អនុរដ្ឋមន្ត្រីក្រសួងហរិញ្ញវត្ថុសហរដ្ឋអាមេរិក លោក Wally Adeyemo បានថ្លែងកាលពីថ្ងៃសុក្រថា ប្រទេសចិនប្រឈមនឹងបញ្ហាសេដ្ឋកិច្ចមួយចំនួន ដែលមានរួមវិស័យអចលនទ្រព្យ និងការកើនឡើងនៃចំនួនមនុស្សចាស់។ ប៉ុន្តែលោកមិនគិតថា វានឹងប៉ះពាល់ខ្លាំងដល់សេដ្ឋកិច្ចសហរដ្ឋអាមេរិកទេ ក្រៅតែពីការផលិតទំនិញច្រើនលើសសេចក្តីត្រូវការរបស់ចិន។ នេះបើតាមសេចក្តីរាយការណ៍របស់ទីភ្នាក់ងារសារព័ត៌មាន Reuters។
លោក Adeyemo បានថ្លែងនៅក្នុងកម្មវិធីមួយរបស់ក្រុមប្រឹក្សាទំនាក់ទំនងការបរទេសនៅក្នុងទីក្រុងញូវយ៉ក កាលពីថ្ងៃសុក្រសប្តាហ៍មុនថា៖ «ខ្ញុំមិនបារម្ភថា បញ្ហាទាំងឡាយរបស់ចិននឹងមានផលប៉ះពាល់ធំដំលើសេដ្ឋកិច្ចសហរដ្ឋអាមេរិកទេ»។
លោកបន្តថា៖ «រឿងមួយដែលខ្ញុំបារម្ភថានឹងមានមកពីប្រទេសចិននោះ គឺការផលិតទំនិញច្រើនហួសសេចក្តីត្រូវការនៅក្នុងប្រទេសចិន ដែលនឹងធ្វើឱ្យប៉ះពាល់ដល់សេដ្ឋកិច្ចពិភពលោក»។
លោក Adeyemo បានថ្លែងថា សមត្ថភាពផលិតរថយន្តប្រើអគ្គិសនីរបស់ចិន ដែលមានការឧបតម្ថថវិកាយ៉ាងច្រើនពីរដ្ឋាភិបាលចិន ការផលិតបន្ទះស្រូបថាមពលព្រះអាទិត្យ ហើយនឹងទំនិញផ្សេងទៀត បាននាំឱ្យឧស្សាហកម្មផ្សេងទៀត ដូចជាដែកថែប និងអាលុយមីញូម ផលិតច្រើនលើសសេចក្តីត្រូវការក្នុងស្រុក។
លោកថ្លែងថា៖ «ដូច្នេះការផលិតច្រើនលើសសេចក្តីត្រូវការហ្នឹង នឹងត្រូវទៅកន្លែងណាមួយហើយ»។
លោកបន្ថែមថា ការយកពន្ធរបស់សហរដ្ឋអាមេរិកលើទំនិញនាំចូល ហើយនឹងការអនុគ្រោះពន្ធសម្រាប់រថយន្តប្រើថាមពលអគ្គិសនី និងអាគុយរថយន្តអគ្គិសនី នឹងជួយធ្វើឱ្យរថយន្តប្រើថាមពលអគ្គិសនីរបស់ចិន ស្ថិតនៅក្រៅទីផ្សារសហរដ្ឋអាមេរិក ហើយអនុញ្ញាតឱ្យក្រុមហ៊ុនផលិតរថយន្តអាមេរិក ប្រកួតប្រជែងដោយមានភាពយុត្តិធម៌ជាង។
លោក Adeyemo ថ្លែងថា៖ «រឿងនេះនឹងក្លាយជាការប្រឈមមុខមួយសម្រាប់សេដ្ឋកិច្ចពិភពលោក ហើយជារឿងដែលយើងកំពុងតែនិយាយជាមួយប្រទេសចិនផ្ទាល់។ ពួកគេត្រូវតែប្រកួតប្រជែងស្មើគ្នា មិនមែនត្រឹមតែជាមួយសហរដ្ឋអាមេរិកទេ ប៉ុន្តែជាមួយប្រទេសទាំងឡាយនៅជុំវិញពិភពលោកផងដែរ»។
លោក Adeyemo បានថ្លែងថា សហរដ្ឋអាមេរិក ក៏កំពុងតែព្យាយាមធ្វើការជាមួយសម្ព័ន្ធមិត្តរបស់ខ្លួនផងដែរដើម្បីកាត់បន្ថយការផលិតទំនិញលើសសេចក្តីត្រូវការរបស់ចិន។ សហភាពអឺរ៉ុបបានចាប់ផ្តើមការស៊ើបអង្កេតអំពីការជួយឧបត្ថម្ភធនមួយ ដែលអាចនាំឱ្យមានការយកពន្ធជាលក្ខណៈដាក់ទណ្ឌកម្មលើការនាំចូលលើរថយន្តប្រើថាមពលអគ្គិសនីរបស់ចិន៕
ប្រែសម្រួលដោយលោក ប៉ូច រាសី
វេទិកាបញ្ចេញមតិ