លោកស្រី Christiana Figueres ជាលេខាប្រតិបត្តិនៃអនុសញ្ញាក្របខ័ណ្ឌសហប្រជាជាតិស្តីពីការប្រែប្រួលអាកាសធាតុ។ លោកស្រី ក៏បានកោតសរសើរលើការដាក់ឲ្យអនុវត្តកិច្ចព្រមព្រៀងការប្រែប្រួលអាកាសធាតុទីក្រុងប៉ារីស ដែលមានប្រទេស១៧៧ បានចុះហត្ថលេខា ហើយកិច្ចព្រមព្រៀងនេះ ទំនងជានឹងចាប់មានប្រសិទ្ធភាពក្នុងរយៈពេល១ឬ២ឆ្នាំខាងមុខ។
លោកស្រី និយាយថា នេះជាពេលវេលាមួយដ៏មានសក្តានុពលល្អសម្រាប់ទាំងកិច្ចការអាកាសធាតុ ទាំងកិច្ចការសុខភាពសាកល។
«ក្នុងការដោះស្រាយការប្រែប្រួលអាកាសធាតុតាមរយៈការកាត់បន្ថយការបញ្ចេញឧស្ម័នពុល យើងបានកំពុងតែបង្ការភាពអាក្រក់នានានៃស្ថានភាពសុខភាពទូទាំងពិភពលោក និងកំពុងធ្វើឲ្យប្រសើរឡើងស្ថានភាពផ្សេងៗដែលត្រូវកែលម្អតាមរយៈវិធាននានានៃអាកាសធាតុ តួយ៉ាងដូចជាការធ្វើឲ្យគុណភាពចំណីអាហារ និងទឹក សន្តិសុខស្បៀង និងសុវត្ថិភាពទឹកប្រសើរឡើង។ យើងកំពុងធ្វើឲ្យស្ថានភាពសុខភាពប្រសើរឡើង»។
លោកស្រី Figueres ក៏បានព្រមានពីបរាជ័យនៃចំណាត់ការនានាសម្រាប់ការប្រែប្រួលអាកាសធាតុ ដែលនាំឲ្យមានការបំផ្លាញផ្ទាល់ដល់សុខភាពត្រឹមឆ្នាំ២០៣០ និងបានចំណាយថវិការវាង២ ទៅ៤ពាន់លានដុល្លាក្នុងមួយឆ្នាំ។ លោកស្រី កត់សម្គាល់ឃើញថា មួយភាគប្រាំមួយនៃជំងឺធ្ងន់ធ្ងរ និងពិការភាពនានាកើតចេញពីមេរោគចម្លងផ្សេងៗ ហើយមេរោគទាំងអស់នេះ នឹងកើនឡើងប្រសិនបើមិនមានការកាត់បន្ថយការប្រែប្រួលអាកាសធាតុ។ លោកស្រីបានបន្ថែមថា អ្នកដែលរងគ្រោះដោយបញ្ហានេះភាគច្រើន គឺជាប្រជាជននៅប្រទេសកំពុងអភិវឌ្ឍ។
លោកស្រី Figueres និយាយថា ប្រទេសចំនួន១៨៩ បានបង្ហាញផែនការជាតិនៃការប្រែប្រួលអាកាសធាតុ របស់ខ្លួន ប៉ុន្តែមានតែ១៥ភាគរយនៃផែនការទាំងអស់នោះ បង្ហាញថា សុខភាពជាធាតុដ៏សំខាន់។លោកស្រី ចាត់ទុកការបង្ហាញនេះថាជាចំណុចប្រកាសអាសន្ន។
«ប្រសិនបើក្នុងរយៈពេល៥ឆ្នាំខាងមុខ យើងមិនផ្លាស់ប្តូរអ្វីដែលយើងកំពុងធ្វើក្នុងវិស័យថាមពល វិស័យដឹកជញ្ជូន វិស័យសំណង់ដែលសុទ្ធតែជាវិស័យបញ្ចេញឧស្ម័នពុលជាដ៏ច្រើនលើសលុបនោះទេនោះ យើងកំពុងតែស្ថិតក្នុងចំណុចរបត់ផ្លាស់ប្តូរតូចមួយនៃបរិយាកាស ដែលនឹងផ្តល់ផលអវិជ្ជមាន និងជះឥទ្ធិពលយ៉ាងខ្លាំងលើសុខភាព និងផែនដីសម្រាប់រយៈពេលជាច្រើនទសវត្សរ៍បន្តទៀត»។
លោកស្រី Figueres ទទូចស្នើសុំអង្គការសុខភាពពិភពលោក ប្រើប្រាស់តួនាទីរបស់ខ្លួនក្នុងវិស័យសុខាភិបាល ផ្សព្វផ្សាយដល់ប្រជាជនឲ្យយល់ដឹងថាអ្វីៗដែលទាក់ទងនឹងការប្រែប្រួលអាកាសធាតុ និងជះឥទ្ធិពលដល់សុខភាព បើមានអ្វីកើតឡើងល្អចំពោះអាកាសធាតុ វាក៏នឹងធ្វើឲ្យសុខភាពសាកលល្អដែរ៕
ប្រែសម្រួលដោយ កោះ សុគន្ធី
