ភ្ជាប់​ទៅ​គេហទំព័រ​ទាក់ទង

ស.រ.អា​នឹង​ជំរុញ​ឲ្យ​មាន​សិទ្ធិ​ស្ត្រី​ក្នុង​របប​ប្រជាធិបតេយ្យ​ថ្មី​នៅ​មជ្ឈិម​បូព៌ា


លោកស្រី​ មីស្សេល​ អូបាម៉ា ភរិយាលោក​ប្រធានាធិបតី​ស.រ.អា (ខាងឆ្វេង) លោកស្រី​ហ៊ីលឡារី គ្លីនតុន​ រដ្ឋមន្ត្រី​ក្រសួង​ការបរទេស​ (ខាង​ស្តាំ) និងលោកស្រី​ រូហ្សា​ អ៊ូទុនបាយេវ៉ា​ (Roza Otunbayeva)​ ប្រធានាធិបតី​ប្រទេស​ គីហ្ស៊ីស្ថាន​ (នៅ​កណ្តាល) នៅ​ថ្ងៃ​ទី​៨​ខែ​មិនា

លោកស្រី​ហ៊ីលឡារី គ្លីនតុន​ រដ្ឋមន្ត្រី​ក្រសួង​ការបរទេស​ មាន​ប្រសាសន៍​ថា​ ស.រ.អា​នឹង​ «ប្រកាន់​ជំហរ​រឹងមាំ»​ ចំពោះ​ការឲ្យ​អំណាច​ដល់​ស្ត្រី​ ខណៈ​ពេលដែលលទ្ធិ​ប្រជាធិបតេយ្យ​ថ្មី​មាន​រូបរាង​ហើយ​នៅ​ក្នុង​មជ្ឈិម​បូព៌ា​ប្រទេស។​ លោកស្រី​ គ្លីនតុន​បាន​មាន​ប្រសាសន៍​ដូច្នេះ​នៅ​ឯ​ពិធី​មួយ​ ដែល​ផ្តល់​កិត្តិយស​ដល់​ស្ត្រី​មកពី​ប្រទេស​១០​ សម្រាប់​ការគាំទ្រ​បញ្ហា​ស្ត្រី​ រួមមាន​លោកស្រី​ រូហ្សា​ អ៊ូទុនបាយេវ៉ា​ (Roza Otunbayeva) ប្រធានាធិបតី​ប្រទេស​ គីហ្ស៊ីស្ថាន​ (Kyrgyzstan) ផង​ដែរ។

លោកស្រី​ គ្លីនតុន​បាន​ប្រើ​ពិធី​នោះ​ ជា​ផ្នែកមួយ​នៃ​ពិធី​ទិវា​នារី​អន្តរជាតិ​ ដើម្បី​ប្រើ​ជា​ការ​ជូន​ដំណឹង​ថា​រដ្ឋបាល​លោក​អូបាម៉ា​នឹង​ធ្វើ​ឲ្យ​ ការឲ្យ​អំណាច​ដល់ស្ត្រី​ជា​គោល​នយោបាយ​មួយ​មាន​អាទិភាព​នៅ​ក្នុង​ការដោះស្រាយ​បញ្ហា​របស់​ខ្លួន​ ជាមួយ​នឹង​លទ្ធិប្រជាធិបតេយ្យដែល​លេច​ឡើង​នៅ​ក្នុង​មជ្ឈិម​បូព៌ា​ប្រទេស។

“ស្ត្រី​នៅ​ក្នុង​ប្រទេស​អេហ្ស៊ីព​និង​ទុយនុយស៊ី​ និង​ប្រទេស​ដទៃ​ទៀត​មាន​សិទ្ធិ​ច្រើន​ដូចជា​បុរស​ដែរ​ដើម្បី​រៀបចំ​រដ្ឋាភិបាល​របស់​ខ្លួន​ឡើង​វិញ​ ធ្វើ​ឲ្យ​ពួកគេ​ធ្វើការ​មាន​ប្រសិទ្ធភាព​ ទទួល​ខុសត្រូវ​ និង​មាន​តម្លាភាព។​ ស.រ.អ​នឹង​ប្រកាន់​យក​ជំហរ​រឹងមាំ​ចំពោះ​សំណើ​ដែល​ថា​ស្ត្រី​ត្រូវ​តែ​បាន​បញ្ចូល​ទៅ​ក្នុង​ការអនុវត្ត​អ្វី​ក៏ដោយ​ឲ្យ​តែ​មាន​ដំណើរ​ឆ្ពោះ​ទៅ​មុខ»។

លោកស្រី​ គ្លីនតុន​បាន​មាន​ប្រសាសន៍​ថា​ គ្មាន​រដ្ឋាភិបាល​ណា​អាច​មាន​ជោគជ័យ​បាន​ទេ​ប្រសិន​បើ​រដ្ឋាភិបាល​ បដិសេធ​ស្ត្រី​ ដែល​មាន​ចំនួន​ពាក់កណ្តាល​នៃ​ពលរដ្ឋរបស់​ខ្លួន​ ពី​ការចូលរួម​ក្នុង​សេចក្តី​សម្រេច​សំខាន់ៗ​នោះ។

លោកស្រី​រដ្ឋមន្ត្រី​ការបរទេស​ ដែល​ចូលរួម​ដោយ​ភរិយា​ប្រធានាធិបតី​ គឺ​លោកស្រី​ មីស្សេល​ អូបាម៉ា​ បាន​ធ្វើ​ជា​អធិបតី​នៅ​ខួប​លើក​ទី៥​ នៃ​ពិធី​ប្រគល់​រង្វាន់​ស្ត្រីក្លាហាន​ ដើម្បី​ផ្តល់​កិត្តិយសដល់​សកម្មជន​នៅ​ជុំវិញ​ពិភពលោក​ ចំពោះ​ការគាំទ្រ​សិទ្ធិ​ និង​ការ​ឲ្យ​អំណាចដល់​ស្ត្រី។

ឆ្នាំ​នេះ​ អ្នក​ទទួល​រង្វាន់​១០​នាក់​ រួមមាន​ទាំង​ស្ត្រី​មេដឹកនាំ​ប្រទេស​ដំបូង​បង្អស់​ផង​ ដែល​បាន​ទទួល​កិត្តិយស​ គឺ​លោកស្រី​ រូហ្សា អ៊ូទុនបាយេវ៉ា ប្រធានាធិបតី​នៃ​សាធារណរដ្ឋ​ គីហ្ស៊ីស្ថាន​ដែល​លោកស្រី​ គ្លីនតុន​បាន​មាន​ប្រសាសន៍​ថា​ លោកស្រី​ អ៊ូទុនបាយេវ៉ា​បាន​កាច់​ចង្កូត​ប្រទេស​លោកស្រី​ឲ្យ​ទៅ​ជា​ប្រទេស​មាន​លទ្ធិប្រជាធិបតេយ្យ​កាលពី​ឆ្នាំ​មុន​ ក្រោយ​ពី​ការរលំ​របប​ផ្តាច់ការ​មួយ។

«លោកស្រី​ បាន​សម្រេចចិត្ត​តាំង​ពី​ដំបូង​ លើ​អ្វី​ដែល​លោកស្រី​នឹង​ជួយ​រៀបចំ​រដ្ឋាភិបាល​ថ្មី ដើម្បី​ឲ្យ​មាន​រដ្ឋធម្មនុញ​ថ្មី​មួយ។​ ហើយ​នៅ​ពេល​កាលៈទេសៈ​មក​ដល់​ បន្ទាប់​ពី​ការបោះឆ្នោត​បាន​ចប់​សព្វគ្រប់​ លោកស្រី​បាន​ផ្ទេរ​អំណាច​ទៅឱ្យ​នាយក​រដ្ឋមន្ត្រី​ថ្មី​និង​រដ្ឋាភិបាល​ថ្មី​នោះ។​ នៅ​ក្នុង​ការធ្វើ​ដូច្នេះ​ លោកស្រី​បាន​ផ្តល់​នូវ​មេរៀន​មួយ​ដែល​មិន​អាច​កាត់ថ្លៃ​បាន​ ដល់​លទ្ធិ​ប្រជាធិបតេយ្យ​ដែល​ផុស​ឡើង​នៅ​គ្រប់​ទី​កន្លែង»។

នៅ​ក្នុង​សុន្ទរកថា​ដែល​ទទួល​យក​ ក្នុង​នាម​នៃ​អ្នក​ទទួល​ជ័យលាភី​ទាំង​អស់ ​លោកស្រី​ប្រធានាធិបតី​ អ៊ូទុនបាយេវ៉ា​បាន​មាន​ប្រសាសន៍​ថា​ លទ្ធិ​ប្រជាធិបតេយ្យ​របស់​ គីហ្ស៊ីស្ថាន​ថ្មី​ ដែល​មាន​ដំបូង​បង្អស់​នៅ​ក្នុង​តំបន់​ អាច​លេចឡើង​ដូច​ជា​ច្របូក​ច្របល់​ ក៏​ប៉ុន្តែ​ ថា​ភាព​ច្របូក​ច្របល់​ដែល​អាច​មើល​ឃើញ​នោះ​ វា​នៅ​ឆ្ងាយ​ណាស់​ ពី​ចំណូលចិត្ត​ឲ្យ​មាន​ការ​បញ្ជា​ដែល​បង្ខិត​បង្ខំ​ដោយ​អ្នក​កាន់អំណាច​ផ្តាច់ការ​ម្នាក់។

«មែន​ហើយ​ នៅ​ពេល​លោកអ្នក​មាន​រដ្ឋាភិបាល​ផ្តាច់ការ​មួយ​ វា​ងាយ​ណាស់​នឹង​បង្កើត​រូបភាព​ក្លែងក្លាយ​នៃ​ស្ថិរភាព​និង​ភាព​ចុះសម្រុង​គ្នា។​ នៅ​ពេល​លោកអ្នក​មាន​លទ្ធិប្រជាធិបតេយ្យ​ លោកអ្នក​ត្រូវ​តែ​រៀន​ទទួល​មតិ​ឲ្យ​បាន​ច្រើន​ មតិ​ខ្លះ​ទិះតៀន​ខ្លាំងៗ​ មតិ​ខ្លះ​ថែម​ទាំង​មើលងាយ​ទៀត​ផង។​ ចំពោះ​ពួក​អ្នកក្រៅ​ មើល​ឃើញ​ថា​លោកអ្នក​ហាក់​ដូចជា​នឹង​រលំ​គ្រប់​វិនាទី»។

ចំណែក​អ្នក​ទទួល​រង្វាន់​ផ្សេងៗ​ទៀត​នៅ​ឯ​ពិធី​នោះ​ មាន​លោកស្រី​ ម៉ារីយ៉ា​ បាស្ហៀរ​ ព្រះរាជអាជ្ញា​ប្រចាំ​តំបន់​របស់​ប្រទេស​អាហ្វហ្កានីស្ថាន​ អ្នកកាសែត​ ហេនរីអេត អេកវី អេបុងហ្កូ (Henriette​ Ekwe​ Ebongo)​ ​នៃ​ប្រទេស​កាម៉េរូន​ លោកស្រី​ជៀនម៉ី កួយ (Jianmei Guo)​ មេធាវី​ចិន​ លោកស្រី​ អាណេស អូសតុគីយ៉ាន (Agnes​ Osztokyan)​ សមាជិក​សភា​នៃ​ប្រទេស​ហុងហ្ការី ​ លោកស្រី​ អេវ៉ា អាប៊ូ ហាឡាវ៉េ (Eva​ Abu​ Halaweh)​ សកម្មជន​ផ្នែក​ច្បាប់​នៃ​ប្រទេស​ហ្ស៊កដានី​ លោកស្រី​ ហ្គោឡាម ស៊ូក្រា (Ghulam​ Sughra)​ សកម្មជន​នៃ​ស្ត្រី​ជនបទ​ប្រទេស​ប៉ាគីស្ថាន​និង​លោក​ស្រី​ម៉ារីសេឡា ម៉ារាឡេស (Marisela Marales)អនុរដ្ឋ​មន្ត្រី​ក្រសួង​យុត្តិធម៌​ប្រទេស​ម៉ិចស៊ីក៕

ប្រែ​សម្រួល​ដោយ​ នុច សារីតា

XS
SM
MD
LG