់ទិននឹងកញ្ចប់ថវិកាដើម្បីបន្តបើករដ្ឋាភិបាលក្នុងឆ្នាំសារពើពន្ធថ្មីដែលនឹងចាប់ផ្តើមនៅថ្ងៃសុក្រ។
មានការបិទរដ្ឋាភិបាលសហរដ្ឋអាមេរិកដោយផ្នែកៗចំនួន២១ដង ចាប់តាំងពីឆ្នាំ១៩៧៦មក៕
