ប្រទេសចិនបានវាយប្រហារសហរដ្ឋអាមេរិកដោយសម្តីធ្ងន់ៗ នៅថ្ងៃសុក្រនេះ ដោយនិយាយថា រដ្ឋាភិបាលក្រុងវ៉ាស៊ីនតោនស្ថិតនៅពីក្រោយខ្នងនៃការតវ៉ាដ៏ជ្រួលច្របល់នៅទីក្រុងហុងកុង។
ការចោទប្រកាន់របស់រដ្ឋាភិបាលក្រុងប៉េកាំងនេះធ្វើឡើងមួយថ្ងៃប៉ុណ្ណោះ បន្ទាប់ពីមានសេចក្តីរាយការណ៍ថា សហរដ្ឋអាមេរិក«ខ្វល់ខ្វាយយ៉ាងខ្លាំង» ចំពោះស្ថានការណ៍ដែលកំពុងរំជើបរំជួលនៅហុងកុង។
ក្រុមអ្នកតវ៉ាដែលលម្អៀងទៅរកលទ្ធិប្រជាធិបតេយ្យបានធ្វើបាតុកម្មប្រឆាំងនឹងសេចក្តីព្រាងច្បាប់ស្តីពីបត្យាប័នអស់រយៈពេល១០សប្តាហ៍មកហើយ។ សេចក្តីព្រាងច្បាប់ស្តីពីបត្យាប័ននេះដែលនឹងអនុញ្ញាតឲ្យចាប់បញ្ជូនខ្លួនអ្នកទោសដែលគេចខ្លួនទៅប្រទេសចិនវិញ។ ការតវ៉ានេះបានពុះកញ្ជ្រោលកាន់តែខ្លាំងឡើងៗនិងបង្កឲ្យមានការចាប់ខ្លួនក្រុមអ្នកតវ៉ារាប់រយនាក់និងមានការស្លាប់មួយចំនួនផងដែរ។
លោក Wang Wentian ឯកអគ្គរដ្ឋទូតចិនប្រចាំប្រទេសកម្ពុជា សរសេរក្នុងសេចក្តីអធិប្បាយកម្រាស់បួនទំព័រលើទំព័រហ្វេសប៊ុករបស់ស្ថានទូតចិនថា សហរដ្ឋអាមេរិកបាន«ធ្វើជាខ្នងបង្អែក»ដល់ក្រុមអ្នកតវ៉ានៅហុងកុង ដែលប៉េកាំងបានហៅថា«ជាក្រុមសកម្មជនបង្កហិង្សាខុសច្បាប់»។
លោក Wang បន្តចោទប្រកាន់សហរដ្ឋអាមេរិកថា «ជាតួអង្គមិនល្អនិងកំពុងដើរតួក្នុងស្ថានភាពចលាចលទីក្រុងហុងកុង»។
ឯកអគ្គរដ្ឋទូតចិនដដែលបានភ្ជាប់សហរដ្ឋអាមេរិកទៅនឹងចលនាបដិវត្តន៍ពណ៌ដែលបានកើតឡើងនៅអឺរ៉ុបខាងកើត អាស៊ីកណ្តាល ព្រមទាំងក្នុងបណ្តាប្រទេសមួយចំនួននៅទ្វីបអាហ្វ្រិក។
អ្នកការទូតចិនរូបនេះបន្ថែមថា សហរដ្ឋអាមេរិកយកលេសស្តីពី«លទ្ធិប្រជាធិបតេយ្យនិងសេរីភាព»ធ្វើជារបាំងមុខក្នុងការ«បង្កចលាចលក្នុងកិច្ចការផ្ទៃក្នុងនិងផ្លាស់ប្តូរអំណាចនយោបាយក្នុងប្រទេសដទៃ»។
នេះគឺជាការវាយប្រហារថ្មីម្តងទៀតរបស់ប្រធានបេសកកម្មការទូតចិននៅកម្ពុជា មកលើសហរដ្ឋអាមេរិក បន្ទាប់ពីបានស្ងប់ស្ងាត់មួយរយៈ។
នៅក្នុងសេចក្តីអត្ថាធិប្បាយរបស់ខ្លួន ឯកអគ្គរដ្ឋទូចចិនលោក Wang Wentian បានលើកសរសើរ និងអរគុណប្រទេសកម្ពុជាថា គឺជា«មិត្ត»ដែលគាំទ្រជំហររបស់ប្រទេសចិនពីដើមរៀងមក។
លោក Wang ក៏បាននិយាយយោងដល់ការចុះផ្សាយកាលពីពេលថ្មីៗនេះរបស់កាសែតអាមេរិក The Wall Street Journal ទាក់ទងនឹងការណ៍ដែលថា ប្រទេសចិនចង់សាងសង់មូលដ្ឋានកងទ័ពជើងទឹកនៅកម្ពុជា និងព័ត៌មានមួយទៀតដែលអះអាងពីគម្រោងសាងសង់ព្រលានយន្តហោះយោធារបស់ចិននៅខេត្តកោះកុងរបស់កម្ពុជា។
អ្នកការទូតរូបនេះចោទបន្តថា ការផ្សព្វផ្សាយនេះគឺជាចេតនា«ប្រឌិតព័ត៌មាន»ដែលចង់«លាបពណ៌និងបំផ្លាញកិច្ចសហប្រតិបត្តិការផ្តល់ផលប្រយោជន៍ទៅវិញទៅមករវាងចិននិងកម្ពុជា»។
អ្នកស្រី Emily V Zeeberg អ្នកនាំពាក្យស្ថានទូតសហរដ្ឋអាមេរិកប្រចាំនៅកម្ពុជាមិនធ្វើសេចក្តីអត្ថាធិប្បាយលើសេចក្តីថ្លែងការណ៍របស់លោក Wang Wentian ឯកអគ្គរដ្ឋទូតចិនប្រចាំប្រទេសកម្ពុជានោះទេ។
គួរបញ្ជាក់ថា ការតវ៉ារបស់សកម្មជនលម្អៀងទៅរកប្រជាធិបតេយ្យនៅទីក្រុងហុងកុងគឺក្នុងគោលដៅទាមទារឲ្យមេដឹកនាំទីក្រុងហុងកុងគឺអ្នកស្រី Carrie Lam លុបចោលសេចក្តីស្នើច្បាប់បត្យាប័ន។
លោកឯម សុវណ្ណារ៉ា អ្នកវិភាគនយោបាយឯករាជ្យ ប្រាប់ VOA នៅថ្ងៃសុក្រនេះថា សារនយោបាយរបស់ឯកអគ្គរដ្ឋទូតចិនគឺចង់ពញ្ញាក់ស្មារតីអាមេរិកនិងអង់គ្លេសកុំឲ្យលូកដៃចូលក្នុងកិច្ចការទីក្រុងហុងកុង។
«ហុងកុងជាអតីតដែនដីអាណានិគមរបស់អង់គ្លេស ហើយអង់គ្លេសនិងសហរដ្ឋអាមេរិកតែងតែឈឺឆ្អាលពាក់ព័ន្ធនឹងសេរីភាពរបស់ពលរដ្ឋហុងកុង ហើយកិច្ចការនេះធ្វើឲ្យចិនបារម្ភ ហើយនិងចង់ពញ្ញាក់ស្មារតីបណ្តាលោកខាងលិចកុំឲ្យលូកចូលជ្រៀតជ្រែកកិច្ចការផ្ទៃក្នុង[ចិន]»។
VOA មិនទាន់អាចសុំការអធិប្បាយពីលោកផៃ ស៊ីផាន អ្នកនាំពាក្យរបស់រដ្ឋាភិបាលបានទេ ទាំងតាមទូរស័ព្ទដៃ និងបណ្តាញទំនាក់ទំនងសង្គម WhatsAPP បានទេនៅថ្ងៃនេះ៕
