កងកម្លាំងសន្តិសុខរបស់រដ្ឋាភិបាលអ៊ីរ៉ាក់បានឡោមព័ទ្ធក្រុង Fallujah លើជ្រុងទាំងបួននៅមុនការវាយលុកពេញទំហឹង ក៏ប៉ុន្តែមានកំណើនកង្វល់អំពីស្ថានភាពក្រុមជនស៊ីវិល ដែលជាប់គាំងនៅក្នុងក្រុងកាន់កាប់ដោយពួករដ្ឋឥស្លាមមួយនេះ។
លោក Muhamed ដែលជាទាហានម្នាក់នៃកងកម្លាំងពិសេសអ៊ីរ៉ាក់នៅលើខ្សែប្រយុទ្ធជួរមុខ ដែលបានត្រូវទាក់ទងតាមទូរស័ព្ទ បាននិយាយដោយមានលក្ខខណ្ឌមិនឲ្យគេប្រើឈ្មោះលោកពេញបាននិយាយថា «ពួករដ្ឋឥស្លាមបានដាក់គ្រាប់បែកនៅតាមផ្លូវ ហើយបានប្រើជនគ្រាប់បែកអត្តឃាត»។
ក្រុង Fallujah ដែលជាសំបុកមួយរបស់ពួកនិកាយ Sunni ត្រូវបានកាន់កាប់ដោយពួករដ្ឋឥស្លាមយូរជាងក្រុងឯទៀតៗនៅក្នុងប្រទេសអ៊ីរ៉ាក់ ហើយគេមានជំនឿថា ពួកយុទ្ធជនបានចាក់ឬសមាំទាំនៅក្នុងក្រុងនេះ។
លោក Muhamed បាននិយាយថា «យើងកំពុងរង់ចាំបញ្ជាដើម្បីធ្វើចលនាចូលទៅក្នុងក្រុងនេះ និងសម្លាប់ពួករដ្ឋឥស្លាម»។
នៅពេលដែលការប្រយុទ្ធគ្នា និងការវាយប្រហារតាមអាកាសនៅជុំវិញទីក្រុងនេះមានខ្លាំងឡើងៗ ស្ថានភាពរបស់ក្រុមជនស៊ីវិលជាប់គាំងនៅក្នុងក្រុងនេះក៏មានភាពអាក្រក់ជាងមុនផងដែរ។ នៅពេលដែលមនុស្សប្រមាណ ៨០០នាក់បានរត់គេចខ្លួនចេញពីក្រុងនេះហើយក៏ដោយ ក៏មានមនុស្សរាប់ពាន់នាក់ទៀតមិនបានរត់រួចទេ។
អង្គការ UNHCR បាននិយាយថា ខ្លួនបានទទួលរបាយការណ៍អំពីទុក្ខវេទនារបស់ជនស៊ីវិល។
អ្នកស្រី Melissa Fleming អ្នកនាំពាក្យនៃអង្គការ UNHCR បានមានប្រសាសន៍ថា «យើងមានសេចក្តីរាយការណ៍អំពីកំណើននៃការប្រហារជីវិតបុរសនិងយុវជន ដែលមិនចង់ប្រយុទ្ធក្នុងនាមនៃពួករដ្ឋឥស្លាម។ សេចក្តីរាយការណ៍ឯទៀតៗបានចែងថា មនុស្សមួយចំនួន ដែលបានប៉ុនប៉ងចាកចេញពីក្រុងនេះត្រូវបានប្រហារជីវិត ឬត្រូវវាយនឹងរំពាត់។ បន្ថែមពីលើនេះទៀត គេរាយការណ៍ថា មានមនុស្សច្រើននាក់បានស្លាប់ ឬកប់នៅក្នុងកម្ទេចកម្ទីនៃផ្ទះរបស់ពួកគេនៅក្នុងកិច្ចប្រតិបត្តិការយោធាដែលកំពុងមានធ្វើនៅទីនោះ»៕
ទីភ្នាក់ងារមនុស្សធម៌បានអំពាវនាវច្រើនដងឲ្យមានការអនុញ្ញាតឲ្យជនស៊ីវិលចាកចេញពីក្រុងនេះ៕
