ភ្ជាប់​ទៅ​គេហទំព័រ​ទាក់ទង

​កិច្ច​ព្រម​ព្រៀង​ពាណិជ្ជកម្ម​រវាង​ចិន​និង​​តៃវ៉ាន់​ ពង្រឹង​​ទំនាក់​​ទំនង​តែ​ការ​ខ្វែង​គំនិត​គ្នា​ផ្នែក​នយោបាយ​នៅ​តែ​មាន


លោក​ ហ៊ូ​ ជីនតាវ​ (Hu Jintao) ​ប្រធានាធិបតី​នៃ​ប្រទេស​ចិន​ បាន​កោតសរសើរ​ចំពោះកិច្ច​ព្រម​ព្រៀង​ពាណិជ្ជ​កម្ម​ថ្មី​មួយ​ ជាមួយកោះតៃវ៉ាន់​ ដោយ​ហៅ​កិច្ច​ព្រម​ព្រៀង​នេះ​ថា​ជា​ «សមិទ្ធិផល​ដ៏មាន​សារៈ​សំខាន់»​មួយ ក្នុង​ការ​ធ្វើ​ឲ្យ​ទំនាក់ទំនង​មាន​ភាព​ល្អ​ប្រសើរឡើង​វិញរវាង​គូ​ប្រជែងគ្នា ​ដ៏​យូរ​អង្វែង​នេះ។ ក៏ប៉ុន្តែ​ ខណៈ​ដែល​វិស័យ​ពាណិជ្ជ​កម្ម​រវាងភាគី​ទាំង​ពីរ​នេះ​រីក​លូត​លាស់​ ក្រុម​អ្នក​វិភាគកត់​សម្គាល់​ឃើញ​ថា​ ប្រទេស​ទាំង​ពីរនៅ​តែប្រឈមនឹង​ការខ្វែង​គំនិត​គ្នា​ផ្នែក​នយោបាយ។ ហើយ​គេ​នៅ​មិន​ទាន់​ដឹង​ច្បាស់​ទេ​ថា​ តើកិច្ច​សហប្រតិបត្តិ​ការ​សេដ្ឋកិច្ច​នឹង​អាច​ជួយរដ្ឋាភិបាលក្រុង​ប៉េកាំង​ (Peking) និង​ក្រុងតៃប៉ិ​ (Taipei)​ ឲ្យដោះ​ស្រាយការ​ខ្វែង​គំនិត​គ្នា​ផ្នែក​នយោបាយ​នេះបាន​ដែរ​ឬ​ទេនោះ​។

ក្នុង​អំឡុង​កិច្ច​ប្រជុំ​មួយ​កាល​ពី​ថ្ងៃ​ច័ន្ទ​ជា​មួយ​ប្រេសិត​នៃ​កោះតៃវ៉ាន់​ លោក​ប្រធានាធិបតី​ចិន​ ហ៊ូ ​ជីន​តាវ​ បាន​សម្តែង​នូវ​សេចក្តី​សង្ឃឹម​ថា កិច្ច​ព្រម​ព្រៀង​ពាណិជ្ជកម្ម​ ដែល​ត្រូវ​បាន​ចុះ​ហត្ថលេខាកាល​ពី​ចុង​ខែ​មុន​ នឹង​ចូល​ជា​ធរមាន​បាន​ឆាប់​បំផុត​ ​ដែល​អាចធ្វើ​ទៅ​បាន​ ដើម្បី​នាំ​យក​នូវ​អ្វី​ដែល​លោក​ហៅ​ថាជា​ «ផល​ប្រយោជន៍​យ៉ាង​ធំ​ធេង» ទៅ​ឲ្យ​ភាគី​ទាំង​ពីរ។

ទី​ភ្នាក់ងារ​ព័ត៌មាន​ស៊ីនហ៊ួរ Xinhua នៃ​ប្រទេស​ចិន ដែល​រដ្ឋកាន់​កាប់​ បាន​ដក​ស្រង់​សម្តី​លោកហ៊ូ​ ​ថា កិច្ច​ព្រមព្រៀង​ពាណិជ្ជកម្ម​នេះ បាន​បង្ហាញ​ថា គេ​អាច​មាន​លទ្ធភាព​នឹងរក​មធ្យោបាយ ដើម្បីដោះស្រាយ​បញ្ហា​បន្ដិច​ម្ដងៗ​បាន។ បញ្ហា​ទាំង​នោះ ​បាន​រារាំង​ដល់​ការ​អភិវឌ្ឍន៍​របស់​ភាគី​ទាំង​ពីរ។

លោក​ ជូ​ ស៊ូឡុង​ (Chu Shulong) ជា​អ្នក​វិទ្យាសាស្រ្ត​នយោបាយ​ នៃ​សកល​វិទ្យាល័យ​ជីងវ៉ា (Tsinghua University) នៅ​ទី​ក្រុងប៉េកាំង ។ លោក​មាន​ប្រសាសន៍​ថា​ ក្នុង​រយៈ​ពេល​យូរ ​កិច្ច​ព្រម​ព្រៀង​ក្របខ័ណ្ឌ​សហប្រតិបត្ដិការ​សេដ្ឋកិច្ច ​ឬ ​Economic Cooperation Framework Agreement ឬ​ហៅ​កាត់​ថា​ ECFA អាច​ត្រួស​ត្រាយ​ផ្លូវ​សំរាប់​ ​ធ្វើការ​ចចារគ្នាអំពី​បញ្ហារសើប​ផ្នែក​នយោបាយ​ និង​សន្តិសុខ​យោធា។ លោក​ជូ​និយាយ​ថា៖

«បើ​យើង​អាច​អនុវត្តកិច្ច​ព្រម​ព្រៀង​ ECFA​ ​បាន​ នោះ​យើង​អាច​មាន​ទំនាក់​ទំនង​សេដ្ឋកិច្ច​និង​សង្គមកិច្ច​ សំរាប់រយៈពេលយូរ និង​ប្រកប​ដោយ​ស្ថេរភាព​បាន​ ។ បន្ទាប់​មក​យើង​អាច​គិត​អំពី​ការ​ព្យាយាម​បង្កើត​ក្រប​ខ័ណ្ឌ​នយោបាយ​មួយ​ តាម​រយៈ​ការ​ចចារ​នយោបាយ»។

លោកជូ ធ្វើ​អត្ថាធិប្បាយ​នេះ​ នៅ​វេទិកា​មួយ​កាល​ពី​ពេល​ថ្មីៗ​នេះ​ នៅ​ក្នុង​ទីក្រុង​វ៉ាស៊ីនតោន ស្តី​ពីទំនាក់​ទំនង​រវាងកោះ​ តៃវ៉ាន់​ និង​ប្រទេស​ចិន​ ដែល​ឧបត្ថម្ភ​ដោយ អង្គការខាណេហ្គី​ដើម្បី​សន្តិភាព​អន្តរ​ជាតិឬ​ Carnegie Endowment for International Peace។

លោក​បន្ថែម​ទៀត​ថា​ ប្រទេស​ចិន​យល់ថា​ កិច្ចការ​នេះ​ ជា​បញ្ហា​រសើប និង​លំបាក​ យ៉ាង​ខ្លាំង​សំរាប់​កោះតៃវ៉ាន់៖

«ខ្ញុំ​គិត​ថា​ ប្រទេសចិន​ដី​គោក​ មិន​ទាន់​ដឹង​ច្បាស់​លាស់​នៅ​ឡើយទេ​ ថា​តើ ​នៅ​ពេល​ណា​ដែល​គេអាចចាប់​ផ្តើមធ្វើដំណើរ​ការនោះ​ ដើម្បី​ឲ្យ​នយោបាយ​មាន​ភាព​ប្រក្រតី​ ឬ​ក៏​ថា​ ពួក​គេ​មិន​ទាំង​ដឹង​ផង​ ថាតើ ពួក​គេអាចចាប់​ផ្តើមធ្វើ​ដំណើរ​ការនោះ​ ដើម្បី​ឲ្យ​នយោបាយ​មានភាព​ប្រក្រតី​បាន​ ឬ​មិន​បាន​»។

ប្រទេស​ចិន​ ចាត់​ទុក​កោះ​នេះ​ ថា​ជា​ផ្នែក​មួយ​នៃ​ដែនដី​របស់​ខ្លួន។ កាល​ពី​អតីតកាល ប្រទេស​នេះ ​បាន​គម្រាម​ប្រើកម្លាំង​ដើម្បី​សម្រេច​គោលបំណង​នោះ​ឲ្យ​បាន​ទទួល​ជោគ​ជ័យ​ ។ ​ប្រទេស​នេះ​ មាន​កាំជ្រួច​ផ្លោង​ចំនួនប្រមាណ ​១​ពាន់​ ៣០០ ​ដើម​ដែល​ដាក់ប្រចាំការ​នៅ​ទល់​មុខ​កោះ​នេះ​ តាម​បណ្តោយ​ឆ្នេរ​សមុទ្រភាគ​ខាង​កើត​របស់​ខ្លួន​។

ក៏​ប៉ុន្តែ​ កាល​ពី​ប៉ុន្មាន​ឆ្នាំ​ថ្មីៗ​នេះ ប្រទេស​ចិន​ បាន​ផ្តោត​ការ​យក​ចិត្ត​ទុក​ដាក់​ ទៅ​លើ​វិធានការ​ទន់ភ្លន់ជាង​មុន ដូច​ជា​ការ​ស្ថាបនា ទំនាក់​ទំនង​សេដ្ឋកិច្ច​ឲ្យ​កាន់​តែ​ជិត​ស្និទ្ធជាង​មុន​ជាដើម​។

ពាណិជ្ជកម្មទ្វេភាគី​ រវាង​កោះ​តៃវ៉ាន់ ​និង​ប្រទេស​ចិន ​មាន​ភាព​រឹង​មាំ​រួច​ស្រេច​ទៅ​ហើយ​ ដែល​មាន​ចំនួន១១០​ពាន់លាន​ដុល្លារ​ក្នុង​មួយ​ឆ្នាំៗ ​ដោយ​មាន​ទំនិញ​មាន​តម្លៃ​ប្រមាណ​៨០​ពាន់​លាន​ដុល្លារ​ ហូរចូល​ទៅ​ក្នុង​ប្រទេស​ចិន​ ហើយ​នឹង​ប្រមាណ​៣០​ពាន់​លាន​ដុល្លារ​ ទៅ​ក្នុង​កោះ​តៃវ៉ាន់។

បន្ទាប់​ពី​លោក​ប្រធានាធិបតី​ ម៉ា យ៉ីងជូ (Ma Ying-jeou) នៃ​កោះ​តៃវ៉ាន់​ បាន​ឡើង​កាន់​តំណែង​នៅ​ក្នុង​ឆ្នាំ​២០០៨​ កោះ​នេះ ​បាន​ចាប់​ផ្តើម​ជើង​ហោះ​ហើរ​តាម​ផ្លូវ​អាកាស​ដោយ​ផ្ទាល់ ព្រម​ទាំង​ទំនាក់​ទំនង​ខាង​ការ​ដឹក​ទំនិញ​ទៅ​កាន់ប្រទេស​ចិនជា​លើក​ដំបូង​តាំង​ពីពេល​ជាង​៦​ទសវត្សរ៍​កន្លង​មក​នេះ។

ក្រុម​អ្នក​វិភាគនិយាយ​ថា​ កិច្ច​ព្រម​ព្រៀង​ពាណិជ្ជ​កម្ម​កាល​ពី​ខែ​មុន​ ជា​កិច្ច​ព្រម​ព្រៀង​សេដ្ឋកិច្ច​ដ៏​មានសារៈ​សំខាន់​បំផុត​ ចាប់​តាំង​ពី​កោះ ​តៃវ៉ាន់ និង​ប្រទេស​ចិនបែង​ចែក​គ្នា​ ។ ​នៅ​ពេល​នោះពួកកុម្មុយ​នីស្ត​ បាន​ឡើង​កាន់​អំណាច​នៅ​ក្នុង​ទី​ក្រុង​ប៉េកាំង​ ក្នុងឆ្នាំ​១៩៤៩។

កិច្ច​ព្រម​ព្រៀង​ ECFA នឹង​បញ្ចប់​ការ​យក​ពន្ធ​លើ​ផលិត​ផល​រាប់​រយ​ប្រភេទ​ ដែល​ជា​ពាណិជ្ជកម្ម​ឆ្លង​កាត់​ច្រកសមុទ្រ​តៃវ៉ាន់​(Taiwan Strait)។ កិច្ច​ព្រម​ព្រៀង​នេះក៏​នឹង​អនុញ្ញាត​ផង​ដែរឲ្យ​ក្រុម​ហ៊ុន​តៃវ៉ាន់​ ធ្វើ​វិនិយោគ​នៅ​ក្នុង​វិស័យ​សេវាកម្ម​របស់​ប្រទេស​ចិន ដោយរាប់​បញ្ចូល​ទាំង​កិច្ច​ការធនាគារ​ គណនេយ្យ​ ការ​ធានា​រ៉ាប់រ៉ង​ និង​មន្ទីរ​ពេទ្យ ៕

ប្រែសម្រួលដោយលីសុខឃាង

XS
SM
MD
LG