អ្នកជំនាញសុខាភិបាលចិនបានអះអាងថា មេរោគកូរ៉ូណាវីរុសថ្មីដែលបានសម្លាប់មនុស្សអស់ ៤ នាក់កន្លងមក គឺជាមេរោគឆ្លង ដែលករណីនេះបង្កឲ្យមានការភ័យខ្លាចថា មេរោគនេះអាចរីករាលដាលយ៉ាងលឿនក្នុងចំណោមមនុស្ស។
គណៈកម្មការសុខាភិបាលជាតិនៃប្រទេសចិនបានបញ្ជាក់ថា មេរោគដែលបង្កឲ្យមានការរលាកសួតនេះ អាចឆ្លងពីមនុស្សម្នាក់ទៅមនុស្សម្នាក់ មិនមែនត្រឹមតែឆ្លងពីសត្វទៅមនុស្សនោះទេ។ នេះបើតាមការរាយការណ៍របស់ទីភ្នាក់ងារព័ត៌មាន Xinhua របស់ចិន។
កាលពីព្រឹកថ្ងៃចន្ទម្សិលមិញ មន្ត្រីសុខាភិបាលចិនបានបញ្ជាក់ថា មានករណីចំនួន ១៣៦ ថ្មីទៀតនៃការឆ្លងមេរោគនេះនៅក្នុងរយៈពេល ៣ ថ្ងៃកន្លងមក ដោយក្នុងនោះមានករណីឆ្លងនៅក្នុងទីក្រុងប៉េកាំង និងទីក្រុងសៀងហៃផងដែរ។
គណៈកម្មការសុខាភិបាលក្រុង Wuhan ភាគកណ្ដាលប្រទេសចិន បាននិយាយថា ចំនួនសរុបនៃអ្នកមានផ្ទុកមេរោគថ្មីនេះមានចំនួនលើស ២ រយនាក់ហើយ។ ករណីអ្នកឆ្លងមេរោគនេះភាគច្រើនត្រូវបានពណ៌នាថាមានលក្ខណៈស្រាល។ កន្លងមក ប្រទេសកូរ៉េខាងត្បូង ថៃ និងជប៉ុន បានអះអាងថាមានករណីឆ្លងមេរោគនេះនៅក្នុងប្រទេសរបស់ខ្លួន។
កាលពីថ្ងៃសុក្រ មជ្ឈមណ្ឌលគ្រប់គ្រងនិងបង្ការជំងឺឆ្លងរបស់សហរដ្ឋអាមេរិកបានចាប់ផ្ដើមពិនិត្យសីតុណ្ហភាពក្នុងខ្លួនរបស់អ្នកធ្វើដំណើរមកពីទីក្រុង Wuhanដែលមកដល់អាកាសយានដ្ឋាន ៣ កន្លែងរបស់ខ្លួននៅក្នុងទីក្រុង San Francisco ទីក្រុង Los Angeles និងទីក្រុង New York។ អាកាសយានដ្ឋាននៅប្រទេសជប៉ុន ថៃ កូរ៉េខាងត្បូង និងសិង្ហបុរី ឥណ្ឌូនេស៊ី ក៏ចាប់ផ្ដើមពិនិត្យសីតុណ្ហភាពក្នុងខ្លួនអ្នកដំណើរឆ្លងកាត់ផងដែរ។
ទាំងមន្ត្រីសុខាភិបាលចិន និងមន្ត្រីអាមេរិកាំងមានការបារម្ភជាពិសេស ដោយសារប្រជាជនចិនភាគច្រើននៃប្រជាជនសរុបទាំង ១ ពាន់ ៤រយលាននាក់ ត្រូវគេរំពឹងថានឹងធ្វើដំណើរនៅក្នុងឱកាសបុណ្យចូលឆ្នាំចិន ដែលនឹងចាប់ផ្ដើមនៅថ្ងៃទី២៥ ខែមករា ខាងមុខនេះ ទាំងនៅក្នុងប្រទេសចិន និងនៅក្រៅប្រទេស។
មេរោគរលាកសួតនេះស្ថិតនៅក្នុងប្រភេទក្រុមមេរោគតែមួយដែលបណ្ដាលឲ្យកើតជំងឺមួយចំនួនតាំងពីជំងឺផ្ដាសាយធម្មតា រហូតដល់ជំងឺផ្លូវដង្ហើមធ្ងន់ធ្ងរ។ ជំងឺ SARS ដែលបានកើតឡើងដំបូងនៅប្រទេសចិនដែរនោះ បានសម្លាប់មនុស្សជិត៨០០នាក់នៅទូទាំងពិភពលោកនៅពេលវាផ្ទុះឡើងកាលពី ១៧ ឆ្នាំមុន៕
