សាលារាជធានីភ្នំពេញ នាព្រឹកថ្ងៃពុធនេះ បានសម្រេចអនុញ្ញាតិឲ្យប្រារព្ធបុណ្យខួប ១០០ថ្ងៃ លោក កែម ឡី នៅវត្តពោធិយ៉ារ៉ាម ហៅវត្តចាស់ រយៈពេលបីថ្ងៃ ដែលនឹងចាប់ផ្តើមនៅថ្ងៃសុក្រខាងមុខ។
កាលពីសប្តាហ៍កន្លងទៅ សាលាក្រុងភ្នំពេញបានចេញសេចក្តីប្រកាសមិនអនុញ្ញាតិ ឲ្យពិធីបុណ្យសព១០០ថ្ងៃរបស់ លោកកែម ឡី អតីតអ្នកវិភាគដែលរិះគន់រដ្ឋាភិបាលនិងគណបក្សជំទាស់ផងនោះ។
ក៏ប៉ុន្តែ ការសម្រេចអនុញ្ញាតិចុងក្រោយនេះគឺធ្វើឡើងភ្លាមៗ ក្រោយពីកិច្ចប្រជុំទ្វេភាគីរវាង លោក ប៉ា សុជាតិវង្ស អភិបាលរាជធានីភ្នំពេញ និងគណៈកម្មការ រៀបចំបុណ្យខួប ១០០ថ្ងៃ របស់លោក កែម ឡី។
លោក មាន ចាន់យ៉ាដា អ្នកនាំពាក្យសាលារាជធានីភ្នំពេញ បានប្រាប់ VOA ថា កន្លងមកសាលាក្រុងមិនបានបដិសេធដាច់អហង្កាចំពោះការរៀបចំពិធីបុណ្យរបស់លោកកែម ឡី នោះទេ គ្រាន់តែ សាលាក្រុងទាមទារឲ្យមានការកំណត់ឲ្យបានច្បាស់លាស់ អំពីការរៀបចំពិធីបុណ្យនោះប៉ុណ្ណោះ។
«ជំហររបស់យើងកន្លងមក ក៏យើងមិនបានហាមឃាត់មិនឲ្យគាត់ធ្វើបុណ្យដែរ។ ក៏ប៉ុន្តែដូចខ្ញុំធ្លាប់ជម្រាបជូនកន្លងមក គណៈកម្មការដែលដាក់មកសាលារាជធានីភ្នំពេញអត់ទាន់មានភាពច្បាស់លាស់ ហើយមិនទាន់មានការសហការជាមួយក្រុមគ្រួសាររបស់លោកកែម ឡី។ ក្រោយពីព្រឹកមិញ យើងបានពិភាក្សាគ្នា ឃើញគាត់បង្ហាញជំហរច្បាស់លាស់ ហើយគ្មានពាក់ព័ន្ធនឹងរឿងអ្វីផ្សេង។ យើងបានអនុញ្ញាតិឲ្យគាត់ធ្វើបុណ្យនៅវត្តចាស់»។
នៅក្នុងកិច្ចពិភាក្សាជាលើកទី១ រយៈពេលប្រមាណ២ម៉ោងនាព្រឹកនេះ សាលារាជធានីភ្នំពេញបានកំណត់ថា ការដង្ហែរូបសំណាក់លោក កែម ឡី ទៅខេត្តតាកែវ ត្រូវហែលចេញពីចំនុចវត្តចាស់ បន្តទៅកាន់រង្វង់មូលចោមចៅ រួចទើបឆ្ពោះទៅកាន់ខេត្តតាកែវ។ ការកំណត់របស់សាលារាជធានីភ្នំពេញបែបនេះនេះ គឺដើម្បីបញ្ចៀសការកកស្ទះចរាចរណ៍ក្នុងក្រុងភ្នំពេញ ស្របពេលដែលកម្ពុជាកំពុងស្វាគមន៍ទស្សកិច្ចផ្លូវការរបស់លោកប្រធានាធិបតីចិន លោក Xi Jinping (ស៊ី ជិនពីង) និងមានការរៀបចំកម្មវិធីបុណ្យព្រះបរមរតនកោដ្ឋនរោត្តមសីហនុ គម្រប់ខួប៤ឆ្នាំនាពេលខាងមុននេះ។
តំណាងគណៈកម្មការរៀបចំបុណ្យខួប ១០០ថ្ងៃ លោក កែម ឡី គឺ លោក ប៉ាង ងួនទៀង បានប្រាប់VOA ឲ្យដឹងថា សាលាក្រុងភ្នំពេញ បានយល់ព្រមឲ្យមានការប្រារព្ធបុណ្យខួប១០០ថ្ងៃ លោក កែម ឡី ក្រោយពីសាលារាជធានីភ្នំពេញបានយល់ច្បាស់ពីបំណងរបស់គណៈកម្មការបុណ្យ និងដឹងពីការរៀបចំកម្មវិធីបុណ្យនោះ។
«ក្រោយពីគណៈកម្មការបង្ហាញជំហរច្បាស់លាស់ទៅ ហើយសាលាក្រុងក៏បានពិចារណាឡើងវិញ។ ហើយក្រោយពីមានការជួបជជែកគ្នា មានការយល់ពីគោលបំណងរបស់គណៈកម្មការ។ គណៈកម្មការ ក៏បានពន្យល់ទៅសាលាក្រុងដែរថា អ្វីដែលយើងធ្វើនេះ គឺធ្វើបុណ្យសុទ្ធសាធ អត់មានគោលបំណងធ្វើបាតុកម្ម ឬទាមទារអ្វីទាំងអស់»។
កម្មវិធីបុណ្យខួប១០០ថ្ងៃ របស់លោក កែម ឡី មានរយៈពេល៣ថ្ងៃ ចាប់ពីថ្ងៃទី១៤ ដល់ថ្ងៃទី១៦ ខែតុលា នៅវត្តចាស់ ជាទីតាំងដាក់តម្កល់សពលោក កែម ឡី មុនពេលដង្ហែទៅបញ្ចុះនៅស្រុកកំណើតរបស់លោកក្នុងខេត្តតាកែវ។ កម្មវិធីបុណ្យនេះ នឹងធ្វើឡើងតាមប្រពៃណីព្រះពុទ្ធសាសនា ដោយមានការតាំងពិព័រណ៍រូបថត និងការចាក់ផ្សាយឡើងវិញនូវបទវិភាគបញ្ហាសង្គមផ្សេងៗ ដែលលោកបណ្ឌិត កែម ឡី ធ្លាប់បានធ្វើនៅពេលដែលលោកនៅមានជីវិតរស់នៅ។ ហើយការដង្ហែរូបសំណាក់លោក កែម ឡី ទៅកាន់ខេត្តតាកែវ នឹងត្រូវធ្វើឡើងនៅថ្ងៃចុងក្រោយនៃពិធីបុណ្យ។ នេះបើតាមការឲ្យដឹងរបស់គណៈកម្មការរៀបចំបុណ្យខួប។
លោក កែម ឡី អតីតអ្នកវិភាគដីល្បីល្បាញ ត្រូវបានខ្មាន់កាំភ្លើង បាញ់ស្លាប់នៅនឹងកន្លែងកាលពីថ្ងៃទី១០ ខែកក្កដា នៅកណ្តាលទីក្រុងភ្នំពេញ។ គ្រួសាររបស់លោកកែមឡី កំពុងនិរទេសខ្លួននៅក្រៅប្រទេស ដោយសារការភ័យខ្លាច។ មកដល់ពេលបច្ចុប្បន្នមានតែជនសង្ស័យម្នាក់គត់ដែលត្រូវបានគេឃាត់ខ្លួន៕
