ភ្ជាប់​ទៅ​គេហទំព័រ​ទាក់ទង

ជន​ស៊ីវិល​គេច​ពី​ការ​ប្រយុទ្ធ​គ្នា​នៅ​រដ្ឋធានី​នៃ​ប្រទេស​កូតឌីវ័រ


ប្រជាជន​ភ័យ​ខ្លាច​ចំពោះ​សុវត្តិភាពរបស់​​ពួក​គេនៅ​​ពេល​ជម្លៀស​​ចេញ​​ពី​សង្កាត់​អាបូបូ​នៃ​ទី​ក្រុង​អាប៊ីដហ្សង់​ ប្រទេស​កូតឌីវ័រ នៅថ្ងៃទី២៤​ ខែ​កុម្ភះ ឆ្នាំ២០១១។

ជនស៊ីវិល​ជាង​៣​ម៉ីន​នាក់​បាន​រត់​ចេញ​ពី​ការ​ប្រយុទ្ធ​គ្នា​រវាង​ក្រុម​អ្នក​គាំទ្រ​រដ្ឋាភិបាល​ដែល​ប្រជែង​គ្នា​របស់​ប្រទេស​កូតឌីវ័រ​ នៅ​ក្នុង​រដ្ឋធានី​ពាណិជ្ជកម្ម​ អាប៊ីដហ្សង់។

ក្រោយ​ពី​ការ​ប្រយុទ្ធ​គ្នា​ជិត​ពីរ​សប្តាហ៍​រវាង​ក្រុម​អ្នក​គាំទ្រ​លោក​ ឡូរ៉ិនត៍​ បាក់បូ​ ប្រធានាធិបតី​ក្នុង​តំណែង​ និង​គូរ​ប្រជែង​របស់​លោក​គឺ​លោក​ អាឡាស្សាន​ វ៉ាត់តារ៉ា មក​ លោក​អាកណូដ៍​ បេស្សូ​ដែល​មាន​ទី​លំនៅ​នៅសង្កាត់អាបូបូ​ថ្លែង​ថា​ លោក​មាន​ការ​លំបាក​គ្រប់គ្រាន់​ហើយ។

លោក​បេស្សូ​និយាយ​ថា​ លោក​និង​គ្រួសារ​លោក​បាន​ចាកចេញ​ពីសង្កាត់​អាបូបូ​ដោយសារ​តែ​ការ​ប្រយុទ្ធ និង​ការ​សម្លាប់​គ្នា។​ លោក​និយាយ​ថា កងកម្លាំង​សន្តិសុខ​កំពុង​ឆែកឆេរ​ផ្ទះ​ ហើយ​ទាំងអស់​នេះ​វា​ជា​ភាព​គ្មាន​សណ្តាប់​ធ្នាប់​មួយ។​ មាន​មនុស្ស​ជា​ច្រើន​ដែល​បាន​ស្លាប់។​ គ្មាន​អ្វី​បរិភោគ​ទេ​ ព្រោះ​ផ្សារ​ទាំង​អស់​បាន​បិទ​ទ្វារ។​ លោក​បេស្សូ​និយាយ​ថា​ ប្រសិន​បើ​មាន​នរណា​ម្នាក់​ជួយ​ប្រជាពលរដ្ឋ​នៃសង្កាត់អាបូបូ​នោះ​ ប្រជាពលរដ្ឋនៃសង្កាត់នេះ​សូម​ស្វាគមន៍​ជាទី​បំផុត។

ដោយ​គ្មាន​អ្នកណា​ម្នាក់​ជួយ​ពួក​គេ​ លោក​បេស្សូ និង​គ្រួសារ​បាន​ចាកចេញ​ដោយ​គ្មាន​យក​បាន​អ្វី​សោះ​ហើយ​លប​រត់​ចេញ​ពីសង្កាត់អាបូបូ​ ដោយ​ឆ្លងកាត់​កន្លែង​ឆែកឆេរ​ របស់​សកម្ម​ប្រយុទ្ធ​របស់​លោក​បាក់បូ​ចូល​ទៅ​ក្នុង​កន្លែង​ស្ងប់ស្ងាត់​ នៅ​ជិត​សួនសត្វ​របស់​ទី​ក្រុង​អាប៊ីដហ្សង់​ដែល​នៅ​ពេល​នេះ​ត្រូវ​បាន​បិទ​ទ្វារ។​ ឡើង​ទៅ​លើ​ទី​ទួល​ដ៏​ចោត​មួយ​ ឆ្លង​កាត់​រថយន្ត​តាក់ស៊ីតម្រៀប​គ្នា​ជា​ជួរ​ដែល​ពួកគេ​គ្មាន​លទ្ធភាព​នឹង​ជិះ​នោះ​ លោក​បេស្សូ និង​ភរិយា​លោក​ អ្នកស្រី​ ក្លែរីសយ៉ាវ​ សប្បាយ​ចិត្ត​នឹង​ធ្វើការ​ផ្លាស់ប្តូរ​លំនៅ។

អ្នកស្រី​ យ៉ាវ​និយាយ​ថា​ ពីរ​សប្តាហ៍​កន្លង​ទៅ​នេះ​មាន​ការ​លំបាក​ខ្លាំង​ណាស់​ចំពោះ​កូន​ទាំង​បួន​នាក់​របស់​ពួក​គេ​ ដែល​មាន​អាយុ​ពី​ ២​ទៅ​១៨​ឆ្នាំ។​ អ្នកស្រី​និយាយ​ថា​ ពួក​ក្មេងៗ​យំ​ នៅ​ពេល​ណា​ពួក​គេ​ឮ​សូរ​សម្លេង​គ្រាប់បែក។​ ដោយ​ស្ថានការណ៍​មិន​បាន​គ្រាន់បើ​ ហើយ​ដោយ​ពួក​ក្មេងៗ​ភ័យ​ខ្លាច​ផង​នោះ​ ឪពុកម្តាយ​ទាំង​ឡាយ​នៅ​ក្នុងសង្កាត់អាបូបូ​មាន​ការ​ភ័យ​ខ្លាច​ហើយ​ត្រូវ​តែ​ស្វែង​រក​កន្លែង​ផ្សេង​ទៀត​ដើម្បី​រស់​នៅ។

អ្នក​សម្រប​សម្រួល​ខាង​ថែទាំ​មនុស្សជាតិ​របស់​អង្គការ​សហ​ប្រជាជាតិ​នៅ​ទី​នេះ​និយាយ​ថា​ តំបន់​ខ្លះ​នៃ​សង្កាត់អាបូបូ​ជា​តំបន់​ដែល​ត្រូវ​បាន​គេ​បោះបង់​ ដោយ​មាន​សាកសព​នៅ​លើ​ផ្លូវថ្នល់ដែល​ត្រូវ​តែ​បាន​បញ្ចុះ​យ៉ាង​ឆាប់ៗ​ដែល​អាច​ធ្វើ​ទៅ​បាន។

ប្រែ​សម្រួល​ដោយ​ នុច សារីតា

XS
SM
MD
LG