រដ្ឋមន្ត្រីការបរទេសចិនលោក Wang Yi បានធ្វើដំណើរមកដល់រដ្ឋធានីវ៉ាស៊ីនតោន សហរដ្ឋអាមេរិកនៅថ្ងៃព្រហស្បតិ៍នេះសម្រាប់ជំនួបជាមួយនឹងមន្ត្រីជាន់ខ្ពស់សហរដ្ឋអាមេរិកអំពីបញ្ហាសន្តិសុខទ្វេភាគីនិងថ្នាក់តំបន់ ស្របពេលដែលប្រទេសទាំងពីរមានបំណងរក្សាបណ្ដាញទំនាក់ទំនងឱ្យនៅបើកចំហ។
រដ្ឋមន្ត្រីការបរទេសសហរដ្ឋអាមេរិកលោក Antony Blinken នឹងទទួលស្វាគមន៍លោក Wang នៅឯក្រសួងការបរទេសសម្រាប់ការទទួលទានអាហារពេលល្ងាចបែបការងារនៅក្រោយជំនួបនៅល្ងាចថ្ងៃព្រហស្បតិ៍នេះ។
ទីប្រឹក្សាសន្តិសុខជាតិសេតវិមានលោក Jake Sullivan នឹងទទួលជួបពិភាក្សាជាមួយនឹងលោក Wang នៅអគារ Blair House នៅជិតសេតវិមាននៅថ្ងៃសុក្រស្អែក។
មន្ត្រីជាន់ខ្ពស់មកពីរដ្ឋបាលរបស់ប្រធានាធិបតីអាមេរិកលោក Joe Biden បានបង្ហើបឱ្យដឹងជាមុនអំពីបញ្ហាជាច្រើន ដែលក្នុងនោះរួមមានទាំងបញ្ហាសង្គ្រាមរបស់អ៊ីស្រាអែលជាមួយនឹងក្រុមហាម៉ាស់ (Hamas) សង្គ្រាមរបស់រុស្ស៊ីនៅអ៊ុយក្រែន វិបត្តិសារធាតុហ្វេនតានីល (fentanyl) និងហេតុការណ៍បុកនាវាកាលពីពេលថ្មីៗនេះនៅសមុទ្រចិនខាងត្បូងផងដែរ។
ស្របពេលនេះដែរ អ្នករិះគន់នៅសភាសហរដ្ឋអាមេរិកបានជំរុញប្រទេសចិនឱ្យដោះលែងពលរដ្ឋអាមេរិកាំងដែលជាប់ឃុំដោយមិនត្រឹមត្រូវ និងបានថ្កោលទោសឥរិយាបថយោធារបស់ចិននៅសមុទ្រចិនខាងត្បូង។
ប្រធានគណៈកម្មាធិការកិច្ចការបរទេសនៃរដ្ឋសភាអាមេរិកលោក Michael McCaul និងប្រធានអនុគណៈកម្មាធិការកិច្ចការតំបន់ឥណ្ឌូប៉ាស៊ីហ្វិកបានបញ្ជាក់នៅក្នុងសេចក្ដីថ្លែងការណ៍មួយថា៖ «ក្នុងអំឡុងជំនួបជាមួយនឹងលោក Wang Yi រដ្ឋបាលរបស់លោក Biden មិនត្រូវចាញ់បោកការសន្យាក្លែងក្លាយនោះទេ ប៉ុន្តែត្រូវទាមទារអ្វីដែលចិនអាចផ្ដល់ជូនបានដូចជាការដោះលែងពលរដ្ឋអាមរិកាំងដែលត្រូវបានចាប់ធ្វើជាចំណាប់ខ្មាំងនៅចិន ការបញ្ឈប់ការនាំចូលសារធាតុហ្វេនតានីល និងការបញ្ឈប់ការពង្រីកឥទ្ធិពលយោធារបស់ចិននៅក្នុងតំបន់ឥណ្ឌូប៉ាស៊ីហ្វិកជាដើម»៕
