តុលាការខេត្តរតនគិរី នៅថ្ងៃចន្ទ បានសម្រេចមិនឃុំខ្លួនអ្នកនយោបាយជើងចាស់មួយរូប និងជាអតីតមន្រ្តីជាន់ខ្ពស់នៃគណបក្សសង្រ្គោះជាតិ លោក មាជ សុវណ្ណារ៉ា ឡើយ ប៉ុន្តែបានកំហិតសេរីភាពជាមូលដ្ឋានមួយចំនួនរបស់លោក។
លោក សឺន ជុំជួន មេធាវីរបស់លោក មាជ សុវណ្ណារ៉ា ប្រាប់វីអូអេថា ចៅក្រមបានសាកសួរលោក មាជ សុវណ្ណារ៉ា រយៈពេលជិតមួយថ្ងៃ នាថ្ងៃទី៧ ខែតុលា បន្ទាប់មកចៅក្រមបានសម្រេចឱ្យលោកចាកចេញពីតុលាការ ដោយមិនមានការឃុំខ្លួនឡើយ។ លោកមេធាវីបន្ថែមថា តុលាការបានកំហិតសេរីភាពរបស់លោក មាជ សុវណ្ណារ៉ា មួយចំនួន។
លោកថ្លែងថា៖ «ហើយលទ្ធផលចុងក្រោយ ចៅក្រមសម្រេចមិនឃុំខ្លួនគាត់ទេ ប៉ុន្តែមានលក្ខខណ្ឌមួយចំនួនដូចជាលក្ខខណ្ឌត្រូវឱ្យគាត់ហ្នឹង នៅពេលដែលមានការផ្លាស់ប្តូរអាសយដ្ឋានថ្មីអីជាដើម ត្រូវតែជូនដំណឹងមកដល់តុលាការទាក់ទងនឹងការផ្លាស់ប្តូរទីលំនៅ។ ហើយចំណុចសំខាន់មួយទៀតគឺត្រូវតែបង្ហាញខ្លួននៅចំពោះមុខមន្ត្រីនគរបាលនៃស្នងការដ្ឋាននគរបាលខេត្តបាត់ដំបងក្នុងរយៈពេល២ខែម្តង។ នេះជាលក្ខខណ្ឌសំខាន់ៗ»។
លោក មាជ សុវណ្ណារ៉ា បានអំពាវនាវឱ្យតុលាការទម្លាក់ការចោទប្រកាន់លើរូបលោកពីបទ«ញុះញង់ឱ្យមានការរើសអើង» ដើម្បីលោកអាចធ្វើនយោបាយក្នុងប្រទេសកម្ពុជា ដោយសេរី។
លោកប្រាប់វីអូអេថា៖ «អ៊ីចឹងបានខ្ញុំសុំទាមទារឱ្យមានការបើកសិទ្ធិសេរីភាពពេញលេញ ពិសេសទម្លាក់បទចោទដែលថា ខ្ញុំញុះញង់ឱ្យមានការរើសអើងអីហ្នឹង គឺខ្ញុំចង់ឱ្យតុលាការទម្លាក់បទចោទ ព្រោះក្នុងនាមប្រធានគណបក្សក្រៅរដ្ឋាភិបាលមួយដែលជាដៃគូប្រកួតប្រជែងដោយភាពស្មោះត្រង់ តាមគោលនយោបាយ កម្មវិធីនយោបាយ។ អ៊ីចឹងខ្ញុំចង់ឃើញសេរីភាពរបស់ខ្ញុំពេញលេញ»។
កាលពីកន្លងទៅ តុលាការខេត្តរតនគិរីបានចេញដីកាចាប់ខ្លួនលោក មាជ សុវណ្ណារ៉ា នៅក្នុងករណីដែលកើតឡើងមួយឆ្នាំមកហើយ។ ក្រោយទទួលបានដំណឹងនេះ លោក មាជ សុវណ្ណារ៉ា ក៏បានរកមេធាវីជួយការពាររឿងនេះ ហើយលោកក៏ត្រឡប់ចូលមកប្រទេសកម្ពុជាវិញ។
លោក មាជ សុវណ្ណារ៉ា បច្ចុប្បន្នជាប្រធានគណបក្សជំនាន់ថ្មី ដែលទើបត្រូវបានបង្កើតឡើងនៅឆ្នាំនេះ ធ្លាប់ប្រាប់វីអូអេថា លោកមានការងឿងឆ្ងល់នឹងដីកាចាប់ខ្លួនដែលចេញដោយតុលាការខេត្តរតនគិរី ដោយសារពេលលោកនៅក្នុងប្រទេសកម្ពុជា លោកមិនត្រូវបានចាប់ខ្លួនឡើយ។
ប៉ុន្តែក្រោយលោកបានចាកចេញទៅក្រៅប្រទេស លោកទទួលបានដីកាចាប់ខ្លួន ដែលចុះថ្ងៃទី ៨ ខែកញ្ញា ឆ្នាំ ២០២៣ ទៅវិញ ពោលគឺមានរយៈពេលមួយឆ្នាំមកហើយ។
បើតាមលោក មាជ សុវណ្ណារ៉ា តុលាការខេត្តរតនគិរីបានចោទប្រកាន់លោកពីបទ«ញុះញង់ឱ្យមានការរើសអើង»ចំពោះការថ្លែងរបស់លោកកាលពីថ្ងៃទី ៣១ ខែសីហា ឆ្នាំ ២០២៣ ពាក់ព័ន្ធនឹងការអត្ថាធិប្បាយរបស់លោកដែលនិយាយអំពីកម្មករខ្មែរទទួលបានប្រាក់ឈ្នួលប្រចាំថ្ងៃ តិចជាងកម្មករវៀតណាមដែលបានធ្វើការក្នុងចម្ការកៅស៊ូនិងចម្ការចេករបស់ក្រុមហ៊ុនវៀតណាមក្នុងខេត្តរតនគិរី៕
វេទិកាបញ្ចេញមតិ