ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

នាយករដ្ឋមន្ដ្រី​ចិន​វែក​ញែក​អំពី​សេដ្ឋកិច្ច​ ស្ថិរភាព​សង្គម​ នៅ​ក្នុង​សេចក្ដី​ថ្លែង​ការណ៍​ប្រចាំ​ឆ្នាំ


នាយករដ្ឋមន្ត្រី​ចិន លោក វេន ជាបាវ (Wen Jiabao) ថ្លែង​​អំពី​របាយការណ៍​រដ្ឋាភិបាល​ នៅ​ក្នុង​ពិធី​បើក​​កិច្ច​ប្រជុំ​​ប្រចាំ​ឆ្នាំ​របស់​សភា​​ប្រជាជន​ចិន​ ឯ​មហាសាល​ប្រជាជន​ក្នុង​​ទី​ក្រុង​ប៉េកាំង​កាល​ពី​ថ្ងៃ​ទី​០៥​ខែ​មិនា​ឆ្នាំ​២០១១។
នាយករដ្ឋមន្ត្រី​ចិន លោក វេន ជាបាវ (Wen Jiabao) ថ្លែង​​អំពី​របាយការណ៍​រដ្ឋាភិបាល​ នៅ​ក្នុង​ពិធី​បើក​​កិច្ច​ប្រជុំ​​ប្រចាំ​ឆ្នាំ​របស់​សភា​​ប្រជាជន​ចិន​ ឯ​មហាសាល​ប្រជាជន​ក្នុង​​ទី​ក្រុង​ប៉េកាំង​កាល​ពី​ថ្ងៃ​ទី​០៥​ខែ​មិនា​ឆ្នាំ​២០១១។

នាយក​រដ្ឋមន្ដ្រី​ចិន​លោក​ វេន​ ជាបាវ​ (Wen Jiabao)​ ថ្លែង​ថា​សេដ្ឋកិច្ច​របស់​ប្រទេស​ចិន​ស្ថិត​នៅ​លើ​មាគ៌ា​សម្រាប់​ការ​ពង្រីក​សេដ្ឋកិច្ច​៥ឆ្នាំ​ខាង​មុខ។​ លោក​ក៏​បាន​ថ្លែង​សង្កត់​មក​លើ​សេចក្ដី​ត្រូវការ​ឲ្យ​មាន​សេដ្ឋកិច្ច​ស្ទុះ​លឿន​បន្ថែម​នៅ​ក្នុង​ស្រុក​ ដែល​នឹង​បំព្រួញ​ភាព​ចន្លោះ​ធំ​ធេង​រវាង​អ្នក​មាន​និង​ អ្នកក្រ។ មេដឹកនាំ​ចិន​បាន​លាត​ត្រដាង​បង្ហាញ​ផែនការ​សេដ្ឋកិច្ច​របស់​រដ្ឋាភិបាល​ នៅ​ក្នុង​សន្ទរកថា​តាម​លំនាំ​ស្ថានភាព​សហព័ន្ធ​របស់​ស.រ.អ.​នៅ​ពេល​ថ្លែង​ក្នុង​សភា​ប្រជាមានិត​ចិន។

នៅ​ក្នុង​មហាសាល​ប្រជាជន​ដ៏​ធំ​ល្វឹងល្វើយ​ ដែល​មាន​ក្រឡុក​ក្រលៀត​ច្រើន​ស្ថិត​នៅ​ចំ​កណ្ដាល​រដ្ឋធានី​ប៉េកាំង ​នាយក​រដ្ឋមន្ដ្រី​ចិន​ លោក​ វេន​ ជា​បាវ ​បាន​ថ្លែង​សន្ទរកថា​ដ៏​ស្រគត់ស្រគំ​មួយ​ ជា​សារ​ប្រាប់​អំពី​បញ្ហា​សង្គម​និង​សេដ្ឋកិច្ច​ដែល​ប្រទេស​ជាតិ​កំពុង​ប្រឈម​មុខ។

លោក​ វិន ​ជាបាវ ​ថ្លែង​ថា​ ប្រទេស​ចិន​ស្ថិត​នៅ​លើមាគ៌ា​ប្រាំ​ឆ្នាំ​ទៀត​នៃ​ការ​លូតលាស់​សេដ្ឋកិច្ច​ដ៏​ខ្លាំងក្លា​ដែល​មាន​កម្រិតប្រមាណ​៧%។ ​តែ​លោក​ថ្លែង​ថា​ អតិផរណា​និង​អំពើ​ពុករលួយ​គំរាម​លើ​ស្ថិរភាព​សង្គម​ដែល​ត្រូវ​តែ​ទប់ស្កាត់។

អតិផរណា​បាន​ក្លាយ​ទៅ​ជា​ការ​ព្រួយ​បាម្ភ​របស់​រដ្ឋាភិបាល​ជា​យូរ​មក​ហើយ។​ ប្រជាពលរដ្ឋ​ចិន​ធម្មតា​រាប់​លាន​នាក់​ចំណាយ​ពាក់​កណ្ដាល​នៃ​ប្រាក់​ចំណូល​របស់​ខ្លួន​លើ​អាហារ​ ហើយ​តម្លៃ​របស់​វា​កាន់តែ​ឡើង​ខ្ពស់។

អាត្រា​អតិផរណា​របស់​ប្រទេស​ជាតិ​បាន​ត្រូវ​ប៉ាន់ស្មាន​ថាមាន​ប្រមាណ​ជិត៥% ហើយ​សេដ្ឋវិទូ​ខ្លះ​ និយាយ​ថា​ អត្រា​នេះ​នឹង​កើន​ជា​បន្ត​ទៀត​ ទោះ​បី​ជា​មាន​ការ​តឡើង​អត្រា​ការ​ប្រាក់​ចំនួន​៣​លើក​ក៏​ដោយ។ មេ​ដឹកនាំ​ចិន​សច្ចា​ថា​នឹង​បម្រួញ​គម្លាត​ទ្រព្យសម្បត្តិ​ រវាង​អ្នកមាន​និង​អ្នក​ក្រ​ ដើម្បី​ដោះស្រាយ​អ្វី​ដែល​គេ​ពិពណ៌នា​ថា​ជា​ ការ​អភិវឌ្ឍ​សេដ្ឋកិច្ច​មិន​ស្មើគ្នា។ ​លោក​ វេន​ ជាបាវ​ ថ្លែង​ថា​ រដ្ឋាភិបាល​របស់​លោក​នឹង​ខិតខំ​ឲ្យ​មាន​សេចក្ដី​ត្រូវការ​ក្នុង​ស្រុក​ ដោយ​តំឡើង​ការ​ជួយ​ឧបថ្ថម្ភ​ដល់​កសិករ​និង​ជន​ក្រីក្រ​នៃ​តំបន់​ទីក្រុង។

ជន​ជាតិ​ចិន​រាប់​រយ​លាន​នាក់​នៅ​ពុំ​ទាន់​បាន​ទទួល​ប្រយោជន៍​ពី​ការ​លូតលាស់​សេដ្ឋកិច្ច​ខ្លាំង។ ការ​ខកចិត្ដ​របស់​ប្រជា​ពលរដ្ឋ​បាន​ឆេះងំ​ដោយ​គេ​មើល​ឃើញ​អំពី​ភាព​មិន​ស្មើ​គ្នា​នៅ​ក្នុង​សេដ្ឋកិច្ច​ ក៏​ដូច​គ្នា​នឹង​រឿង​ពុក​រលួយ​របស់​មន្ដ្រី​ផ្លូវការ​និង​កម្មសិទ្ធិ​ដី​ធ្លី​ ព្រម​ទាំង​ភាព​កខ្វក់​បរិស្ថាន។ លោក​ វេន​ ជាបាវ​ ដោះស្រាយ​ការ​ព្រួយ​បារម្ភ​ទាំង​នោះ​ដូច​តទៅ។

លោក​ថ្លែង​ថា​ រដ្ឋាភិបាល​ត្រូវ​ធ្វើ​ឲ្យ​ប្រសើរ​ឡើង​ដល់​ជីវភាព​របស់​ពលរដ្ឋ​ដោយ​ធ្វើ​ការ​កែ​ទម្រង់​សំខាន់ៗ​ ធ្វើ​ឲ្យ​មាន​ការ​អភិវឌ្ឍ​និង​ស្ថេរភាព។​ លោក​ថ្លែង​ទៀត​ថា​ មេដឹក​នាំ​ត្រូវ​ធា​នា​ឲ្យ​ច្បាស់​ថា​ ពលរដ្ឋ​ពេញចិត្ដ​នឹង​ជីវិត​របស់​គេ ​និង​ការងារ ហើយ​សង្គម​ស្ងប់​ស្ងៀម​និង​មាន​សណ្ដាប់​ធ្នាប់ រួច​ ប្រទេស​ជាតិ​រីករាយ​នឹង​សន្ដិភាព​យូរ​អង្វែង​និង​ស្ថេរភាព។

ស្ថេរភាព​សង្គម​ធ្លាប់​ជា​ការ​ព្រួយ​បារម្ភ​របស់​រដ្ឋាភិបាល​ចំ​ពេល​ដែល​មាន​ការ​បះបោរ​ខាង​នយោបាយ​ដែល​រាល​ដាល​នៅ​ក្នុង​តំបន់​មជ្ឈឹម​បូព៌ា។ ​បណ្ដាញ​ពត៌មាន​រដ្ឋ​ចិន​ព្រមាន​កាល​ពី​ថ្ងៃ​សៅរ៍​ប្រឆាំង​នឹង​ សេចក្ដី​អំពាវនាវ​ឲ្យ​ធ្វើ​តាម​បាតុកម្ម​និយម​លទ្ធិ​ប្រជាធិបតេយ្យ​នៅ​មជ្ឈឹមបូព៌ា។

កង​កម្លាំង​សន្ដិសុខ​ចិន​បាន​ត្រូវ​ដាក់​ពង្រាយ​យ៉ាងច្រើន​នៅ​ទី​កន្លែង​សំខាន់ៗ​នៃ​ទី​ក្រុង​ធំៗ​ ដែល​ត្រូវ​កំណត់​យក​ជា​ចំណុច​ប្រមូល​ផ្ដុំ​គ្នា​ដោយ​ក្រុម​សកម្មជន​និយម​លទ្ធិ​ប្រជាធិបតេយ្យ​ ហើយ​ដែល​ក្រុម​នេះ​បាន​ចុះ​ផ្សាយ​ការ​អំពាវនាវ​នេះ​នៅ​ក្នុង​បណ្តាញ​អ៊ីនធឺណិត៕

ប្រែ​សម្រួល​ដោយ​ អ៊ូ​ ធួក

XS
SM
MD
LG