នៅពេលចាប់ផ្តើមនៃការបិទប្រទេសដោយសារការរាលដាលឆ្លងនៃវីរ៉ុសកូរ៉ូណា រដ្ឋាភិបាលនៃប្រទេសសហគមន៏អឺរ៉ុបបានប្រញាប់ប្រញាល់ទប់ទល់ដល់ការប៉ះពាល់ផ្នែកជំនួញ និងផ្នែកសារធារណៈជាមួយនិងការឧត្ថម្ភផ្សេងៗ ដែលជាវិធីដើម្បីធានាថា ការចុះថយសេដ្ឋកិច្ចក្រោយវិបត្តិជំងឺកូរ៉ូណានឹងមិនប៉ះពាល់ខ្លាំងក្នុងរយៈពេលយូរនោះទេ ដោយសារតែការកាត់បន្ថយបុគ្គលិក និងការក្ស័យធន់ជាដើម។
អ្នកវិភាគមួយចំនួនលើកឡើងថា ការប្រមើរមើលផ្នែកសេដ្ឋកិច្ច ហាក់មានភាពមិនច្បាស់លាស់នៅឡើយទេសំរាប់សហគមន៏អឺរ៉ុប ដោយសារតែផលប៉ះពាល់នៃការបិទប្រទេសនេះ អាចមានរយៈពេលរាប់ឆ្នាំទៅមុខ បើទោះបីនាពេលនេះមានការបន្ធូរបន្ថយខ្លះយ៉ាងណាក្តី។ រដ្ឋាភិបាលក្នុងប្រទេសសហគមន៏អឺរ៉ុប ដែលកំពុងមានបន្ទុកស្រាប់ជាមួយនឹងឱនភាពប្រចាំឆ្នាំដែលមានកម្រិតប្រហាក់ប្រហែលពេលមានសង្គ្រាមស្រាប់ផងនោះបានប្រឈមនឹងជម្រើសដែលមិនអាចជៀសរួចរវាងការកាត់ចំណាយសារធារណៈឬការដំឡើងប្រាក់ពន្ធ ដែលជម្រើសទាំងពីរនេះនឹងធ្វើឲ្យមានភាពយឺតយ៉ាវដល់ការងើបឡើងវិញនៃសេដ្ឋកិច្ចទាំងមូល។
នៅសប្តាហ៏នេះ ប្រទេសសហគមន៏អឺរ៉ុបបានបន្ធូរបន្ថយការរឹតបន្តឹងថែមទៀត ដោយអនុញ្ញាតឲ្យបើកឡើងវិញនូវមុខជំនួញផ្សេងៗ រួមមានដូចជា បារាំកម្សាន្ត ហាងកាត់សក់ បន្ទាប់ពីបានបិទអស់រយៈពេល២ខែរួចមក។
នៅវិហារកាតូលិក basilica of St. Francis ក្នុងតំបន់ Assisi នៃប្រទសអ៊ីតាលី លោកឳ Enzo Fortunato បានថ្លែងក្នុងសម្តីដើមថា «ការបើកឡើងវិញនូវវិហារគ្រឹស្គសាសនា នៅក្នុងដំណាក់កាលនេះជាសញ្ញាមួយនៃក្តីសង្ឃឹម»។
លោកឳ Enzo Fortunato បានថ្លែងយ៉ាងដូចនេះនៅពេលដែលអ្នកមកគោរពសាសនា បានពាក់ម៉ាស់និងបានរក្សាគម្លាតពីគ្នា ដោយមានអ្នកឈរចាំវាស់ស្ទង់កម្តៅអ្នកមកចូលរួមនៅខាងមុខខ្លោងទ្វាចូលផង។ ទោះជាយ៉ាងនេះក្តី ប្រតិកម្មចំពោះការបន្ធូរបន្ថយដល់ការរឹតបន្តឹងនេះមានភាពលាយឡំជាមួយការកាន់ទុក្ខសោកស្តាយ ចំពោះអ្នកដែលបានស្លាប់ទៅ ក៏ដូចជាអារម្មណ៏ខ្វាយខ្វល់ពីផលប៉ះពាល់នៃសេដ្ឋកិច្ច ដល់ប្រទេសនីមួយៗរបស់គេ ដែលមិនដែលបានងើបឡើងវិញទាំងស្រុង បន្ទាប់ពីវិបត្តិហិរញ្ញវិត្ថុកាលពីឆ្នាំ២០០៨មក។
បើទោះបីប្រជាជនអ៊ីតាលី មានភាពរីករាយដោយទទួលបាននូវសេរីភាពខ្លះៗវិញពីការបិទប្រទេសកន្លងមកក៏ដោយ មន្ត្រីក្នុងទីក្រុងរ៉ូមជាច្រើននាក់ ដែលមិនខុសពីមន្ត្រីដទៃទៀតនៅក្នុងទីក្រុងផ្សេងៗក្នុងប្រទេសអឺរ៉ុប កំពុងតាមដានបញ្ហាសេដ្ឋកិច្ច ដែលគេរំពឹងថា នឹងមានការចុះថយក្នុងកម្រិតប្រមាណ១០ ភាគរយ។
សមាគមលក់ទំនិញរាយរបស់ប្រទេសអ៊ីតាលីឈ្មោះ Confcommercio បានរាយការណ៏នៅថ្ងៃចន្ទថា ការចំណាយរបស់អ្នកប្រើប្រាស់ទំនិញ ធ្លាក់ចុះប្រមាណ៤៧ភាគរយ ក្នុងខែមេសា ហើយហានិភ័យនៃការគ្រោះថ្នាក់ជាអិចិន្ត្រយ៏របស់សេដ្ឋកិច្ចស្ថិតក្នុងកម្រិតខ្ពស់។ លោក Carlo Sangalli ដែលជាប្រធានរបស់សមាគនេះ បានអំពាវនាវឲ្យមាន «ផែនការជាទូទៅមួយសំរាប់ការកសាងប្រទេសឡើងវិញ ដែលជាផែនការមួយនៅតែមិនទាន់កើតចេញជារូបរាងនៅឡើយ»។
ការខិតខំអោយមានឯកភាពក្នុងសហគមន៏អឺរ៉ុប
ការរៀបចំផែនការរបស់រដ្ឋាភិបាលនៃប្រទេសក្នុងសហគមន៏អឺរ៉ុបនីមួយៗមានការលំបាក។ ដោយមានសេដ្ឋកិច្ចដែលប្រទាក់ក្រឡាជាមួយគ្នា ក៏ដូចជា គោលការណ៏និងប្រព័ន្ធច្បាប់ដែលមានភាពនៅឆ្ងាយពីគ្នានៅឡើយ រដ្ឋជាសមាជិករបស់សហភាពអឺរ៉ុប កំពុងតែខិតខំឲ្យមានការឯកភាពគ្នា និងយល់ស្របគ្នាទៅលើចំណុចលម្អិតទាំងឡាយថាតើគេត្រូវចូលរួមផ្តល់ថវិកាយ៉ាងដូចម្តេចក្នុងការស្តារសហគមន៏អឺរ៉ុបឡើងវិញ ក្រោយជំងឺរាតត្បាតវីរ៉ុសកូរ៉ូណា។ គេក៏កំពុងសំឡឹងទៅមើលថាតើធនាគារកណ្តាលរបស់សហភាពអឺរ៉ុបអាចជួយគាំទ្រនូវសកម្មភាពចេញលុយសងបំណុលរបស់រដ្ឋាភិបាលដល់កម្រិតណា ដែលរឿងនេះបានធ្វើឲ្យមានការបែកបាក់គ្នាកាន់តែខ្លាំងក្នុងប្រទេសជាសមាជិករបស់សហភាពអឺរ៉ុបភាគខាងជើង ដែលជាប្រទេសអ្នកមាន និងសមាជិករបស់សហភាពអឺរ៉ុបភាគខាងត្បូងដែលជាប្រទេសក្រីក្រជាង។
ហានិភ័យនៃផលប៉ះពាល់ផ្នែកសេដ្ឋកិច្ចនិងជំងឺឆ្លងបានបង្កើតឲ្យមានការប្រះស្រាំកាន់តែធំនិងជ្រៅជាងមុន នៅក្នុងប្លុកដែលកំពុងតែមានការបែកបាក់គ្នាស្រាប់ ដោយសារតែគោលនយោបាយស្តីពីជនអន្តោប្រវេសន៏និងគោលនយោបាយក្រៅប្រទេសទាក់ទងនិងការការពារប្រទេស។ វិសមភាពផ្នែកសេដ្ឋកិច្ចអាចនឹងកើនឡើង ដោយរដ្ឋសមាជិកជាអ្នកមាន អាចមានលទ្ធភាពច្រើនជាង ក្នុងការផ្តល់ថវិកាដើម្បីធ្វើឲ្យប្រសើរឡើងនូវឧស្សាហកម្មជាតិនិងជំនួញ និងផ្តល់ឲ្យពួកគេនូវប្រៀបមួយ សម្រាប់ការប្រកួតប្រជែងជាមួយដៃគូប្រកួតច្រើនជាងរដ្ឋសមាជិករបស់សហគមន៏អឺរ៉ុបដែលជាប្រទេសក្រីក្រ។
ការទាមទាឲ្យសមាជិកជាអ្នកមាន ជួយផ្តល់ថវិកាសំរាប់ផ្គត់ផ្គង់ថវិកា សមាជិកជាអ្នកក្រ ក្នុងសហគមន៏អឺរ៉ុបកំពុងត្រូវបានគេបំភ្លេច ដែលប្រការនេះ បានធ្វើឲ្យមេដឹកនាំប្រទេសមួយចំនួនក្នុងតំបន់ភាគខាងត្បូងនៅក្នុងទ្វីបអឺរ៉ុប មានការខឹងសម្បារ ដោយពួកគេព្រមានថា ទំនាក់ទំនងក្នុងភាពជាសមាជិក នឹងមានភាពកាន់តែតានតឹងជាងអ្វីដែលគេធ្លាប់បានឃើញកាលពីអំឡុងនៃវិបត្តិហិរញ្ញវត្ថុទៅទៀត។
ភាពមិនចុះសម្រុងគ្នាបានធ្វើឲ្យនាយករដ្ឋមន្ត្រីប្រទេសអ៊ីតាលី លោក Giuseppe Conte ព្រមានថា គម្រោងរបស់សហភាពអឺរ៉ុបអាចនឹងបរាជ័យ ប្រសិនបើរដ្ឋសមាជិកភាគខាងជើងមិនជួយដល់រដ្ឋសមាជិកភាគខាងត្បូងទេនោះ។
ចំណែកប្រទេសហូឡង់វិញអះអាងថា រដ្ឋសមាជិកក្រីក្រនៅភាគខាងត្បូង គួរតែបន្ទោសខ្លួនឯងប៉ុណ្ណោះ ដែលការនិយាយនេះបានធ្វើឲ្យនាយករដ្ឋមន្ត្រីប្រទេសព័រទុយហ្កាល់លោក António Costa បានហៅសំដីនៃការចោទប្រកាន់នោះថាជាការ «គួរអោយស្អប់ខ្ពើម»។
ការបោះឆ្នោតស្ទាបស្ទង់មតិនាពេលថ្មីៗនេះបានបង្ហាញថា ប្រជាជនអ៊ីតាលីមានការអាក់អន់ចិត្តយ៉ាងខ្លាំង ដោយខ្លួនទទួលរងនូវការឈឺចាប់បន្ថែមទៀត ដោយសារតែខ្វះជំនួយឧបត្ថម្ភបរិក្ខាពេទ្យជាបន្ទាន់ពីប្រទេសជិតខាងនោះ ដោយសារតែខ្លួនជាប្រទេសទីមួយ ដែលរងគ្រោះខ្លាំងដោយសារតែជំងឺកូរ៉ូណា។
កាលពីពេលកន្លងទៅក្នុងខែនេះ ក្នុងការស្ទង់មតិមួយបានរកឃើញថា ប្រជាជនអ៊ីតាលីប្រមាណ៤៤ភាគរយ បានត្រៀមខ្លួនជាស្រេចក្នុងការចាកចេញពីសមាជិករបស់សហភាពអឺរ៉ុបដូចប្រទេសអង់គ្លេសដែរ ដែលចំនួននេះកើនឡើងខ្លាំង បើប្រៀបធៀបនិងការស្ទង់មតិកាលពីឆ្នាំ២០០០ ដែលមានចំនួនតែ៩ភាគរយតែប៉ុណ្ណោះ ដែលពេលនោះប្រទេសអ៊ីតាលីបានផ្លាស់ប្តូរការចាយវាយក្រដាសប្រាក់របស់ខ្លូនពីលីរ៉ា ទៅអឺរ៉ូវិញ។ តាមរយៈក្រុមហ៊ុនស្ទង់មតិមួយឈ្មោះ Gianluca Borrelli បានអោយដឹងថា «ប្រជាជនអ៊ីតាលីមានអារម្មណ៏ថា ខ្លួនត្រូវបានគេក្បត់»។
ការឈឺចាប់របស់ប្រទេសអ្នកក្រនិងអ្នកមាន
ប្រទេសអ្នកមានកំពុងតែតស៊ូផងដែរ ហើយការផ្តល់ថវិការបស់ប្រទេសសមាជិកភាគខាងជើង នឹងការផ្តល់ធនធានកំពុងប្រឈមនិងការថ្នាក់ថ្នាំងចិត្តក្នុងប្រទេសអាល្លឺម៉ង់ ដែលពេលនេះសេដ្ឋកិច្ចរបស់ប្រទេសនេះកំពុងធ្លាក់ចុះជាផ្លូវការ។ ក្នុងរយៈពេលត្រីមាសទី១ក្នុងឆ្នាំនេះ ផលិតផលរបស់ប្រទេសនេះ មានការធ្លាក់ចុះយ៉ាងរហ័សចាប់តាំងពីវិបត្តិហិរញ្ញវត្ថុឆ្នាំ២០០៨មក។
អ្នកសេដ្ឋសាស្ត្រអាល្លឺម៉ង់រំពឹងទុកថា ស្ថានភាពសេដ្ឋកិច្ចរបស់ប្រទេសនេះ ដែលមានទំហំធំជាងគេ ក្នុងចំណោមប្រទេសនានាក្នុងទ្វីបអឺរ៉ុប នឹងចុះថយប្រមាណពី១០ទៅ២០ភាគរយនៅក្នុងត្រីមាសទី២ ក្នុងឆ្នាំ២០២០នេះ។
លោក Carsten Brzeski សេដ្ឋកិច្ចវិទូនៃក្រុមហ៊ុនធនាគារហូឡង់ ING បានអោយដឹងតាមសម្តីដើមថា «ស្ថានភាពសេដ្ឋកិច្ចក្នុងប្រទេសអាល្លឺម៉ង់នឹងធ្លាក់ចុះកាន់តែធ្ងន់ធ្ងរ មុនពេលដែលវាប្រសើរឡើងវិញ»។
សេដ្ឋកិច្ចចាយលុយអឺរ៉ូទាំងមូល បានធ្លាក់ចុះក្នុងត្រីមាសទី១ក្នុងឆ្នាំនេះ ក្នុងកម្រិតមួយយ៉ាងលឿន ដែលក្នុងនោះប្រទេសបារាំង បានធ្លាក់ចុះក្នុងកម្រិត៥,៨ភាគរយនៅក្នុងត្រីមាសទី១។ សេដ្ឋកិច្ចប្រទេសអ៊ីតាលីធ្លាក់ចុះប្រមាណ៤,៧ ភាគរយ ហើយប្រទេសអេស៉្បាញធ្លាក់ចុះក្នុងកម្រិត៥,២ភាគរយ។
ផលិតផលសរុបក្នុងស្រុកនៅក្នុងប្លុកដែលប្រើប្រាស់រូបិយបណ្ណតែមួយនេះបានធ្លាក់ចុះប្រមាណ៣,៨ ភាគរយជារួម ដែលជាការធ្លាក់ចុះមួយដ៏ខ្លាំងបំផុតមិនដែលធ្លាប់មាន ចាប់តាំងពីការបង្កើតឲ្យមានការចាយវាយប្រាក់អឺរ៉ូក្នុងឆ្នាំ១៩៩៩ មក។
តួលេខក្នុងត្រីមាសទី២ ត្រូវបានគេរំពឹងថា នឹងមានការធ្លាក់ចុះកាន់តែអាក្រក់ថែមទៀត នៅពេលដែលផលប៉ះពាល់ទាំងស្រុងនៃសេដ្ឋកិច្ចបិទទ្វានេះ នឹងត្រូវបានគេបង្ហាញអោយដឹងជាលម្អិត។ ការទស្សន៍ទាយជារួមគឺថា ផលិតផលសរុបក្នុងស្រុកនៃតំបន់ចាយរូបបិយបណ្ណអឺរ៉ូនឹងធ្លាក់ចុះជិត៨ភាគរយក្នុងឆ្នាំនេះ ដែលចំនួននេះគឺជិត២ដងនៃចំនួនដែលធ្លាប់កើតមានក្នុងឆ្នាំ២០០៩។ ក្តីសង្ឃឹមដែលថា សេដ្ឋកិច្ចអឺរ៉ុបនឹងងើបឡើងវិញយ៉ាងឆាប់រហ័សនោះត្រូវបានរលាយបាត់ទៅវិញយ៉ាងលឿន ដោយសេដ្ឋកិច្ចវិទូជាច្រើនបានព្រមានថា សេចក្តីត្រូវការតិចតួចនឹងមានតទៅទៀតនៅក្នុងសហគមអឺរ៉ុបក្នុងពេលខាងមុខ។
ផលប៉ះពាល់របស់ប្រទេសអាល្លឺម៉ង់
តុលាការជាន់ខ្ពស់ក្នុងប្រទេសអាល្លឺម៉ង់ពុំបានជួយក្នុងកិច្ចខិតខំប្រឹងប្រែងដើម្បីស្រោចស្រង់កញ្ចប់សេដ្ឋកិច្ចរបស់សហគមន៏អឺរ៉ុបនោះទេ។
តុលាការធម្មនុញ្ញរបស់អាល្លឺម៉ង់បានសម្រេចថា ធនាគារកណ្តាលរបស់សហភាពអឺរ៉ុបដែលហៅកាត់ថា ECB បានរំលោភនូវគោលការណ៏នៃសមភាព ជាមួយនឹងកិច្ចសន្យាទិញនូវមូលប័ត្របំណុលដែលមានទឹកប្រាក់ប្រមាណ ២,៦ ទ្រីលានដុល្លារចាប់តាំងពីឆ្នាំ២០០៨មក។ តុលាការនេះក៏បានលើកឡើងផងដែរថា ដោយគ្មានអំណាចខាងផ្លូវច្បាប់ធនាគារមួយនេះបានរំលោភ ដោយព្យាយាមបង្កើតឡើងនូវគោលនយោបាយសេដ្ឋកិច្ចមួយដ៏ទូលំទូលាយ សម្រាប់តំបន់ចាយប្រាក់អឺរ៉ូ និងរំលោភដែនសមត្ថកិច្ចយុត្ថាធិការរបស់ខ្លួន។
តុលាការនេះក៏បានរកឃើញផងដែរ ធនាគារកណ្តាលរបស់ប្រទេសអាល្លឺម៉ង់ Bundesbank មិនគួចុះហត្ថលេខាគាំទ្រសកម្មភាពរបស់ធនាគារគណ្តាលរបស់សហគមន៏អឺរ៉ុបទេ ដោយធនាគារកណ្តាលរបស់ប្រទេសអាល្លឺម៉ង់នេះ ក៏បានទាត់ចោលនូវសេចក្តីសំរេចខាងផ្លូវច្បាប់របស់តុលាការយុត្តិធម៌សហភាពអឺរ៉ុបដែលថា ខ្លួនត្រូវធ្វើយ៉ាងដូចនេះ។
អ្នកជំនាញខាងច្បាប់បានអោយដឹងថា ការសម្រេចរបស់តុលាការអាល្លឺម៉ង់ បានធ្វើឡើងដោយផ្អែកលើកហេតុផលពីរយ៉ាង។ ទីមួយ នៅពេលដែលការសម្រេចនោះមិនបានរួមបញ្ជូលនូវការទិញមូលប័ត្របំណុលដែលមានតំលៃចុងក្រោយប្រមាណ៩១៤ពាន់លានដុល្លារ ដែលទឹកប្រាក់នេះ គឺភាគច្រើនជាបំណុលរបស់ប្រទេសអ៊ីតាលីនិងប្រទេសអេស្ប៉ាញ ក្នុងអ្វីដែលគេហៅថា «បំណុលដោយសារតែការរាតត្បាតនៃជំងឺ» កាលពីខែមីនាកន្លងទៅ ហើយការសម្រេចនេះអាចធ្វើអោយមានការប៉ះពាល់ដល់ធនាគារកណ្តាលរបស់សហភាពអឺរ៉ុប ជាមួយនឹងការទិញទ្រព្យសម្បតិ្តនិងមូលប័ត្របំណុលដែលមានចំនួនច្រើនក្នុងពេលអនាគត។
មូលប័ត្របំណុល ដែលជួយធានាគាំទ្រដោយរដ្ឋសមាជិកជាអ្នកមាន បានផ្តល់ការដោះបន្ទុក ដល់ប្រទេសអ៊ីតាលី និងប្រទេសអេស្ប៉ាញ ដោយរក្សានូវការប្រាក់ទាបចំពោះការផ្តល់កម្ចីប្រាក់ដល់ប្រទេសទាំងពីរ នៅពេលដែលគេទៅរកទីផ្សារពាណិជ្ជកម្មបើកចំហរ។
តុលាការយុត្តិធម៌របស់សហភាពអឺរ៉ុបបានព្រមានថា ការសម្រេចរបស់តុលាការជាន់ខ្ពស់នៃប្រទេសអាល្លឺម៉ង់នេះក៏បានធ្វើអោយនីតិវិធីខាងផ្លូវច្បាប់របស់តុលាការសហភាពអឺរ៉ុបស្ថិតក្នុងភាពមិនច្បាស់លាស់ ដែលអាចធ្វើអោយមានហានិភ័យនិងមហន្តរាយដល់គម្រោងរបស់សហភាពអឺរ៉ុបស្តីពី «ការឯកភាពគ្នាខាងផ្លូវច្បាប់របស់ EU»។
លោក Arnaud Mares អតីតទីប្រឹក្សារបស់ធនាគារកណ្តាលរបស់សហភាពអឺរ៉ុប បានប្រាប់អោយដឹងតាមសំដីដើមរបស់លោកថា «ការសំរេចរបស់តុលាការអាល្លឺម៉ង់នេះ បានបង្ហាញពីការគំរាមមួយដោយពិតប្រាកដ ដល់ស្ថិរភាពរបស់សហភាពអឺរ៉ុបទាំងមូល»។ លោកបន្ថែមទៀតថា «ការសំរេចនេះអាចនាំឲ្យសហភាពអឺរ៉ុបឈានទៅដល់ចំណុចនាំឲ្យមានការបែកបាក់គ្នាកាន់តែឆាប់រហ័សជាងអ្វីដែលមនុស្សគ្រប់គ្នាបានគិតដល់»។
ប្រែសម្រួលដោយ លោក ជ្រា វណ្ណារិទ្ធ
