លោក យ៉ង់ ប៉ាក់ អគ្គនាយកប្រតិបត្តិរបស់ក្រុមហ៊ុនមួយឈ្មោះថា Agribee Cambodia ត្រូវបានចៅក្រមស៊ើបសួរនៃសាលាដំបូងរាជធានីភ្នំពេញ សម្រេចឃុំខ្លួនក្នុងពន្ធនាគារបណ្តោះអាសន្ន ពាក់ព័ន្ធនឹងបទញុះញង់ឱ្យមានការរើសអើង និងបរិហារកេរ្តិ៍ជាសាធារណៈ ដែលប្តឹងដោយលោក ព្រាប កុល រដ្ឋមន្រ្តីប្រតិភូអមនាយករដ្ឋមន្រ្តី។ នេះបើតាមអ្នកនាំពាក្យរបស់សាលាដំបូងរាជធានីភ្នំពេញ។
លោក អ៊ី រិន្ទ អ្នកនាំពាក្យរបស់តុលាការ ប្រាប់វីអូអេនៅថ្ងៃព្រហស្បតិ៍នេះថា ជនត្រូវចោទឈ្មោះ យ៉ង់ ប៉ាក់ ត្រូវចោទពីបទញុះញង់ឱ្យមានការរើសអើង និងបទបរិហារកេរ្តិ៍ជាសាធារណៈ ប្រព្រឹត្តនៅរាជធានីភ្នំពេញ ក្នុងខែមករា ឆ្នាំ ២០២៤ បទល្មើសមានបញ្ញត្តិឱ្យផ្តន្ទាទោសតាមមាត្រា ៣០៥ មាត្រា ៤៩៤ និងមាត្រា ៤៩៦ នៃក្រមព្រហ្មទណ្ឌ។
លោកបន្ថែមថា៖ «ក្រោយពីសាកសួរនិងពិនិត្យភស្តុតាង ចៅក្រមស៊ើបសួរនៃសាលាដំបូងរាជធានីភ្នំពេញ បានសម្រេចឃុំខ្លួនបណ្តោះអាសន្ននៅមណ្ឌលអប់រំកែប្រែទី ១(ម១) ដើម្បីបន្តចំណាត់ការស៊ើបសួរតាមនីតិវិធីច្បាប់»។
កាលពីថ្ងៃទី ១៩ ខែមករា ឆ្នាំ ២០២៤ អយ្យការអមសាលាដំបូងរាជធានីភ្នំពេញបានចេញដីកាបញ្ហាឱ្យនាំខ្លួនបុគ្គលឈ្មោះ យ៉ង់ ប៉ាក់ ជាអគ្គនាយកប្រតិបត្តិរបស់ក្រុមហ៊ុនAgribee Cambodia មកបង្ហាញខ្លួននៅការិយាល័យប្រឆាំងបទល្មើសបច្ចេកវិទ្យានៃស្នងការដ្ឋាននគរបាលរាជធានីភ្នំពេញឱ្យបានមុនថ្ងៃទី ៥ ខែកុម្ភៈ ឆ្នាំ ២០២៤ ដើម្បីសាកសួរពីដំណើររឿងញុះញង់ឱ្យមានការរើសអើងនិងបរិហារកេរ្តិ៍ជាសាធារណៈដែលប្តឹងដោយលោក ព្រាប កុល។
លោក សំ វិច្ឆិកា អ្នកនាំពាក្យស្នងការរាជធានីភ្នំពេញប្រាប់វីអូអេកាលពីថ្ងៃពុធថា លោក យ៉ង់ ប៉ាក់ ដែលសមត្ថកិច្ចអះអាងថា ប្រើប្រាស់គណនីហ្វេសប៊ុកឈ្មោះChivann Pen ត្រូវបានឃាត់ខ្លួនកាលពីថ្ងៃទី ២២ ខែមករា តាមបណ្តឹងរបស់លោក ព្រាប កុល។
គណនីហ្វេសប៊ុកឈ្មោះ Chivann Pen កាលពីថ្ងៃទី ១៥ ខែមករា ឆ្នាំ ២០២៤ បានបង្ហោះសារអមដោយរូបភាពរបស់លោក ព្រាប កុល ថា លោក ព្រាប កុល ត្រូវបានគេសង្ស័យជាប់ពាក់ព័ន្ធនឹងការកិបកេងលុយជាង ៨០លានដុល្លារ ក្នុងគម្រោងវិនិយោគអចលនទ្រព្យរបស់ក្រុមហ៊ុន CIC ដែលធ្វើឱ្យអ្នកវិនិយោគប្រមាណ ៥៤៦នាក់ បាត់បង់ទ្រព្យធនលុយកាក់ក្នុងការវិនិយោគក្នុងក្រុមហ៊ុននេះ។
បន្ទាប់ពីមានការបង្ហោះខ្លឹមសារបែបនេះរួចមក នៅថ្ងៃទី ១៦ ខែមករា ឆ្នាំ ២០២៤ មេធាវីរបស់លោក ព្រាប កុល គឺលោក សារ៉េត សារ៉េនឌី បានចេញលិខិតជូនដំណឹងទៅម្ចាស់គណនីហ្វេសប៊ុកឈ្មោះ Chivann Pen ឱ្យលុបសំណេរខ្លឹមសារនិងរូបភាពដែលបានបង្ហោះកាលពីថ្ងៃទី ១៥ ខែមករា ឆ្នាំ ២០២៤។ មេធាវីចាត់ទុកថា ការបង្ហោះនោះមានលក្ខណៈ«បរិហារកេរ្តិ៍និងញុះញង់»។ ប៉ុន្តែជាក់ស្តែង ខ្លឹមសារនិងរូបភាពទាំងនោះមិនត្រូវបានម្ចាស់គណនីហ្វេសប៊ុកឈ្មោះ Chivann Pen លុបនោះឡើយ។ ក្រោយមកទៀតកាលពីថ្ងៃទី ២៣ ក្រុមហ៊ុន CIC បានចេញលិខិតបំភ្លឺមួយច្បាប់ដែលបានបញ្ជាក់ថា លោក ព្រាប កុល មិនបានជាប់ពាក់ព័ន្ធនឹងការកិបកេងប្រាក់ជាង៨០លានដុល្លារពីស្ថាប័នរបស់ខ្លួនឡើយនិងថា លោកក៏ពុំធ្លាប់មានតួនាទីក្នុងរចនាសម្ព័ន្ធរបស់ក្រុមហ៊ុន CIC ដែរ។
លោក ព្រាប កុល អតីតនាយកប្រតិបត្តិនៃអង្គការតម្លាភាពកម្ពុជា ហើយបច្ចុប្បន្នជារដ្ឋមន្រ្តីប្រតិភូអមនាយករដ្ឋមន្ត្រី បានបញ្ជាក់ប្រាប់វីអូអេនៅថ្ងៃព្រហស្បតិ៍នេះថា គណនីហ្វេសប៊ុកឈ្មោះ Chivann Pen គឺរបស់លោក យ៉ង់ ប៉ាក់។ លោកថា បុគ្គលនោះបានចោទប្រកាន់រូបលោក ដោយគ្មានភស្តុតាងច្បាស់លាស់ ហើយវាប៉ះពាល់យ៉ាងធ្ងន់ធ្ងរដល់កេរ្តិ៍ឈ្មោះរបស់លោក។
លោកថ្លែងថា៖ «ដោយសារតែការចោទប្រកាន់ ដោយគ្មានភស្តុតាង គ្មានអំណះអំណាងអីនេះ វាធ្វើឱ្យប៉ះពាល់ធ្ងន់ធ្ងរដល់កេរ្តិ៍ឈ្មោះរបស់ខ្ញុំ។ ហើយការផ្សព្វផ្សាយជាសាធារណៈនោះក៏បានទូលំទូលាយទាំងនៅក្នុងប្រទេសទាំងនៅក្រៅប្រទេសអ៊ីចឹងផលប៉ះពាល់នេះគឺវាធំធេងណាស់»។
លោកបន្ថែមទៀតថា បើទោះបីជាម្ចាស់គណនីហ្វេសប៊ុកឈ្មោះ Chivann Pen បានសារភាពចំពោះកំហុសរបស់ខ្លួនដែលបានធ្វើក៏ដោយ ក៏លោកនៅតែពិចារណាក្នុងការទាមទារសំណងពីបុគ្គលរូបនោះ។
លោកលើកឡើងថា៖ «ហើយគាត់ក៏បានទទួលសារភាពនៅក្នុងនីតិវិធីតុលាការហើយដែរ។ ហើយខ្ញុំនឹងពិភាក្សាពិចារណាមើលថា តើគាត់ត្រូវតែទទួលទោសឬសងយ៉ាងម៉េច? ខ្ញុំត្រូវទាមទារអី? ខ្ញុំនឹងថ្លឹងថ្លែងក្រោយ តែឥឡូវនេះខ្ញុំមិនទាន់អាចបញ្ជាក់ជូនបានទេបាទ»។
នៅថ្ងៃព្រហស្បតិ៍នេះដែរ លោក ព្រាប កុល ក៏បានបង្ហោះសារជាអក្សរលើទំព័រហ្វេសប៊ុករបស់ខ្លួនថា ៖ «សម្រាប់ខ្ញុំគឺគ្មានជម្រើសអ្វីផ្សេងក្រៅពីប្តឹងទៅតុលាការ ដើម្បីឱ្យជននេះទទួលខុសត្រូវចំពោះមុខច្បាប់នោះឡើយ? ប្រទេសមានច្បាប់ បើមិនអនុវត្តច្បាប់ទេសង្គមនឹងមានភាពអនាធិបតេយ្យជាមិនខាន ហើយជនទុច្ចរិត នឹងបន្តដើរបង្ខូចកេរ្តិ៍ឈ្មោះគេតាមទំនើងចិត្ត»។
លោកឱ្យដឹងទៀតថា ប្រធានគណៈកម្មការនៃស្ថាប័ន CIC បានបញ្ជាក់ក្នុងលិខិតជាផ្លូវការហើយថា លោកពុំមានពាក់ព័ន្ធក្នុងការចោទថាបានកិបកេងលុយស្ថាប័នឡើយ។
លោក ម៉ាក ចំរើន ប្រធានក្រុមប្រឹក្សាភិបាលនៃក្រុមហ៊ុន Agribee Cambodia ប្រាប់វីអូអេថា ការប្តឹងផ្តល់នេះជារឿងបុគ្គលតែប៉ុណ្ណោះ មិនមានអ្វីជាប់ពាក់ព័ន្ធនឹងក្រុមហ៊ុនឡើយ។
លោកថ្លែងថា៖ «មិនមែនទេ[វា]គឺរឿង Personal [ផ្ទាល់ខ្លួន]សុទ្ធ អត់មានពាក់ព័ន្ធនឹងក្រុមហ៊ុន។ ក្រុមហ៊ុន អត់មាន[ពាក់ព័ន្ធទេ]។ តែគ្រាន់តែទូទៅ បុគ្គលហ្នឹងគឺជាបុគ្គលដែលមាននៅក្នុងស្ថាប័ន។ អាហ្នឹង វាជាធម្មតាជះឥទ្ធិពលអាក្រក់ដល់ស្ថាប័នខ្ញុំខ្លះដែរ»។
បើតាមលោក ព្រាប កុល ដែលជាដើមបណ្តឹង រហូតមកដល់ពេលនេះ ម្ចាស់គណនីChivann Pen បានសារភាពកំហុស និងស្នើសុំការអភ័យទោសពីរូបលោក។ ប៉ុន្តែលោកថា ទុកឱ្យតុលាការជាអ្នកសម្រេចចំពោះរឿងក្តីនេះ៕
វេទិកាបញ្ចេញមតិ