នៅក្នុងការហៅទួរស័ព្ទទៅកាន់ម្ចាស់អំណោយយុទ្ធនាការឃោសនាបោះឆ្នោតប្រធា នាធិបតីរបស់លោកស្រី លោកស្រី Hillary Clinton បានស្តីបន្ទោសលោក James Comeyនាយកភ្នាក់ងារស៊ើបអង្កេតសហព័ន្ធ FBIចំពោះការបរាជ័យក្នុងការបោះឆ្នោតប្រធានាធិបតីរបស់លោកស្រីដោយនិយាយថា ការស៊ើបអង្កេតដែលបានធ្វើឡើងវិញនៅក្នុងការប្រើប្រាស់សារអេឡិចត្រូនិច ឬអ៊ីម៉ែលរបស់លោកស្រីបានបំផ្លាញយុទ្ធនាការឃោសនាបោះឆ្នោតប្រធានាធិបតីរបស់លោកស្រី។
ក្នុងស្ទង់មតិថ្នាក់ជាតិស្ទើរតែទាំងអស់ បានបង្ហាញថា លោកស្រីគ្លីនតុនខាងគណបក្សប្រជាធិបតេយ្យបាននាំមុខលោកដូណាល់ ត្រាំ (Donald Trump) គូប្រកួតប្រជែងខាងគណបក្សសាធារណរដ្ឋរយៈពេលជាច្រើនសប្តាហ៍រហូតដល់ថ្ងៃបោះឆ្នោតនៅថ្ងៃអង្គារ។ ក៏ប៉ុន្តែ លោក Trump បានទទួលជ័យជម្នះដ៏គួរឲ្យភ្ញាក់ផ្អើលនៅទូទាំងប្រទេសនៅពេលដែលការរាប់សន្លឹកឆ្នោតបានចាប់ផ្តើម ហើយលោក Trump បានទទួលជ័យជម្នះមិនដល់១២ម៉ោង បន្ទាប់ពីស្ថានីយបោះឆ្នោតបានបិទ។
ទីភ្នាក់ងារព័ត៌មាន Reuters បានរាយការណ៍ថា លោកស្រីគ្លីនតុន បានប្រាប់ពួកអ្នកម្ចាស់អំណោយកាលពីថ្ងៃសៅរ៍ថា ការសើរើពិនិត្យមើលឡើងវិញនៃការស្ទង់មតិថ្នាក់ជាតិ បានបង្ហាញថា លិខិតរបស់លោក Comey នាយក FBI ទៅកាន់សភាអំពីការរកឃើញសារ e-mail ថ្មីដែលបានធ្វើជាសាធារណៈតែចំនួន១១ថ្ងៃមុនពេលការបោះឆ្នោត ជាព្រឹត្តិការណ៍ដ៏សំខាន់មួយដែលបានបង្ហាញពីជ័យជម្នះដ៏ខ្លាំងក្លា។មនុស្ស៣នាក់ ដែលបានចូលរួមនៅក្នុងសន្និសីទតាមទូរស័ព្ទរបស់លោកស្រីគ្លីនតុន បានរៀបរាប់ប្រាប់ឡើងវិញពីការវិភាគរបស់លោកស្រីអំពីលទ្ធផលនៃការបោះឆ្នោតនេះ។
ការសន្ទនារបស់លោកស្រីគ្លីនតុនបានធ្វើឡើងជាមួយពួកអ្នកគាំទ្រជាលើកទីមួយកាលពីថ្ងៃសៅរ៍ នៅពេលដែលលោកស្រីបានពិភាក្សាលម្អិតពីលទ្ធផលនៃយុទ្ធនាការឃោសនាបោះឆ្នោតមិនបានទទួលជោគជ័យ។ លោកស្រីមិនសូវចេញមុខមាត់ចាប់តាំងពីលោកស្រីចាញ់ការបោះឆ្នោតលោកTrumpនៅក្នុងសុន្ទរកថាមួយទៅកាន់ពួកអ្នកគាំទ្រ និងក្រុមការងាររបស់លោកស្រីនៅក្នុងទីក្រុងញូយ៉កកាលពីព្រឹកថ្ងៃពុធសប្តាហ៍មុន៕
