ប្រទេសកុម្មុយនីស្តវៀតណាមគឺជាប្រទេសតែមួយគត់ក្នុងពិភពលោកដែលដឹកនាំដោយគណបក្សកម្មករប៉ុន្តែជ័យជម្នះដ៏គួរឲ្យភ្ញាក់ផ្អើលក្នុងការទប់ស្កាត់ជំងឺកូវីដ១៩ មិនអាចបញ្ឈប់ជំងឺរាតត្បាតនេះពីការធ្វើឲ្យប្រជាជនជិតមួយលាននាក់គ្មានការងារធ្វើនោះទេ។
មនុស្សប្រហែល៩សែននាក់គ្មានការងារធ្វើហើយ១៨លាននាក់ទៀតធ្វើការងារមិនតាមជំនាញ នេះបើយោងតាមទិន្នន័យរបស់ការិយាល័យស្ថិតិទូទៅរបស់រដ្ឋនៅពាក់កណ្តាលឆ្នាំ២០២០។តួលេខនោះគូសបញ្ជាក់អំពីផលប៉ះពាល់នៃជំងឺរាតត្បាតមួយនេះសូម្បីតែក្នុងប្រទេសវៀតណាម។
វៀតណាមគឺជាប្រទេសដែលមានប្រជាជនច្រើនតែមួយគត់ក្នុងពិភពលោកដែលរាយការណ៍ថា គ្មានករណីស្លាប់ដោយសារជំងឺកូវីដហើយក៏ជាប្រទេសក្នុងចំណោមប្រទេសដែលសេដ្ឋកិច្ចនឹងកើនឡើងក្នុងឆ្នាំនេះ។ ទោះជាមានភាពជោគជ័យនៅផ្នែកទាំងពីរនោះយ៉ាងណាក៏ដោយ វៀតណាមត្រូវតែប្រឈមនឹងកំណត់ត្រាគ្មានការងារធ្វើ ដែលមូលហេតុមួយផ្នែកធំគឺដោយសារតែការធ្លាក់ចុះនៃតម្រូវការផលិតផលវៀតណាមពីប្រទេសដែលទទួលរងគ្រោះខ្លាំងដោយសារជំងឺនេះ។
ចំនួនអ្នកស្លាប់ភាគច្រើននៅតាមទីក្រុង។នៅក្នុងត្រីមាសទីពីរក្នុងឆ្នាំ២០២០អត្រាគ្មានការងារធ្វើនៅទីប្រជុំជនបានឡើងដល់៤,៤៦ភាគរយ ខណៈដែលតួលេខកាលពី២ឆ្នាំមុនគឺត្រឹមតែ៣,០៩ភាគរយប៉ុណ្ណោះ។ តួលេខនេះគឺបង្ហាញ ពីការផ្លាស់ប្តូរដ៏ធំមួយពីត្រីមាសទីមួយក្នុងឆ្នាំ២០២០នៅពេលដែលការិយាល័យនៃអង្គការពលកម្មអន្តរជាតិក្នុងទីក្រុងហាណូយបាននិយាយថាកម្រិតមានការងារធ្វើ«មិនត្រូវបានប៉ះពាល់ដោយសារវិបត្តិ»ជំងឺកូវីដ១៩នោះទេ។
ការិយាល័យស្ថិតិទូទៅវៀតណាមបាននិយាយក្នុងសេចក្តីថ្លែងការណ៍មួយថា៖«ជំងឺរាតត្បាតកូវីដ១៩ដ៏ស្មុគស្មាញនិងមិនអាចទាយទុកជាមុនបាននេះ បានធ្វើឲ្យការលូតលាស់នៃវិស័យនានានិងឧស្សាហកម្មភាគច្រើនមានសភាពយឺតយាវ។ ភាពគ្មានការងារធ្វើនិងការធ្វើការមិនតាមជំនាញបានកើនឡើងយ៉ាងខ្លាំង»។
តួលេខគ្មានការងារធ្វើទាំងនោះគឺស្ទើរតែមិនដែលកើតមាននៅវៀតណាម ដែលប្រវត្តិសាស្ត្រកំណើនពាណិជ្ជកម្មតែងតែខ្ពស់កប់ពពករោងចក្រនិងការដ្ឋានសាងសង់ដំណើរការទៅមុខទាំងយប់ទាំងថ្ងៃ។
សហជីពកម្មករ
ដើម្បីឆ្លើយតបទៅនឹងភាពអាសន្ននៃជំងឺកូវីដ រដ្ឋាភិបាលវៀតណាមបានផ្តល់មូលនិធិសង្គ្រោះចំនួន២,៧លានដុល្លារសហរដ្ឋអាមេរិកដែលរួមមានជំនួយដល់កម្មករ ដែលកំពុងរងការខូចខាតធ្ងន់ធ្ងរ ក្នុងទីផ្សារពលកម្ម។ ប្រទេសវៀតណាមកំពុងស្ថិតក្នុងដំណាក់កាលអនុម័តឲ្យមានសហជីពកម្មករឯករាជ្យក្រោមគណបក្សកុម្មុយនីស្ត ដែលជាផ្នែកមួយនៃការសន្យារបស់ខ្លួនជាមួយនឹងកិច្ចព្រមព្រៀងពាណិជ្ជកម្មថ្មីជាមួយសហភាពអឺរ៉ុប និងរៀបចំកម្លាំងពលកម្មថ្មីសម្រាប់សេដ្ឋកិច្ចឌីជីថល។
លោក Nguyen Hanh Phuc ប្រធានរដ្ឋសភាជាតិវៀតណាមបាននិយាយថា៖ «និយោជិតគ្រប់ជំនាញទាំងអស់ត្រូវតែបានបណ្តុះបណ្តាលបានយ៉ាងល្អប្រសើរ។យើងត្រូវតែលើកទឹកចិត្តឲ្យសហគ្រិនធ្វើការវិនិយោគទៅក្នុងវគ្គបណ្តុះបណ្តាលបុគ្គលិកនិងលើកកម្ពស់សមត្ថភាពប្រកួតប្រជែងរបស់និយោជិត»។
ទោះបីជាវៀតណាមបានព្យាយាមថែរក្សាសណ្តាប់ធ្នាប់ក្នុងប្រទេសរបស់ខ្លួនយ៉ាងណាក៏ដោយ ជាពិសេសការទប់ស្កាត់ជំងឺកូវីដ១៩ឆ្នាំនេះមុននឹងវាទប់ទល់លែងបាន ប្រទេសនេះមិនបានផ្សាំខ្លួនទៅនឹងការខូចខាតដោយសារជំងឺរាតត្បាតនៅខាងក្រៅព្រំដែនរបស់ខ្លួនឡើយ។ បណ្តាប្រទេសក្នុងតំបន់អាស៊ីអាគ្នេយ៍ពឹងផ្អែកខ្លាំងទៅលើការនាំចេញដើម្បីជំរុញសេដ្ឋកិច្ចរបស់ខ្លួនជាក់ស្តែងគឺការនាំចេញទៅសហរដ្ឋអាមេរិកនិងសហភាពអឺរ៉ុប ប៉ុន្តែតម្រូវការអតិថិជនក្នុងតំបន់ទាំងពីរនោះបានធ្លាក់ចុះដោយសារជំងឺរាតត្បាត។
ទោះយ៉ាងណា ការវិនិយោគនៅតែមានក្នុងប្រទេសវៀតណាមបើប្រៀបធៀបនឹងប្រទេសផ្សេងទៀតភាគច្រើន។ ឧទាហរណ៏ ជំងឺកូវីដ១៩បានបង្អាក់ការរួមបញ្ចូលនិងការទិញយកអាជីវកម្មជាសាកល ប៉ុន្តែវៀតណាមគឺជាករណីលើកលែងហើយកិច្ចព្រមព្រៀងជាច្រើន«កំពុងត្រូវគេរំពឹងថានឹងរីកចម្រើន» នេះបើយោងតាមការលើកឡើងនាពេលថ្មីៗនេះរបស់ក្រុមហ៊ុនប្រឹក្សា PwC។
លោក Ong Tiong Hooi ដៃគូប្រតិបត្តិការសេវាកម្ម នៅក្រុមហ៊ុន PwC វៀតណាមបាននិយាយថា៖ «យើងបានកត់សម្គាល់ថាសកម្មភាពរបស់ M&A មិនបានធ្លាក់ចុះនោះទេ។ វាអាចយល់បានថាក្រុមហ៊ុនក្នុងស្រុកឥឡូវកំពុងនាំមុខដោយសារតែពួកគេគឺមានមូលដ្ឋាននៅក្នុងប្រទេស»។
ឧទាហរណ៍មួយផ្សេងទៀតមានប្រជាជនវៀតណាមធ្វើការហោះហើរក្នុងស្រុកច្រើនជាងមុនបើប្រៀបធៀបនឹងអំឡុងពេលដូចគ្នានេះកាលពីឆ្នាំមុនដែលជាផ្នែកមួយនៃយុទ្ធនាការជំនួសការបាត់បង់ភ្ញៀវទេសចរបរទេសដោយអ្នកធ្វើដំណើរក្នុងស្រុក។ សណ្ឋាគារដូចជាសណ្ឋាគារ Anam នៅឆ្នេរវៀតណាមភាគខាងត្បូងបាននិយាយថាពួកគេបានពង្រឹងវិធានការអនាម័យដើម្បីឲ្យភ្ញៀវទេសចរក្នុងស្រុកមានអារម្មណ៍ថាមានសុវត្ថិភាពពេលធ្វើដំណើរ។
លោក Pham Van Hien ស្ថាបនិកសណ្ឋាគារAnam បាននិយាយថា៖ «បច្ចុប្បន្ននេះដែលការដាក់កំហិតនានាដោយសារតែជំងឺកូវីដ១៩ ត្រូវបានសម្រួលឬបន្ធូរបន្ថយក្នុងប្រទេសវៀតណាមយើងស្វាគមន៍ក្រុមគ្រួសារ ដែលស្វែងរកទីសុវត្ថិភាពដើម្បីស្នាក់នៅអំឡុងពេលឈប់សម្រាករដូវក្តៅ នៅក្នុងរមណីយដ្ឋានរបស់យើង»៕
ប្រែសម្រួលដោយ ទុំ ម្លិះ
