ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ចិន​ថា ការណ៍​ដែល​អង្គការ​អូតង់​ថា​ខ្លួន​គំរាមកំហែង​ដល់​សន្តិសុខ​សាកលលោក គឺជា​ការបំផ្លើស


មេដឹកនាំ​អង្គការ​អូតង់ បាន​ចូលរួម​ក្នុង​សម័យ​ប្រជុំ​ពេញអង្គ​ក្នុង​អំឡុងពេល​ជំនួប​កំពូល​របស់​ខ្លួន នៅ​ទីស្នាក់ការ​កណ្តាល​របស់​សម្ព័ន្ធភាព​នេះ នៅ​​ទីក្រុង​ប្រ៊ុចសែល ប្រទេស​ប៊ែលហ្ស៊ិក កាលពី​ថ្ងៃទី១៤ ខែមិថុនា ឆ្នាំ២០២១។

រដ្ឋាភិបាល​ចិន​បាន​បញ្ជាក់​ថា ការ​លើកឡើង​របស់​អង្គការ​អូតង់ (NATO) ដែល​ថា ប្រទេស​ចិន​បង្ក​នូវ «បញ្ហា​ប្រឈម​នៅ​ក្នុង​ប្រព័ន្ធ» ចំពោះ​សហគមន៍​អន្តរជាតិ គឺជា​ការ​និយាយ​បំផ្លើស។

ស្ថាន​បេសកកម្ម​ចិន​ប្រចាំ​សហភាព​អឺរ៉ុប​ បាន​ចេញ​សេចក្តី​ថ្លែងការណ៍​មួយ​កាលពី​ថ្ងៃ​អង្គារ ដើម្បី​ឆ្លើយតប​ទៅនឹង​សេចក្តី​ថ្លែងការណ៍​រួម​របស់​បណ្ដា​មេដឹកនាំ​នៃ​ប្រទេស​ជា​សមាជិក​អង្គការ​អូតង់​កាលពី​ថ្ងៃ​ចន្ទ។

បណ្ដា​មេដឹកនាំ​នៃ​ប្រទេស​ជា​សមាជិក​អង្គការ​អូតង់ ​បាន​ប្ដេជ្ញា​នៅ​ក្នុង​សេចក្តី​ថ្លែងការណ៍​រួម​នោះ​ថា​ នឹង​រួបរួម​កម្លាំង​គ្នា​ប្រឆាំង​នឹង​ឥរិយាបថ​យោធា​កាន់តែ​គឃ្លើន​របស់​ចិន​ដែល​បាន​គំរាម​កំហែង​ដល់ «ប្រព័ន្ធ​រៀបរយ​អន្តរជាតិ​ដែល​ផ្អែក​លើ​ច្បាប់»។

ស្ថាន​បេសកកម្ម​របស់​ប្រទេស​ចិន​នេះ​បាន​បញ្ជាក់​ថា ការ​ចោទ​ប្រកាន់​របស់​អង្គការ​អូតង់​ គឺជា«ការ​និយាយ​បង្ខូច​ដល់​ការ​រីក​ចម្រើន​ដោយ​សន្តិវិធី​របស់​ប្រទេស​ចិន ការ​វិនិច្ឆ័យ​ខុស​លើ​ស្ថានការណ៍​អន្តរជាតិ​និង​តួនាទី​របស់​ខ្លួន និង​ការ​បន្ត​នូវ​គោល​គំនិត​សង្គ្រាម​ត្រជាក់​ និង​ចិត្តសាស្ត្រ​នយោបាយ​ដែល​មាន​ការ​រៀបចំ​ទុក»។

សេចក្តី​ថ្លែងការណ៍​របស់​ស្ថាន​បេសកកម្ម​ចិន​នេះ​ គឺ​ជា​សេចក្ដី​ថ្លែងការណ៍​លើក​ទី​ពីរ​នៅ​ក្នុង​រយៈពេល​ប៉ុន្មាន​ថ្ងៃ​កន្លង​មក​នេះ​ ដែល​រដ្ឋាភិបាល​ចិន​បាន​តបត​ចំពោះ​ការ​រិះគន់​របស់​សម្ព័ន្ធភាព​អន្តរជាតិ​នៅ​បស្ចិម​ប្រទេស។

ស្ថានទូត​ចិន​នៅ​ក្នុង​ទីក្រុង​ឡុងដ៍ ចក្រភព​អង់គ្លេស បាន​ចេញ​សេចក្តី​ថ្លែងការណ៍​មួយ​កាលពី​ថ្ងៃ​ចន្ទ ដោយ​ចោទ​ប្រកាន់​បណ្ដា​មេដឹកនាំ​នៃ​ក្រុម​ប្រទេស G-7 ថា​ បាន​ជ្រៀតជ្រែក​ចូល​ក្នុង​កិច្ចការ​ផ្ទៃក្នុង​របស់​ខ្លួន បន្ទាប់ពី​ក្រុម​ប្រទេស G-7 បាន​ចេញ​សេចក្តី​ថ្លែងការណ៍​រួម​រិះគន់​ថា ​ចិន​បាន​រំលោភ​បំពាន​សិទ្ធិ​មនុស្ស​លើ​ជាតិសាសន៍​ភាគតិច​អ៊ុយហ្គ័រ (Uyghur) កាន់​សាសនា​ឥស្លាម នៅ​ក្នុង​តំបន់ Xinjiang៕

XS
SM
MD
LG