ផ្ទាំងប៉ាណូ បដា អ្នកគំាទ្រនិងទង់ជាតិ ទាំងនេះគឺជាអ្វីដែលរដ្ឋាភិបាលនៃប្រទេសមីយ៉ាន់ម៉ារៀបចំទទួលស្វាគមន៍ដំណើរទស្សនកិច្ចផ្លូវរដ្ឋរបស់លោក Xi Jinping ប្រធានាធិបតីនៃសាធារណរដ្ឋប្រជាជនចិនចំនួនពីរថ្ងៃ ដោយចាប់ផ្តើមពីថ្ងៃសុក្រនេះទៅ។
ទស្សនកិច្ចនេះត្រូវគេរំពឹងថា គឺជាការបា្ររព្ធខួបទី៧០នៃទំនាក់ទំនងរវាងចិននិងមីយ៉ាន់ម៉ាជាមួយនឹងកិច្ចព្រមព្រៀងនានាសម្រាប់គម្រោងហេដ្ឋារចនាសម្ព័ន្ធសំខាន់ៗ នៃគម្រោងផ្តួចផ្តើមផ្លូវក្រវ៉ាត់ពាណិជ្ជកម្មរបស់រដ្ឋាភិបាលក្រុងប៉េកាំង។
លោក Murray Hiebert អ្នកសា្រវជ្រាវជាន់ខ្ពស់នៃកម្មវិធីតំបន់អាស៊ីខាងត្បូងនៅឯមជ្ឈមណ្ឌលយុទ្ធសាស្ត្រនិងការសិក្សាអន្តរជាតិហៅកាត់ថា CSIS ដែលមានមូលដ្ឋាននៅក្នុងរដ្ឋធានីវ៉ាស៊ីនតោនបានប្រាប់ VOA ថា៖ «នេះគឺជាទស្សនកិច្ចលើកទីមួយរបស់លោក Xi ទៅកាន់ប្រទេសមីយ៉ាន់ម៉ា ចាប់តាំងពីឆ្នាំ២០០៩មក មុននឹងលោក Xi ក្លាយជាប្រធានាធិបតីនិងជាប្រធានបក្ស»។
លោក Murray បានថ្លែងបញ្ជាក់ទៀតថា «បន្ទាប់ពីដំណើរទស្សនកិច្ចនោះ មីយ៉ាន់ម៉ាបានចាប់ផ្តើមធ្វើកំណែទម្រង់ ដោយរួមទាំងដោះលែងអ្នកទោសនយោបាយ បង្កើនឯករាជ្យបន្ថែមទៀតដល់ប្រព័ន្ធផ្សព្វផ្សាយ បើកចំហសេដ្ឋកិច្ច បង្កើតទំនាក់ទំនងកាន់តែស៊ីជម្រៅជាមួយនឹងសហរដ្ឋអាមេរិក និងលុបចោលគម្រោងទំនប់វារីអគ្គិសនី Myitsone ដែលជាគម្រោងធំបំផុតមួយសម្រាប់ចិន។ ចាប់តាំងពីឆ្នាំ២០១៧ មកទំនាក់ទំនងរវាងមីយ៉ាន់ម៉ានិងសហរដ្ឋអាមេរិកបានធ្លាក់ចុះជាថ្មីម្តងទៀត ដោយសារតែមានការផ្ទុះឡើងនៃវិបត្តិជនភៀសខ្លួនរ៉ូហ៊ីងយ៉ាកាន់សាសនាឥស្លាមជិតមួយលាននាក់។ ដំណើរទស្សនកិច្ចលើកនេះនឹងបើកទ្វារឲ្យចិនបង្កើតចំណងទាក់ទងកាន់តែស៊ីជម្រៅជាមួយនឹងមីយ៉ាន់ម៉ា»។
អ្នកស្រី Yun Sun សហនាយកនៃកម្មវិធីតំបន់អាស៊ីខាងកើតនិងជានាយកនៃកម្មវិធីចិន នៅឯមជ្ឈមណ្ឌល Stimson បានប្រាប់ VOA ថា ទស្សនកិច្ចរបស់លោក Xi គឺជា ទស្សនកិច្ចថ្នាក់កំពូលតែមួយគត់ ដោយលោកបានចង្អុលបង្ហាញអំពីសន្និសីទព័ត៌មានផ្លូវការដែលត្រូវបានធ្វើឡើងដោយអនុរដ្ឋមន្ត្រីការបរទេសចិនលោក Luo Zhaohui កាលពីសប្តាហ៍មុន៕
