វ៉ាក់សាំងកូវីដ១៩ ដែលទើបទទួលបានការអនុញ្ញាតឲ្យប្រើកាលពីពេលថ្មីៗនេះនៅក្នុងសហរដ្ឋអាមេរិក គ្រោងនឹងត្រូវបានគេដឹកជញ្ជូនដោយផ្ទុកក្រោមសីតុណ្ហភាពត្រជាក់ខ្លាំងបំផុតតាមរថយន្តដឹកទំនិញ ចេញពីរោងចក្រផលិតឱសថរបស់ក្រុមហ៊ុន Pfizer នៅក្នុងក្រុង Kalamazoo រដ្ឋ Michigan សម្រាប់ការចែកចាយល្បឿនលឿនដោយដឹកជញ្ជូនតាមផ្លូវអាកាសទៅកាន់មជ្ឈមណ្ឌលប្រចាំតំបន់នានានៅទូទាំងសហរដ្ឋអាមេរិក។
ការចាក់វ៉ាក់សាំងអាចចាប់ផ្ដើមលឿនបំផុតនៅថ្ងៃចន្ទស្អែក ស្របពេលដែលករណីឆ្លងជំងឺកូវីដ១៩ កំពុងកើនឡើង ហើយអ្នកស្លាប់ដោយសារជំងឺនេះនៅក្នុងសហរដ្ឋអាមេរិកកើនជិតដល់ ៣ សែននាក់។ នេះបើយោងតាមទិន្នន័យរបស់មជ្ឈមណ្ឌលស្រាវជ្រាវជំងឺកូវីដ១៩ នៃសាកលវិទ្យាល័យ Johns Hopkins។
លោកឧត្តមសេនីយ៍ Gustave Perna ប្រធានគម្រោងសម្របសម្រួលនិងពន្លឿនការផលិតនិងចែកចាយវ៉ាក់សាំងកូវីដ១៩ (Operation Warp Speed) របស់រដ្ឋបាលលោកប្រធានាធិបតី Donald Trump បានបញ្ជាក់នៅក្នុងសន្និសីទកាសែតកាលពីថ្ងៃសៅរ៍ថា ក្រុមហ៊ុនដឹកជញ្ជូននឹងដឹកជញ្ជូនវ៉ាក់សាំងដំបូងទៅកាន់មជ្ឈមណ្ឌលចែកចាយជិត ១៥០ កន្លែង ហើយបន្ទាប់មកទៅកាន់មជ្ឈមណ្ឌលចែកចាយប្រហែល ៤៥០ កន្លែងបន្ថែមទៀតនៅត្រឹមថ្ងៃពុធ។
ទីភ្នាក់ងារម្ហូបអាហារនិងឱសថរបស់សហរដ្ឋអាមេរិកបានអនុញ្ញាតជាផ្លូវការឲ្យប្រើក្នុងគ្រាបន្ទាន់នូវវ៉ាក់សាំងកូវីដ១៩ ដែលផលិតរួមគ្នាដោយក្រុមហ៊ុន Pfizer និងក្រុមហ៊ុន BioNTech នេះ កាលពីល្ងាចថ្ងៃសុក្រ។
វ៉ាក់សាំងនេះតម្រូវឲ្យផ្ទុកក្រោមសីតុណ្ហភាព -៧០ អង្សារសេ។ នៅក្នុងដំណាក់កាលសាកល្បងចុងក្រោយ វ៉ាក់សាំងនេះបានបង្ហាញឲ្យឃើញថា មានប្រសិទ្ធភាព ៩៥% សម្រាប់បង្ការជំងឺកូវីដ១៩។
បុគ្គលិកសុខាភិបាល និងមនុស្សចាស់ជរាដែលស្នាក់នៅមណ្ឌលចាស់ជរា នឹងមានអាទិភាពដំបូងគេបង្អស់ក្នុងការទទួលបានការចាក់វ៉ាក់សាំងនេះ ដែលជុំទីមួយមានប្រហែលជា ២ លាន ៩ សែនដូស។ វ៉ាក់សាំងនេះតម្រូវឲ្យចាក់ ២ ដូស ដោយដូសទីពីរនឹងត្រូវចាក់ ៣ សប្ដាហ៍ក្រោយពីការចាក់ដូសទីមួយ ដើម្បីទទួលបានការការពារជាអតិបរមាប្រឆាំងនឹងជំងឺកូវីដ១៩។
នាយកប្រតិបត្តិក្រុមហ៊ុន BioNTech លោក Ugur Sahin បាននិយាយថា វ៉ាក់សាំងនេះ «នឹងជួយសង្គ្រោះជីវិតមនុស្សនៅទូទាំងសហរដ្ឋអាមេរិក និងអាចជួយពន្លឿនឲ្យជីវភាពប្រចាំថ្ងៃត្រឡប់មកដូចធម្មតាឡើងវិញ»៕
