ប្រទេសមួយចំនួនកំពុងចាត់វិធានការដោយប្រយ័ត្នប្រយែងជាបណ្ដើរៗនៅក្នុងការបើកប្រទេសឡើងវិញ បន្ទាប់ពីបិទដើម្បីទប់ទល់នឹងការឆ្លងរាលដាលនៃជំងឺកូវីដ ១៩។
អាជ្ញាធរអាល្លឺម៉ង់អនុញ្ញាតឲ្យហាងតូចៗមួយចំនួនបើកឡើងវិញនៅថ្ងៃចន្ទនេះ ប៉ុន្តែនៅតែអនុវត្តវិធានការរក្សាគម្លាតពីគ្នា។
ប្រទេសស្រីលង្កាបានដកបម្រាមគោចរចេញពីផ្នែកភាគច្រើននៅក្នុងប្រទេស ដោយមានគម្រោងបន្ធូរបន្ថយបម្រាមនេះនៅទូទាំងប្រទេសនៅថ្ងៃពុធខាងមុខ។
សិស្សសាលានៅប្រទេសន័រវេសបានត្រឡប់ចូលរៀនវិញកាលពីថ្ងៃចន្ទម្សិលមិញ ចំណែកឯសិស្សនៅប្រទេសដាណាម៉ាកគ្រោងនឹងចូលរៀនវិញនៅថ្ងៃពុធខាងមុខ។
អាជ្ញាធរក្នុងប្រទេសកូរ៉េខាងត្បូងបានជំរុញឲ្យអនុវត្តការប្រយ័ត្នប្រយែង បន្ទាប់ពីបានដកវិធានការបិទការដើរហើរមួយចំនួនចេញ ដោយសារតែចំនួនអ្នកឆ្លងថ្មីនៃជំងឺកូវីដ ១៩ នៅបន្តធ្លាក់ចុះ។
រដ្ឋាភិបាលចក្រភពអង់គ្លេសបានបញ្ជាក់ថានឹងចាប់ផ្ដើមបន្ធូរបន្ថយបម្រាមបិទការដើរហើរនៅក្នុងប្រទេសនៅថ្ងៃទី ៧ ខែឧសភាខាងមុខ។
កន្លែងអាជីវកម្ម និងសាលារៀននៅផ្នែកភាគច្រើននៃសហរដ្ឋអាមេរិកនៅតែបិទនៅឡើយ ដោយធ្វើឲ្យមានការតវ៉ាប្រឆាំងនឹងអភិបាលរដ្ឋ និងបទបញ្ជាដែលតម្រូវឲ្យប្រជាពលរដ្ឋនៅក្នុងផ្ទះ និងជៀសវាងការប្រាស្រ័យទាក់ទងក្នុងសង្គមកាន់តែច្រើនតាមតែអាចធ្វើទៅបាន។
ប្រធានអង្គការសុខភាពពិភពលោកលោក Tedros Adhanom Ghebreyesus បានបញ្ជាក់ថា លោកមានការលើកទឹកចិត្តចំពោះគម្រោងរបស់ប្រទេសនីមួយៗនៅក្នុងការបន្ធូរបន្ថយបម្រាម ប៉ុន្តែលោកថា វា សំខាន់ណាស់ដែលវិធានការទាំងនេះត្រូវធ្វើឡើងជាដំណាក់កាល»៕
