អាជ្ញាធរចិននឹងកំណត់ឲ្យមេធាវីការពារសិទ្ធិមនុស្សដ៏សំខាន់ម្នាក់ លោក Pu Zhiqiang ឡើងសវនាការនៅថ្ងៃច័ន្ទនេះ។ លោក Pu ដែលត្រូវបានគេឃុំឃាំងអស់រយៈពេលជាង១ឆ្នាំកន្លះមកហើយនោះ ប្រឈមនឹងការជាប់ពន្ធនាគាររហូតដល់៨ឆ្នាំ ពីបទចោទលើការបង្ហោះសារលើបណ្តាញសង្គម ដើម្បីញុះញង់ឲ្យមានការស្អប់ខ្ពើមក្រុមជនជាតិដើមភាគតិច និងបង្កភាពចលាចល។
រដ្ឋាភិបាលនានានៃបណ្តាប្រទេសលោកខាងលិច ដោយរួមមានទាំងសហរដ្ឋអាមេរិកផងដែរនោះបានយកចិត្តទុកដាក់ចំពោះករណីនេះ ហើយបានស្នើឲ្យមានការដោះលែងមេធាវីរូបនេះ។ អង្គការសិទ្ធិមនុស្សនានាបានឲ្យដឹងថា សវនាការរបស់លោក Pu គឺជាសវនាការដែលមានលក្ខណៈនយោបាយ ដែលចោទជាសំណួរទៅលើការប្តេជ្ញារបស់ចិនចំពោះនីតិរដ្ឋ។ តាមពិតទៅ រដ្ឋធម្មនុញ្ញរបស់ប្រទេសចិនការពារសេរីភាពក្នុងការបញ្ចេញមតិ ថ្វីត្បិតតែជាធម្មតា អាជ្ញាធរតែងតែរឹតត្បិតប្រព័ន្ធផ្សព្វផ្សាយ និងគ្រប់គ្រងបណ្តាញអ៊ីនធឺណិតក៏ដោយ។
មេធាវីម្នាក់របស់លោក Pu គឺលោក Shang Baojun មានប្រសាសន៍ថា ពួកគេមានសុទិដ្ឋិនិយមដោយប្រុងប្រយ័ត្ន និងបញ្ចេញសេចក្ដីសង្ឃឹមថា តុលាការអាចក្រោកឈរឡើងដើម្បីដាក់សម្ពាធ និងធ្វើការកាត់ក្តីដោយយោងទៅតាមច្បាប់៕
