ប្រទេសទួរគីបានចាប់ផ្ដើមគម្រោងសង់ទំនប់ទឹកដ៏ធំបំផុតមួយក្នុងពិភពលោកក្នុងគោលដៅបំពេញសេចក្ដីត្រូវការថាមពលដ៏ច្រើនបំផុតសម្រាប់សេដ្ឋកិច្ចដែលកំពុងតែលូតលាស់ខ្លាំងរបស់ទួរគី។ តែទំហំនិងល្បឿននៃគម្រោងការបាននាំឲ្យមានការព្រួយបារម្ភអំពីសុវត្ថិភាពបរិស្ថាន និងកេរដំណែលវត្ថុបូរាណរបស់ប្រទេសដូចគ្នានឹងលទ្ធភាពដែលមនុស្សរាប់ម៉ឺននាក់នឹងបាត់បង់លំនៅដ្ឋានរបស់គេ។
នៅតំបន់ជ្រលងភ្នំ ឡក (Loc Valley) ភាគឦសាននៃប្រទេសទួរគី គម្រោងសង់ទំនប់ចំនួន១.០០០នៅក្នុងតំបន់ ដំណើរការគ្រប់ម៉ោង។ ភ្នំខ្ពស់ៗនិងជ្រលងភ្នំជ្រៅៗ ដែលហូរចូលទៅក្នុងសមុទ្រខ្មៅ ជាទីកន្លែងល្អសម្រាប់គម្រោងវារីអគ្គិសនី។ តែតំបន់នោះក៏ជាទីតាំងរបស់រុក្ខជាតិ និងជម្រកសត្វព្រៃជាច្រើនផងដែរ។ មានន័យថា ទំនប់ដែលមានលក្ខណៈដូចគ្នានឹងទំនប់កំពុងសា្ថបនានៅក្នុងតំបន់ជ្រលងភ្នុំ ឡក នេះ គឺជាចំណុចនៃការតតាំងគ្នារវាងអ្នកការពារបរិស្ថាននិងរដ្ឋាភិបាល។
នៅតាមបណ្ដោយទន្លេ ដិវរ៉េកានី (Devrekani) លោក ហ្សាហ្វ៊រ កិស៊ីន (Zafer Kecin) ដឹកនាំយុទ្ធនាការប្រឆាំងនឹងសំណង់ទំនប់។ លោកនិយាយថា ជីវភាពរបស់ជនរស់នៅទីនោះស្ថិតនៅក្នុងភាពគ្រោះថ្នាក់។
លោក កិស៊ីន និយាយថា «យើងបានបាត់បង់អូរដែលមានទឹកហូររបស់យើង។ ទីនេះជាលំនៅដ្ឋានរបស់យើងជាទីកន្លែងពីកនីករបស់យើង ដែលពេញទៅដោយធម្មជាតិ ដែលយើងអាចស្ទូចត្រីបាន។ ជីវភាពរបស់យើងស្ថិតនៅទីនេះ។ ទីនេះទាំងអស់នឹងបានត្រូវលេចទឹក ហើយក្លាយជាបឹងដែលមានទឹកនឹងថ្កល់»។
កាលពីឆ្នាំមុន ក្រុមអ្នកការពារបរិស្ថាននៅក្នុងរដ្ឋធានីអង់ការ៉ា បានបើកយុទ្ធនាការប្រឆាំងនឹងគម្រោងសង់ទំនប់នៅតំបន់ជ្រលងភ្នំឡក។ ចលនាការពារបរិស្ថានមានឈ្មោះថា ដូហ្កា ដេនីហ្គី (Doga Denigi) ដើរតួនាទីនាំមុខគេក្នុងការប្រឆាំងគម្រោងសង់ទំនប់ ជាពិសេសនៅមុខតុលាការទួរគី។ នេះគឺដោយសារតែទំនប់ភាគច្រើនសង់នៅតំបន់ព្រៃបម្រុងសម្រាប់ការពារធម្មជាតិ។
យោងទៅតាមលោក ឌីកល ទូបា គីលិក (Dicle Tuba Kilic) នៃចលនា ដូហ្កា ដេនីហ្គី រដ្ឋាភិបាលកាលពីប៉ុន្មានខែថ្មីៗនេះ បានផ្លាស់ប្ដូរច្បាប់ក្រោយពីបានទទួលបរាជ័យជាច្រើនដងក្នុងការតទល់គ្នានៅតុលាការ។ ឡោកគីលិក បន្តថា៖
«រដ្ឋាភិបាលធ្វើគ្រប់មធ្យោបាយស្របច្បាប់ដើម្បីជំរុញឲ្យសំណង់ទំនប់ មានដំណើរទៅមុខដោយងាយស្រួល។ រោងចក្រវារីអគ្គិសនីជាង១.៧០០ បានត្រូវរៀបចំជាគម្រោងការ។ ហើយបើប្រសិនជាគេសម្រេចគម្រោងទាំងអស់ វានឹងធ្វើឲ្យប៉ះពាល់ដល់ប្រព័ន្ធអេកូលូស្ស៊ីដីសើមរបស់ទូរគី និងវប្បធម៌មូលដ្ឋាន ដែលមានជីវិតនៅក្នុងតំបន់បាតជ្រៅនៃជ្រលងភ្នំ ឬនៅលើកំពូលភ្នំដោយសារនៅពេលនេះ គេត្រូវបង្ខំឲ្យប្ដូរទីកន្លែងចេញពីភូមិនេះទៅ។ ទំនប់នោះនឹងបំផ្លាញទីកន្លែងវត្ថុបូរាណពីព្រោះវាបើកផ្លូវឲ្យទៅមានសំណង់ទំនប់ដោយមិនមានការវាយតម្លៃអំពីការប៉ះពាល់ដល់បរិស្ថាន និង ដល់សង្គម ។ អ្នកមិនចាំបាច់ធ្វើអ្វីទេ»។
សហភាពអឺរុប បានរិះគន់ដល់ការកែទម្រង់ច្បាប់ ដោយបានសរសេរចុះក្នុងសេចក្ដីរាយការណ៍ចុងក្រោយបង្អស់អំពីការវិវត្តសមាជិកភាពទួរគី ទោះជាកំណែទម្រង់ទាំងនោះបានត្រូវប្រើប្រាស់ដើម្បីធ្វើឲ្យទួរគីអាចចូលរួមធ្វើជាសមាជិករបស់សហភាពអឺរុបក៏ដោយ។ គណបក្សបរិស្ថានអឺរុបក៏បានឃោសនាប្រឆាំងនឹងគម្រោងការសាងសង់ទំនប់នោះដែរ។ តែនាយករដ្ឋមន្ដ្រីទួរគី លោក រីស៊ីផ តាយីផ អេរដូហ្កាន (Recep Tayyip Erdogan) បានហៅអ្នកប្រឆាំងដែលជាអ្នកការពារបរិស្ថានថា ជា«អ្នកឆាប់ស្លន់ស្លោរ» ដោយលោកនិយាយថា ប្រទេសត្រូវការអគ្គីសនីដើម្បីដកខ្លួនចេញពីការពឹងផ្អែកលើប្រេងទិញពីបរទេសដែលមានតម្លៃខ្ពស់។ លោក អេរដូហ្កាន មានប្រសាសន៍ថា «គេបាននិយាយបង្វែរទិសប្រាប់ដល់ប្រជាពលរដ្ឋរបស់ខ្ញុំ។ យើងបានបង្ហាញការយកចិត្ដទុកដាក់របស់យើងចំពោះធម្មជាតិនិងនិរន្ដរភាព។ យើងជាអ្នកស្រឡាញ់ធម្មជាតិបំផុត។ យើងបានដាំដើមឈើច្រើនលានដើមនៅលើដីទំនេរ»។
ការស្ថាបនាទំនប់នៅតែមានបន្ដ។ តែចំពោះសកម្មជន ហ្សាហ្វ៊រ កិស៊ីន ពេលនេះជាពេលលំបាកចំពោះគាត់។ គាត់និយាយថា សហគមន៍មានការបែកបាក់គ្នា។ តែគាត់និយាយថា ក្រុមអ្នកប្រឆាំងនឹងការសាងសង់ទំនប់បានប្ដេជ្ញាចិត្ដនឹងបញ្ឈប់គម្រោងការសំណង់នេះ។
ក្រុមអ្នកការពារបរិស្ថានទួរគីបាននិយាយពន្យល់គណបក្សជំទាស់ធំមួយគឺ គណបក្សសាធារណរដ្ឋប្រជាមានិត សុំឲ្យយកការកែទម្រង់ឡើងតុលាការធម្មនុញ្ញរបស់ប្រទេស៕
ប្រែសម្រួលដោយ អ៊ូ ធួក
