កាលពីជាង១៩ឆ្នាំមុន ការវាយប្រយុទ្ធគ្នារវាងកងទ័ពរាជរដ្ឋាភិបាលដឹកនាំដោយគណបក្សប្រជាជនកម្ពុជារបស់លោកនាយករដ្ឋមន្ត្រីហ៊ុន សែន និងកងទ័ពខ្មែរ ក្រហមបានបញ្ចប់ទៅ តាមអ្វីដែលគេដឹងថា ជាជោគជ័យរបស់គោលនយោបាយឈ្នះឈ្នះ ដែលដាក់ចេញដោយលោកហ៊ុន សែន។
ជាការរំឭកដល់ជោគជ័យនេះ រាជរដ្ឋាភិបាលបានប្រកាសផែនការកសាងវិមានអនុស្សាវរីយ៍គោលនយោបាយឈ្នះឈ្នះ កាលពីខែកុម្ភៈ ឆ្នាំ២០១៥។ លោកនាយឧត្តមសេនីយ៍ទៀ បាញ់ រដ្ឋមន្ត្រីក្រសួងការពារជាតិ បានឲ្យដឹងកាលពីពេលថ្មីៗនេះថា ការសាងសង់វិមាននេះ សម្រេចបាន៥៥ភាគរយ ក្រោយការសាងសង់រយៈពេលមួយឆ្នាំ។
ថ្លែងនៅក្នុងពិធីបូកសរុបលទ្ធផលរយៈពេលមួយឆ្នាំនៃការកសាងវិមាននេះ ដែលបានធ្វើឡើងនៅក្នុងខណ្ឌជ្រោយចង្វា រាជធានីភ្នំពេញកាលពីថ្ងៃសៅរ៍ លោកទៀ បាញ់ បានមានប្រសាសន៍ថា វិមានឈ្នះឈ្នះនឹងក្លាយជាមជ្ឈមណ្ឌលសិក្សាស្រាវជ្រាវអំពីកិច្ចខិតខំរបស់រដ្ឋាភិបាលក្នុងការកសាងសន្តិភាព និងប្រវត្តិសាស្ត្រនានាស្តីពីកម្ពុជា។
លោកថ្លែងថា៖ «នេះគឺជាឱកាសល្អណាស់សម្រាប់ហៅថា យុវវ័យរបស់យើង ដែលត្រូវសិក្សា ឬក៏ផ្តល់មេរៀនណាមួយដែលចង់បញ្ជាក់ទៅថា នយោបាយឈ្នះឈ្នះបានមករបៀបណា បានជាវាមានរឿងហ្នឹងគឺថា អាចទៅជាប្រធានបទមួយសម្រាប់សេចក្តីត្រូវការរបស់ពិភពលោកខ្លាំងណាស់ ព្រោះកន្លែងខ្លះ គឺថា ម្ង៉ៃៗ គឺគិតតែពីរឿងហៅថា ធ្វើបុណ្យខ្មោចហ្នឹង ធ្វើសម្បើមណាស់»។
លោកនាយឧត្តមសេនីយ៍ទៀ បាញ់ បានស្នើឲ្យមានការសាងសង់វិមានអនុស្សាវរីយ៍ឈ្នះឈ្នះទំហំតូចៗបន្ថែមទៀត នៅក្នុងទីតាំងដែលអាចបញ្ជាក់ពីរឿងរ៉ាវកាលពីអតីតកាលពាក់ព័ន្ធនឹងការអភិវឌ្ឍក្រោយសម័យសង្គ្រាម។
«កន្លែងផ្សេងៗទៀតក៏នឹងត្រូវជ្រើសរើសថែមទៀតនៅពេលខាងមុខ។ បើរកបានឃើញថា វាសមស្រប សមរម្យថា នឹងធ្វើហៅថា អនុស្សាវរីយ៍នយោបាយឈ្នះឈ្នះ ទ្រង់ទ្រាយស្អីហ្នឹង យើងអាចពិភាក្សាគ្នាក្រោយ មិនមែនតែធ្វើ ហៅថា ធំប៉ុណ្ណឹងទេ។ វាអាចនឹងបង្រួញទៅតាមកម្រិតរបស់វា តូចៗដែរ វាមានទ្រង់ទ្រាយរបស់វាដើម្បីឲ្យបញ្ជាក់ថា នេះគឺជាការតភា្ជប់ ហើយអាចរំឭកជាក់ស្តែងនៅកន្លែងរបស់ខ្លួន វាលេចឡើងជាក់ស្តែងថែមទៀត»។
លោកបានស្នើឲ្យមេបញ្ជាការនៅតំបន់ភូមិភាគ៣ ក្នុងខេត្តកំពង់ស្ពឺ តំបន់ភូមិភាគ៤ក្នុងខេត្តឧត្តរមានជ័យ និងតំបន់ភូមិភាគ៥ ក្នុងខេត្តបាត់ដំបង ឲ្យពិចារណារៀបផែនការកសាងវិមាននេះ។
តាមផែនការសាងសង់វិមានដែលនឹងរំឭកស្នាដៃរបស់លោកហ៊ុន សែន ក្នុងការនាំសន្តិភាពពេញលេញឲ្យកម្ពុជានេះ នឹងត្រូវសាងសង់លើផ្ទៃដីទំហំ១៥ហិកតា ដែលជាអំណោយរបស់លោកលី យ៉ុងផាត់ សមាជិកព្រឹទ្ធសភាគណបក្សប្រជាជនកម្ពុជា និងជាអ្នកជំនួញដ៏មានឥទ្ធិពលម្នាក់ក្នុងចំណោមអ្នកជំនួញមានទ្រព្យសម្បត្តិស្ដុកស្ដម្ភក្នុងប្រទេសកម្ពុជា។
លោកនាយឧត្តមសេនីយ៍ឈុំ សុជាតិ អ្នកនាំពាក្យក្រសួងការពារជាតិ មិនអាចបញ្ជាក់បានថា ការសាងសង់វិមានអនុស្សាវរីយ៍គោលនយោបាយឈ្នះឈ្នះនេះថា នឹងចប់នៅពេលណានោះទេ។ លោកថ្លែងថា ការចំណាយលើការសាងសង់វិមាននេះគឺបានមកពីការចូលរួមចំណែកពីសប្បុរសជន។
លោកថ្លែងថា៖ «សំខាន់វា អ្នកសប្បុរសជនគាត់ជួយទេ អត់មានទាក់ទងនឹងថវិការដ្ឋទេ»។
លោកនាយឧត្តមសេនីយ៍ឈុំ សុជាតិ ប្រាប់ VOA បន្ថែមថា៖ «យើងសុំពីសាធារណជន គាត់ជួយឧបត្ថម្ភ»។
អ្នកវិភាគយល់ថា មិនមានអ្វីជាការខុសឆ្គងក្នុងការកសាងវិមានអនុស្សាវរីយ៍គោលនយោបាយឈ្នះឈ្នះទេ តែរដ្ឋាភិបាលត្រូវធានាឲ្យបាននូវឯកភាពជាតិដែលអាចដាក់ឲ្យប្រទេសកម្ពុជាដែលហែកហួរដោយសង្គ្រាមនេះ សិ្ថតក្នុងស្ថិរភាពយូរអង្វែង។
លោកមាស នី អ្នកសិក្សាស្រាវជ្រាវអំពីការអភិវឌ្ឍសង្គម ប្រាប់ VOA ថា គោលនយោបាយឈ្នះឈ្នះកំពុងសាបរលាបបន្តិចម្តងៗ ដោយសាររដ្ឋាភិបាលបានដាក់គំនាបលើគូប្រជែងរបស់ខ្លួន។ លោកនិយាយថា ប្រសិនបើការដាក់គំនាបនេះបន្តទៅមុខទៀតនោះ ស្ថិរភាពរបស់ប្រទេសកម្ពុជានឹងស្ថិតក្នុងស្ថានភាពគួរឲ្យបារម្ភ។
«រដ្ឋាភិបាលបានទទួលប្រជាប្រិយ៍ខ្ពស់ ការណ៍ដែលអនុវត្តនូវវិធីសាស្ត្រ ឬយុទ្ធសាស្ត្រឈ្នះឈ្នះ។ ក៏ប៉ុន្តែដូចខ្ញុំជំរាបមិញហ្នឹងថា មកដល់ពេលបីឆ្នាំចុងក្រោយនេះ យើងហាក់បីដូចជាសង្កេតឃើញថា រដ្ឋាភិបាលបានប្តូរជំហរឈ្នះឈ្នះហ្នឹងហើយ គឺយើងឃើញថា មានអ្នកឈ្នះ មានអ្នកចាញ់ ដល់អញ្ចឹងទៅ ដល់មានអ្នកឈ្នះ មានអ្នកចាញ់អីចឹងឯងដែលធ្វើឲ្យបញ្ហាសង្គម ឬភាពទុកចិត្តរបស់ពលរដ្ឋទៅលើរដ្ឋាភិបាល ហាក់ដូចជាមានការធ្លាក់ចុះ ដោយសារតែការផ្លាស់ប្តូរជំហរហ្នឹង»។
មន្ត្រីជាន់ខ្ពស់ក្រសួងវប្បធម៌មួយរូបបានឲ្យដឹងកាលពីពេលកន្លងមកថា វិមានអនុស្សាវរីយ៍គោលនយោបាយឈ្នះឈ្នះនេះនឹងមានកម្ពស់យ៉ាងតិច៥០ម៉ែត្រ៕
