ភ្ជាប់​ទៅ​គេហទំព័រ​ទាក់ទង

ការ​ប្រគុំ​តន្រ្តី​ភ្ជាប់​មិត្ត​ភាព​អាមេរិក និង​កម្ពុជា


ក្មេងៗ​អាមេរិកាំង​ទាំង​នេះ​កំពុង​ច្រៀង​បទ​«ភ្នំពេញ»​ ដែល​ជា​ស្នា​ព្រះហស្ថ​និពន្ធ​ដោយ​អតីត​ព្រះ​បរមសព​ព្រះ​បាទ​នរោត្តម​សីហនុ។
ក្រុម​តន្រ្តី​ករ​អាមេរិកាំង​ពីរ​ក្រុម​បាន​ប្រគុំ​តន្ត្រី​សប្បុរសធម៌​នៅក្នុង​រាជធានី​ភ្នំពេញ នៅ​មុន​ថ្ងៃ​ទទួល​បាន​ឯករាជ្យ​របស់​អាមេរិក។ ក្រុម​តន្ត្រី​និង​អ្នក​រៀបចំ​និយាយ​ថា ពួក​គេ​សង្ឃឹម​ថា ការ​ប្រគុំ​តន្រ្តី​នេះ​នឹង​ជួយ​ភ្ជាប់​ចំណង​មិត្ត​ភាព​កាន់​តែ​ជិត​ស្និទ្ធ​រវាង​អាមេរិក​និង​កម្ពុជា។​

ក្មេងៗ​អាមេរិកាំង​ទាំង​នេះ​កំពុង​ច្រៀង​បទ​«ភ្នំពេញ»​ ដែល​ជា​ស្នា​ព្រះហស្ថ​និពន្ធ​ដោយ​អតីត​ព្រះ​បរមសព​ព្រះ​បាទ​នរោត្តម​សីហនុ នៅក្នុង​រាជ​ធានី​ភ្នំពេញ​កាល​ពី​ដើម​សប្តាហ៍​នេះ​ ជា​ផ្នែក​មួយ​នៅ​ក្នុង​ដំណើរ​ប្រគុំ​តន្រ្តី​របស់​ពួកគេ​ក្នុង​តំបន់​អាស៊ី។​

Ateha Baily​ គឺ​ជា​អ្នក​ចម្រៀង​ម្នាក់​នៅក្នុង​ក្រុម​អ្នក​ចម្រៀង​ជាពួក​កុមារ Boston​ដែល​មាន​សមាជិក​ជាង​៦០​នាក់ ​មក​ពី​រដ្ឋ ​Massachusetts របស់​សហរដ្ឋ​អាមេរិក។​

Ateha និយាយថា៖ «ខ្ញុំ​ត្រូវ​រៀន​ពាក្យ​ជាមុន ហើយ​វា​ពិបាក​បន្តិច​ដែរ ប៉ុន្តែ​ក្រោយ​ពី​ខ្ញុំ​ចេះ​ពាក្យ​ទាំង​នេះ​ហើយ វា​ដំណើរ​ការ​បាន​យ៉ាង​ល្អ ហើយ​ខ្ញុំ​ចូលចិត្ត​ចង្វាក់​ភ្លេង ពី​ព្រោះ​វា​ទាក់ទាញ​មែន​ទែន»។​

Ben Hires គឺ​ជា​នាយក​កម្មវិធីនៃ​ក្រុម​តន្រ្តី​កុមារ​នេះ។​

Ben​ និយាយថា៖ «សារៈ​សំខាន់​នៃ​ការ​ប្រគុំ​តន្ត្រី​នេះ គឺ​ថា​ នៅ​ពេល​ដែល​កូន​សិស្ស​របស់​យើងបាន​រៀន​សូត្រ​បន្ថែម​ទៀត​អំពី​ប្រវត្តិ​សាស្ត្រ​កម្ពុជា អាមេរិក និង​ប្រវត្តិ​សង្រ្គាម អ្វី​ដែល​ពួក​គេ​យក​ទៅ​ជាមួយ​នោះ​គឺ​ដំណើរ​ការ​ផ្សះផ្សារ​ផ្លូវ​ចិត្ត​ ហើយ​បោះ​ជំហាន​ឆ្ពោះ​ទៅ​មុខ។ ផ្នែក​ដែល​សំខាន់​មួយ​ទៀត​នោះ​គឺថា​ តន្រ្តី​បាន​ចូល​ពាក់​ព័ន្ធ​ ពីព្រោះ​តន្ត្រី​នេះ​ហើយ​ដែល​នាំ​ភាគី​ទាំង​ពីរ​ឲ្យ​រួម​រស់​ជាមួយ​គ្នា​បាន»។​

ជាមួយ​គ្នា​នេះ​ដែរ ការ​ប្រគុំ​តន្រ្តី​មួយ​ទៀត​ដោយ​ក្រុម​ New York New Music Ensemble ក៏​បាន​បង្ហាញ​បទ​ភ្លេង​របស់​អ្នក​និពន្ធ​ដ៏​ល្បីល្បាញ​ចំនួន​បី​នាក់​របស់​កម្ពុជា​ផង​ដែរ។​
អ្នកស្រី Jayn Rosenfeld គឺ​ជា​នាយិកា​ប្រតិបត្តិ​របស់​ក្រុម​តន្រ្តីករ​ដែល​មក​ពី​ទីក្រុង​ញូយ៉ក​នេះ។​

Ben​ និយាយថា៖ «វា​ខុស​គ្នា​បន្តិច​ដែរ​ពី​ការ​ប្រគុំ​បទ​ភ្លេង​ផ្សេង​ទៀត។ នៅពេល​ដែល​យើង​លេង​បទ​របស់​បច្ចឹម​ប្រទេស​និង​អាមេរិក យើង​ដឹង​ពី​សំឡេង​របស់​អ្នក​និពន្ធច្រើន​ជាង​ឆ្ងាយ​ណាស់។ ប៉ុន្តែ​ នៅពេល​ដែល​យើង​ប្រគុំ​បទ​ខ្មែរ ខ្ញុំ​មាន​អារម្មណ៍​ថា យើងបាត់​ផ្នែក​ខ្លះ​នៃ​អ្វី​ដែល​នៅក្នុង​ចិត្ត​គំនិត​របស់​អ្នក​និពន្ធ​បទភ្លេង។ ដូច្នេះ ខ្ញុំ​មានការ​គោរព​យ៉ាង​ខ្លាំង​ដល់​វប្បធម៌​តន្ត្រី​របស់​អ្នក​និពន្ធ​បទ​ភ្លេង​ទាំង​នេះ ពីព្រោះ​វាខុសគ្នា​ពី​វប្បធម៌​របស់​ពួក​យើង»។

លោក​បណ្ឌិត ហ៊ឹម សុភី ជា​អ្នក​និពន្ធ​បទ​ភ្លេង​ម្នាក់។​

លោក​បណ្ឌិតនិយាយថា៖ «ការនាំ​យក​ការ​ប្រគុំ​តន្រ្តី​ចំនួន​ពីរ​ពី​អាមេរិក​យក​មក​សម្តែង ជា​ពិសេស​សម្តែង​ស្នាដៃ​ដែល​ជា​របស់​ខ្មែរ ​ ធ្វើឲ្យ​ចំណង​មិត្ត​ភាព​រវាង​កម្ពុជា​និង​អាមេរិក​កាន់​តែមាន​ភាព​ជិត​ស្និទ្ធ»។

លោក​បណ្ឌិត​សំ សំអាង​ក៏​ជា​អ្នក​និពន្ធបទ​ភ្លេង​ម្នាក់​ដែរ។​

លោក​បណ្ឌិតនិយាយថា៖ «វាជា​មោទនភាព​មួយ ហើយ​ជា​ឱកាស​មួយ​ដែល​យើង​គួរ​តែ​ឆក់​ចាប់​យក ហើយ យើង​មាន​សេចក្តី​រីករាយ​និង​មាន​មោទនភាព​ដែល​តន្រ្តីករ​ដែល​មាន​កម្រិត​អន្តរ​ជាតិ​មក​សម្តែង​បទ​របស់​អ្នក​និពន្ធ​បទ​ខ្មែរ​យើង»។​

លោក​បណ្ឌិត អ៊ុង ជិនណារី​ក៏ជា​អ្នក​និពន្ធ​បទភ្លេង​ម្នាក់​ដែរ។​

លោក​បណ្ឌិតនិយាយថា៖ «កាលណា​យើង​នៅ​ខ្សោយ យើងបើក​ទ្វារ​មក គេ​លេប​តែ​ម្តង។ កាលណា​យើង​ខ្លាំង​ទប់​ជាមួយគេ​បាទ វា​គ្មាន​អីទេ វា​ទៅ​ជា​មិត្តភាព​ហើយ»។​

ការ​ប្រគុំ​តន្រ្តី​ទាំង​ពីរ​នេះ​នឹង​ជួយ​ដល់​អង្គការ​សិល្បៈ​ខ្មែរ​អមតៈ ដែល​ជាអ្នករៀបចំ​កម្មវិធី​នេះ​ឡើង។​

លោក​សុង សេង​គឺ​ជា​តំណាង​ម្នាក់​របស់​អង្គការ​នេះ។​

លោកនិយាយថា៖ «សិល្បៈ​ខ្មែរ​អមតៈ​ព្យាយាម​ប្រមូល​និង​ផ្សារ​ភ្ជាប់​ការងារ​មួយ​ចំនួន​ធំ​ដែល​យើង​តែង​តែ​ធ្វើ​រួមគ្នា​ជាមួយ​ហ្នឹង​ខ្មែរ​និង​សហ​រដ្ឋ​អាមេរិក ​ដើម្បី​ឲ្យ​គេ​ជួយ​យើង។​ ហើយ​យើង​ក៏យល់​ថា គេ​ជា​មនុស្ស​ម្នាក់​ដែល​មាន​ចិត្ត​សប្បុរស​ធម៌​ផង​ដែរ​ក្នុង​ការជួយ​ប្រទេស​យើង»។​

ក្រុមអ្នក​ចម្រៀង​ជាពួក​នេះ​ក៏​នឹង​សម្តែង​នៅ​ក្នុង​ខេត្ត​សៀមរាប​ផង​ដែរ​នៅ​ថ្ងៃទី​៤​ខែ​កក្កដានេះ៕
XS
SM
MD
LG